Read Eastern Krahn Make 4 Bible Online

Make 4 - Eastern Krahn bible

Make 4

¹:Yee' :Yusu'-a torne nyor⧾ deh :neheh', 'de :Galali'i-yobo'-pehnu worn 'i. :Yeh or kpa-eh 'dlu bo, :yee' :gwlor-nyor:⧾ :doru', mo-: 'gbo-dih-or 'dlu dih. Eh-: no-eh, 'de or 'kpa 'de 'blagbe 'di 'de 'ni ken, 'do :wor or :dhe dih, 'de an-a' klehkpeh gban-dih: 'ni worn dih.

²Or torne-uh deh⧾ :dhulu' 'de 'dlan⧾ 'di. :Yeh or torne-uh-a deh, :yee' or 'dae:,

³A :to :dou'⧾ o. 'Yu :due' :oo', or-: mu deh⧾-yor: :gba 'da.

⁴:Yeh or gba-ih-a 'de 'gle, :yee' :nee' 'kpa 'o :gwie 'i, 'de neme 'yle, en mla-ih.

⁵:Nee' 'kpa 'o 'bluhba ken, :or :ne-a 'soba 'zorn. :Yeh en 'kpa-a 'o, :yee' en 'dhobo: en 'wluh-'. Deh no-eh, 'bluh :dhulu' se 'o :ne.

⁶Jorwor: :yeh 'yluh :kma-a 'i, :yee' en wlor-', :ka en-' buh⧾ se-a :dha :dhorno' mu 'de glu, :yee' en 'klan-'.

⁷'De :nee' 'kpa 'de 'wu⧾-kwla 'nyne-'. :Yeh 'wu⧾ ku-a, :yee' en :mla-dih-ih-: worn, 'de en :se-' wa.

⁸Jorwor: :nee' 'kpa 'o 'bluhba: 'jeh ken, me-: me, 'de :en ku, 'de :en wa. :Yeh en wa-a, :yee' :nee' po 'yor-a' :kwlaa taan, :nee' po :kwlaa :meheh'lo:, 'de :nee' po :kehehn' :due'.

⁹'Do 'dlan-a' 'dlu-' :jla 'da, :yee' or 'dae:, Nyor :or 'ble-a :dou'⧾ :or 'ye-a' dhih 'worn, 'nyi or 'worn-ih.

¹⁰Ti :Yusu' se-a 'de nyor⧾ 'sluh⧾ 'klu-' :ne, 'de or :ne-a 'de or-a'a: klei' :zi-nyor:⧾ :noo'-: 'dekorn: or-a'a: bo :na-nyor⧾-: 'nyne-', :yee' on dhele-or-: dih 'dlan⧾ or po-a, or 'ye-ih' gbor :za 'de on bo.

¹¹'De or :wlu 'de on bo, or 'dae:, Nyorsoa-a' nyor⧾ wlu 'ken :korn-eh-a' 'slan :za-eh: gbor 'de a :mor :mloror' bo. Jorwor: nyor⧾ :yuh :on se-a 'de :a 'di :ne, deh⧾-a' klehkpeh :ne 'de 'dlan⧾ 'di, 'de on bo.

¹²Eh-: no-eh, 'de :Mor on pobo: dih, 'de an-a' 'ye dih. :Mor on :to :dou'⧾, 'de an-a' 'worn deh-' dih, 'de on :ne 'de Nyorsoa bo 'bili:, 'de or :ne-' an-a' deh⧾-zon⧾-a' dhih bo 'ma-dih:.

¹³:Yee' :Yusu' dhele-uh-: dih, or 'da, A :se-' 'dlan :daa dih 'worn :e? :Yee' :kaa a mu 'dlan⧾-a' klehkpeh-' dih 'worn-eh :no :eh?

¹⁴'Yu :or gba-a deh⧾-yor, or gba Nyorsoa-a' wlu.

¹⁵Nyor⧾ :noo' gweh deh⧾-yor: :or 'kpa-a 'o :gwie 'i. :Yeh on 'worn-ih'-a, :yee' 'ku yi-: 'de, 'de on :za 'o wlu :on :gba-eh 'do on :porluh⧾ ken.

¹⁶Nyor⧾ :noo' gweh deh⧾-yor: :or 'kpa-a 'o 'bluhba: :or :ne-a 'soba 'zorn ken. :Mor on 'worn Nyorsoa-a' wlu, :yee' 'do :dha :due' :dao', on kpon-uh-: dih 'do :porluh⧾-a' dih 'pehn ka 'di.

¹⁷Jorwor: on se deh-' dih 'worn-eh: 'jeh 'ble 'de on 'di, :yee' on gweh deh⧾-yor: :or :korn-a buh⧾ se-a :dha :dhorno' mu 'de glu, :yee' an-a' :gwle 'o 'do ti :dhorno'⧾ 'di. :Mor 'worn dih 'beh-eh 'yle, 'de 'kle 'ye-eh 'ye 'de yi, 'do Nyorsoa-a' wlu-a' dhih bo, :yee' 'do :dha :due' :dao', on ple-', on 'tali: Nyorsoa-deh-: dih.

¹⁸Nyor⧾ :noo' gweh deh⧾-yor: :or 'kpa-a 'de 'wu⧾-kwla 'nyne-'. Mo-: gweh nyor⧾ :on 'worn-a Nyorsoa-a' wlu.

¹⁹Jorwor: 'kmo bo-deh:⧾, me-: 'beh-dih an-a' :porluh⧾ 'worn dih. :Ka on 'ye-a' no, 'de on 'ye-a' bhan, eh-: 'da-dih-uh 'yi. Deh⧾ :dhulu', me-: an 'bhorn 'gabaa. Deh⧾-a' klehkpeh :daa, me-: 'yle, :en kpon Nyorsoa-a' wlu :bhluun' 'worn dih, :yee' :ka on 'ye-a' no, 'de on 'ye-a' 'yor po, ka se :ne.

²⁰Jorwor: nyor⧾ :noo' gweh deh⧾-yor: :or 'kpa-a 'o 'bluhba: 'jeh ken, :on 'worn-a Nyorsoa-a' wlu, 'de :on 'duo-uh-a-' 'do on :porluh⧾ ken. :Ka deh⧾-yor: :or po-a 'yor-a' :kwlaa taan-: :kwlaa :meheh'lo-: 'dekorn: :kehehn' :due'-: or :ne-a, 'ka-: on :ne.

²¹:Yee' :Yusu'-a kpa or-a' wlu 'dlu bo, or 'dae:, A 'ye nyor :zai', or tba 'nape, 'de or po-eh 'de :yabe 'zorn :weh :e? :Ae' 'de or dhe-eh dih 'de ken 'pehn-deh 'zorn ke? 'Nape se 'o :dha 'nape-a dhe-a dih :korn :e?

²²Deh :eh 'zile-eh, eh :korn eh 'ye ken :nyeh. 'De deh :eh :kan-eh worn 'i, eh :korn eh 'ye 'o zorn-pli 'i yi.

²³Nyor :or 'ble-a :dou'⧾ :or 'ye-a' dhih 'worn, 'nyi or 'worn-ih.

²⁴'De or zela-uh :gwluhuh', or 'dae:, A :to :dou'⧾ deh 'jeh, 'do deh⧾ a 'worn-a, 'do en bo. :Ka a no-a a 'bei'-a' ne-a' :yba-dih-eh, 'ka-: Nyorsoa-a mu a-a' ne-a' :yba-dih-eh :no :ke, :yee' a-a' ne-a mu 'o 'dlu dih :zi.

²⁵Nyor :or 'ye-a deh⧾ :dhulu', or-a'a: deh⧾ :dhulu' or 'ye-a, en mu ken 'kpa-:. Jorwor: nyor :or se-a deh 'ye, or-a'a: deh-yu-a' 'jeh or 'ble-a, eh mu-or 'kwa :za-eh:.

²⁶:Yeh :Yusu' po-a 'dlan :daa, or :jla-a, :yee' or po 'dlan :noror', or 'dae:, 'Ka-: Nyorsoa-a' nyor⧾ wlu 'ken :korn-eh mu-a :ne. 'Yu :due', or-: gba deh⧾-yor 'de 'gle.

²⁷:Mor glu gor, :yee' or pa-', or 'pehn-: dih. :Mor zorn zen, :yee' or 'kpa 'o dih :na 'da 'weh. :Yeh or 'si-a 'o deh⧾-a' klehkpeh :daa, en-' no 'da, :yee' deh⧾-yor: or gba-a 'de 'gle, or me-', 'de or ku. Jorwor: :ka deh⧾-yor-a no-a me-a', 'de or no-a ku-a', or se-eh yubo:.

²⁸'Bluhba:, or-: no-eh 'de deh⧾-a ku, 'de en po 'yor. :Mor nyor 'dhu deh⧾-a' 'yor, :tehn 'i-deh: en no-a, en po 'kwehn, 'de en ku. :Mor en ku, 'de en wa, 'de en 'vlu.

²⁹:Mor en 'vlu, 'de nyor :or 'dhu-ih'-a, 'de or mu, or no :faa, or chehn-ih. Deh no-eh, en-' chehehn-ti nyni 'o 'weh.

³⁰:Yee' :Yusu' dhele-uh-: dih, or 'dae:, Deh :a 'beh-dih: :a 'ye Nyorsoa-a' nyor⧾ wlu 'ken :korn-eh 'i :po-dih: :eh? 'Dlan-a' :yoror :or 'beh-dih: :or 'ye-eh' gbor :za :eh?

³¹Eh gweh :zlaan'-a' 'yor-eh:, :eh no-a 'zeehn: neh, 'de gbaa-deh⧾-yor-a' klehkpeh nyor⧾-a gba-a 'nyne-', dha 'bluhba ken.

³²Jorwor: eh-a' 'jeh :dao', :mor nyor gba-eh, :mor eh ku, :yee' eh 'beh-: 'i, eh :zi 'o gbaa-deh⧾-a' 'yor-a' klehkpeh :en :gba-eh 'weh, 'de 'dhuu'-deh⧾ 'nyne-'. 'De eh za 'gabuh:⧾ :klaba'⧾. 'Do eh-a' 'gabuh⧾-a' :pebeh'-' :dao', neme: :en zi-dih-a-' dih 'de yai', en 'beh-dih: en 'ye 'o 'dle⧾ :po-dih:.

³³:Yee' :mor :Yusu' :taa Nyorsoa-a' tubo-wlu⧾ po 'de nyor⧾ bo, :yee' 'dlan⧾ :dhulu' :en goor-dih-ih-a, me-: or po 'de on bo. Or zela-uh 'dlan⧾ on 'beh-dih:-a on 'ye-a' dih 'worn :gwluhuh'.

³⁴Or :se 'de nyor⧾ bo :wlu 'de :ka 'sluh 'di, 'dlan⧾ :due', me-: or no, 'de or wlu 'de on bo. Jorwor: :mor or-: or-a'a: bo :na-nyor⧾-: on :ne :due', 'de or wlu 'de on bo, or zela deh⧾-a' klehkpeh ken dih.

³⁵'Do 'we-eh: :dao' 'di, :yeh glu-a gor-a, :yee' :Yusu' :wlu-' 'de or-a'a: bo :na-nyor⧾ bo, or 'dae:, A zi, :a 'dhan, :a 'ye 'de :Galali'i-yobo'-pehnu 'de 'kpa.

³⁶:Yeh or zela-uh-a :gwluhuh', :yee' on sie nyor⧾ :doru' :on :ne-a 'o on bo 'weh, 'de on 'kpa 'de or bo 'blagbe 'di, on kpa-or. :Yee' 'blagbe:⧾ :nee'-a mu-' :ke.

³⁷:Yeh on :ne-a 'de 'ni ken, :yee' :pobor' :dhulu'-a: 'yle. 'De yobo'-pehnu-a' 'duh⧾-a 'kpa 'de 'blagbe 'di. :Yeh eh no :ao', :yee' 'ni-a 'bhorn eh 'ye 'de eh 'di 'yi.

³⁸:Yeh deh⧾ :daa, en mu-a 'dlu bo, :yee' or :ne 'de 'blagbe-a' :gborluh' bo, or :po deh 'dlu ken, :yee' or 'mo-'. 'De on za-or 'nyinor-', on 'da, Nyor⧾ deh :torne-nyor:, :mor 'ni kpa :a-uh, :on se 'de deh dih po :e?

³⁹:Yee' or :sorn-' 'weh, 'de or po :pobor' 'borboa' 'i, or :wlu 'de yobo'-pehnu-a' 'duh⧾ bo, or 'da, No 'dhuan. :Yee' :pobor' 'bor-', 'de yobo'-pehnu-a' 'duh⧾ no 'dhuan.

⁴⁰:Yee' or dhele-uh-: dih, or 'da, :Eh no-dih a :fano :eh? A se dhih 'jeh-' :po-eh 'ble 'gboror: :e?

⁴¹:Yeh eh no :ao', :yee' eh po-uh' :fano: 'gabaa, 'de an 'chihleh-eh 'i, an no, Deh 'i-deh-nyor: 'o, :or :dhe dih :eh, :or :korn wlu yobo'-pehnu-a' 'duh⧾-: 'dekorn: :pobor' :sloror'-: en dhe 'o dih :eh?