Read Eastern Krahn Make 15 Bible Online

Make 15 - Eastern Krahn bible

Make 15

¹Zorn bo-mlai', :yee' Nyorsoa-a' 'slaa: :za-nyor:⧾ :klaba'⧾-: 'bluhba: :korn-nyor⧾-: nyor⧾ 'tele' :torne-nyor⧾-: 'dekorn: zabe: :zi-nyor⧾-a' klehkpeh-: on pa 'slan. 'De on san :Yusu', on kpa-or 'o Pale' ybei', 'de on za-or 'kwla.

²:Yee' Pale' dhele-or-: dih, or 'dae:, :Mor 'o :or 'dhu :Jueh'-nyor⧾-a' 'keen-' :e? :Yeh or 'da :ao', :yee' :Yusu' :wlu-', or 'dae:, :Ka :on 'da-a, 'ka-: 'o eh :ne.

³:Yee' Nyorsoa-a' 'slaa: :za-nyor:⧾ :klaba'⧾ po-or dhih :dhulu' 'dlu.

⁴'De Pale' dhele-or dih :neheh', or 'da, :On :se-' :wlu i :e? Pobo: dhih :dhulu' an po-a 'o :on 'dlu ya.

⁵Jorwor: or :se-' :wlu :chio'lo:. Eh-: no-eh, 'de Pale'-a' :porluh 'ma.

⁶:Yee' :mor 'Meh-a' :bla-dih: 'dlu dih-gor-a' ti :taa 'o nyni, zon 'o zon, :yee' Pale'-a za 'de :kasue 'di, nyor :due', :yor :Jueh'-nyor⧾-a 'yba-a.

⁷:Yee' 'yu :due' an 'da-dih-a :Bala'ba, or-: :ne 'de :kasue 'di. Ti or :ne or 'bei' :bla-dih:-a 'gomla worn, 'de on 'dba-a nyor⧾, 'do :wor on :po-dih-or 'de.

⁸:Yee' nyor⧾ :doru' :dao', on mu 'de Pale' bo, 'de on dhele-or dih or 'ye deh or no-a, :mor 'Meh-a' :bla-dih: 'dlu dih-gor-a' ti :taa 'o nyni, or 'ye-eh' no.

⁹:Yeh on dhele-or dih, :yee' or 'da, A 'bhorn 'on 'ye :Jueh'-nyor⧾-a'a: 'keen dih 'tali: 'do a bo, or 'ye mu :e?

¹⁰Deh :korn-a dhih or dhele-uh-a deh :daa dih, eh-: 'dhu, or yubo-eh' :ka eh 'dhu-a :gwlehehn'-', :eh no-eh, 'de Nyorsoa-a' 'slaa: :za-nyor:⧾ :klaba'⧾ :za-a :Yusu' 'kwla 'de or bo.

¹¹Jorwor: Nyorsoa-a' 'slaa: :za-nyor:⧾ :klaba'⧾ 'dhu-dih: nyor⧾ :dao'-: worn 'gabaa, on 'ye :Bala'ba 'yba 'de or bo, or :ne-' :Yusu' dih 'tali:.

¹²'De Pale' 'da :dele' ka, :Yee' 'yu :daa a 'da-dih-a :Jueh'-nyor⧾-a' 'keen, :kaa 'on 'ye or-a' dhih no :eh?

¹³:Yee' an po 'geh⧾, an no, :Kor-dih-or 'o tu 'i o.

¹⁴'De or 'da, :Eh :korn dhih :eh? :A 'ye deh-zon: or no-a 'dee. :Yeh or 'da :ao', :yee' an-a' 'geh⧾ :po-eh 'kpa 'de de dih, an no, :Kor-dih-or 'o tu 'i o.

¹⁵:Yee' :ka or 'bhorn-a or 'ye-a' nyor⧾ :doru' :dao' an-a' :porluh⧾ dih 'pehn-dih:, :yee' or :za 'de :Bala'ba 'de :kasue 'di 'weh, 'do on bo. 'De or no-eh, or-a'a: sorye' bla :Yusu', 'de or za-or 'kwla, on 'ye-or' 'o tu 'i :kor-dih:.

¹⁶:Yeh Pale' :za-a :Yusu' 'kwla, :yee' sorye' :dao', on kpa-or 'o Pale'-a'a: 'sla ybei', 'de on gweh on 'bei' sorye'-a' klehkpeh de.

¹⁷:Yee' on :pa-dih-or' :gba 'vuu: :on :kpe-a gbor. On gle 'wu⧾-a' 'gbeheh:, :ka 'keen :gblaa' :ne-a, eh-: on 'dhu 'o or 'dlu.

¹⁸'De an tba-dih-or son⧾ 'i, an no, :Gwle 'kmo o, :Jueh'-nyor⧾-a' 'keen.

¹⁹:Yee' an bla-dih-or sene'eh 'dlu, an gba-or :dhehmeh ya, 'de an bla 'koor-dlu⧾ 'yi glu, 'do or 'zorn, on 'da an 'ye-or' deh.

²⁰:Yeh on gweh-a or-a' :goba'-dhih ken dih 'wluh-dih-eh 'i, :yee' on za-or :gba 'vuu: :dao'-: dih, 'de on :pa-dih-or or-a' 'jeh-a'a: 'tiei-', on kpa-or, on 'ye-or' 'o tu 'i :kor-dih:.

²¹:Yeh an mu-a, :yee' 'do :gwie 'i, 'do :wor on :yeh-dih: 'yu :due' ken, an 'da-dih-a Samor' :or 'ti-a :Sali'na-gwlor 'di :dee', 'de :or no-a 'Ehleza'na-: 'dekorn: 'Wlufor-: on :baa'. Or 'wluh 'de :gbalie 'i, or zi-' :dee'. Or-a' 'jeh :dao', or-: on :kpa-dih: 'kpih, :or 'ye :Yusu'-a'a: 'klorse tu 'ble 'do or bo.

²²'De on kpa :Yusu' 'do :dha an 'da-dih-a :Gorgor'ta, :eh :bleh-dih:-a 'i, Nyor-dlu-kpaa'-tluh:.

²³:Yeh on nyni-a 'o, :yee' on 'nyi-or nomor on po-a 'mina bo, :en pa-dih-a nyor⧾-a' ku 'dli-', or 'ye 'na, or :ne-' or-a' ku worn yubo:, jorwor: or :se-or' 'na.

²⁴:Yee' on :kor-dih-or 'o tu 'i. 'De on vorn :nobo, on 'ye deh nyor :due'-a mu-a :kpa yubo:. 'Ka-: on no or-a'a: paa-tiei-a' gble-a'.

²⁵:Glaa'e-yluh bo :oo', on :kor-dih-or 'o tu 'i.

²⁶Deh :korn-a dhih on 'dba-or, eh-: on 'chle 'do 'klorse tu 'i, on 'da, :Jueh'-nyor⧾-a' 'keen :oo'.

²⁷:Yee' 'ylii'-nyor⧾ 'sororn', mo-: :ne or :kor-dih-eh: 'o tu 'i, :dha :due'. :Due' :ne 'de or-a' :dila bo, 'de :due' :ne 'de or-a' kona bo. [

²⁸:Yee' Nyorsoa-a' 'chlee-deh 'kpa-' dhih 'jeh, :eh no-a, An mu-or 'tele' :wa-nyor⧾ :zlo-dih:.]

²⁹:Yeh nyor⧾ :an zi-a, on 'ye-or, :yee' an du 'dlu⧾ 'i, an wla-dih-or', an no, :Ehn 'hehehn:. :Mor, :or no-a :or mu-a Nyorsoa-a' 'sla ya :gba, 'de :or 'ye-or' po :neheh', 'do 'we taan 'di,

³⁰:za-dih: :an-a' 'jeh-', :on 'ye 'dhle, :on 'ye 'o tu 'i 'wluh.

³¹'Ka-: Nyorsoa-a' 'slaa: :za-nyor:⧾ :klaba'⧾-: 'dekorn: nyor⧾ 'tele' :torne-nyor⧾-: an no, an wla-dih-or 'de an-a' 'jeh 'nyne-', on 'da, Or 'puh-dih: nyor⧾, jorwor: or se or-a' 'jeh-a' 'puh-dih-eh 'beh-dih:.

³²'Nyi Nyorsoa-a' 'taan'-yu :or 'dhu-a 'Ezlea-nyor⧾-a' 'keen-', or 'dhle, or 'wluh 'o tu 'i :naa, :a 'ye-eh' 'ye. :Mor :a 'ye-eh, :yee' :a mu-or dhih 'jeh-' :po. :Yee' nyor⧾ :on :ne :Yusu' :kor-dih-eh: 'o tu 'i, :dha :due', mo-: :an po-or wlu⧾ 'bhun dih :ke.

³³:Yee' :yeh eh no-a 'yluh-gbao', :yee' glu-tile gor-' 'do 'bluhba-dlu: :dao', an-a' klehkpeh ken, 'de eh :yeh-dih: 'gwie-yluh bo ken.

³⁴:Yeh eh no-a 'gwie-yluh bo, :yee' :Yusu' po 'geh, or 'dae:, 'Iloi:, 'Iloi:, 'dama: :sabata'ni:, :eh :bleh-dih:-a 'i, 'An Nyorsoa, 'an Nyorsoa, :eh :korn dhih 'de :an za 'on 'yli-eh dih :eh?

³⁵:Yee' nyor⧾ :on :nyna-a 'o dih, an-a' :noo' :on 'worn-ih'-a, on 'da, A :to :dou'⧾, or wele :Ila'yor:.

³⁶:Yee' an-a' nyor :due' kpa ple-a', 'de or mu, or po :fuu'u 'de 'dli-' :pa-nomor bo, 'de or 'dhu-uh 'o tu 'i, or 'tuh-uh 'o :Yusu' worn 'i, or 'ye-or' 'na. :Yeh or 'tuh-uh-a 'o, :yee' or :wlu-', or 'dae:, A 'bor, a 'nyi, :a pobo: 'o, :eh beh :Ila'yor-a mu 'de :yi, or 'ye-or' 'o tu 'i :za :eh?

³⁷:Yee' :Yusu' po 'geh, 'de or chehn :febeh' 'i.

³⁸:Yeh or 'meh-a, :yee' 'yli-eh: on po-a yai' 'de Nyorsoa-a' 'sla 'zorn, eh 'klae: dih, eh 'wluh 'for⧾ 'sororn'. Eh :za 'de dih 'klae-eh 'dlu bo, 'de eh nyni 'de eh-a' 'zorn ne.

³⁹:Yee' :yeh sorye'-a' nyor :klaba' :or pobo-a :Yusu' ya, or 'ye-a :ka or no-a :febeh' 'i :chehn-eh, :yee' or 'da, Keen', dhih 'jeh, 'yu :daa, Nyorsoa-a' 'Yu :oo'.

⁴⁰:Yee' 'nynor⧾-kpao'⧾ :on :ne-a 'o, 'de :an pobo-a 'de, 'de on 'klu-', 'do :wor :Mehle' :or 'wluh-a :gwlor an 'da-dih-a :Magala'-: :Salo'mi-: 'dekorn: :Mehle' :or 'wluh-a 'Jeen: 'zeehn-: :korn :Jose'-: on :ne.

⁴¹'Nynor⧾-kpao'⧾ :daa, an zi 'o :Yusu' klei', 'de an za-dih-or', ti or :ne-a :Galali'i :dee'. :Yee' 'nynor⧾-kpao'⧾ :dhulu' :noo' :on zi-a 'o or klei', ti or yi-a :Julu'slehn, mo-: :ne 'o :ke.

⁴²:Yee' eh no Nyorsoa-a' :gwlee-we-eh-a' 'tiei-a' 'kpa :po-zorn:, :yeh eh 'ye-a' 'gwie-yluh bo no,

⁴³:yee' 'Joseh: :or 'wluh-a :gwlor an 'da-dih-a Amati'a 'di, :or no-a :Jueh'-nyor⧾-a' zabe: :zi-nyor, nyor⧾-a 'ye-a deh-', :or fuo-a ti Nyorsoa-a mu-a nyor⧾ wlu 'ken :korn 'ken, or-: :ku :gwluhuh', :or mu 'de Pale' bo, :or dhele-or dih, or 'ye-or' :Yusu'-a' 'ku 'nyi.

⁴⁴:Yeh or 'da :ao', :yee' eh 'gele: Pale'-: dih :ka :Yusu' 'meh-a, 'de or 'da sorye'-a' nyor :klaba', or dhele-or dih :eh beh or 'meh 'jeh ka :eh?

⁴⁵:Yeh sorye'-a' nyor :klaba' zela-or :gwluhuh' :ka :Yusu' 'meh-a, :yee' Pale' zela: 'Joseh-: :gwluhuh' or 'ye or-a' 'ku kpa.

⁴⁶:Yee' 'Joseh dhen 'nena-yli-eh:, 'de or :za 'o :Yusu'-a' 'ku 'do tu 'i, or bhian-dih-uh 'yli-eh: :dao' kle-' dih, 'de or po-uh 'de nma-dih-deh: :eh no-a 'soba 'di. :Yee' or klibo: sobu', mo-: or no, 'de or kan 'o nma-dih-deh worn 'i.

⁴⁷:Yee' :Mehle' :or 'wluh-a :Magala'-: 'dekorn: :Jose' 'de :Mehle'-: on 'ye :dha on 'pehn-dih:-a or-a' 'ku dih 'weh.