Read Eastern Krahn Matio' 28 Bible Online

Matio' 28 - Eastern Krahn bible

Matio' 28

¹:Yee' :yeh Nyorsoa-a' :gwlee-we-eh zi-a, 'de eh no-a zorn bo-mlai', 'de 'doror'-dlu-a' :zai'-we-eh: an 'da-dih-a 'Sorle 'di, :yee' :Mehle' :or 'wluh-a :Magala'-: 'dekorn: :Mehle' :yor :dao'-: an mu 'de :Yusu'-a' nma-dih-deh ken pobo: 'da.

²:Yee' 'yli :a bla-a 'i, 'bluhba-a' :tleh-a' 'kawehn: 'kpa 'o 'weh. Deh no-eh, :Gwlor :baa'-a' 'enjor :due', or-: 'wluh 'de Nyorsoa 'bli yai', or-: klibo: sobu' :dao', :or za-uh 'o, 'do nma-dih-deh worn 'i, :or :dhe 'o on ken dih.

³Or gweh dhehn-a' 'yli-' :chleh-eh:, 'de 'tiei or pa-', en :ne :bhoror:.

⁴:Yeh eh no :ao', :yee' sorye' :an 'dhu-a nma-dih-deh 'yli-eh bo, :fano-a: no-uh or-a' dhih 'gabaa. Eh-: no-eh, 'de an-a' 'tiei-a tleh, on 'ga dih, on 'pehn dih, :eh gweh-a 'meheh'-nyor⧾ 'i.

⁵:Yee' 'enjor: :dao', or :wlu-' 'de 'nynor⧾-kpao'⧾ :dao' bo, or 'dae:, A 'bor, :fano: :ple-eh. 'On yubo-eh', :Yusu' on :kor-dih:-a 'o tu 'i, or-: 'o, a 'bhorn 'kwla⧾-' dih.

⁶Or se :daa :ne. Or :sorn-' 'weh, :ka or no-a eh-a' :za-a'. A 'yle, a 'ye :dha or 'pehn-a dih :dee' 'ye.

⁷:Yee' a 'dhobo:, a mu, a 'ye or-a'a: bo :na-nyor⧾ :gwluhuh' zela:, :ka or 'wluh-a 'de nma-dih-deh 'di, 'de or mu-a on ybei' 'de :Galali'i-bluhba ken, 'do :wor an mu-or 'ye-dih:. :Yee' 'an zela a :gwluhuh' 'weh :naa.

⁸:Yeh on 'worn-ih'-a, :yee' on 'dhobo:, on 'wluh 'o nma-dih-deh bo 'weh. 'Do :fano: :ple-eh-a' :taa'-: :korn mor 'mona: :dhulu'-: 'de an kpa ple-a', an mu or-a'a: bo :na-nyor⧾ :gwluhuh' zela: 'da.

⁹:Yee' 'yli :a bla-a 'i, :yee' :Yusu'-a' 'jeh 'ya-dih-uh-: 'i, or 'dae:, 'On :yeh-dih: a 'weh o. :Yeh or 'da :ao', :yee' on yi 'o or bo, 'de on 'jli dih 'do or 'zorn, on kpon or-a' buh⧾ dih, 'de an za or-a' :weheh'.

¹⁰'De or :wlu 'de on bo, or 'dae:, A 'bor :fano: :ple-eh. A mu, a 'ye 'an-a: bo :na-nyor⧾ :gwluhuh' zela:, on 'ye 'de :Galali'i-bluhba ken mu. 'Do :wor an mu 'on 'ye-dih:.

¹¹:Yee' :yeh 'nynor⧾-kpao'⧾-a mu-a, :yee' sorye'-a' :noo' :an 'dhu-a nma-dih-deh 'yli-eh bo :dee', on mu 'o :gwlor-', on zela: Nyorsoa-a' 'slaa: :za-nyor:⧾ :klaba'⧾ deh⧾-a' klehkpeh :en :no-eh :gwluhuh'.

¹²:Yee' Nyorsoa-a' 'slaa: :za-nyor:⧾ :klaba'⧾-: 'dekorn: 'bluhba: :korn-nyor⧾-: on 'kpa :dha :due', 'de on pa 'slan-'. :Yeh on pa-a 'slan-', :yee' on 'nyi sorye' :dao' 'wlii: :doru'.

¹³:Yee' on 'dae:, Deh a 'ye-a' :za, a 'da, or-a'a: bo :na-nyor:⧾, mo-: 'yle 'mano-', mo-: 'yli or-a' 'ku, ti :a mane:-a 'nyinor-'.

¹⁴:Yee' :mor eh 'dhu, 'gomla-nyor⧾-a' nyor :klaba' 'worn deh :daa, :yee' :a mu-eh 'kpa :po, :a 'ye a zabe ken :za.

¹⁵:Yee' sorye' :dao', on 'duo: 'wlii: :dao'-' 'weh, 'de on no deh on zela-uh-a :gwluhuh'. Eh-: no-eh, 'de :Jueh'-nyor⧾ yubo: dhih :daa 'de on 'nyne-', :eh :yeh-dih:-a 'zean' ken :sloror'.

¹⁶:Yee' :Yusu'-a'a: bo :na-nyor:⧾ :on :korn-a :bhue: 'yor-eh :ne-a :due', on mu 'de tluh ken 'de :Galali'i-bluhba ken, :dha :Yusu' zela-uh-a :gwluhuh', on 'ye-a' mu.

¹⁷:Yee' :yeh on 'ye-or, :yee' an za or-a' :weheh'. Jorwor: an-a' nyor⧾ :noo'-a' :porluh⧾-a dhobo-' :ka or 'dhu-a :Yusu'-'.

¹⁸'De :Yusu' 'koan'-dih-uh dih, or 'dae:, 'Kpih-a' klehkpeh, :en :ne-a 'de Nyorsoa 'bli yai'-: 'dekorn: 'noror yao 'zorn-: en 'nyi-eh: 'on 'weh.

¹⁹:Yee' eh-a' dhih, a mu, a 'ye-eh' no, 'de 'dawor'⧾-dlu⧾-a' klehkpeh, on 'ye 'an-a: bo :na-nyor⧾ no. A po-uh 'ni 'dlu, 'de :Baa'-: 'Yu-: 'dekorn: Gban 'i :ne :Zulu-: an-a' 'nyne 'di.

²⁰:Yee' a torne-uh deh⧾-a' klehkpeh 'on zela: a :gwluhuh', on 'ye 'o en-' 'tele' dih dhe. :Yee' a dhe-eh :gwlii', 'an mu 'o a bo :ne, 'do ti-a' klehkpeh bo, :eh :yeh-dih:-a 'bluhba-a' 'dlu-' :jla 'da ken.