Read Eastern Krahn Make 1 Bible Online

Make 1 - Eastern Krahn bible

Make 1

¹:Yee' tubo-wlu:⧾ 'jeh :en kor-a Nyorsoa-a' 'Yu :Yusu' 'Klae 'i, en-' glu 'dhu 'da, :wor :dhe dih.

²:Ka Nyorsoa-a' wele-eh: :po-nyor :Azaya' no-a eh-a' 'chle-a', eh-: :dhe dih, Nyorsoa 'dae:, 'An mu 'an-a: tubo-wlu:⧾ :po-nyor :on ybei' :dbo o. Or-: mu :an-a' :gwie 'kpa :po.

³'De tubo-wlu:⧾ :po-nyor: :daa, or 'wor 'de :bhehneh'-bluhba ken, or 'dae:, A po :Gwlor :baa'-a' :gwie 'kpa 'do or bo o. A po or-a' :gwie 'kpa, a 'ye-eh' 'i 'sleh-dih:, or 'ye-eh' bo :na.

⁴:Yee' 'yu :due' an 'da-dih-a :Jororn', or-: 'yle, :or po nyor⧾ 'ni 'dlu 'de :bhehneh'-bluhba ken, 'de or po Nyorsoa-a' tubo-wlu⧾, or 'da, A 'tali: a-a' deh⧾-zon⧾ dih, a 'ye 'de Nyorsoa bo 'bili:, 'de a 'ye 'ni 'dlu :po, :yee' Nyorsoa-a mu a-a' deh⧾-zon⧾-a' dhih bo 'ma-dih:.

⁵'De :gwlor-nyor:⧾ :on :ne-a 'de :Judi'a-bluhba ken-: 'dekorn: 'de :Julu'slehn-gwlor 'di-: an-a' klehkpeh mu 'de or bo. An za an-a' 'jeh-a' deh⧾-zon⧾ gbor, 'de or po-uh 'ni 'dlu 'do 'Jorle-ni worn.

⁶'Tiei: or pa-', :kpuan' ken :soo'-a' 'pibi:, me-: on :no-dih-ih, 'de or bla deh-ku 'gben-'. :Yee' :kpamu'⧾-: duh-ni-: me-: no or-a'a: dii-deh⧾.

⁷Or zela-uh-: :gwluhuh', or 'da, Nyor :or mu-a 'on ken dih :yi, or-a' dhih 'beh-: 'i, or :zi 'o 'on-'. 'On se deh-' 'dhu-eh:, 'on 'ye ya yi 'do or 'zorn, 'on 'ye or-a'a: :buhbuh⧾-a' dubu'⧾ :sloror' bhehn-dih:.

⁸'An po a 'ni 'dlu 'weh. Jorwor: Gban 'i :ne :Zulu:, mo-: or mu 'o a 'dlu :po.

⁹'Do ti :dao' 'di, 'do :wor 'o, :Yusu' 'wluh-dih: 'Nazla-gwlor-' 'de :Galali'i-bluhba ken, 'de :Jororn' po-or 'ni 'dlu 'de 'Jorle-ni worn.

¹⁰:Yeh :Yusu' :taa 'o 'nior 'wluh, :yee' 'do :dha :due' 'jeh :dao', or 'ye yao kan-dih: worn, 'de or 'ye Nyorsoa-a' :Zulu:, :on gweh-a pabu', mo-: :an yi 'o or 'dlu.

¹¹'De wlu 'wluh 'de Nyorsoa 'bli yai', on 'dae:, :Mor no 'an-a: :dhih :kma-yu. 'An :porluh 'pehn-: dih 'do :on bo.

¹²:Yee' 'do :dha :due' 'jeh :dao', Nyorsoa-a' :Zulu no-eh', 'de :Yusu' mu 'de :bhehneh'-bluhba ken,

¹³'de 'kwla-nimi⧾ 'klu-', 'do 'we-a' :kwlaa :nyieh 'di. :Yeh or :ne-a 'de, :yee' 'ku 'dhen-or-: dih or 'ye deh-zon no. :Yeh 'ku 'dhen-or dih :dheen:, :yee' 'enjor-nyor:⧾, mo-: 'yle, :on :za-dih-or'.

¹⁴:Yeh on po-a :Jororn' :kasue 'di, :yee' :Yusu' mu 'de :Galali'i-bluhba ken. :Yeh or :ne-a 'de, :yee' Nyorsoa-a' tubo-wlu:⧾ 'jeh, me-: or po,

¹⁵or 'dae:, Ti-a nyni 'o 'weh. Nyorsoa-a' nyor⧾ wlu 'ken :korn-eh 'koan'-: bo. A 'tali: a-a' deh⧾-zon⧾ dih, a 'ye 'de Nyorsoa bo 'bili:. Tubo-wlu:⧾ 'jeh :daa, a po-ih dhih 'jeh-'.

¹⁶Eh :korn 'we-eh :due', :yeh :Yusu'-a na-dih-a :Galali'i-yobo'-pehnu worn dih, 'do :wor or 'ye-dih: Samor'-: or-a' dei' Andlu'-: mo-: :an po sor 'do 'ni worn 'i. Deh no-eh, on no zimi: 'dba-nyor:⧾.

¹⁷:Yeh or :yeh-dih-uh-a ken, :yee' or :wlu-' 'de on bo, or 'dae:, A 'yle. A zi 'o 'on klei'. 'An mu-eh :no, a 'ye nyor⧾ 'de Nyorsoa bo :ya-nyor⧾ no, :eh :zi 'o zimi: :kpon-eh-'.

¹⁸:Yee' 'do :dha :due' 'jeh :dao', on 'pehn-dih: an-a'a: sor⧾-: dih, 'de on zi 'o or klei'.

¹⁹:Yeh on 'beh-dih:-a 'de dih :weh-beh:, :yee' or 'ye 'Jeen-: 'dekorn: or-a' dei' :Jororn'-: :on no-a :Zehbehli'-a'a: 'nynuu, mo-: an 'pa sor⧾ 'de 'blagbe 'di.

²⁰:Yeh :Yusu' 'ye-uh'-a, :yee' 'do :dha :due' :dao', or 'da-uh' on 'ye 'o or klei' zi. :Yee' on sie 'de on :baa'-: 'dekorn: nyor⧾ :an no-dih-uh-a :koan bo, on 'ye-a' geli' :za-: 'de 'blagbe 'di 'weh, 'de on zi 'o or klei'.

²¹:Yee' :yeh :Yusu'-: 'dekorn: or-a'a: bo :na-nyor⧾-: on mu-a, 'de on nyni-a 'o :gwlor an 'da-dih-a :Kapa'nior, 'de Nyorsoa-a' :gwlee-we-eh nyni-a 'o, :yee' or pa 'de an-a' 'di :gweh-dih-sla 'zorn, 'de or torne-uh deh.

²²Or-a' nyor⧾ deh :torne-eh :florn-dih: an-a' klehkpeh-: worn. Deh no-eh, or torne-uh deh :ka nyor :or 'ble-a 'kpih 'de Nyorsoa-deh 'di, :eh :se-a :ka nyor⧾ 'tele' :torne-nyor⧾-a no-a.

²³:Yeh or torne-a nyor⧾ deh, :yee' 'yli :a bla-a 'i, 'yu :due', 'kwla 'ye-dih-deh :ne-a 'o 'de, or-: pa 'de an-a' 'sla :dao' 'zorn, :or 'wor, :or 'da,

²⁴Deh :an 'bhorn :on 'ye :a-uh' :no-dih: :eh? :Yusu' :mor, :or 'wluh-a 'Nazla-gwlor 'di, :on yi-: 'de :on 'ye :a-a' dhih dih gweh :e? :Mor :dao', 'on yubo: :on 'weh o. :Mor, Nyorsoa-a' gban 'i :ne-nyor: 'o o.

²⁵:Yeh or 'da :ao', :yee' :Yusu' po 'kwla 'ye-dih-deh: :dao' 'borboa' 'i, or 'da, No 'dhuan. 'Wluh 'o or 'de.

²⁶:Yeh or 'da :ao', :yee' eh gbua-or-: 'i 'gabaa, 'de eh 'wor-dih-or, eh 'wluh 'o or 'de.

²⁷:Yeh eh 'wluh-a 'o or 'de, :yee' nyor⧾-a' klehkpeh :on :ne-a 'o, eh :florn-dih-uh-: worn. 'De an 'chihleh-eh 'i, an no, :Eh :ne :ao' :eh? Nyor⧾ deh :torne-eh: :dele' :oo', eh-: :dhe dih :e? 'Yu :daa, or wlu-dih 'de 'kpih 'di. :Mor or :wlu 'de 'kwla 'ye-dih-deh⧾-a' 'jeh bo, :yee' en dhe 'o or-a' wlu-: dih.

²⁸:Yeh eh no :ao', :yee' :Yusu'-a' 'nyne 'dhobo:, en gweh :Galali'i-bluhba-a' klehkpeh-: 'dlu.

²⁹:Yeh :Yusu' no-a deh :dao', :yee' or 'wluh 'de 'sla :dao' 'zorn 'weh, 'de or-: 'Jeen-: 'dekorn: :Jororn'-: on pa 'de Samor'-: 'dekorn: Andlu'-: on 'bli 'gbu 'di.

³⁰:Yee' nyor⧾ zela: :Yusu'-: :gwluhuh' :ka Samor'-a'a: 'bila-nynor, :chehbe'-a no-or, 'de or 'pehn-a dih.

³¹:Yeh or 'worn-ih'-a, :yee' or mu 'de or bo 'weh, 'de or kpon or-a' son dih, or 'dhu-or ya-'. :Yee' or-a' :chehbe' 'bor-', 'de or kpa-uh :bale'-'.

³²:Yee' 'gwie-yluh bo :dao', :yeh 'yluh 'kpa-a 'nior, :yee' nyor⧾ :ya 'de :Yusu' bo puhba-nyor⧾-a' klehkpeh-: 'dekorn: :yuh 'kwla 'ye-dih-deh⧾ :ne-a 'o 'de-: 'weh.

³³'De gwlor 'kpa :dha :due' 'do 'gbu worn 'i.

³⁴:Yee' or 'puh-dih: nyor⧾ :dhulu' :on 'ble-a puhba-deh:⧾ 'doror: 'dor, 'de or :za nyor⧾ 'kwla 'ye-dih-deh⧾ 'de. Or :se-' 'worn en :se-' :wlu, deh no-eh, en yubo: nyor or 'dhu-eh:-' 'weh.

³⁵:Yee' :yeh :zai' :zulu⧾-a wlu-a, :yee' or :sorn-' 'weh, 'de or mu 'de :dha nyor se-a :ne, or 'ye 'de Nyorsoa bo :wlu.

³⁶:Yeh or :ne-a 'de, :yee' Samor'-: 'dekorn: or 'bei'-: on :sorn-' 'weh, 'de on mu-or 'kwla⧾-' dih 'bhorn 'da.

³⁷:Yeh on 'ye-or, :yee' on 'dae:, Nyor⧾-a' klehkpeh, an 'bhorn :on 'kwla⧾-' dih o.

³⁸'De or zela-uh :gwluhuh', or 'da, A zi, :a mu 'de :gwlor⧾ :neheh' :eh 'koan'-dih:-a :a dih 'di dih. 'Do :wor 'on :korn 'on 'ye Nyorsoa-a' tubo-wlu⧾ :po-dih: :neheh' :ke. Eh-: :korn dhih :oo', 'on 'yle.

³⁹:Yee' or na :Galali'i-bluhba-a' klehkpeh ken dih, 'de or po Nyorsoa-a' tubo-wlu⧾, 'de an-a' 'di :gweh-dih-sla⧾ 'zorn, or za nyor⧾ 'kwla 'ye-dih-deh⧾ 'de.

⁴⁰Eh :korn ti :due', 'de 'yu :due', yau-zon-weh kpon-a, or-: mu 'de :Yusu' bo, :or 'jli dih 'do or 'zorn, :or bale-or, :or 'da, :Mor eh 'dhu, :on 'worn-dih-eh ken dih, :yee' :on 'beh-dih: 'an 'puh-dih-eh 'weh, 'de 'on :ne-' :kane' dih :ne :neheh'.

⁴¹:Yeh or no :ao', :yee' or-a' :wehlih-a: no :Yusu', 'de or tba-or son ken dih, or 'da, 'On 'worn-dih-eh'. 'Wluh :kane' dih.

⁴²:Yee' 'do :dha :due' 'jeh :dao', 'do :wor or-a' yau-zon-weh 'bor-dih:, 'de or 'puh.

⁴³'De :Yusu' 'dhobo: or dbo-or, or 'dhu-or 'slen deh 'jeh, or 'dae:,

⁴⁴:An-a' zela:-' deh :daa nyor-beh :gwluhuh' o. Jorwor: mu, :on 'ye :an-a' 'jeh Nyorsoa-a' 'slaa: :za-nyor 'i :to-dih. :Yee' kpa 'slaa: :za-dih-deh :ka :Mose'-a' 'tele' 'da-a, 'de nyor⧾-a' klehkpeh 'ye-eh' yubo: :ka :on 'puh-a.

⁴⁵Jorwor: or mu deh⧾-' dih, 'de or zela: nyor⧾ :dhulu' :gwluhuh' :gbor, :ka or 'puh-a. Eh-: no-eh, 'de :mor :Yusu' :taa :gwlor-' dih 'si, 'de or-a' :nyeh 'i :neheh', or tehn-dih gwlor bo dih, 'de or dhe dih 'do :dha nyor⧾ se-a :ne. Jorwor: nyor⧾-a 'wluh deh⧾-' dih, an mu 'de or bo 'gboror:.