Read Eastern Krahn Make 3 Bible Online

Make 3 - Eastern Krahn bible

Make 3

¹:Yee' :Yusu' mu 'de 'di :gweh-dih-sla 'zorn-: de, :neheh'. 'Do :wor or :yeh-dih: 'yu :due' :or :korn-a son 'meh-a.

²:Yee' an pobo-or-: ya, on 'ye-eh' 'ye, :eh beh or mu 'yu :dao' 'puh-dih: 'do Nyorsoa-a' :gwlee-we-eh 'di-:, 'de on 'ye-or' 'tele' dih :kpon-dih: 'do deh-zon: :no-eh bo.

³:Yeh an pobo-a 'o, :yee' or :wlu-' 'de 'yu :or :korn-a son 'meh-a bo, or 'dae:, 'Yle. Yi 'noror nyor⧾ ybei'.

⁴:Yeh 'yu mu-a, 'de or :nyna-a dih, :yee' :Yusu' dhele-uh-: dih, or 'dae:, Eh :ne 'o :a-a'a: 'tele'-a' :gwie 'i 'weh, nyor 'ye nyor-' :za-dih: 'do Nyorsoa-a' :gwlee-we-eh 'di :e? :Ae' nyor 'ye deh-zon no? Eh :nmor-: 'yi nyor 'ye nyor-a' :febeh' zelie: :e? :Ae' nyor 'ye nyor 'dba ke? :Yeh or dhele-uh-a dih, :yee' an-a' nyor :se-' :wlu.

⁵:Yee' :yeh or pobo:-a an-a' klehkpeh ya, 'de an-a' 'worn, an-a' :wlu-a, :yee' or 'kpa-' 'chehn. Jorwor: or 'ye an-a' :wehlih:, 'do an-a' 'dlu⧾-a' :kmu-a' bo, 'de or :wlu 'de son-a' 'meheh'-yu: :dao' bo, or 'dae:, Slo :an-a' son. 'De or slo-uh. :Yee' or-a' son 'bor-'.

⁶:Yeh :Falasi'i-nyor⧾ 'ye-a deh :dao', :yee' on 'si-: 'zorn. 'De mo-: 'dekorn: :Hehlo'-a'a: bo :na-nyor⧾-: on 'dhu dhih, 'do :dha :due' :dao', :ka on 'ye-a' :Yusu'-a' 'dba-a' no.

⁷:Yee' :yeh :Yusu'-: 'dekorn: or-a'a: bo :na-nyor⧾-: on 'wluh-a 'o, :yee' on mu 'de :Galali'i-yobo'-pehnu worn 'i. :Yeh an mu-a, :yee' nyor⧾ :doru', mo-: 'wluh :Galali'i-bluhba ken, mo-: zi 'o on klei'. 'De nyor⧾ :dhulu' :noo' 'wluh :Judi'a-bluhba ken-:

⁸:Julu'slehn-: 'Idumi'a-bluhba ken-: 'bluhba-a' 'for :or :ne-a 'de 'Jorle-ni-a' 'yluh-a' 'kwla 'wluh-dih: 'da worn dih-: 'dekorn: 'bluhba-a' 'for⧾ :eh :ne-a 'Taya-gwlor-: 'dekorn: 'Saedorn-gwlor 'de dih-:. Nyor⧾ :dhulu' :daa, deh⧾ or no-a, me-: on 'worn, eh-: :korn dhih on yi 'de or bo.

⁹:Yeh nyor⧾-a dhie-a 'i, :yee' or zela: or-a'a: bo :na-nyor⧾-: :gwluhuh', on 'ye 'de 'blagbe 'di 'kpa po 'do or bo, 'de nyor⧾ :ne-or' 'dlu dih :gweh-dih:.

¹⁰Deh no-eh, or 'puh-dih: puhba-nyor:⧾ :dhulu', :yee' :ka nyor⧾ :an puhba-a, on 'worn-ih'-a, :yee' on yi 'de or bo, 'de an vorn on 'ye-or' dih 'tuh.

¹¹:Mor 'kwla 'ye-dih-deh:⧾ :en :ne-a 'o nyor⧾ 'de, en 'ye-or, :yee' en bla en-' 'jeh-: dih 'do or ybei', 'de en po 'geh⧾, en no, :Mor, Nyorsoa-a' 'Yu :oo' o.

¹²:Yee' or 'dhu-ih 'slen deh 'jeh, en :ne-eh' no, 'de nyor⧾ :ne-' nyor or 'dhu-eh:-' yubo:.

¹³:Yeh :Yusu' 'wluh-a 'o :Galali'i-yobo'-pehnu worn 'i :dao', :yee' or mu 'de tluh ken, 'de or 'da nyor⧾ or 'bhorn-a, 'do or bo. :Yeh on yi-a 'de,

¹⁴:yee' or :za 'de on 'klu-' nyor⧾-a' :bhue: 'yor 'sororn' or 'da-dih-a or-a'a: dboo-nyor⧾. :Yeh or gan-a nyor⧾ :dao', :yee' or :wlu-' 'de on bo, or 'dae:, 'On gan a 'weh a 'ye 'on bo :na, 'on 'ye a dbo a 'ye Nyorsoa-a' wlu kpa.

¹⁵'An mu a 'kpih 'nyi-:, a 'ye 'kwla 'ye-dih-deh⧾ 'do nyor⧾ 'de :za.

¹⁶Nyor⧾ or 'duo:-a-', an-a' 'nyne :wor :dhe dih. Samor' or 'dhu-dih:-a :Piteh'-nyne-:

¹⁷:Zehbehli'-a'a: 'nynuu 'Jeen-: :korn or-a' dei' :Jororn'-: :on :ne-a 'sororn', or 'dhu-dih:-a Bona'yi-nyne, :en 'dhu-a 'ni-a' 'gbuu'-nyor⧾-nyne-',

¹⁸Andlu'-: Felor'-: :Batale'meor-: Matio'-: :Tormor'-: 'Ehfea-a'a: 'yu 'Jeen-: 'Talior-: :korn Samor' :or no-a or-a'a: 'bluhba-dlu-a' dhih :vorn-nyor-:

¹⁹'dekorn: :Juda' :Ehkeh'lior-: :or plo-a :Yusu'.

²⁰:Yee' :Yusu' mu 'de 'gbu-: de, 'de :gwlor-nyor⧾ :gweh de 'do mor :neheh'. Eh-: no-eh 'de or-: or-a'a: bo :na-nyor⧾-: on se 'beh-dih: on 'ye deh di-a' 'jeh :sloror'.

²¹:Yee' :yeh or-a'a: nyor⧾ 'worn-ih'-a, :yee' on mu-or 'o 'weh, on 'ye-or' wlu 'ken :korn. Deh no-eh, on 'da, Sena-a: no-or.

²²Nyor⧾ 'tele' :torne-nyor:⧾ :on 'wluh-a :Julu'slehn, on 'dae:, :Behzeh'bu: 'o, :on no-a 'ku, mo-: :ne 'o or 'de. 'Kwla 'ye-dih-deh: :klaba' :oo', eh-: 'nyi-or 'kpih, 'de or za nyor⧾ 'kwla 'ye-dih-deh⧾ 'de.

²³:Yeh or 'worn-ih'-a, :yee' or 'da nyor⧾-a' klehkpeh :on :ne-a 'o 'weh, 'de or po 'dlan, or dhele-uh dih, or 'da, :Kaa 'ku-a mu an-a' 'jeh dih :no-eh :no :eh?

²⁴:Mor 'bluhba-dlu :za an-a' 'jeh 'sororn', 'de on 'ye an-a' 'jeh bo vorn, :yee' 'bluhba-dlu: :dao', on se dih :nyna-eh 'beh-dih:.

²⁵:Mor 'cheh-buh :za an-a' 'jeh 'sororn', 'de on 'ye an-a' 'jeh bo vorn, :yee' 'cheh-buh: :dao', on se dih :nyna-eh 'beh-dih:.

²⁶:Mor 'ku :za an-a' 'jeh 'sororn', 'de on 'ye an-a' 'jeh bo vorn, :yee' on :se-' dih :nyna-eh 'beh-dih: i, an-a' 'kpih-a mu worn :gweh.

²⁷Nyor se 'beh-dih: or 'ye :kmuu-nyor-a'a: 'gbu wa, 'de or 'ye or-a'a: 'tiei-' 'duo:. Jorwor: :mor or 'ye-eh' no, or mu :kmuu-nyor: :dao' :san :weh, 'de or 'ye or-a'a: 'tiei kpa.

²⁸Dhih 'jeh, 'an zela a :gwluhuh', nyor⧾-a' deh⧾-zon⧾-a' klehkpeh-: 'dekorn: Nyorsoa-a' 'nyne 'kor-dih-eh-: en mu bo 'ma-dih-eh:.

²⁹Jorwor: nyor-beh: :or 'kor-dih:-a Gban 'i :ne :Zulu-a' 'nyne, or-a' deh⧾-zon⧾ 'se 'ba bo 'ma-dih-eh, :ka ti-a mu-a 'dlu-' :tehn. Deh no-eh, or no deh-zon: :klaba' :eh mu-a 'o or 'dlu :ne, :ka ti-a mu-a 'dlu-' :tehn. (

³⁰Deh :korn-a dhih or :za-a deh :daa-', eh-: 'dhu, on 'da or 'ble 'kwla 'ye-dih-deh:.)

³¹:Yee' :Yusu' 'de-: 'dekorn: or-a' dei'-nyor⧾-kpalu⧾-: mo-: yi 'o or bo, 'de on :nyna dih 'do 'zorn, on dbo 'de or bo 'gbu 'di wlu.

³²:Yee' nyor⧾ :doru', mo-: 'gola-or 'de dih, 'de on zela-or :gwluhuh', on 'da, :On 'de-: 'dekorn: :an-a' dei'-boi'-: mo-: :ne 'de 'zorn, :an dhele :an-a' dhih dih.

³³'De or dhele-uh dih, or 'dae:, :Or 'dhu 'on-de-' :eh? :Or 'dhu 'an dei'-boi'-' :eh?

³⁴'De or pobo: nyor⧾ :on 'gola-or 'de dih ya, or 'da, 'On-de-: 'dekorn: 'an 'de-di'-boi'-: mo-: :dhe dih.

³⁵Nyor :or no-a Nyorsoa-a' 'ton :korn-deh, or-: 'dhu 'an 'de-di'-boi'-: 'dekorn: 'on-de-:-'.