Read Eastern Krahn Make 10 Bible Online

Make 10 - Eastern Krahn bible

Make 10

¹:Yee' :Yusu' mu-', or 'wluh 'o :dha 'o 'weh, 'de or mu 'de :Judi'a-bluhba ken-: 'dekorn: 'de 'Jorle-ni-a' 'yluh-a' 'kwla 'wluh-dih: 'da-:. :Yeh or :ne-a 'de, :yee' nyor⧾ :doru', mo-: yi 'de or bo :neheh', 'de or torne-uh deh, :ka or no-a 'do ti-a' klehkpeh bo.

²:Yee' :Falasi'i-nyor⧾-a' nyor⧾ :noo', mo-: yi 'de or bo, :on yi-or wlu 'worn dih 'bhorn-dih: 'da, 'de on dhele-or dih, on 'da, Eh :ne 'o :a-a'a: 'tele'-a' :gwie 'i 'weh :e, nyor 'ye or-a'a: 'nynor 'kwla :za :e?

³'De or dhele-uh dih, or 'da, Deh :Mose' zela: a :gwluhuh' :eh?

⁴'De on 'da, :Mose' 'worn-dih-eh' nyor 'ye or-a'a: 'nynor 'kwla :za-chlee-deh 'chle, 'de or 'ye-or' 'kwla :za.

⁵'De or 'da, A-a' deh :torne-eh :kma 'i, eh-: :korn dhih 'de :Mose' 'worn-dih-eh ken dih, 'de or 'chle 'tele' :daa 'do a bo.

⁶:Eh 'wluh-a 'de eh-a' glu 'dhu 'da, 'do :dha Nyorsoa :no-dih:-a deh⧾-a' klehkpeh, 'do :wor or :no-dih: 'nynor-: 'dekorn: nyor-kpalu-:.

⁷Eh-: :korn dhih, 'de 'nynor-: 'dekorn: nyor-kpalu-: an mu an-a'a: 'cheh dih 'tali:, 'de on 'ye :dha :due' 'ti.

⁸:Yee' mo-: :ne-a 'sororn', an mu nyor :due' :no. :Yee' on se 'sororn' :ne :dele' ka, jorwor: on no nyor :due'.

⁹'Do eh-a' dha, deh Nyorsoa po-a :dha :due', nyor se :korn, or 'ye-eh' 'i zela:.

¹⁰:Yeh on no :ao', :yee' :Yusu'-: 'dekorn: or-a'a: bo :na-nyor⧾-: on mu 'de 'gbu. :Yeh on mu-a 'de 'gbu, :yee' on dhele-or deh :ne-a :due'-: dih :neheh'.

¹¹'De or :wlu 'de on bo, or 'dae:, Nyor-beh-nyor-beh: :or mu-a or-a'a: 'nynor 'kwla :za, 'de :or 'ye-a' 'nynor :noror' :korn, :yee' or no 'nyne :zaan' 'do 'nynor or :za-a 'kwla bo.

¹²:Yee' :mor 'nynor tba son, 'de or 'ye nyor :noror' 'bli 'ti, :yee' or no 'nyne :zaan' :ke.

¹³:Yee' nyor⧾ :noo', mo-: :ya 'de :Yusu' bo 'nynuu: :nyene' or 'ye-uh dih 'tuh, on 'ye :bhorlie' 'ye. Jorwor: or-a'a: bo :na-nyor⧾ kan-uh-: 'i.

¹⁴:Yeh or 'ye-a deh an no-a, :yee' eh se-or 'ton :korn, 'de or :wlu 'de on bo, or 'dae:, A 'nyi 'nynuu: :nyene' yi 'noror 'on bo. A 'bor an-a' 'yi :kan-eh. Deh no-eh, :ka 'nynuu: :nyene' :ne-a, nyor⧾ :on :ne :ao', mo-: Nyorsoa-a mu wlu 'ken :korn.

¹⁵Dhih 'jeh, 'an zela a :gwluhuh', nyor :or se-eh 'worn-dih: Nyorsoa 'ye-a' wlu 'ken :korn :ka 'yu-yu :ne-a, :yee' or :se-' Nyorsoa-a' nyor⧾ wlu 'ken :korn-eh 'zorn :pa i.

¹⁶'De or 'duo: 'nynuu: :nyene' :dao' :due' :due', 'de or 'dhu-uh :gwlii', or tba-uh son⧾ ken dih, or po-uh :bhorlie' bo.

¹⁷:Yee' :yeh :Yusu' 'kpa-a :gwie 'i, 'de or mu-a, :yee' 'yu :due', or-: ple, :or yi 'de or bo, 'de :or 'jli dih 'do or 'zorn, :or dhele-or dih, :or 'da, Nyor⧾ deh :torne-nyor: 'jeh :nor, deh 'on 'ye no 'de 'on 'ye 'kmo :sie: :febeh' 'ble :eh?

¹⁸'De :Yusu' dhele-or dih, or 'da, :Eh :korn dhih :an 'da-dih 'on nyor 'jeh :eh? Nyorsoa :due', or-: 'dhu nyor 'jeh-' 'klein'.

¹⁹:On yubo: :Mose'-a' 'tele' 'weh, :eh no-a, Nyor-a' 'dba-:-' nyor, nyor-a' :no-' 'nyne :zaan', nyor-a' 'yli-:-', nyor-a' 'dhu-dih:-' nyor⧾ dhih ken dih, nyor-a' 'yli-:-' :on 'be, :yee' 'ye :on 'de-: 'dekorn: :on :baa'-: deh-'.

²⁰:Yeh or 'da :ao', :yee' 'yu :dao', or 'dae:, Nyor⧾ deh :torne-nyor:, :eh 'wluh-a 'de 'an 'yu :gbolo'-bla, 'on dhe 'o 'tele'⧾ :daa, en-' klehkpeh-: dih.

²¹:Yeh or 'da :ao', :yee' :Yusu' pobo-or-: ya, 'de :ybeh-dih: ka 'di, 'de or 'da, Deh :due', eh-: :sie: 'o, eh-: :on :korn :on 'ye no. Mu. Deh⧾-a' klehkpeh :on 'ble-a, :on 'ye-ih plo, 'de :on 'ye 'wlii: :an mu-a 'ye-:, :on 'ye-ih nyor⧾ :on se-a deh-a' :za-da 'ble 'nyi. :Mor :on no-eh, :yee' :an mu bhaan-deh⧾ 'ble-: 'de Nyorsoa 'bli yai'. :Mor :on no :ao', :yee' 'yle, :on 'ye 'o 'on klei' zi.

²²:Yeh 'yu :dao', or 'worn-a dhih :Yusu' :za-a-', :yee' or-a' :porluh 'kpa-: 'zorn, 'de or du 'yuba, or mu, or 'wluh 'o :dha :Yusu' :ne-a. Deh no-eh, or 'ble :kororn-deh:⧾ :dhulu'.

²³:Yee' :Yusu' pobo: or-a'a: bo :na-nyor⧾-: ya, 'de or :wlu 'de on bo, or 'dae:, Eh no 'yi :kma-deh: 'do bhaan-nyor bo, 'de or 'ye 'de Nyorsoa-a' nyor⧾ wlu 'ken :korn-eh 'zorn pa.

²⁴Deh or :za-a-', eh 'ma-dih: an-a' :porluh⧾ 'weh. 'De or 'dae: :neheh', 'Nynuu-a:, eh no 'yi :kma-deh: nyor 'ye 'de Nyorsoa-a' nyor⧾ wlu 'ken :korn-eh 'zorn pa.

²⁵Eh :kma 'i, 'do bhaan-nyor bo, or 'ye 'de Nyorsoa-a' nyor⧾ wlu 'ken :korn-eh 'zorn pa, :eh :zi 'o :kpuan' ken :soo'o 'ye 'de 'mehno-a' 'bie' 'di :yi-dih:

²⁶:Yeh or :za-a deh :daa-', :yee' an-a' :porluh⧾ 'ma-' 'gabaa. 'De on dhele-or dih, on 'da, :Yee' :mor eh :ne :ao', :yee' :or 'beh-dih: :or 'ye 'puh :naa :eh?

²⁷:Yusu' pobo-uh-: ya, 'de or 'da, Nyor⧾ se deh :daa eh-a' no-a' 'beh-dih:. Jorwor: Nyorsoa :mloror', or 'beh-dih: deh⧾-a' klehkpeh-a' no-a' 'weh.

²⁸:Yeh :Yusu' 'da :ao', :yee' :Piteh' wlu-', or 'da, :Gbee'e:. Deh⧾-a' klehkpeh :wor :a 'tali: dih, 'de jorwor: :a zi 'o :on klei'.

²⁹'De :Yusu' 'da, Dhih 'jeh, 'an zela a :gwluhuh', nyor :or 'tali:-a or-a'a: 'gbu-: 'de-di'-boi'-: 'de-: :baa'-: 'nynuu-: 'dekorn: or-a'a: gle⧾-: dih, 'do 'an dhih-: 'dekorn: 'do Nyorsoa-a' tubo-wlu:⧾ 'jeh bo-:

³⁰:yee' nyor :dao', or mu 'gbu⧾-: 'de-di'-boi'-: 'de-: 'nynuu-: 'dekorn: gle⧾-: en-' :kehehn' :kehehn' 'ye-: dha ti :daa bo. :Mor or :taa deh⧾ 'jeh :daa 'ye, nyor⧾-a mu-or 'kle 'ye-dih: :ke. :Yee' or mu 'kmo :sie: :febeh' 'ye-:, 'do ti :dele' :en mu-a 'de :yi 'di.

³¹Jorwor: nyor⧾ :dhulu' :a 'da-dih-a nyor⧾ :klaba'⧾ :naa, mo-: :an mu 'zeehn :no 'de ybei'. :Yee' :yuh :a 'da-dih-a nyor⧾ 'zeehn :naa, an-a' 'jeh :dao', mo-: :an mu nyor⧾ :klaba'⧾ :no 'de ybei'.

³²:Yee' :Yusu'-: 'dekorn: or-a'a: bo :na-nyor:⧾ :on :korn-a :bhue: 'yor :ne-a 'sororn', mo-: 'kpa :gwie 'i, :an mu :Julu'slehn, 'de or :korn 'de on ybei'. :Yee' or-a'a: bo :na-nyor⧾-a' :porluh⧾ 'ma-', 'de nyor⧾ :an zi-a 'o on klei', :fano-a no-uh. 'De or po or-a'a: bo :na-nyor⧾ :dha :due', or zela-uh :gwluhuh' deh :eh mu-or :no,

³³or 'dae:, A :gbee'e:. :A mu :Julu'slehn :naa. 'Do :wor 'yu an 'da-dih-a Nyor-kpalu-a' 'yu-a mu :plo-dih-eh, 'de Nyorsoa-a' 'slaa: :za-nyor:⧾ :klaba'⧾-: 'dekorn: nyor⧾ 'tele' :torne-nyor⧾-: bo. :Yee' nyor⧾ :dao', an mu-or wlu 'ken chehn, or 'ye 'meh, 'de on 'ye-or' nyor⧾ :on :se-a :Jueh'-nyor⧾ 'kwla :za-dih:,

³⁴'de on 'ye-or :goba'-dhih ken dih 'wluh-dih:, on 'ye-or' :dhehmeh ya gba, on 'ye-or' bla, 'de on 'ye-or' 'dba. Jorwor: :mor 'we taan zi, :yee' or mu-' :sorn.

³⁵:Yee' 'Jeen-: 'dekorn: :Jororn'-: :on no-a :Zehbehli'-a'a: 'nynuu, mo-: yi 'de :Yusu' bo, 'de on dhele-or dih, on 'da, Nyor⧾ deh :torne-nyor:, deh-beh:, eh-: :a 'bhorn :on 'ye no 'do :a bo.

³⁶'De or dhele-uh dih, or 'da, Deh a 'bhorn 'on 'ye no 'do a bo :eh?

³⁷'De on 'da, 'Nyi :a-a' nyor :due' :dhe 'de :an-a' :dila-son bo dih, 'de :due' 'ye 'de :an-a' kona-son bo dih :dhe, 'de :an-a' dhih-a' 'i 'beh-a' 'di.

³⁸Jorwor: :Yusu' 'dae:, Deh a dhele-a dih, a se-eh 'i yubo:. 'Kle 'ye-eh-a' 'korbuh 'an mu-a 'di 'na-dih:, a 'beh-dih: an-a' 'di 'na-dih-eh 'weh :e? :Ae' :ka 'an mu-a 'ni 'dlu :po-eh :no, a 'beh-dih-eh ke?

³⁹'De on 'da, :A 'beh-dih-eh'. 'De or 'dae:, 'Korbuh 'an mu-a 'di 'na-dih:, a mu-uh 'di 'na-dih:. :Ka 'an mu-a 'ni 'dlu :po-eh :no, 'ka-: a mu 'ni 'dlu :po-eh :no :ke,

⁴⁰jorwor: 'do 'an :dila-son-: 'dekorn: 'an kona-son-: en-' bo dih :dhe-deh: :dao', eh :se 'mor-:, 'an-a' 'nyi-eh nyor⧾. Jorwor: Nyorsoa, or-: po 'for⧾ :dao' 'kpa, 'do nyor⧾ or gan-a bo, on 'ye 'de eh bo dih :dhe.

⁴¹:Yee' :yeh or-a'a: bo :na-nyor⧾ :bhue: :dao', on 'worn-ih'-a, :yee' on 'kpa-dih: 'Jeen-: 'dekorn: :Jororn'-:-' 'chehn.

⁴²'De :Yusu' 'da an-a' klehkpeh 'do or bo, or 'dae:, A yubo-eh', nyor⧾ :on se-a Nyorsoa yubo:, an-a' nyor⧾ an 'da-dih-a an-a' nyor⧾ wlu 'ken :korn-nyor⧾, 'de on 'klu-', mo-: :an kpa-dih-uh 'kpih.

⁴³Eh se :korn, eh 'ye :ao' :ne, 'noror a 'klu-', jorwor: nyor :or 'bhorn-a nyor :klaba'-deh 'noror a 'klu-', :yee' or-: :korn :or 'ye a-a'a: 'bhoi-yu no.

⁴⁴:Yee' :mor a-a' nyor :taa 'bhorn or 'ye 'o a 'dlu :ne, :yee' or :korn or 'ye a-a' klehkpeh-a' 'ge-yu no.

⁴⁵Jorwor: 'yu an 'da-dih-a Nyor-kpalu-a' 'yu :sloror', or :se 'de yi or 'ye :tabehyie po, jorwor: or yi-: 'de, or 'ye :gwlor-nyor⧾-a' 'bhoi-yu no, 'de or 'ye or-a' :febeh' 'kwla :za 'do nyor⧾ :dhulu'-a' zelie-eh bo.

⁴⁶:Yee' :Yusu'-: 'dekorn: or-a'a: bo :na-nyor⧾-: on mu :Jehliko'o. :Yeh an 'wluh-a 'o :gwlor-', :yee' nyor⧾ :doru', mo-: :ne an mu. :Yee' 'yu :due' an 'da-dih-a Bateme'o, :or 'dor-a, 'de :or no-a :zloror-nyor, :or :korn-a :baa' 'dhu-a Teme'o, or-: :dhe dih 'do :gwie: worn 'i.

⁴⁷:Yeh or 'worn-ih'-a, on no-a :Yusu' :or 'wluh-a 'Nazla, or-: 'o, :or 'yle, :yee' or 'kpa 'o 'geh⧾ :po 'da 'weh, or no, :Yusu', :Debe'-a' 'yu, 'ye 'an :wehlih.

⁴⁸:Yeh or po-a 'geh⧾, 'de or wele-a :Yusu', :yee' nyor⧾ :dhulu' :on :ne-a 'o, an po-or 'borboa' 'i, an no, No 'dhuan. :Yee' jorwor: or 'kpa 'de de dih, or po 'geh⧾, 'de or no, :Debe'-a' 'yu, 'ye 'an :wehlih.

⁴⁹:Yeh or no :ao', :yee' :Yusu' :nyna dih, or 'dae:, A 'da-or. 'De on 'da-or, on 'dae:, 'Ble :porluh-a' dih 'pehn-eh. :Sorn-'. Or 'da :on 'weh.

⁵⁰:Yeh or 'worn-ih'-a, :yee' or 'vile: or-a'a: 'korlor 'weh, 'de or wan 'o 'bluhbor dih, or mu 'de :Yusu' bo.

⁵¹:Yee' :Yusu' dhele-or-: dih, or 'da, Deh :an 'bhorn 'on 'ye no 'do :on bo :eh? 'De 'doror'-nyor 'da, Nyor⧾ deh :torne-nyor:, 'an 'bhorn 'on 'ye dih 'ye o.

⁵²'De :Yusu' 'da, Mu. :An-a' dhih 'jeh-' :po-eh no-eh, 'de :on 'puh. :Yee' 'do :dha :due' :dao', :yee' or 'ye-: dih, 'de or zi 'o :Yusu' klei' 'do :gwie 'i.