Read Eastern Krahn Matio' 6 Bible Online

Matio' 6 - Eastern Krahn bible

Matio' 6

¹:Yee' :Yusu'-a kpa or-a' wlu 'dlu bo, or 'dae:, A 'wla :gwluhuh' dih, 'de a :ne-' a-a'a: 'yi 'sleh-kplen no, 'do :gwlor-nyor⧾ ybei', 'de on :ne-ih' 'ye. :Mor a no-eh, :yee' a :se-' geli' :za-dih-deh 'ye-: i, 'do a :Baa' :or ne-a 'de yai' bo.

²'Do eh-a' dhih, :mor :on :taa se deh-a' :za-da 'ble-nyor deh 'nyi, :an-a' 'dhu-:-' eh-a' :gamu worn 'i, :ka nyor⧾ :an 'ye-a nyor⧾-a' 'yli, an no-a, 'de 'di :gweh-dih-sla⧾ 'zorn dih-: 'kpa :gwie⧾ bo dih-: an 'bhorn-a :ka nyor⧾ 'ye-uh'-a' dhih bo po. Dhih 'jeh, 'an zela a :gwluhuh', on 'ye an-a'a: geli' :za-dih-deh⧾-a' klehkpeh 'weh.

³Jorwor: :mor :mloror', :mor :on :taa se deh-a' :za-da 'ble-nyor deh 'nyi, :an-a' kona-son-a' yubo:-' deh :an-a' :dila-son-a no-a,

⁴'de eh 'ye deh :on 'nyi-a se deh-a' :za-da 'ble-nyor, eh 'ye 'slan-' 'dhu-eh:. :Yee' :on :Baa' :or 'ye-a deh⧾ :en :no-eh 'de 'slan-', or-: mu :on geli' :za.

⁵:Yee' :mor a :taa 'de Nyorsoa bo wlu, a-a' :no-' nyor⧾ :an 'ye-a nyor⧾-a' 'yli, an-a' deh. Deh no-eh, mo-: :ybeh-eh on 'ye dih :nyna, 'de on 'ye Nyorsoa bo :wlu 'de 'di :gweh-dih-sla⧾ 'zorn dih :gbor, 'dekorn: 'kpa :gwie⧾-a' 'gbaen' bo dih-: 'de :ka nyor⧾ 'ye-uh'-a' 'ye. Dhih 'jeh, 'an zela a :gwluhuh', on 'ye an-a'a: geli' :za-dih-deh⧾-a' klehkpeh 'weh.

⁶Jorwor: :mor :mloror', :mor :on :taa 'de Nyorsoa bo wlu, pa 'de :on 'bli :chuu 'di, po 'o :an-a' :kpaa', 'de :on 'ye 'de :on :Baa' nyor-a' 'ye-a, bo :wlu. :Yee' :on :Baa' :or 'ye-a deh⧾ :en :no-eh 'de 'slan-', or-: mu :on geli' :za.

⁷:Yee' :mor a :taa 'de Nyorsoa bo wlu, a-a' :po-' :dhlumeh' 'plo :eh se-a deh-' 'dhu-eh: :eh zela deh :ne-a :due' bo :zelaa:, :eh gweh-a :ka se Nyorsoa yubo-nyor⧾, an-a' dhih :ne-a. Deh no-eh, :mor on :taa 'ye, :yee' on 'da Nyorsoa-a mu an-a' wlu⧾ :dhulu' :dao' 'worn-: :deh.

⁸A-a' :gweh-' nyor⧾ :dao'. Deh no-eh, a :Baa' yubo: deh a se-a 'ble 'weh, 'de a mu-or dih dhele-dih:.

⁹'Ka-: a 'ye a-a' Nyorsoa bo :wlu-eh no, :A :Baa' :or :ne-a 'de yai', Deh-' 'ye-eh: 'do :an-a' gban 'i :ne-nyne bo.

¹⁰'Nyi :an-a' nyor⧾ wlu 'ken :korn-eh 'yle. :Ka nyor⧾ :ne-a 'de :on 'bli yai' no-a :an-a' 'ton :korn-deh, :yee' 'ka-: eh 'ye :no-eh: dha yao 'zorn.

¹¹'Nyi :a 'zean'-we-eh-a' dii-deh.

¹²'Ma-dih: :a-a' deh⧾-zon⧾-a' dhih bo, :ka :a 'ma-dih:-a deh⧾-zon:⧾ :a 'bei' no-a 'do :a 'bhun, en-' dhih bo :ke.

¹³:An-a' :kpa-dih:-' 'de :a dih 'dhen-eh bo. 'De mor :an-a' 'worn-:-' 'ku-a' :no-dih:-' :a deh-'. [ Deh no-eh, :mor no 'keen :or :korn-a nyor⧾ wlu 'ken, 'do 'kpih-: 'dekorn: dhih-a' 'i 'beh-a'-: 'di, :ka ti-a mu-a 'dlu-' :tehn. 'Ka-: eh 'ye :ne.]

¹⁴:Yee' :mor eh 'dhu, nyor no a deh-zon 'bhun, 'de a 'ye eh-a' dhih bo 'ma-dih:, :yee' a :Baa' :or :ne-a 'de yai', or mu a-a' deh⧾-zon⧾-a' dhih bo 'ma-dih: :ke.

¹⁵Jorwor: :mor a se deh⧾-zon:⧾ a 'bei' no-a 'do a 'bhun, en-' dhih bo 'ma-dih:, :yee' a :Baa' :se-' a-a' deh⧾-zon⧾-a' dhih bo 'ma-dih: i :ke.

¹⁶:Yee' :Yusu'-a kpa or-a' wlu 'dlu bo, or 'dae:, :Mor a :taa 'suehn-' pa, :yee' a-a' 'ble-:-' :wehlih-yuba :ka nyor⧾ :an 'ye-a nyor⧾-a' 'yli, an no-a. Deh no-eh, nyor⧾ :dao', :mor on :taa 'suehn-' pa, :yee' an-a' 'slan 'i. An 'bhorn nyor⧾ 'ye-uh' 'ye, :ka an pa-a 'suehn-'. Dhih 'jeh, 'an zela a :gwluhuh', on 'ye an-a'a: geli' :za-dih-deh⧾-a' klehkpeh 'weh.

¹⁷Jorwor: :mor eh 'dhu, :on :taa 'suehn-' pa, :yee' 'slan 'i, 'de :on 'ye 'chlan 'dlu :po.

¹⁸'De :ka eh :ne-a' nyor⧾-a' 'yli 'ye ka gweh, :ka :an pa-a 'suehn-'. Jorwor: 'nyi :on :Baa' nyor-a' 'ye-a, :ne :due', or yubo-eh. :Mor eh no :ao', :yee' :on :Baa' :or 'ye-a deh⧾ :en :no-eh 'de 'slan-', or-: mu :on geli' :za.

¹⁹:Yee' a-a' 'gola:-' a-a'a: bhaan-deh⧾ dih dha yao 'zorn, 'do a-a' 'jeh bo. Dha :wor 'gbomor⧾-: gani'-: en :ne, en 'kor-dih deh⧾. Dha-a' 'jeh :wor 'ylii'-nyor⧾ :ne, an wa 'gbu⧾, an 'yli deh⧾.

²⁰Jorwor: a no 'de Nyorsoa 'bli yai', a-a'a: bhaan-deh⧾ dih :dhe 'da, 'do :wor 'gbomor⧾-: gani'-: en se :ne, en 'ye deh 'kor-dih:, 'de mor 'ylii'-nyor⧾ 'i-a' 'jeh se 'de :ne, on 'ye 'gbu⧾ wa, on 'ye deh 'yli.

²¹Deh no-eh, 'do :dha :an-a'a: bhaan-deh⧾ :ne-a, 'do :wor :an-a' :porluh-a mu :ne :ke.

²²:Yee' 'yli-eh:, eh-: 'dhu yau-a' 'nape-'. :Mor :an-a' 'yli :nmor 'yi dih, :yee' :an-a' yau-a' klehkpeh mu zorn-pli-' dih 'yi-dih:.

²³Jorwor: :mor eh 'dhu, :an-a' 'yli se 'yi dih :nmor, :yee' :an-a' yau-a' klehkpeh mu :kule-' dih 'yi-dih:. :Yee' :mor eh 'dhu, zorn-pli :ne-a 'de :on 'di, en :za-dih: :kule-', :yee' :kule-a' 'jeh :dao', eh 'beh-: 'i 'gabaa.

²⁴:Yee' eh se nyor :korn :or 'ye-a' nyor⧾ :klaba'⧾ 'sororn'-a' 'bhoi-yu no. :Mor or no-eh, :yee' or mu :due'-' 'nyeh-:, 'de or 'ye 'sororn' nor-' :ybeh. :Yee' or mu :due'-a' wlu deh-' 'ye-:, 'de or 'ye 'sororn' nor-a' dhih-' :vlehn. A se 'wlii-: 'dekorn: Nyorsoa-: an-a' :weheh' :za-eh 'beh-dih: 'do :dha :due'.

²⁵Eh-a' dhih, 'an zela a :gwluhuh', a-a' :porluh⧾ 'bor a 'worn dih 'beh-dih-eh 'do a-a' 'kmo :ne-eh-a' dhih, 'do deh a 'ye-a' di-: 'dekorn: deh a 'ye-a' 'na-: bo, 'de mor 'do a-a' yau-a' dhih 'do deh a 'ye-a'-' pa bo. Eh :se :febeh'-a' dhih se 'i 'beh, 'do dii-deh⧾ bo ke :e? 'De eh :se yau-a' dhih se 'i 'beh, 'do paa-deh⧾ bo ke :e?

²⁶A pobo: neme: :daa ya :en zi-dih-a-' dih 'de yai', :en-' 'dhu-a deh, 'de mor :en-' chehn-a :koo, :en-' 'dhu-a :koo yai'. Jorwor: a :Baa' :or :ne-a 'de yai', or 'nyi-ih dii-deh⧾ 'weh :gbor :gbor. A-a' dhih se 'i 'beh 'gabaa, 'do en ken ke :e?

²⁷A-a' nyor :yoror :or :korn :gwluhuh' dih :na-dih-eh-a' 'bleh 'bleh 'beh-dih: :eh 'ye 'o or-a' :febeh' ybei' kpa 'do 'yluh-buh :due' 'di :eh?

²⁸:Yee' :eh :korn dhih 'da, 'de a 'beh-dih a-a' 'jeh-a' :porluh⧾ 'worn dih 'do paa-deh⧾-a' dhih bo :eh? A pobo: :peli'-a' 'voma'e: :daa ya, :en :ne-a 'de 'kwla, :ka en no-a ku-a', 'de en-' no-a gle, en-' no-a paa-deh⧾.

²⁹Jorwor: 'an zela a :gwluhuh', 'Keen :Salomor'-a' 'jeh, ti or :ne-a 'de or-a' dhih-a' 'i 'beh-a' klehkpeh 'di, or :se-' paa-deh:⧾ :nmaa'e-' pa, en :se 'o :peli'-a' 'voma'e: :daa, en-' :due'-' :zi.

³⁰:Yee' :mor eh 'dhu, Nyorsoa :taa 'o 'kwla :peli'-a' deh⧾-' :pa-dih-eh no, :en 'dhu-a 'zean'-: :glaa'e-: deh-', :yee' on po-a 'yli, :yee' dha a mu :na-dih: :eh? :Yee' a :mor, or se deh-' :pa-dih-eh 'beh-dih: :e? A :mor :gwlor-nyor:⧾ :on :korn-a dhih 'jeh-' :po-eh se-a 'i 'beh.

³¹Eh-a' dhih, a 'bor a-a' :porluh⧾-a' 'worn dih 'beh-dih-eh. A-a' :no-', Deh :a mu :di :eh? 'De mor a-a' :no-', Deh :a mu 'na-: :eh? 'De mor a-a' :no-', Deh :a mu-' :pa :eh?

³²Deh no-eh, deh⧾-a' klehkpeh :daa, me-: se Nyorsoa yubo-nyor⧾-a ple 'de, 'de a :Baa' :or :ne-a 'de yai', or yubo-eh' :ka a :korn-a a 'ye-a en-' klehkpeh 'ble.

³³Jorwor: a 'bhorn deh⧾ :en :korn-a 'de Nyorsoa-a' nyor⧾ wlu 'ken :korn-eh-: :korn or-a' 'yi 'sleh :gwie-: 'kwla⧾-' dih :zai', :yee' deh⧾-a' klehkpeh :daa, :en :sie:-a 'o, or mu-ih a 'nyi-: :ke.

³⁴:Yee' eh-a' dhih, a 'bor a-a' :porluh⧾-a' 'worn dih 'beh-dih-eh 'do :glaa'e-a' dhih bo. Deh no-eh, :glaa'e-a mu eh-a' 'jeh-a' :porluh⧾-a' 'worn dih 'beh-dih-deh:⧾ :dhulu' 'ble-: 'do eh-a' 'jeh bo. 'We-a' klehkpeh, en 'ble en-' 'jeh-a' 'worn dih 'beh-dih-deh:⧾.