Read Eastern Krahn Matio' 3 Bible Online

Matio' 3 - Eastern Krahn bible

Matio' 3

¹'Do ti-a' 'jeh :dao' 'di, :yee' 'yu :due' an 'da-dih-a nyor⧾ 'ni 'dlu :po :Jororn', or-: mu 'de :Judi'a-a' :bhehneh'-bluhba ken, 'de or po Nyorsoa-a' tubo-wlu⧾,

²or 'dae:, A 'tali: a-a' deh⧾-zon⧾ dih, 'de a 'ye 'de Nyorsoa bo 'bili:. Deh no-eh, Nyorsoa-a' nyor⧾ wlu 'ken :korn-eh 'koan'-: bo.

³:Jororn' :daa, or-: :korn dhih :oo', Nyorsoa-a' wele-eh: :po-nyor: :Azaya' :za-a-', or 'dae:, Nyor :daa, or 'wor-' 'de :bhehneh'-bluhba ken, or 'dae:, A po :Gwlor :baa'-a' :gwie 'kpa 'do or bo o. A po or-a' :gwie 'kpa, a 'ye-eh' 'i 'sleh-dih:, or 'ye-eh' bo :na.

⁴'Tiei: :Jororn' pa-', :kpuan' ken :soo'-a' 'pibi:, me-: on :no-dih-ih, 'de or bla deh-ku 'gben-'. :Yee' :kpamu'⧾-: duh-ni-: me-: no or-a'a: dii-deh⧾.

⁵'De :gwlor-nyor⧾-a mu 'de or bo, an 'wluh :Julu'slehn-: :korn :Judi'a-bluhba-a' klehkpeh ken dih-:. 'De :noo' 'wluh 'Jorle-ni worn dih.

⁶An za an-a' 'jeh-a' deh⧾-zon⧾ gbor, 'de or po-uh 'ni 'dlu 'do 'Jorle-ni worn.

⁷Jorwor: :yeh or 'ye-a :Jueh'-nyor⧾-a' kpor⧾ an 'da-dih-a :Falasi'i-: 'dekorn: :Sayusi'i-: an-a' nyor⧾ :dhulu', an yi-a 'de or bo, on 'ye-a' 'ni 'dlu :po, :yee' or :wlu-' 'de on bo, or 'dae:, A :mor sane-zon⧾-nynuu: :daa, :or 'dhu a 'slen, a 'ye ple, a 'ye Nyorsoa-a' 'chehn-yuba: :or yi-a 'de, 'zorn 'wluh-dih: :eh?

⁸A no deh⧾, nyor⧾ 'ye a 'ye, :ka a 'tali:-a a-a' deh⧾-zon⧾ dih, 'de a 'bili:-a-' dih 'de Nyorsoa bo.

⁹:Yee' a-a' :na-dih-eh:-' :gwluhuh' dih, :eh :mor a :mor 'Eble'hehn 'di-a' 'nynuu: 'o :dhih 'o, eh-: :korn dhih a mu 'puh-:. A 'nyi 'on zela: a :gwluhuh', Nyorsoa 'beh-dih: sobu'⧾ :kpuan'⧾ :daa en-' no-a' 'weh, en 'ye 'Eble'hehn 'di-a' 'nynuu-' 'dhu-eh:.

¹⁰:Dhoeh' :dhe-eh: yai' :naa, eh 'ye tu⧾ :en :se-a' 'bi 'jeh :tlo i, en-' glubuh⧾ chehn. Tu⧾-a' klehkpeh :en :se-a' 'bi 'jeh :tlo i, en mu :dba-eh:, 'de en 'ye 'de neh-' :po-eh:.

¹¹'An po a 'ni 'dlu 'weh, 'de a 'ye a-a' deh⧾-zon⧾ dih 'tali:, 'de a 'ye 'de Nyorsoa bo 'bili:. Jorwor: nyor :or mu-a 'on ken dih :yi, or-a' dhih 'beh-: 'i, or :zi 'o 'on-'. 'On se deh-' 'dhu-eh: 'on 'ye or-a'a: :buhbuh:⧾ :sloror' kwa 'gba 'do or bo. Jorwor: Gban 'i :ne :Zulu-: 'dekorn: neh-: me-: or mu 'o a 'dlu :po.

¹²Or 'ble or-a'a: 'daba: 'de or 'kwa, or 'ye deh⧾-yor: or sonor:-a, or-a' klehkpeh-' vun. :Yee' :yor or vun-a-', or mu-or :dha :due' :po, 'de or 'bli 'gbu-a' yai'. Jorwor: or-a' fluh⧾, me-: or mu 'yli :po, 'de neh-a' :yeh se-a 'mo-a' :korn.

¹³:Yee' :Yusu' 'wluh 'de :Galali'i-bluhba ken, 'de or mu 'de :Jororn' bo 'Jorle-ni worn 'i, :Jororn' 'ye-or' 'ni 'dlu :po.

¹⁴Jorwor: :Jororn' 'bhorn or 'ye-or' 'borboa' 'i po, or 'dae:, :Mor :korn :or 'ye 'on 'ni 'dlu :po, :yee' :an yi 'noror 'on bo, 'on 'ye :on 'ni 'dlu :po :e?

¹⁵:Yeh or 'da :ao', :yee' :Yusu' 'dae:, 'Ka-: eh :korn eh 'ye :ne :naa. Deh no-eh, :a :korn :a 'ye deh⧾-a' klehkpeh Nyorsoa 'bhorn-a no. 'De or 'worn-dih-eh ken dih, or :po :Yusu' 'ni 'dlu.

¹⁶:Yee' 'do :dha :due' 'jeh :dao', :yeh :Jororn' po-a :Yusu' 'ni 'dlu, 'de :Yusu' 'wluh-a 'o 'nior, 'do :wor 'o yao kan-dih: worn, 'de or 'ye Nyorsoa-a' :Zulu:, :on gweh-a pabu', mo-: 'wluh 'de yai', mo-: :dhe 'o or 'dlu dih.

¹⁷'De wlu 'wluh 'de Nyorsoa 'bli yai', on 'dae:, 'An-a: :dhih :kma-yu: 'o, or-: :dhe dih. 'An :porluh 'pehn-: dih 'do or bo.