Read Eastern Krahn Matio' 27 Bible Online

Matio' 27 - Eastern Krahn bible

Matio' 27

¹Zorn bo-mlai', :yee' Nyorsoa-a' 'slaa: :za-nyor:⧾ :klaba'⧾-: 'dekorn: :Jueh'-nyor⧾-a' 'bluhba: :korn-nyor⧾-: an-a' klehkpeh, on polo-eh', 'de on 'worn-dih-eh ken dih, on 'ye :Yusu' 'dba.

²'De on san-or, on kpa-or 'o Pale' :or no-a 'gomla-nyor⧾-a' nyor :klaba' ybei', 'de on za-or 'kwla.

³:Yee' :yeh :Juda', :or :plo-dih:-a :Yusu' nyor⧾ bo, :yeh or 'worn-ih'-a :ka on no-a :Yusu' :korn or 'ye 'meh, :yee' or-a' :porluh-a 'chlehn-', 'do deh or no-a bo, 'de or kpa 'sebla-wlii-a' :kwlaa taan :dao' deka, 'de Nyorsoa-a' 'slaa: :za-nyor:⧾ :klaba'⧾-: 'dekorn: 'bluhba: :korn-nyor⧾-: bo.

⁴'De or :wlu 'de on bo, or 'dae:, 'On no deh-zon:. Deh no-eh, 'on plo 'yu :or se-a deh⧾-zon⧾-a' deh 'i yubo:, on 'ye-or' 'dba. Jorwor: on :wlu-' 'de or bo, on 'dae:, Deh :a 'ble, :a 'ye 'o :no-dih: :eh? Eh :sie: 'de :on :due' bo.

⁵:Yee' :Juda' 'vile: 'wlii: :dao' 'weh, 'de Nyorsoa-a' 'sla 'zorn, 'de or mu, or bhele: or-a' 'jeh ya, 'de or 'meh.

⁶:Yee' Nyorsoa-a' 'slaa: :za-nyor:⧾ :klaba'⧾, on 'duo: 'wlii: :dao'-' 'weh, on 'dae:, 'Wlii: :daa, nyor-a' :febeh'-wlii: 'o. :Mor en :po-eh 'de :a-a'a: Nyorsoa-a' 'sla-a' 'wlii 'klu-', :yee' eh mu :a-a'a: 'tele' 'kor-dih:.

⁷'De on polo-eh, on 'worn-dih-eh ken dih, on 'ye 'wlii: :dao' no, on 'ye 'bluhba-a' 'kplo dhen, 'de deh⧾ :ma-nyor 'kwa, 'de on 'ye 'o 'duhba⧾ dih nma-dih:.

⁸Eh-: :korn dhih :oo', 'de 'bluhba-a' 'kplo :dao', an 'da-dih-or Nyomor-bluhba, :eh :yeh-dih:-a 'zean'-we-eh :daa ken.

⁹:Yee' Nyorsoa-a' wlu 'kpa-' dhih 'jeh, :ka or-a' wele-eh: :po-nyor: :Jehlimaya' no-a eh-a' :za-a' see, or no-a, :Yee' on 'duo: 'sebla-wlii-a' :kwlaa taan-', :en no-a 'wlii 'Ezlea-nyor⧾ 'worn-dih-a ken dih, on 'ye-or' :plo-dih:.

¹⁰'De 'wlii-a' 'jeh :dao', me-: on no, on dhen 'bluhba-a' 'kplo, 'de deh⧾ :ma-nyor 'kwa, :ka :Gwlor :baa' no-a an wlu 'worn 'dhu-eh.

¹¹:Yee' :Yusu' :nyna dih 'do Pale' ybei', 'de Pale' dhele-or dih, or 'dae:, :Mor 'o :or 'dhu :Jueh'-nyor⧾-a' 'keen-' :e? 'De :Yusu' 'da, :Ka :on 'da-a, 'ka-: 'o eh :ne.

¹²:Yee' Nyorsoa-a' 'slaa: :za-nyor:⧾ :klaba'⧾-: 'dekorn: 'bluhba: :korn-nyor⧾-: on po-or dhih 'dlu, jorwor: or :se-' :wlu 'de on bo.

¹³'De Pale' 'da, Dhih :dhulu' on po-a 'o :on 'dlu, :an-a' 'worn-ih ke :e?

¹⁴Jorwor: or :se-' :wlu, or :se-' deh-beh-deh-beh ken dih zela:. Eh-: no-eh, 'de Pale'-a' :porluh 'ma 'gabaa.

¹⁵:Yee' :mor 'Meh-a' :bla-dih: 'dlu dih-gor-a' ti :taa 'o nyni, zon 'o zon, :yee' 'gomla-nyor⧾-a' nyor :klaba'-a za 'de :kasue 'di nyor :due', :yor :Jueh'-nyor⧾-a 'bhorn-a, :or 'ye-a' 'de 'wluh.

¹⁶'Do ti :dao' 'di, :yee' 'yu :due' an 'da-dih-a :Bala'ba, :or :gwlor-nyor:⧾ :doru' yubo:-a deh⧾-zon:⧾ :no-dhih, or-a' 'jeh :dao', or-: :ne 'de :kasue 'di.

¹⁷:Yee' :yeh :gwlor-nyor:⧾ :doru' :dao', on :gweh-dih:-a 'o, :yee' Pale' dhele-uh-: dih, or 'dae:, :Yoror a 'bhorn 'on 'ye dih 'tali: 'do a bo :eh? :Bala'ba: :e? :Ae' :Yusu' an 'da-dih-a Nyorsoa-a' 'taan'-yu ke?

¹⁸Deh :korn-a dhih or dhele-uh-a deh :daa dih, eh-: 'dhu, or yubo-eh', :ka eh 'dhu-a :gwlehehn'-', :eh no-eh, 'de on :za-a :Yusu' 'kwla 'de or bo.

¹⁹:Yee' Pale' :dhe dih 'do or-a'a: zabe: :zi :kpala' ken, 'de or-a'a: 'nynor dbo-or wlu bo, or 'dae:, :An-a' :no-dih:-' 'yu :dao', :or se-a deh-zon-a' deh 'i yubo-deh-' o. Deh no-eh, 'on :ya eh-a' ya-zon: 'gwie or-a' dhih.

²⁰Jorwor: Nyorsoa-a' 'slaa: :za-nyor:⧾ :klaba'⧾-: 'dekorn: 'bluhba: :korn-nyor⧾-: on 'dhu-dih: nyor⧾ :dao'-: worn, on 'ye :Bala'ba 'yba, 'de Pale' 'ye :Yusu' 'dba.

²¹:Yee' Pale' dhele-uh-: dih :neheh', or 'dae:, Nyor⧾ 'sororn' :daa, :yoror a 'bhorn 'on 'ye dih 'tali: 'do a bo :eh? 'De on 'dae:, :Bala'ba: 'o.

²²'De Pale' 'da, :Yee' 'yu :daa, an 'da-dih-a Nyorsoa-a' 'taan'-yu, :kaa 'on 'ye or-a' dhih no :eh? :Yee' an-a' klehkpeh 'dae:, :Kor-dih-or 'o tu 'i o.

²³'De or 'da, :Eh :korn dhih :eh? :A 'ye deh-zon: or no-a 'dee. :Yeh or 'da :ao', :yee' an-a' 'geh⧾ :po-eh 'kpa 'de de dih, an no, :Kor-dih-or 'o tu 'i o.

²⁴:Yee' :yeh Pale' pobo-a 'de eh 'di, 'de :ka or 'ye-a' no, 'de 'ka se-a :ne, 'de jorwor: :zaa'-a 'bhorn-a yaa'e dih 'wluh-eh, :yee' or 'duo: 'ni-', 'de or :dle kwa, 'do :gwlor-nyor:⧾ :doru' :dao' ybei', or 'da, 'Yu :daa, 'an son se 'de or-a' 'meheh'-deh 'di :ne. A-a' dhih :oo'.

²⁵'De an-a' klehkpeh 'da, 'Nyi or-a' 'meheh'-gbeh :ne 'o :a 'dlu, 'dekorn: 'o :a-a'a: 'nynuu-a' 'jeh 'dlu-:.

²⁶:Yee' or :za 'de :Bala'ba 'de :kasue 'di 'weh, 'do on bo, 'De or no-eh, or-a'a: sorye' bla :Yusu', 'de or za-or 'kwla, on 'ye-or' 'o tu 'i :kor-dih:.

²⁷:Yeh Pale' :za-a :Yusu' 'kwla, :yee' or-a'a: sorye' kpa-or 'de Pale' 'bli 'sla ya, 'de on gweh on 'bei' sorye'-a' klehkpeh de, 'de on 'gbo-dih: :Yusu' 'dlu dih.

²⁸:Yee' on chehn-or wluh⧾ dih, 'de on :pa-dih-or :gba 'vuu: :on :ne-a 'zoo.

²⁹On gle 'wu⧾-a' 'gbeheh:, :ka 'keen :gblaa' :ne-a, eh-: on 'dhu 'o or 'dlu. 'De on 'dhu-or sene'eh 'kwa, 'de or-a' :dila-son-', 'de an bla 'koor-dlu⧾ 'yi glu, 'do or 'zorn, on 'da an 'ye-or' deh, 'de an 'wluh-dih-or :goba'-dhih ken dih, an no, :Gwle 'kmo o, :Jueh'-nyor⧾-a' 'keen.

³⁰:Yee' an gba-or :dhehmeh ya, on 'duo: sene'eh: :dao'-', 'de on :bla-dih-eh 'o or 'dlu.

³¹:Yeh on gweh-a or-a' :goba'-dhih ken dih 'wluh-dih-eh 'i, :yee' on za-or :gba 'vuu: :dao'-: dih, 'de on :pa-dih-or or-a' 'jeh-a'a: 'tiei-', on kpa-or, on 'ye-or' 'o tu 'i :kor-dih:.

³²:Yeh an mu-a, :yee' on :yeh-dih: 'yu :due' ken, an 'da-dih-a Samor' :or 'ti-a :Sali'na-gwlor 'di :dee', or-: on :kpa-dih: 'kpih, or 'ye :Yusu'-a'a: 'klorse tu 'ble 'do or bo.

³³:Yee' on nyni 'o :dha an 'da-dih-a :Gorgor'ta, :eh :bleh-dih:-a 'i, Nyor-dlu-kpaa'-tluh:.

³⁴'Do :wor on 'nyi-dih-or nomor on po-a kwein bo, :en pa-dih-a nyor⧾-a' ku 'dli-', or 'ye 'na, or :ne-' or-a' ku worn yubo:. Jorwor: :yeh or 'dhen-or worn, :yee' or :se-or' 'na.

³⁵:Yee' on :kor-dih-or 'o tu 'i, 'de on vorn :nobo, on gble or-a'a: paa-tiei-', 'de on 'klu-'.

³⁶:Yeh on no :ao', :yee' on :dhe dih, 'de an 'dhu-or 'yli-eh bo.

³⁷'Do or 'dlu bo, 'do :wor on 'chle deh :korn-a dhih on 'dba-or, on 'da, :Yusu' :or no-a :Jueh'-nyor⧾-a' 'keen, or-: :dhe dih.

³⁸:Yee' 'ylii'-nyor⧾ 'sororn', mo-: :ne or :kor-dih-eh: 'o tu 'i, :dha :due'. :Due' :ne 'de or-a' :dila bo, 'de :due' :ne 'de or-a' kona bo.

³⁹:Yeh nyor⧾ :an zi-a, on 'ye-or, :yee' an du 'dlu⧾ 'i, an wla-dih-or',

⁴⁰an no, :Mor, :or no-a :or mu-a Nyorsoa-a' 'sla ya :gba, 'de :or 'ye-or po :neheh', 'do 'we taan 'di, :za-dih: :an-a' 'jeh-'. :Mor :on 'dhu Nyorsoa-a' 'Yu-' 'jeh ka, :yee' 'dhle, :on 'ye 'o tu 'i 'wluh.

⁴¹'Ka-: Nyorsoa-a' 'slaa: :za-nyor:⧾ :klaba'⧾-: nyor⧾ 'tele' :torne-nyor⧾-: 'dekorn: 'bluhba: :korn-nyor⧾-: an no, an wla-dih-or :ke, an no,

⁴²Or 'puh-dih: nyor⧾, jorwor: or se or-a' 'jeh-a' 'puh-dih-eh 'beh-dih:. :Mor or 'dhu 'Ezlea-nyor⧾-a' 'keen-' 'jeh ka, :yee' 'nyi or 'dhle, or 'wluh 'o tu 'i :naa, :yee' :a mu-or dhih 'jeh-' :po.

⁴³:Ka or dhe-a Nyorsoa :gwlii', :yee' 'nyi Nyorsoa 'puh-dih-or :naa, :mor Nyorsoa :taa-or 'bhorn. Deh no-eh, or 'da, or-: Nyorsoa-a' 'Yu :oo'.

⁴⁴:Yee' 'ylii'-nyor:⧾ :dao', :on :ne :Yusu' :kor-dih-eh: 'o tu 'i, :dha :due', mo-: :an po-or wlu⧾ 'bhun dih deh :dao' :ke.

⁴⁵:Yee' :yeh eh no-a 'yluh-gbao', :yee' glu-tile gor-' 'do 'bluhba-dlu: :dao', an-a' klehkpeh ken, 'de eh :yeh-dih: 'gwie-yluh bo ken.

⁴⁶:Yeh eh yi-a 'gwie-yluh bo :no 'da, :yee' :Yusu' po 'geh, or 'dae:, 'Iloi:, 'Iloi:, 'dama: :sabata'ni:, :eh :bleh-dih:-a 'i, 'An Nyorsoa, 'an Nyorsoa, :eh :korn dhih 'de :an za 'on 'yli-eh dih :eh?

⁴⁷:Yee' nyor⧾ :on :nyna-a 'o dih, an-a' :noo', :on 'worn-ih'-a, on 'da, Or wele :Ila'yor:.

⁴⁸:Yee' 'do :dha :due' :dao', an-a' nyor :due' kpa ple-a', or mu 'o :fuu'u:. 'De or po :fuu'u: :dao' 'de 'dli-' :pa-nomor bo, 'de or 'dhu-uh 'o tu 'i, or 'tuh-uh 'o :Yusu' worn 'i, or 'ye-or' 'na.

⁴⁹:Yee' nyor⧾ :noo' 'da, A 'bor, a 'nyi, :a pobo: 'o, :eh beh :Ila'yor-a mu 'de :yi, or 'ye-or' 'puh-dih: :eh?

⁵⁰:Yee' :Yusu' po 'geh :neheh', 'de or chehn :febeh' 'i.

⁵¹:Yeh or 'meh-a, :yee' 'do :dha :due' :dao', 'yli-eh: on po-a yai' 'de Nyorsoa-a' 'sla 'zorn, eh 'klae: dih, eh 'wluh 'for⧾ 'sororn'. Eh :za 'de dih 'klae-eh 'dlu bo, 'de eh nyni 'de eh-a' 'zorn ne. 'De 'bluhba-a tleh. :Yee' sobu'⧾ :kpuan'⧾ wa-dih-: dih 'bha 'bha.

⁵²'De nma-dih-deh⧾-a kan-dih worn :ke, 'de Nyorsoa-nyor:⧾ :dhulu', :on 'meh-a, mo-: Nyorsoa :za 'de, 'de on yi 'kmo bo de.

⁵³On 'wluh 'de nma-dih-deh⧾ 'di. :Yee' ti Nyorsoa :za-a: 'de :Yusu' 'de nma-dih-deh 'di, 'do :wor nyor⧾ :dao', on :mu-dih: :Julu'slehn: :or no-a gban 'i :ne gwlor 'di, 'de nyor⧾ :dhulu' kpa 'yli-eh, on 'ye-uh.

⁵⁴:Yee' :yeh sorye'-a' nyor :klaba'-: 'dekorn: :yuh :on :ne-a 'o or bo-: :an 'dhu-a :Yusu' 'yli-eh bo, on 'ye-a 'bluhba-a' tleh-a'-: 'dekorn: deh⧾-a' klehkpeh :en :no-eh-: :yee' :fano-a: no-uh 'gabaa, on 'da, Keen', dhih 'jeh, 'yu :daa, Nyorsoa-a' 'Yu :oo'.

⁵⁵:Yee' 'nynor⧾-kpao'⧾ :dhulu' :on :ne-a 'o :ke, 'de :an pobo-a 'de, :on zi-a 'o :Yusu' klei' :dee', :on 'wluh-a :Galali'i-bluhba ken, :on 'ye-or' :za-dih:,

⁵⁶'de on 'klu-', 'do :wor :Mehle' :or 'wluh-a :gwlor an 'da-dih-a :Magala'-: :Zehbehli'-a'a: nyor⧾-kpalu⧾-nynuu 'de-: 'dekorn: :Mehle' :or 'wluh-a 'Jeen-: :korn :Jose'-: on :ne.

⁵⁷:Yee' :yeh eh no-a 'gwie-yluh bo, :yee' bhaan-yu :due', an 'da-dih-a 'Joseh, :or 'wluh-a :gwlor an 'da-dih-a Amati'a 'di, 'de :or no-a :Yusu'-a'a: bo :na-nyor :ke,

⁵⁸or-: mu 'de Pale' bo, or-: dhele-or dih, or 'ye-or' :Yusu'-a' 'ku 'nyi. 'De Pale' 'nyi nyor⧾ 'tele', on 'ye-uh' or 'nyi.

⁵⁹'De or 'duo: :Yusu'-a' 'ku-', or bhian-dih-uh 'nena-yli-eh: :dele' kle-' dih,

⁶⁰or po-uh 'de nma-dih-deh: :dele', :eh no-a 'soba 'di, or chehn-a 'do or-a' 'jeh bo. :Yee' or klibo: sobu' :kolu', mo-: or no, 'de or kan 'o nma-dih-deh: :dao' worn 'i, or mu.

⁶¹:Yee' :Mehle' :or 'wluh-a :Magala'-: 'dekorn: :Mehle' :yor :dao'-: 'do :wor on :ne, on :dhe dih, an pobo 'o nma-dih-deh ken.

⁶²:Yee' :yeh Nyorsoa-a' :gwlee-we-eh-a' zorn zen-a, :yee' Nyorsoa-a' 'slaa: :za-nyor:⧾ :klaba'⧾-: 'dekorn: :Falasi'i-nyor⧾-: on mu 'de Pale' bo,

⁶³on 'dae:, Nyor :klaba', :a :po-dih: deh :gwluhuh' bo, ti nyor⧾ dih :bo-dih-nyor: :daa, or :ne-a 'kmo, or 'da :mor or 'meh, or mu-' :sorn, :mor 'we taan zi.

⁶⁴:Yee' eh-a' dhih, 'nyi nyor⧾ 'tele' on 'ye nma-dih-deh: :dao' 'yli-eh bo 'dhu deh 'jeh, 'de 'we taan 'ye zi o. :Mor :on se-eh no, :yee' or-a'a: bo :na-nyor⧾-a mu :mu, on 'ye or-a' 'ku 'yli o. :Yee' an mu :ao' 'da-: 'de nyor⧾ bo, :eh :mor or 'wluh 'de nma-dih-deh 'di 'weh. :Yee' sih :yih :daa, en mu 'o :zai' ne-' :zi o.

⁶⁵:Yeh on 'da :ao', :yee' Pale' :wlu-' 'de on bo, or 'dae:, A mu, a kpa sorye'. :Ka a 'beh-dih:-a a 'ye :ao' 'do a-a' 'yli-eh bo 'dhu-eh no, 'ka-: a 'ye no.

⁶⁶'De on mu, on po nma-dih-deh: :dao' sobu' worn 'i, on 'dhu-eh yubo: 'da, 'de on :sie: 'o sorye', on 'ye-eh' 'yli-eh bo 'dhu.