Read Eastern Krahn Make 14 Bible Online

Make 14 - Eastern Krahn bible

Make 14

¹:Yee' eh :sie: 'o 'we 'sororn', 'Meh-a' :bla-dih: 'dlu dih-gor-: 'dekorn: Se 'vu-bhlee-a' gor-: en 'ye 'o nyni. :Yee' Nyorsoa-a' 'slaa: :za-nyor:⧾ :klaba'⧾-: 'dekorn: nyor⧾ 'tele' :torne-nyor⧾-: an 'bhorn on 'ye :Yusu' 'sleh dih :po-dih:, on 'ye-or' kpon, 'de on 'ye-or' 'dba.

²Jorwor: an wlu-' 'de an-a' 'jeh 'nyne-', an no, :A 'bor :a-a' :kpon-or' 'do gor-'. :Mor :a no-eh, :yee' eh mu 'kpunu: 'kpun yaa'e dih :za, 'noror :gwlor-nyor:⧾ :doru' :daa 'nyne-' 'bla.

³Eh :korn 'we-eh :due', :yee' :Yusu' :ne 'de Samor', :or yau-zon-weh kpon-a :dee', 'de or 'bli 'gbu, 'de :Behtani'i. :Yeh or :ne-a 'de, 'de or di-a deh, :yee' 'nynor :due' or-: yi 'o or bo, or-: :ya 'de :zolo-eh: :eh :no-dih-eh sobu' an 'da-dih-a :alaba'ta, :eh :ne-a 'naa-tu-a' 'bleh 'bleh-a' :pofi'orn: :or 'kpa-a deh ken 'gabaa 'di. Eh-: or :za deh worn 'i, 'de or 'chehli-or 'do :Yusu' 'dlu.

⁴:Yeh or no :ao', :yee' nyor⧾ :ne-a 'o, an-a' nyor⧾ :noo' 'kpa-' 'chehn, 'de an wlu 'de an-a' 'jeh 'nyne-', an no, :Eh :korn dhih 'de 'nynor-a dola :pofi'orn: :daa dih :eh?

⁵:Mor nyor⧾ plo :pofi'orn: :daa :dee', 'wlii: an mu-a 'ye-:, en-' 'wlii 'beh-dih: en 'ye 'wlii: nyor :due'-a 'ye-a 'do zon :due' 'di-' dih zi. 'Wlii: :dao', me-: :a :korn :a 'ye nyor⧾ :on se-a deh-a' :za-da 'ble 'nyi :dee'. :Yee' an jeh-or-: 'bli.

⁶:Yeh an jeh-a, :yee' :Yusu' :wlu-', or 'dae:, A 'wluh 'o or bo. :Eh no 'de a 'beh-dih-or 'worn dih :eh? Or no deh :nmaa'e: 'do 'on bo.

⁷Nyor⧾ :on se-a deh-a' :za-da 'ble, an mu dha a bo :ne, 'do ti-a' klehkpeh bo. :Mor a :taa 'bhorn a 'ye-uh' deh 'jeh bo dih no, :yee' a mu-eh :no. Jorwor: 'on :se-' dha a bo :ne i, 'do ti-a' klehkpeh bo.

⁸Deh or 'beh-dih:-a, eh-: 'o or no. :Pofi'orn: :daa, or 'wla-a 'on-', or sie ti de :dueh'leh:, or po 'an yau 'kpa, 'do 'an dih nma-dih-eh bo, :mor 'on 'meh.

⁹Dhih 'jeh, 'an zela a :gwluhuh', :dha klehkpeh Nyorsoa-a' tubo-wlu:⧾ 'jeh-a mu-a :po-dih-eh dha yao 'zorn-a' klehkpeh, deh 'nynor :daa or no-a, eh mu-' :za-eh:, 'do or-a' dhih-a' :gwluhuh' bo :po-dih-eh bo.

¹⁰:Yee' :Juda' :Ehkeh'lior: :or no-a :Yusu'-a'a: bo :na-nyor⧾-a' :bhue: 'yor :ne-a 'sororn', an-a' nyor :due', or-: mu 'de Nyorsoa-a' 'slaa: :za-nyor:⧾ :klaba'⧾ bo, or 'ye :Yusu' plo 'de on bo.

¹¹:Yeh on 'worn-a deh :daa, :yee' an-a' :porluh⧾ 'pehn-: dih, 'de on po wlu :dhama'-', on 'ye-or' 'wlii 'nyi. :Yeh or 'wluh-a 'o, :yee' or 'bhorn :ka or 'ye-a' no, 'de or 'ye-uh'-a' :Yusu' 'kwla :za-dih:.

¹²:Yee' 'do Se 'vu-bhlee-a' gor-a' :zai'-we-eh 'di, ti :Jueh'-nyor⧾-a 'dba-dih-a 'Meh-a' :bla-dih: 'dlu dih-gor-a' 'blae'-yu, 'do ti-a' klehkpeh bo, :yee' :Yusu'-a'a: bo :na-nyor⧾ dhele-or-: dih, on 'dae:, Dha :an 'bhorn :a 'ye mu, 'de :a 'ye 'Meh-a' :bla-dih: 'dlu dih-gor-a' dii-deh⧾ 'kpa :po-dih: 'do :on bo :eh?

¹³:Yeh on dhele-or dih, :yee' or :za 'de on 'klu-' nyor⧾ 'sororn', mo-: or dbo. Or 'dhu-uh wlu worn, or 'dae:, A mu 'de :gwlor-'. 'Do :wor 'yu :due' :or kpa-a :yabe: :eh :ne-a 'ni 'di, or :ne a mu 'gbon-dih:. :Yee' a zi 'o or klei'.

¹⁴'Gbu or mu-a 'di :pa, 'do :wor a 'ye pa. :Yee' :mor a :yeh-dih: 'yu :or :korn-a 'gbu ken, :yee' a zela-or :gwluhuh', a 'dae:, :A-a'a: nyor⧾ deh :torne-nyor 'dae:, Dha :chuu: or :ne or-a'a: bo :na-nyor⧾ 'ye-a' 'Meh-a' :bla-dih: 'dlu dih-gor-a' deh 'di :di-dih:, on :ne :eh?

¹⁵:Mor a dhele-or dih, :yee' or mu a :chuu: :klaba' :on :ne-a 'de 'gbu :dao', an-a' yai' a-uh :torne:. :Dhe-da :po-eh: 'kpa 'weh 'de mor. 'Do :wor a 'ye :a-a'a: dii-deh⧾ 'kpa :po-dih: 'do :a bo.

¹⁶:Yeh :Yusu' 'da :ao', :yee' on 'kpa 'i :gwie:. On mu-' :gwlor. :Yeh on nyni-a :gwlor-', :yee' on 'ye deh⧾-a' klehkpeh :ka :Yusu' no-a eh-a' :za-a', 'de on po 'Meh-a' :bla-dih: 'dlu dih-gor-a' dii-deh⧾ 'kpa.

¹⁷:Yeh glu gor-a, :yee' :Yusu'-: 'dekorn: or-a'a: bo :na-nyor:⧾ :on :korn-a :bhue: 'yor :ne-a 'sororn'-: on mu 'de 'weh.

¹⁸:Yeh an di-a deh, :yee' or :wlu-' 'de on bo, or 'dae:, Dhih 'jeh, 'an zela a :gwluhuh', a-a' nyor :due', or-: mu 'on :plo. Nyor-a' 'jeh :dao', or-: 'mor-: :a di-dih deh :dha :due' :naa.

¹⁹:Yeh or 'da :ao', :yee' an-a' :porluh⧾ 'kpa-: 'zorn, 'de an dhele-or dih :due' :due', an no, 'Mor :oo' :e?

²⁰'De or 'da, 'De a 'nyne-' :oo', nyor-a' 'jeh :dao', or :ne. A :mor :ne 'an 'gba-a, a-a' nyor :due' :oo'.

²¹'Yu an 'da-dih-a Nyor-kpalu-a' 'yu-a mu 'meh-: :mloror' :kpeheh: :ka eh no-a 'chle-eh 'do or 'bhun, 'de Nyorsoa-a' 'chlee-deh 'di, jorwor: 'chlo 'do nyor :or mu-or :plo bo. Eh mu 'yi dih :nmor 'do nyor :dao' bo :dee', :mor or se 'wluh.

²²:Yeh an di-a deh, :yee' :Yusu' 'duo: 'bhlee: :kpuan'-' 'weh, or po Nyorsoa-a' 'zio 'do eh bo, 'de or :chehn-dih-eh dih, 'de or 'kwa, or 'nyi-eh or-a'a: bo :na-nyor⧾, or 'da, A 'duo-eh'. 'Bhlee: :daa, eh-: 'dhu 'an yau-'.

²³:Yee' or 'duo: 'korbuh :on 'yi-a 'glee-nomor 'di 'weh, 'de or po Nyorsoa-a' 'zio, or 'nyi-uh, 'de an-a' klehkpeh, on 'na 'glee-nomor :or :ne-a 'de on 'di.

²⁴:Yee' or 'da, 'An nyomor :or mu-a dih 'wla-: 'do nyor⧾ :dhulu' bo, :or po-a kuo 'kpih ken, 'do a mor-: 'dekorn: Nyorsoa-: 'nyne bo, or-: 'o, :or :dhe dih.

²⁵Dhih 'jeh, 'an zela a :gwluhuh', 'on :se-' 'glee-nomor 'na-: i :neheh', eh 'ye 'we-eh: Nyorsoa-a mu-a nyor⧾ wlu 'ken :korn 'ken :yeh-dih:.

²⁶:Yeh on :gweh-a 'i, :yee' on ble Nyorsoa-a' 'zio :po-duh:. 'De on mu 'de 'Orle-tluh ken.

²⁷:Yeh an mu-a, :yee' :Yusu' :wlu-' 'de on bo, or 'dae:, A-a' klehkpeh, a mu 'on 'de dih :gba. Deh no-eh, eh 'chle-eh:-' 'de Nyorsoa-a' 'chlee-deh 'di, or 'da, 'An mu 'blae'⧾-a' 'yli-eh bo 'dhu-nyor 'dba-:. :Mor 'on 'dba-or, :yee' 'blae'⧾-a mu dih :gba.

²⁸'De :Yusu' 'dae: :neheh', Jorwor: :mor 'on 'meh, 'de Nyorsoa 'ye 'de 'on :za, :yee' 'an mu a ybei' :mu 'de :Galali'i-bluhba ken.

²⁹'De :Piteh' 'da, :Mor an-a' klehkpeh, on :gba :on 'de dih, 'on :se-eh' :no i.

³⁰'De :Yusu' 'dae: 'de or bo, Dhih 'jeh, 'an zela :on :gwluhuh', :mor :soan'-beor 'ye zlo-a' kpor⧾ 'sororn' no, 'gwior :yor :daa, :an mu 'an dhih-' dhobo:, :on 'ye kpor⧾ taan no.

³¹:Yee' :Piteh'-a' wlu :ne 'kpih ken :chio'lo:, or 'dae:, Eh-a' :yeh 'dhu, mor-: 'mor-: :a :korn :a 'ye :dha :due' 'meh-dih: :sloror', 'on :se-' :an-a' dhih-' dhobo: i. :Ka :Piteh' 'da-a, :yee' 'ka-: an-a' klehkpeh 'da :ke.

³²:Yee' on mu 'de :dha an 'da-dih-a :Gehseh'mani, 'de :Yusu' :wlu 'de or-a'a: bo :na-nyor⧾ bo, or 'dae:, :Mor 'on :taa 'de Nyorsoa bo wlu, :yee' a :dhe dih dha :dha :daa o.

³³:Yeh or :taa mu, :yee' or kpa :Piteh'-: :Jororn'-: 'dekorn: 'Jeen-: 'weh. :Yeh on 'ken-dih:-a 'o dih :weh-beh:, :yee' or-a' :porluh :ku kwa, 'de an 'beh-dih-or 'worn dih 'gabaa.

³⁴:Yee' or zela-uh :gwluhuh', or 'dae:, 'An :porluh-a' 'worn dih 'beh-dih-eh: :daa, eh 'bhorn eh 'ye 'on 'dba. A :sie: :daa. :Yee' a 'dhu-eh 'yli-eh bo.

³⁵:Yee' :yeh or 'beh-dih:-a 'de dih :weh-beh:, :yee' or 'jli-: dih 'do 'bluhbor. 'De or :wlu 'de Nyorsoa bo, or 'dae:, :Mor eh gweh-eh, :yee' no-eh, 'an 'kle 'ye-ti: :daa, en 'ye zi.

³⁶:Yee' or 'da, 'On-ba:, :on 'beh-dih: deh⧾-a' klehkpeh-a' no-a' 'weh. :Za 'on 'kle 'ye-eh-a' 'korbuh :daa 'kwa. Eh :se 'an ken dih 'worn-dih-deh:, jorwor: :an-a' ken dih 'worn-dih-deh:, eh-: 'ye 'dlu bo mu.

³⁷:Yee' or mu 'de or-a'a: bo :na-nyor:⧾ :on :ne-a taan bo-: de, 'de or :yeh-dih-uh 'mo 'da. 'De or za-uh 'nyinor-', or :wlu 'de :Piteh' bo, or 'dae:, Samor', :an 'mo-' :e? :On se 'beh-dih: :on 'ye-eh' 'yli-eh bo 'dhu 'do 'yluh-buh :due' 'di :sloror' :e?

³⁸A 'dhu-eh 'yli-eh bo. A :wlu 'de Nyorsoa bo, 'de dih 'dhen-eh :ne-' a gla :za. :Porluh 'worn-dih-eh ken dih 'weh, jorwor: yau se 'kpih ken :ne.

³⁹:Yeh or :za-a deh :daa-' 'de on bo, :yee' or mu-: de :neheh' 'do :dha or 'wluh-a, 'de or :wlu 'de Nyorsoa bo. :Ka or 'da-a bale-wlu :zai', 'ka-: or 'da :neheh'.

⁴⁰:Yeh or 'wluh-a 'de Nyorsoa bo :wlu 'da, 'de or yi-a de, :yee' or :yeh-dih-uh 'mo 'da :dele' ka. Deh no-eh, an-a' 'yli :ku kwa. :Yee' deh on 'ye-a-' :za 'de or bo, on se-eh yubo:.

⁴¹:Yeh or yi-a de, 'do kpor⧾-a' taan neh 'di, :yee' or :wlu-' 'de on bo :neheh', or 'dae:, A 'mo-' 'gboror: :e? 'Mo-a' :gweh 'i :blaa'a:. Ti nyni 'o 'weh. A :gbee'e:. 'Yu an 'da-dih-a Nyor-kpalu-a' 'yu-a yi :plo-eh: 'da, 'de deh⧾-zon:⧾ :no-nyor⧾ 'kwa.

⁴²A :sorn-', :a 'ye mu. A :gbee'e:. 'Yu :or mu-a 'on nyor⧾ bo :plo-dih:, or-: :ne 'o :dha 'o, :or 'yle.

⁴³:Yee' :yeh :Yusu'-a wlu-a 'chio'lo:, :yee' 'do :dha :due' 'jeh :dao', :Juda' :or no-a or-a'a: bo :na-nyor:⧾ :on :korn-a :bhue: 'yor :ne-a 'sororn', an-a' nyor :due', or 'si-: dih, or :ya 'de nyor⧾ :doru'. On 'ble :bhla 'jlehn⧾-: 'dekorn: tu⧾-: 'kwa. Nyor⧾ :daa or :ya-a: 'de, on 'wluh 'de Nyorsoa-a' 'slaa: :za-nyor:⧾ :klaba'⧾-: nyor⧾ 'tele' :torne-nyor⧾-: 'dekorn: 'bluhba: :korn-nyor⧾-: bo.

⁴⁴:Yee' 'yu :or yi-a :Yusu' :plo 'da, or zela-uh-: :gwluhuh' see, or 'dae:, 'An mu deh 'i :po o. 'Yu 'an mu-a 'de :bhluun'⧾-' 'kpa-:, :yee' or-: 'o o. A kpon-or o. A 'dhu-or 'yli-eh bo, a 'ye-or' kpa o.

⁴⁵:Yee' :Juda' 'dhobo:, or 'koan'-dih: :Yusu'-: dih, 'de or 'da, Nyor⧾ deh :torne-nyor:. :Yeh or 'da :ao', :yee' or 'kpa 'de or :bhluun'⧾-'.

⁴⁶:Yeh or no :ao', :yee' nyor⧾ :ne :Juda' yi-a 'de, on kpon :Yusu' 'weh.

⁴⁷:Yeh on kpon-or, :yee' 'yu :due' :or :nyna-a 'o dih, or jli 'de or-a'a: :bhla 'jlehn kpla-'-: dih, 'de or po-eh, or chehn 'o Nyorsoa-a' 'slaa: :za-nyor⧾-a' nyor :klaba'-a'a: 'bhoi-yu-a' :dou'.

⁴⁸:Yee' :Yusu' dhele-uh-: dih, or 'dae:, :Bhla 'jlehn⧾-: 'dekorn: tu⧾-: me-: a 'ble, 'de a yi 'on kpon 'da, :eh gweh-a :ka nyor :or yi-a 'ylii'-nyor: :kpon 'da :e?

⁴⁹Zorn 'o zorn, 'on :ne 'de a bo, 'do Nyorsoa-a' 'sla ybei', 'an torne nyor⧾ deh, a :se 'de 'on :kpon-dih:. Jorwor: deh Nyorsoa-a' 'chlee-deh :za-a-', eh :korn eh 'ye dhih 'jeh-' 'kpa.

⁵⁰:Yeh or 'da :ao', :yee' or-a'a: bo :na-nyor⧾-a' klehkpeh ple-', on gba-or 'de dih.

⁵¹:Yee' 'yu :due' :or :chleh-dih:-a 'nena-yli-eh-', or-: zi 'o :Yusu' klei'. 'De on :ge-dih: 'yu :dao' bo.

⁵²:Yee' or-a'a: 'yli-eh 'wluh-or-: dih, 'de or :chehn 'kpanua', or ple.

⁵³:Yee' an kpa :Yusu' 'de Nyorsoa-a' 'slaa: :za-nyor⧾-a' nyor :klaba' bo, :dha Nyorsoa-a' 'slaa: :za-nyor:⧾ :klaba'⧾-a' klehkpeh-: 'bluhba: :korn-nyor⧾-: 'dekorn: nyor⧾ 'tele' :torne-nyor⧾-: on :gweh-dih:-a.

⁵⁴:Yeh an mu-a, :yee' :Piteh'-a na-or-: 'de :peh :peh, jorwor: or :se-uh' dih 'koan'-dih:, or :tehn-dih-uh bo dih, 'de or mu 'o Nyorsoa-a' 'slaa: :za-nyor⧾-a' nyor :klaba'-a'a: 'gbu ybei'. 'De or :dhe dih 'do neh 'i, 'do nyor⧾ :an 'dhu-a 'gbu 'yli-eh bo 'bhun, 'de or 'wona.

⁵⁵:Yee' Nyorsoa-a' 'slaa: :za-nyor:⧾ :klaba'⧾-: 'dekorn: zabe: :zi-nyor:⧾ :klaba'⧾-a' klehkpeh-: an 'bhorn dhih on 'ye-a' 'o :Yusu' 'dlu po, 'de on 'ye-or' 'dba, jorwor: on :se-or' dhih 'bhun 'ye.

⁵⁶Nyor⧾ :dhulu', mo-: 'dhu-dih: :Yusu' dhih ken dih, jorwor: an-a' wlu-a' 'kpa :dha :due'.

⁵⁷Nyor⧾ :noo', mo-: :sorn-', :on 'dhu-dih-or dhih ken dih, mo-: 'da,

⁵⁸:A 'worn or-a' wlu, or 'da, or mu Nyorsoa-a' 'sla :daa :gwlor-nyor⧾ po-a ya :gba, 'de or 'ye :noror' po, 'do 'we taan 'di, :yor nyor⧾-a' son :se-a' :po i.

⁵⁹:Yeh on 'da :ao', :yee' an-a' wlu :se-' :dha :due' 'kpa :chio'lo:.

⁶⁰:Yee' Nyorsoa-a' 'slaa: :za-nyor⧾-a' nyor :klaba' :sorn-' 'weh, 'de or :nyna dih 'do on ybei', or 'chleh :Yusu', or 'dae:, :On se deh 'ble, :on 'ye-' :za, 'do dhih :daa on po-a 'o :on 'dlu, 'do en bo :e?

⁶¹Jorwor: :Yusu' no 'dhuan, or :se-' :wlu. :Yee' Nyorsoa-' 'slaa: :za-nyor⧾-a' nyor :klaba' 'chleh-or :neheh', or 'dae:, :Mor :bhorlie'-Nyorsoa-a' 'yu, or 'tan-a :oo' :e?

⁶²'De :Yusu' 'da, Keen'. 'Mor :oo'. 'De mor, a mu 'yu an 'da-dih-a Nyor-kpalu-a' 'yu 'ye-:, or mu 'de 'kpih :korn-Nyorsoa-a' :dila-son bo dih :dhe, 'de a 'ye-or' 'ye, or 'ye 'de yi, 'de 'ni-kpan:⧾ :en :ne-a 'de yai' 'nyne-'.

⁶³:Yeh :Yusu' :za-a deh :daa-', :yee' Nyorsoa-a' 'slaa: :za-nyor⧾-a' nyor :klaba' 'fa-dih: or-a'a: :gba 'vuu-: dih, 'de or 'dae:, :Eh :korn dhih, 'de :a 'bhorn dhih ken dih zela-nyor:⧾ :noo' :neheh' :eh?

⁶⁴A 'worn-ih' :ka or no-a Nyorsoa-a' 'nyne 'kor-dih-eh. :Kaa a 'da :naa :eh? 'De an-a' klehkpeh chehn-or wlu 'ken, on 'da, Or :zlor 'meh-a' 'weh.

⁶⁵:Yee' nyor⧾ :noo' 'duo: :Yusu'-a' :dhehmeh ya :gba-eh-' 'weh, 'de :noo' bla-or deh 'yli ken, 'de an tba-dih-or :kola'⧾ dih, an no, Po gban-wlu⧾. :Eh zi :eh zi :eh? :Or tba :on deh :eh? 'De nyor⧾ :an 'dhu-a 'gbu 'yli-eh bo, an bla-or.

⁶⁶Ti :Piteh' :ne-a 'o 'gbu ybei', :yee' Nyorsoa-a' 'slaa: :za-nyor⧾-a' nyor :klaba'-a'a: 'bhoi-yu :due', :or no-a 'nynor-kpao'-yu, or yi-: 'de.

⁶⁷:Yeh or 'ye-a :Piteh', or 'wona-a, :yee' or pobo-or-: ya 'dhuan, 'de or 'da, :An-a' 'jeh :ke, mor-: :Yusu'-: :or 'wluh-a 'Nazla, a na-dih :dha :due' :dee'.

⁶⁸Jorwor: or dhobo-ih' 'weh, or 'dae:, Deh :an za-a-', 'on se-eh 'i yubo:, 'de 'an-a' 'worn-ih' dih. :Yeh or 'da :ao', :yee' or mu 'de 'gbu worn 'i. :Yee' :soan'-beor zlo-'.

⁶⁹:Yeh or :ne-a 'o, :yee' 'nynor :dao', or 'ye-or' :neheh', 'de or :wlu 'de nyor⧾ :on :nyna-a 'o dih bo, or 'dae:, 'Yu :daa, an-a' nyor :due' :oo' :ke.

⁷⁰:Yee' :Piteh' dhobo-ih' 'weh :neheh'. :Yeh on :forn-dih:-a 'o, :yee' nyor⧾ :on :nyna-a 'o dih, on 'dae:, Keen'. :Mor, an-a' nyor :due' :oo'. Deh no-eh, :on no :Galali'i-yu:.

⁷¹:Yee' :Piteh' :zlehn-dih: deh, or 'dae:, Nyorsoa-a' dhih, dhih 'jeh :oo', 'an za-'. 'Nyi Nyorsoa 'ye 'on, :mor 'on 'tmo sih. 'Yu a 'da-a, 'on se-or yubo: 'jeh ka.

⁷²:Yee' 'do :dha :due' :dao', :soan'-beor zlo-', 'do kpor⧾-a' 'sororn' neh 'di. :Yeh :soan'-beor zlo-a, 'de jorwor: :Piteh' :po-dih: dhih :Yusu' :za-a-' :gwluhuh' bo, or no-a, :Mor :soan'-beor 'ye zlo-a' kpor⧾ 'sororn' no, :an mu 'an dhih-' dhobo:, 'do kpor⧾ taan 'di. :Yee' :Piteh' :wa worn, or 'vin-'.