Read Eastern Krahn Make 5 Bible Online

Make 5 - Eastern Krahn bible

Make 5

¹:Yee' :yeh :Yusu'-: 'dekorn: or-a'a: bo :na-nyor⧾-: on mu-a, :yee' on 'si-: dih 'de :Galali'i-yobo'-pehnu 'de, 'do :Galasi'i-nyor⧾-a' 'bluhba ken.

²:Yeh on 'wluh-a 'de 'blagbe 'di, :yee' 'yu :due', or-: 'wluh 'de nma-dih-deh⧾ 'klu-', or-: 'ya-dih-uh 'i. 'Yu :daa, 'kwla 'ye-dih-deh :ne-a 'o 'de,

³:or 'ti-a 'de nma-dih-deh⧾ 'klu-', nyor se-or worn 'i 'beh-dih: :neheh'. 'De 'chen-dubu'⧾-a' 'jeh :sloror' se-or worn 'i 'beh-dih:.

⁴On po-or 'chen-dubu'⧾ son⧾-', 'de on po-or :gbolo-eh buh-', 'do kpor⧾ :dhulu' 'di. Jorwor: or zela: 'chen-a' 'jeh-: 'i, 'de or :wa-dih: :gbolo-eh dih. :Yeh or no :ao', :yee' nyor se or-a' wlu 'ken :korn-eh 'beh-dih: :neheh'.

⁵'Gwie-: :glaa'e-: or po 'geh⧾, or no sobu'⧾, or tba-dih or-a' 'jeh deh⧾ dih, 'de nma-dih-deh⧾ 'klu-'-: 'dekorn: 'de tluh⧾ ken-:.

⁶:Yee' :yeh or 'ye-a :Yusu' 'de :dha :dhorno', :yee' or ple-', or 'ya-dih-or-: 'i, 'de or bla 'koor-dlu⧾ 'yi glu 'do or ybei',

⁷or po 'geh⧾ 'gabaa, or no, :Yusu', 'yi 'beh-Nyorsoa-a' 'Yu. Deh :an 'bhorn :on 'ye 'on-' :no-dih: :eh? 'An bale :on 'weh 'de Nyorsoa-a' 'nyne 'di, :on :korn 'gen, :an-a' 'ye-dih:-' 'on 'kle o. (

⁸Deh :korn-a dhih or 'da :ao' 'de :Yusu' bo, eh-: 'dhu, :yeh :Yusu' 'ye-or :zai', :yee' or 'dae:, 'Kwla 'ye-dih-deh:, 'wluh 'o 'yu :daa 'de.)

⁹'De :Yusu' dhele-or dih, or 'da, :An-a' 'nyne :eh? 'De or 'da, 'An 'nyne :wor Sorye' :dhulu'. Deh no-eh, :a :dhie: 'i :dhih 'o :oo'.

¹⁰'De or bale: :Yusu' 'gabaa, or 'da, :On :korn 'gen. :An-a' :za-' 'kwla 'ye-dih-deh:⧾ :daa :dha 'bluhba: :daa ken.

¹¹:Yee' 'do dha-a' 'jeh :dao', :yee' :bee'⧾ :dhulu', me-: wa dih 'do tluh :gben-eh 'i.

¹²'De 'kwla 'ye-dih-deh⧾ bale-or, en 'da, Dbo 'de :a :bee'⧾ bo, :a 'ye 'de en 'di pa.

¹³:Yee' or 'worn-dih-eh ken dih 'weh. 'De en 'wluh 'o 'yu :dao' 'de, en mu, en pa 'de :bee'⧾ 'di. :Yee' :bee'⧾ :dao' :en 'beh-dih:-a :en 'ye-a' 'wlu 'sororn' no, en jla :jiin'-: glu, 'de en :za 'noror tluh :gben-eh 'i ple-a', en 'kpa 'o yobo'-pehnu worn, 'de en 'meh 'do 'nior.

¹⁴:Yee' nyor⧾ :an 'dhu-a :bee'⧾ :dao' 'yli-eh bo, on ple-', on mu 'de :gwlor-'-: 'dekorn: 'de :gbalie⧾ bo dih-: 'de an zela nyor⧾ :gwluhuh'. 'De nyor⧾ yi deh :eh :no-eh 'ye 'da.

¹⁵:Yeh on yi-a 'de :Yusu' bo, :yee' on 'ye 'yu :or 'kwla 'ye-dih-deh⧾ 'wluh-a 'o 'de 'weh, or pa deh-', 'de or :dhe dih. Or yi or-a' 'jeh bo. :Yee' eh po-uh' :fano:.

¹⁶'De nyor⧾ :on 'ye-a deh :eh :no-eh 'do 'yu-: 'dekorn: :bee'⧾ :dao'-: bo, on zela: nyor⧾-: :gwluhuh'.

¹⁷:Yee' nyor⧾ :dao', on 'kpa :Yusu'-a' bale-eh-: ken, or 'ye 'o on 'bli-bluhba ken 'wluh.

¹⁸:Yee' :yeh :Yusu'-a 'kpa-a 'de 'blagbe 'di, :yee' 'yu :dao' :or 'ble-a 'kwla 'ye-dih-deh⧾ :dee', or bale-or', or 'ye 'o or klei' zi.

¹⁹Jorwor: or :se-' 'worn, or 'dae:, Mu :gwlor-' 'de :on 'bei' bo, :on 'ye-uh' :gwluhuh' zela: deh :kolu' :Gwlor :baa' no-a 'do :on bo, :ka or no-a :an-a' :wehlih-a' 'ye-a'.

²⁰'De 'yu :dao', or mu, or :yi-dih: 'de 'bluhba-a' 'for ken :or :ne-a Gwlor⧾ :bhue: an 'da-dih-a :Deka'poli 'de dih, 'de or zela: nyor⧾ :gwluhuh' deh :kolu' :Yusu' no-a 'do or bo, eh-a' dhih. :Yee' eh 'ma-dih: 'de nyor⧾-a' klehkpeh 'di-: dih.

²¹:Yee' :yeh :Yusu' 'dhan-a :Galali'i-yobo'-pehnu :neheh' 'de 'blagbe 'di, 'de or yi-a de, :yee' nyor⧾ :doru' 'gbo-dih-or 'dlu dih. :Yeh or :ne-a 'o on worn 'i,

²²:yee' 'yu :due' an 'da-dih-a 'Jalor :or :korn-a 'de :Jueh'-nyor⧾-a' 'di :gweh-dih-sla 'zorn-a' wlu bo, or-: yi 'de or bo. :Yeh or 'ye-or, :yee' or 'jli-: dih 'do or ybei'.

²³'De or bale-or, or 'da, 'An-a: 'yu-nynor-kpao'-yu-a: puhba 'gabaa, or 'bhorn 'meh-a'. :On :korn 'gen deh 'jeh, 'yle :on 'ye-or' son⧾ ken dih tba, or 'ye 'puh, or 'ye 'kmo-' :ne.

²⁴:Yeh or bale-or, :yee' :Yusu' zi 'o or klei' 'weh. :Yeh an mu-a, :yee' nyor⧾ :doru' zi 'o or klei', an 'tun-dih dih, on 'ye-or' dih 'koan'-dih:.

²⁵:Yeh an mu-a, :yee' 'nynor :due', 'nynor-kpao'-weh-a no-a, nyomor-a 'wluh-a 'de yau-' 'do zon⧾-a' :bhue: 'yor 'sororn' 'di, or-: :ne 'o nyor⧾ :dao' 'nyne-' :ke.

²⁶Or-a' 'jeh :dao', or-: kwein: :di-nyor:⧾ :dhulu' 'ye-dih: 'kle :ye-dihih:, 'de or plo or-a'a: 'wlii-a' klehkpeh 'do kwein: :no-eh bo. Jorwor: or-a' puhba-deh-a' 'worn-dih: 'boror'-dhih, eh 'kpa 'de de dih.

²⁷:Yeh or 'worn-a :Yusu'-a' 'nyne, :yee' or mu, or :na nyor⧾ 'nyne-' dih, or 'wluh-dih: 'de or 'kpuh 'i, 'de or 'tuh or-a'a: :gba 'vuu dih :weheh:.

²⁸Deh :korn-a dhih, or no-a deh :dao', eh-: 'dhu, or :wlu-' 'de or-a' 'jeh 'di, or 'da, :Mor 'on 'tuh or-a'a: :gba 'vuu dih :sloror', :yee' 'an mu 'puh-:.

²⁹:Yeh or 'tuh-uh-a dih, :yee' 'do :dha :due' :dao', or-a' 'nynor-kpao'-weh 'bor-', :yee' or yubo-eh' 'de or-a' 'jeh 'di :ka or 'puh-a, 'de or-a' 'jeh worn 'ye-eh :jla-a.

³⁰:Yeh eh no :ao', :yee' :Yusu' yubo-eh' :ka nyor⧾ 'puh-dih-kpih 'wluh-a 'de or yau-', :yee' or 'bili:-'-: dih 'de nyor⧾ 'klu-', 'de or :wlu, or 'da :Or 'tuh 'an-a: :gba 'vuu dih :eh?

³¹:Yeh or dhele-uh-a dih, :yee' or-a'a: bo :na-nyor⧾ 'dae:, Nyor⧾ :daa :on :dhie: :ao', :an 'tun-dih-a dih, :an-a' 'ye-uh', 'de :an no, :Or 'tuh 'on dih :eh :e?

³²:Yeh eh no :ao', :yee' or pobo-: dih or 'ye nyor :or no-a deh :dao' 'ye.

³³:Yee' :ka 'nynor :dao', or yubo:-a deh :eh :no-eh 'do or bo, :yee' :fano-a: no-or, or-a' 'tiei-a tleh-', 'de or mu 'de :Yusu' bo, or 'jli dih 'do or ybei', 'de or zela-or deh⧾-a' klehkpeh :gwluhuh' :ka or no-a puhbeh-: 'dekorn: :ka or no-a 'puh-a'-:.

³⁴:Yee' :ka 'nynor jla-a, :yee' :Yusu' :wlu-' 'de or bo, or 'dae:, 'An 'yu, :an-a' dhih 'jeh-' :po-eh no-eh, 'de :an-a' 'weh 'bor. Mu :pehleh'peh:, :on 'puh-' o.

³⁵:Yeh or 'si-a 'o :wlu 'da, :yee' nyor⧾ :noo', mo-: 'wluh 'de 'Jalor 'bli 'gbu, 'de on :wlu 'de 'Jalor bo, on 'dae:, :An-a'a: 'yu 'meh-' o. :Eh :korn dhih :an 'beh-dih :a-a'a: nyor⧾ deh :torne-nyor 'worn dih :neheh' :eh?

³⁶Jorwor: :yeh :Yusu' 'worn-ih'-a, :yee' or :se-ih' :dou'⧾ bo :to. Deh or zela:-a 'Jalor :gwluhuh', eh-: 'dhu, :Fano 'bor :an-a' no-a'. Deh :due' 'suh, po-eh dhih 'jeh-'.

³⁷:Yeh or :taa 'de 'Jalor 'bli 'gbu mu, :yee' or :se-' 'worn nyor⧾ :dhulu' 'ye 'o or klei' zi. Nyor⧾ or kpa-a, mo-: 'dhu :Piteh'-: 'Jeen-: 'dekorn: 'Jeen-a' dei' :Jororn'-:.

³⁸:Yee' :yeh on nyni-a 'o, :yee' or 'ye nyor⧾ :doru', mo-: :an po 'viin'-dhlumeh'.

³⁹'De or pa 'de 'gbu 'di, or dhele-uh dih, or 'da, :Eh :korn dhih a po :dhlumeh' :eh? :Eh 'vin-dih a-uh :eh? 'Nynor-kpao'-yu: :daa, or :se-' 'meh, or 'mo-'.

⁴⁰:Yeh or 'da :ao', :yee' an 'keleh-or', 'de or po 'o an-a' klehkpeh 'zorn, or 'da 'yu 'de-: or :baa'-: 'dekorn: or-a' 'yor-eh-a'a: bo :na-nyor⧾ taan or kpa-: 'de on pa 'de :chuu: 'yu :ne-a 'di.

⁴¹:Yeh on pa-a, :yee' or kpon or-a' son-: dih, or :wlu 'de or bo, or 'dae:, Tali'ta: kumi:, :eh :bleh-dih:-a 'i, 'Nynor-kpao'-yu:, 'on 'da, :Sorn-', mu yai'.

⁴²:Yee' :yeh or :wlu-a 'de zon⧾-a' :bhue: 'yor 'sororn'-yu: :dao' :or 'meh-a bo, :yee' 'do :dha :due' :dao' or :sorn-' 'weh, 'de or na dih. :Yeh eh no :ao', :yee' eh :florn-dih-uh-: worn 'gabaa.

⁴³Jorwor: :Yusu' 'dhu-uh 'slen deh 'jeh, on :ne-' nyor-beh-nyor-beh deh :daa :gwluhuh' zela:. 'De or zela-uh :gwluhuh' on 'ye 'yu deh-beh 'nyi, or 'ye di.