Read Eastern Krahn Make 6 Bible Online

Make 6 - Eastern Krahn bible

Make 6

¹:Yee' :Yusu' 'wluh 'o :dha 'o 'weh, 'de or-a'a: bo :na-nyor⧾ zi 'o or klei', 'de on mu 'de or 'bli :gwlor-'.

²:Yeh Nyorsoa-a' :gwlee-we-eh nyni-a 'o, :yee' or 'kpa nyor⧾ deh :torne-eh-: ken 'de an-a' 'di :gweh-dih-sla 'zorn. :Yee' nyor⧾ :dhulu' :on 'worn-a or-a' wlu, eh :florn-dih-uh-: worn, 'de an no, Dha 'yu :daa or 'chean'-dih: deh⧾-a' klehkpeh :daa :eh? :Toror' :daa or 'ble-a, :toror'-a' :yor 'o :eh? :Eh no 'de or no :ao' deh⧾ :kolu'⧾-a' no-a', deh :dao' :eh?

³Eh :se :Mehle'-a'a: 'yu, :or no-a tu⧾ :bha-nyor :e? Eh :se 'Jeen-: 'Joseh-: :Juda'-: 'dekorn: Samor'-: an-a' 'de-di' :e? Eh :se or-a' dei'-nynor⧾-kpao'⧾, mo-: se dha :a bo :ne :e? :Yee' nyor⧾ :ne-a 'de 'sla :dao' 'zorn, on :se-' or-a' dhih 'worn-dih:.

⁴'De :Yusu' :wlu 'de on bo, or 'dae:, Nyor⧾ 'sluh⧾-a 'ye Nyorsoa-a' wele-eh: :po-nyor deh-' 'weh. Jorwor: nyor⧾ :on :ne-a 'o or 'bli :gwlor-'-: or 'bli 'gbu-: 'dekorn: or-a' 'wluh-a-nyor⧾-: an-a' 'ye-or deh-'.

⁵:Yee' :Yusu' se 'beh-dih: or 'ye deh⧾ :kolu'⧾ no 'do :dha 'o. Jorwor: deh :due' or no-a, eh-: 'dhu, or tba puhba-nyor⧾-a' kpor son⧾ ken dih, 'de or 'puh-dih-uh.

⁶Or-a' :porluh 'ma-'. Deh no-eh, on :se-or' dhih 'jeh-' po. :Yee' :Yusu' mu :gwlor⧾ :nyene' :eh :ne-a 'Nazla-gwlor 'de dih, 'de or torne nyor⧾ deh.

⁷'De or 'da or-a'a: bo :na-nyor:⧾ :on :korn-a :bhue: 'yor :ne-a 'sororn', 'do or bo, 'de or dbo an-a' 'sororn', 'sororn' deh⧾-' dih. Or 'nyi-uh 'kpih 'do 'kwla 'ye-dih-deh⧾ ken.

⁸'De or dhe-uh 'tele' 'i, or 'da, :Dha a mu-a, nyor-a' :kpa-' deh o. Deh⧾ :tba-tu⧾ :due', me-: a 'ye kwa 'ble. Nyor-a' :kpa-' 'bhlee, nyor-a' :kpa-' 'tiei 'di :po :gleu', nyor-a' :kpa-' 'wlii 'de or 'paa-dih-'.

⁹:Buhbuh:⧾, me-: a 'ye buh⧾-' 'dhu. Jorwor: a-a' :kpa-' 'wla :noror'.

¹⁰'Gbu a 'si-a :gwlor-' dih a :ko-dih:-a 'di, mo-: a 'ye 'di dih :dhe :chio'lo:, a 'ye 'o :gwlor :dao' 'di 'wluh.

¹¹:Mor nyor⧾ se a dih kpon, 'de mor on se a-a' wlu :dou'⧾ bo :to, :yee' a 'tali: :gwlor :dao' dih, a 'gbabo: :buhbuh⧾ 'zorn dih, a 'ye 'o 'wluh, eh 'ye-uh 'i :to-dih: :ka Nyorsoa :za-a an-a' deh son 'di.

¹²:Yeh or dhe-a or-a'a: bo :na-nyor⧾ 'tele' 'i, :yee' on mu-', 'de an po Nyorsoa-a' tubo-wlu⧾ 'de nyor⧾ bo on 'ye-' dih 'bili: 'do an-a' deh⧾-zon⧾-a' dhih bo.

¹³'De on :za nyor⧾ 'kwla 'ye-dih-deh⧾ 'de, on po puhba-nyor:⧾ :dhulu' 'chlan 'dlu, on 'puh-dih-uh.

¹⁴:Yee' 'Keen :Hehlo' 'worn :Yusu'-a' 'nyne 'weh. Deh no-eh, or-a' 'nyne gweh 'o 'bluhba-dlu: :dao' ken-: 'dlu. :Yee' nyor⧾ :noo' 'dae:, Nyor⧾ 'ni 'dlu :po :Jororn' :oo', :or 'wluh 'de nma-dih-deh 'di. Eh-: no-eh, 'de or 'ble 'kpih, or no nyor⧾ 'di dih 'ma-dih-deh⧾ deh :dao'.

¹⁵:Yee' nyor⧾ :noo' 'da, :Ila'yor: 'o. 'De nyor⧾ :noo' 'da :neheh', Or gweh Nyorsoa-a' wele-eh: :po-nyor: soa :due'.

¹⁶:Ka 'Keen :Hehlo' 'worn-ih'-a, :yee' or 'da, :Jororn' :or :korn-a 'dlu 'on chehn-a 'o, or-: 'o, :or 'wluh 'de nma-dih-deh 'di.

¹⁷Deh :korn-a dhih or 'da :ao', eh-: 'dhu. Or-a' 'jeh 'yor-eh: 'nyi nyor⧾ 'tele', 'de on kpon :Jororn', on san-or, 'de on po-or :kasue 'di see. Or no deh :daa 'weh, 'do :Hehlo'dia-a' dhih bo, :or :Hehlo' :za-a or-a' dei' Felor' 'kwa, 'de or :korn-a :naa.

¹⁸:Jororn' za-eh' 'weh :dee' see, 'de :Hehlo' bo, 'do kpor⧾ :dhulu' 'di, or 'dae:, Eh se 'o :a-a'a: 'tele'-a' :gwie 'i :ne, nyor 'ye or-a' 'de-di' :yi-nyor 'nynor 'kwa :za.

¹⁹:Yeh :Jororn' :za-a deh :daa-' 'de :Hehlo' bo, :yee' :Hehlo'dia 'kpa-dih: :Jororn'-' 'chehn 'gabaa, or 'ble-dih-or 'di dih, or 'bhorn or 'ye-or' nyor⧾ ya po on 'ye-or' 'dba. Jorwor: or se eh-a' 'kpih 'ble.

²⁰Deh no-eh, :Hehlo'-a ple :Jororn'-a' :fano:, 'de or-a' 'worn nyor-a' :no-dih-or deh-'. 'De mor or yubo-eh' :ka :Jororn' no-a 'yi 'sleh-nyor, 'de or :ne-a gban 'i. 'Do ti-a' klehkpeh bo, :mor or 'worn :Jororn'-a' wlu, :yee' or-a' :porluh-a 'beh-dih-or 'worn dih, jorwor: or to or-a' wlu :dou'⧾ bo 'weh, 'de :porluh-a' dih 'pehn ka 'di 'gboror:.

²¹:Yee' 'we-eh: :Hehlo' 'wluh-dih:-a-', eh-: nyni 'o, 'de or 'da gor, or 'da 'kwi⧾ :klaba'⧾ :on :ne-a 'o or 'zorn-: :janbe-boi'-: 'dekorn: nyor⧾ :klaba'⧾ :on 'wluh-a :Galali'i-bluhba ken-: mo-: :ne 'o. 'Do 'we-eh: :dao' 'di, 'do :wor :Hehlo'dia 'ye-dih: :ka or 'ye-a' no, 'de or 'ye-a' :Jororn' 'dba.

²²:Yeh nyor⧾ :gweh-a de, :yee' :Hehlo'dia-a'a: 'nynor-kpao'-yu 'kpa 'o :gwlea 'weh, 'de or ye, or 'pehn-dih: :Hehlo'-: 'dekorn: nyor⧾ or 'da-a, an-a' :porluh⧾ dih 'gabaa. Eh-: :korn dhih, 'de :Hehlo' dhele-or dih, or 'da, Deh :an 'bhorn :eh? :Wlu. Deh-beh-deh-beh: :an 'bhorn-a, 'an mu-eh :on 'nyi-:.

²³'De or :zlehn-dih: deh, or 'dae:, Deh-beh-deh-beh: :an mu-a 'on 'yba-dih:, 'an mu-eh :on 'nyi-:, eh-a' :yeh 'dhu, 'on 'ye 'an-a: 'bluhba-dlu :gwluhuh' 'beh-dih:, 'on 'ye or-a' 'for :on 'nyi, :on 'ye-or' wlu 'ken :korn, 'an mu-eh :no.

²⁴:Yeh or 'da :ao', :yee' 'nynor-kpao'-yu mu 'de or 'de bo, or 'da, 'On-de:, deh 'on 'ye 'yba 'de 'on-ba 'kwa :eh? 'De or 'de 'da, Nyor⧾ 'ni 'dlu :po :Jororn'-a' 'dlu, mo-: :on 'ye 'yba.

²⁵'De or 'dhobo:, or mu 'de or :baa' bo de, or 'da, 'On-ba:, 'an 'bhorn :on 'ye 'on nyor⧾ 'ni 'dlu :po :Jororn'-a' 'dlu 'nyi :kana :kana 'de 'pani' 'di.

²⁶:Yeh 'keen 'worn-a deh :daa, :yee' or-a' :porluh pa-' :chehbe' 'gabaa 'do deh or :za-' 'de or-a'a: 'nynor-kpao'-yu bo, eh-a' dhih. Deh or :zlehn-dih:-a-: 'dekorn: nyor⧾ or 'da-a, an-a' dhih-: or :se-' 'bhorn or-a' wlu 'ye sih-' 'kpa.

²⁷:Yee' 'do :dha :due' :dao', or 'nyi sorye'-yu: :or 'dhu-a or-a'a: 'gbu 'yli-eh bo, 'tele', or 'ye 'de nyor⧾ 'ni 'dlu :po :Jororn'-a' 'dlu :ya. 'De sorye'-yu mu, or chehn 'o or-a' 'dlu 'de :kasue 'di,

²⁸'de or po-uh 'de 'pani' di, or 'nyi-uh 'nynor-kpao'-yu, 'de 'nynor-kpao'-yu 'nyi-uh or 'de.

²⁹:Yeh :Jororn'-a'a: bo :na-nyor⧾ 'worn-ih'-a, :yee' on mu 'o or-a' 'ku 'weh, 'de on nma-dih-uh dih.

³⁰:Yee' :Yusu'-a'a: dboo-nyor⧾ mu 'de or bo-: de, 'de on 'gola-or 'de dih, on zela-or deh⧾-a' klehkpeh on no-a-: 'dekorn: deh⧾ on :torne:-a nyor⧾-: :gwluhuh'.

³¹:Yee' nyor⧾ :dhulu'-a: mu, 'de :noo'-a yi 'o on bo. Eh-: no-eh, 'de an-a' 'ye :ka on 'ye-a' no, 'de on 'ye-a' deh di-a' 'jeh. Eh-: :korn dhih, 'de or :wlu 'de or-a'a: bo :na-nyor⧾ bo, or 'dae:, A zi, :a 'wluh :daa, :a mu, :a 'ye kpor chehn, 'do :dha nyor se-a :ne, 'de :a 'ye :forn :weh-beh:.

³²'De on 'kpa 'de 'blagbe 'di, on mu 'de :dha nyor se-a :ne, on 'ye kpor chehn.

³³:Yeh an 'kpa-a :gwie 'i, :yee' nyor⧾ :dhulu' yubo-uh-: 'i. 'De nyor⧾ :dao' :on 'wluh-a :gwlor⧾ :nyene' 'di dih, an na 'bluhbor, an ple, an chehn-dih-uh-: nya. :Yeh :Yusu'-: or-a'a: bo :na-nyor⧾-: on 'ye-a' dih 'si, :yee' nyor⧾ :dao' on :ne 'de on ybei'.

³⁴:Yeh or 'si-a 'bluhbor, or 'wluh-a 'de 'blagbe 'di, :yee' or :yeh-dih: :gwlor-nyor:⧾ :doru'-: ken. :Yeh or 'ye-uh'-a, :yee' an-a' :wehlih-a: no-or. Deh no-eh on gweh 'blae'⧾ :en se-a 'yli-eh bo 'dhu-nyor :korn. :Yee' or 'kpa an-a' deh⧾ :dhulu'-a' :torne-eh-: ken.

³⁵:Yeh glu-a gor-a, :yee' or-a'a: bo :na-nyor⧾ yi 'o or bo, on 'dae:, Dha :daa :a :ne-a, nyor se-a :ne, 'de mor ti zi-a :ke.

³⁶Dbo nyor⧾ :daa :gwlor⧾ :nyene' 'di dih-: 'dekorn: :gbalie⧾ bo dih-: :en 'koan'-dih:-a dha :daa dih, on 'ye dii-deh⧾ dhen 'do an-a' 'jeh bo, on 'ye di.

³⁷Jorwor: :Yusu' :wlu-' 'de on bo, or 'dae:, A :mor 'ye-uh' deh 'nyi on 'ye di. 'De on 'da, :A mu :a 'ye 'wlii: nyor :due'-a 'ye-a 'de 'chuh⧾ :meheh' na 'di, en-' 'bhlee dhen :a 'ye-uh' :ya, on 'ye di :e?

³⁸:Yeh on 'da :ao', :yee' :Yusu' dhele-uh-: dih, or 'da, 'Bhlee: :kpuan'⧾ dhie a 'ble :eh? A mu, a 'ye-eh' bo dih 'ye. :Yeh on 'ye-eh bo dih, :yee' on yi-: de, 'de on 'da, 'Bhlee: :kpuan'⧾ :mm'-: 'dekorn: zimi 'sororn'-: me-: :a 'ye.

³⁹'De or zela: nyor⧾ :gwluhuh' on 'ye 'pu⧾ 'pu⧾ no, on 'ye-' dih dhele: 'do :peli' ken.

⁴⁰'De an-a' 'pu⧾ 'pu⧾ dhele:-' dih. Nyor⧾-a' :kehehn' :due' :ne 'o on 'bli, 'de nyor⧾-a' :kwlaa :mm' :ne 'o on 'bli, eh-: on 'ble :blee:, 'de on :gweh 'de.

⁴¹:Yee' or 'duo: 'bhlee: :kpuan'⧾ :mm'-: 'dekorn: zimi 'sororn' :dao'-: 'weh, 'de or pobo: 'de yai', or po Nyorsoa-a' 'zio, 'de or :chehn-dih: 'bhlee: :kpuan'⧾ :dao' dih, 'de or 'kwa. Or 'nyi-ih or-a'a: bo :na-nyor⧾, on 'ye-ih' nyor⧾ 'nyi. 'De on no-eh. :Yee' or gble zimi 'sororn' :dao' 'weh :ke, 'de an-a' klehkpeh on 'ye.

⁴²'De :gwlor-nyor⧾-a' klehkpeh di deh, on dbo.

⁴³:Yeh on gweh-a deh :di-eh 'i, :yee' 'bhlee-: 'dekorn: zimi-: :en :sie:-a 'o dih, or-a'a: bo :na-nyor⧾ po-a :dha :due', me-: 'yi :too'⧾-a' :bhue: 'yor 'sororn'.

⁴⁴Nyor⧾ :on di-a deh, nyor⧾-kpalu⧾-a' 'wlu :mm' :ne 'de on 'nyne-'.

⁴⁵:Yee' :yeh eh no :ao', :yee' 'do :dha :due' :dao', :Yusu' po 'de or-a'a: bo :na-nyor⧾ 'blagbe 'di, 'de or 'da, A mu 'on ybei' 'de :gwlor an 'da-dih-a :Behse'la 'di, 'de :Galali'i-yobo'-pehnu-a' 'for :a 'wluh-a bo de. :Yeh an mu-a, :yee' or :sie: de, 'de or dbo nyor⧾ :doru' :dao' on 'bli deh⧾-' dih.

⁴⁶:Yeh or kpa-uh-a wlu, :yee' or mu 'de tluh ken, or 'ye 'de Nyorsoa bo :wlu.

⁴⁷:Yeh glu gor-a, :yee' 'blagbe :ne 'de 'ni-a' gwea:, :yee' or :due' :sie: 'o 'kpuhba' 'i.

⁴⁸:Yee' or 'ye-eh' :ka or-a'a: bo :na-nyor⧾-a 'ye-a 'kle 'do 'blagbe-a' bli 'da, deh no-eh, :pobor'-a 'beh-dih-uh 'worn dih. :Yee' 'do :dha 'o zorn-a yi-dih-a :zen-dih: 'da, 'do :wor or na-dih 'ni ken dih, or mu 'de on bo, or 'bhorn or 'ye-uh' dih zi :dee'.

⁴⁹Jorwor: :yeh on 'ye-or, 'de or na-a 'ni ken dih, :yee' an 'da-dih-or 'meheh'-nyor-a' :zulu: :dee', 'de an po 'geh⧾.

⁵⁰Deh no-eh, :yeh an-a' klehkpeh on 'ye-or, :yee' :fano-a: no-uh 'gabaa. Jorwor: 'do :dha :due' :dao', or :wlu-' 'de on bo, or 'dae:, A :ku :gwluhuh'-'. 'Mor :oo'. A 'bor :fano-a' :no-' a-uh.

⁵¹'De or 'kpa 'de on bo 'blagbe 'di, 'de :pobor' 'bor. :Yee' eh 'ma-dih: 'de on 'di-: dih 'gabaa.

⁵²Deh no-eh, eh-: 'dhu, deh 'bhlee-deh 'dhu-eh:-', on :se-eh-' dih 'worn, 'de an-a' deh :torne-eh :kma 'i.

⁵³:Yeh on 'dhan-a :Galali'i-yobo'-pehnu, :yee' on 'si 'bluhbor: 'do :gwlor an 'da-dih-a :Gehneh'sla, 'de on san an-a'a: 'blagbe.

⁵⁴Ti on 'si-a 'bluhbor, 'de nyor⧾ 'ye-a :Yusu', :yee' on 'dhobo:, on yubo-or-: 'i.

⁵⁵'De an ple, an mu deh⧾-' dih, 'do 'for-a' klehkpeh :dao' bo, an ya 'de or bo puhba-nyor:⧾, :an 'pehn-a ken 'pehn-deh⧾ ken, :dha on 'worn-dih:-a or-a' 'nyne or :ne-a.

⁵⁶:Dha klehkpeh or mu-a :mu, :gwlor⧾ :nyene'-: :gwlor⧾ :klaba'⧾-: 'dekorn: :gbalie⧾ bo dih-:, :yee' nyor⧾-a kpa 'de or bo an-a'a: puhba-nyor⧾ 'do :dha nyor⧾-a po-dih-a 'doror', 'de an bale :Yusu' or 'ye 'worn, puhba-nyor⧾ 'ye or-a'a: :gba 'vuu-a' 'mla-a' deh-beh dih 'tuh :sloror'. Nyor⧾-a' klehkpeh :on 'tuh-uh-a dih, an-a' klehkpeh 'puh-' 'tene' :kpeen:.