Read Eastern Krahn Matio' 8 Bible Online

Matio' 8 - Eastern Krahn bible

Matio' 8

¹:Yee' :yeh :Yusu' 'dhle-a, or 'wluh-a 'de tluh ken, :yee' :gwlor-nyor:⧾ :doru', mo-: zi 'o or klei'.

²:Yee' 'yu :due', yau-zon-weh kpon-a, or-: mu 'de or bo, :or 'jli dih 'do or 'zorn, :or 'da, :Gwlor :baa', :mor eh 'dhu, :on 'worn-dih-eh ken dih, :yee' :on 'beh-dih: 'an 'puh-dih-eh 'weh, 'de 'on :ne-' :kane' dih :ne :neheh'.

³:Yeh or no :ao', :yee' :Yusu' tba-or son ken dih, 'de or 'da, 'On 'worn-dih-eh'. 'Wluh :kane' dih. :Yee' 'do :dha :due' :dao', 'do :wor or-a' yau-zon-weh 'bor-dih:.

⁴'De :Yusu' 'dae: 'de or bo, :An-a' zela:-' deh :daa nyor-beh :gwluhuh' o. Jorwor: mu, :on 'ye :an-a' 'jeh Nyorsoa-a' 'slaa: :za-nyor 'i :to-dih:. :Yee' kpa 'slaa: :za-dih-deh :ka :Mose'-a' 'tele' 'da-a, 'de nyor⧾-a' klehkpeh 'ye-eh' yubo: :ka :on 'puh-a.

⁵Eh :korn ti :due', :yeh 'we :zi-dih:-a 'o ken dih, :yee' :Yusu' 'si :Kapa'nior-gwlor-: dih. :Yee' sorye'-a' nyor :klaba' :due', or-: yi 'o or bo, :or bale-or, or 'ye-or'-' :za-dih:,

⁶or 'dae:, :Gwlor :baa', 'an-a: 'bhoi-yu:, or-: :korn 'tiei: 'meh, :or 'pehn dih 'de :gwlor-', :or 'ye or-a' 'jeh worn 'gabaa.

⁷'De :Yusu' 'da, 'An mu :mu, 'on 'ye-or' 'puh-dih:.

⁸Jorwor: sorye'-a' nyor :klaba' :dao', or 'dae:, :Gwlor :baa', 'on se-eh 'i :bleh-dih:, :on 'ye 'de 'an-a: 'gbu 'di pa. Jorwor: dbo wlu 'suh, :yee' or mu 'puh-:.

⁹'An 'jeh :ke, 'mor nyor-kpalu: 'o, :or :ne-a 'o 'tele' 'zorn. 'De 'on 'ble 'kpih 'do sorye' :on :ne-a 'o 'on 'zorn ken. :Mor :yor 'on zela: :gwluhuh', Mu, :yee' :mloror' mu-'. :Yee' :mor :yor 'on 'da, 'Yle, :yee' :mloror' yi-: 'de. :Yee' :mor 'on 'da, 'de 'an-a: 'bhoi-yu bo, No deh :daa, :yee' :mloror' no-eh'.

¹⁰:Yeh :Yusu' 'worn-a deh :daa, :yee' eh :florn-dih-or-: worn. 'De or :wlu 'de nyor⧾ :an zi-a 'o or klei' bo, or 'dae:, Dhih 'jeh, 'an zela a :gwluhuh', 'on 'see eh-a' nyor 'ye, :or 'ye dhih 'jeh-' :po-eh 'ble deh :dao', dha 'Ezlea-bluhba-a' 'jeh ken.

¹¹'An zela a :gwluhuh', :gwlor-nyor:⧾ :dhulu'-a mu 'de 'yluh-a' 'kwla 'wluh-dih: 'da 'wluh-:, 'de :noo' 'ye 'noror 'yluh-a' 'nior: 'kpa 'da 'wluh, 'de on :ne 'Eble'hehn-: Ase'-: 'dekorn: 'Jekor-: on 'ye :dha :due' dih :dhe 'do gor-', 'do :dha Nyorsoa :korn-dih:-a nyor⧾ wlu 'ken.

¹²Jorwor: :yuh :on :korn-a :on 'ye-a' neh 'i :ne-nyor⧾ no, 'do or-a' nyor⧾ wlu 'ken :korn-eh 'zorn, an mu 'zorn :po-eh: 'de :kule-', 'do :dha 'vin-a'-: 'dekorn: 'nyne 'i :di-dih-eh-: en mu-a :ne.

¹³'De or zela: 'yu :dao' :gwluhuh', or 'dae:, Mu. :Ka :on no eh-a' dhih 'jeh-' :po-eh, 'ka-: eh mu :ne 'do :on bo. :Yee' 'do 'yluh-buh :due' :dao' 'di, 'do :wor 'yu-a' 'bhoi-yu 'puh-dih:.

¹⁴:Yee' :Yusu' pa 'de :Piteh' 'bli 'gbu 'di, 'de or 'ye :Piteh'-a'a: 'bila-nynor, or-: :chehbe'-a no, :or 'pehn dih.

¹⁵'De :Yusu' 'tuh or-a' son dih. :Yee' or-a' :chehbe' 'bor-'. 'De or :sorn-', or kpa :Yusu' :bale'-'.

¹⁶:Yee' 'gwie-yluh bo :dao', nyor⧾ :ya 'de or bo, nyor⧾ :dhulu' 'kwla 'ye-dih-deh:⧾ :ne-a 'o 'de 'weh. 'De or no wlu-a' 'bleh 'bleh, or za-ih 'o on 'de, 'de or 'puh-dih: puhba-nyor⧾-a' klehkpeh.

¹⁷Or no deh :daa 'weh, 'de Nyorsoa-a' wlu 'ye dhih 'jeh-' 'kpa, :ka or-a' wele-eh: :po-nyor: :Azaya' no-a eh-a' :za-a' see, or no-a, Or no-eh', 'de :a-a' :nea-deh⧾-: 'dekorn: :a-a' puhba-deh⧾-: en 'bor.

¹⁸:Yee' :yeh :Yusu' 'ye-a :gwlor-nyor:⧾ :doru' :dao', :on 'gbo-dih-or 'dlu dih, :yee' or 'nyi or-a'a: bo :na-nyor⧾ 'tele', on 'ye 'dhan, on 'ye 'de :Galali'i-yobo'-pehnu 'de 'kpa.

¹⁹:Yee' nyor⧾ 'tele' :torne-nyor :due', or-: yi 'de or bo, or 'dae:, Nyor⧾ deh :torne-nyor:, 'an mu 'o :on klei' :zi, :dha klehkpeh :an mu-a :mu.

²⁰'De :Yusu' :wlu 'de or bo, or 'dae:, :Tolo'-gbe⧾ 'ble 'bi, me-: en pa 'di dih. 'De neme: :en zi-dih-a-' dih 'de yai', en 'ble 'dle⧾, me-: en pa 'di dih. Jorwor: 'yu an 'da-dih-a Nyor-kpalu-a' 'yu, or se 'dlu-a' 'pehn-dih-da: :sloror'-a' 'jeh 'ble.

²¹:Yee' 'yu :noror' :or no-a or-a'a: bo :na-nyor⧾-a' nyor :due', or 'dae:, :Gwlor :baa', 'nyi 'on mu, 'on 'ye 'on-ba dih nma-dih: kele'a: o.

²²Jorwor: :Yusu' zela-or-: :gwluhuh', or 'dae:, Zi 'o 'on klei'. 'Nyi 'meheh'-nyor⧾ nma-dih: an-a' 'jeh-a'a: 'meheh'-nyor⧾ dih.

²³:Yee' :Yusu' 'kpa 'de 'blagbe 'di, 'de or-a'a: bo :na-nyor⧾ zi 'o or klei'.

²⁴:Yeh an mu-a, :yee' 'ga yai' dih :pobor' :dhulu', or-: :yi-dih-uh 'de 'ni ken, 'de eh 'bhorn eh 'ye 'blagbe 'ni 'zorn :pa-dih:. Jorwor: :Yusu'-a 'mo-'.

²⁵'De on mu, on za-or 'nyinor-', on 'dae:, :Gwlor :baa', 'puh-dih: :a-uh. 'Ni-a kpa :a 'weh o.

²⁶:Yeh on 'da :ao', :yee' or :wlu-' 'de on bo, or 'dae:, A :mor :gwlor-nyor:⧾ :on :korn-a dhih 'jeh-' :po-eh se-a 'i 'beh. :Eh no-dih a :fano :eh? :Yee' or :sorn-' 'weh. 'De or po 'ni-: 'dekorn: :pobor'-: 'borboa' 'i. 'De yobo'-pehnu-a' 'duh⧾ no 'dhuan.

²⁷:Yeh eh no :ao', :yee' eh :florn-dih-uh-: worn, 'de on 'da, Deh 'i-deh-nyor: 'o, :or :dhe dih :eh, :or :korn wlu yobo'-pehnu-a' 'duh⧾-: 'dekorn: :pobor' :sloror'-: en dhe 'o dih :eh?

²⁸:Yee' :yeh :Yusu' mu-a, 'de or 'si-a dih 'de :Galali'i-yobo'-pehnu 'de, 'do :Galala'a-nyor⧾-a' 'bluhba ken, :yee' nyor⧾ 'sororn' 'kwla 'ye-dih-deh⧾ :ne-a 'o 'de, mo-: 'wluh 'de nma-dih-deh⧾ 'klu-', 'de on 'ya-dih-or 'i. On :ne-' :fano: 'gabaa. Eh-: no-eh, 'de nyor⧾ se 'beh-dih: on 'ye 'o :gwie: :dao' 'i :yi-dih:.

²⁹:Yeh on 'ye-or, :yee' 'do :dha :due' :dao', an po 'geh⧾, an no, Nyorsoa-a' 'Yu. Deh :an 'bhorn :on 'ye :a-uh' :no-dih: :eh? :On yi-: 'noror :on 'ye :a 'kle 'ye-dih: 'de ti 'ye 'o nyni :e?

³⁰:Yee' 'do :dha on :ne-a, :bee'⧾ :dhulu', me-: wa dih, 'de en se 'o on bo dih :tehn-dih:.

³¹'De 'kwla 'ye-dih-deh⧾ bale: :Yusu', en 'dae:, :Mor eh 'dhu, :mor 'si-dih: :a 'zorn, :yee' dbo 'de :a :bee'⧾ 'di.

³²:Yee' or 'dae: 'de en bo, A mu. 'De en 'wluh 'o on 'de, en mu, en pa 'de :bee'⧾ 'di. :Yee' 'do :dha :due' :dao', :bee'⧾-a' klehkpeh :dao', en jla :jiin'-: glu, 'de en :za 'noror tluh :gbehn-eh 'i ple-a', en 'kpa 'o yobo'-pehnu worn, 'de en 'meh 'do 'nior.

³³:Yee' nyor⧾ :an 'dhu-a :bee'⧾ :dao' 'yli-eh bo, on ple, on mu-' :gwlor. 'De an zela nyor⧾ :gwluhuh' 'do deh⧾-a' klehkpeh :en :no-eh-: :korn mor deh :eh :no-eh 'do nyor⧾ 'kwla 'ye-dih-deh⧾ :ne-a 'o 'de, an-a' dhih.

³⁴:Yee' gwlor-a' klehkpeh :gweh glu, on mu :Yusu' 'yi 'ya-dih: 'da. :Yeh on 'ye-or, :yee' an bale-or', or 'ye 'o 'do on 'bli-bluhba ken 'wluh.