Read Eastern Krahn Matio' 7 Bible Online

Matio' 7 - Eastern Krahn bible

Matio' 7

¹:Yee' :Yusu'-a kpa or-a' wlu 'dlu bo :chio'lo:, or 'dae:, A-a' :chehn-' a 'bei'-a' zabe 'i 'suh, 'de Nyorsoa :ne-' a-a' zabe zi :ke.

²Deh no-eh, :ka a no-a a 'bei'-a' zabe-a' zi-a', 'ka-: Nyorsoa-a mu a-a' ne-a' zi-a' :no :ke. :Yee' :ka a no-a a 'bei'-a' ne-a' :yba-dih-eh, 'ka-: Nyorsoa-a mu a-a' ne-a' :yba-dih-eh :no :ke.

³:Eh no 'de :an 'ye :gbehne-eh-yu :due' :ne-a 'de :an-a' 'de-di' 'yli-e :eh? Jorwor: tu 'kplo :yor :or :ne-a 'de :an-a' 'jeh 'yor-eh 'yli-e, :an-a' 'ye-or' :e?

⁴:Yee' :kaa :on 'beh-dih: :on 'ye 'de or bo :wlu-eh no :eh? :On 'ye :ao', 'An 'de-di', 'yle, 'on 'ye :gbehne-eh 'de :on 'yli-e :za, :mor tu 'kplo :ne 'de :an-a' 'jeh-a' 'yli-e :eh?

⁵:Mor nyor⧾-a' 'yli 'ye-nyor: :daa, :za 'de tu 'kplo :dao' 'de :an-a' 'jeh 'yli-e :zai', :yee' :an mu dih 'ye-: deh 'jeh, 'de :on 'ye :gbehne-eh-yu 'de :on 'be 'yli :za.

⁶A-a' 'nyi-:-' gbe⧾ deh⧾ :en :ne-a gban 'i 'do Nyorsoa bo. :Mor a no-eh, en mu-' dih 'bili: en 'ye a dih :chehn-dih:. A-a' :po-' a-a'a: 'dhama-yor 'do :bee'⧾ ybei' dih. :Mor a no-eh, :yee' en mu-or ken dih :ye-dih:.

⁷A 'yba-dih: Nyorsoa deh, :yee' a mu-eh 'ye-:. A 'bhorn-eh dih, :yee' a mu-eh 'ye-:. :Mor a bla :kpaa', :yee' or mu 'o 'wluh-: 'do a bo.

⁸Deh no-eh, nyor⧾-a' klehkpeh :an 'yba-dih-a Nyorsoa deh, an 'ye-eh'. :Yee' nyor :or 'bhorn-a deh dih, or 'ye-eh'. 'De mor nyor :or bla-a :kpaa', or mu 'o 'wluh-: 'do or bo.

⁹'De a 'nyne-', nyor :yor-a' 'jeh, :or :korn 'yu-a mu-or 'bhlee 'yba-dih:, 'de :or 'ye-or' sobu' 'nyi :eh?

¹⁰'De mor, :mor or-a'a: 'yu 'yba-dih-or zimi-eh, 'de :or 'ye-or' sehn 'nyi :eh?

¹¹'De mor :ka a-a' kplen-a' :yeh :nyni 'yi dih, a yubo: 'nyii'-deh:⧾ 'jeh, a 'ye-a' a-a'a: 'nynuu 'nyi 'weh, :yee' a :Baa' :yor :or :ne-a 'de yai', dha or mu :na-dih: 'do nyor⧾ :an 'yba-dih-or deh⧾ 'jeh, an-a' dhih bo :eh?

¹²Deh a 'bhorn-a nyor⧾ 'ye-a' no 'do a bo, eh-a' 'jeh :dao', eh-: a 'ye no 'do nyor⧾ bo :ke. Eh-: :Mose'-a' 'tele'-: 'dekorn: Nyorsoa-a' wele-eh: :po-nyor⧾-a' nyor⧾ deh :torne-eh-: en 'dhu-eh:-'.

¹³:Yee' a :yi-dih: 'do gba-dih-gba-a' worn :yor se-a bo dih 'beh ka. Deh no-eh, gba-dih-gba :or 'beh-a 'worn dih, 'de mor :gwie: :eh :ne-a bo dih bhou, eh-a' :sie: 'da, :wor 'dhu gbe :zie: 'da-'. Gba-dih-gba-a' 'jeh :dao', or-: :gwlor-nyor:⧾ :doru'-a yi-dih 'o 'worn.

¹⁴Jorwor: gba-dih-gba-a' worn, :or se-a bo dih 'beh-: 'dekorn: :gwie: :eh :kma-a 'i 'do kpa 'da-: me-: kpa nyor⧾ 'de 'kmo :sie: :febeh' bo. Eh-a' 'jeh :wor :gwlor-nyor⧾-kpor-a 'ye, 'de an kpa.

¹⁵:Yee' a 'dhu a-a' 'jeh :dhororn', 'do sih 'tmo :wele-eh: :po-nyor:⧾ :an yi-a 'o a bo, 'de :on pa-a 'blae'⧾-a' ku⧾-', jorwor: :on 'ble-a ji⧾-a' :porluh⧾.

¹⁶An-a' 'bi an mu-a :tlo, me-: nyor⧾-a mu-uh yubo-dih:. 'Wu⧾-kwla :se-' 'nyoeh' :tlo i, 'de dlan :se-' gwehn :tlo i.

¹⁷'Ka-: 'o eh :ne, tu⧾-a' klehkpeh :en no-a tu⧾ 'jeh, en tlo 'bi 'jeh, jorwor: tu 'dhu-a tu-zon-', an tlo 'bi-zon:⧾.

¹⁸Tu 'jeh se 'beh-dih: on 'ye 'bi-zon⧾ :tlo, 'de tu-zon se 'beh-dih: on 'ye 'bi 'jeh :tlo.

¹⁹'De tu⧾-a' klehkpeh :en :se-a 'bi 'jeh :tlo i, en mu :dba-eh:, 'de en 'ye 'de neh-' :po-eh:.

²⁰:Yee' 'do an-a' 'bi an tlo-a bo, 'do :wor a mu-uh yubo-dih:.

²¹:Yee' eh :se nyor⧾-a' klehkpeh :an 'da-dih-a 'on, :Gwlor :baa', :Gwlor :baa', mo-: :an mu Nyorsoa-a' nyor⧾ wlu 'ken :korn-eh 'zorn :pa :deh. Jorwor: nyor :dao' :or mu-a 'On-ba: :or :ne-a 'de yai', or-a' 'ton :korn-deh :no, or :due' gbai, or-: mu-eh 'zorn :pa.

²²:Yee' :mor Nyorsoa-a' zabe: :zi-we-eh nyni 'o, :yee' :gwlor-nyor:⧾ :dhulu'-a mu :aa 'da-:, 'de 'on bo, :Gwlor :baa', :Gwlor :baa', eh :se 'de :an-a' 'nyne 'di, :a se Nyorsoa-a' wele-eh :po-dih: :e? 'De eh :se 'de :an-a' 'nyne 'di, :a se nyor⧾ 'kwla 'ye-dih-deh⧾ 'de :za-dih: :e? 'De eh :se 'de :an-a' 'nyne 'di, :a se deh⧾ :kolu'⧾ :dhulu' :no-dih: :e?

²³:Mor on 'da :ao', :yee' 'an mu-uh :gwluhuh' zela: deh 'jeh, 'On se a yubo:. A 'wluh 'o 'on ybei', a :mor deh⧾-zon:⧾ :no-nyor:⧾ :daa.

²⁴:Yee' nyor⧾-a' klehkpeh :on 'worn-a 'an wlu :daa, 'de :on 'chean'-a deh⧾ 'an za-a-' en-' no-a', :yee' on gweh :toror' :korn-nyor: :or po-a or-a'a: 'gbu 'do 'soba ken.

²⁵:Yee' :yeh 'ni-a dba-a, 'de 'ni 'yi-a, 'de :pobor' :dhulu' :yi-dih-uh-a-', :yee' 'gbu :dao', on :se-' blu. Deh no-eh, on :po-eh: 'o 'soba ken.

²⁶Jorwor: nyor⧾-a' klehkpeh :on 'worn-a 'an wlu :daa, 'de :on se-a deh⧾ 'an za-a-' en-' no-a' 'chean', :yee' on gweh :bobo-nyor: :or po-a or-a'a: 'gbu 'do :bhehneh'-dhu-'.

²⁷:Yee' :yeh 'ni-a dba-a, 'de 'ni 'yi-a, 'de :pobor' :dhulu' :yi-dih-uh-a-', :yee' 'gbu :dao', on blu-', 'de on :wa-dih: dih.

²⁸:Yee' :yeh :Yusu' jla-a 'do deh⧾ :daa or za-a-' bo, :yee' or-a' nyor⧾ deh :torne-eh :florn-dih: :gwlor-nyor:⧾ :doru' :dao'-: worn.

²⁹Deh no-eh, or torne-uh deh, :ka nyor :or 'ble-a 'kpih 'de Nyorsoa-deh 'di, :eh :se-a :ka an-a' nyor⧾ 'tele' :torne-nyor⧾-a no-a.