Read Eastern Krahn Make 7 Bible Online

Make 7 - Eastern Krahn bible

Make 7

¹:Yee' :Falasi'i-nyor⧾-a' nyor⧾ :noo'-: 'dekorn: nyor⧾ 'tele' :torne-nyor⧾-a' nyor⧾ :noo'-: :on 'wluh-a :Julu'slehn, mo-: 'gbo-dih: :Yusu' 'dlu dih,

²'de on 'ye or-a'a: bo :na-nyor:⧾ :noo', :on se-a kwa :dle, eh 'ye-uh'-a' :kane' dih :za, 'de an di-a deh.

³Deh no-eh :Falasi'i-nyor⧾-: 'dekorn: :Jueh'-nyor⧾-a' klehkpeh-: an dhe 'o 'tele'⧾ on :bai'-a' :bai' :torne-uh-a-: dih, an dle kwa, on 'ye :kane' dih :za :weh, 'de an di deh.

⁴:Mor on 'wluh 'de 'doror', :yee' an dle-' :gbor, 'de an di deh. An dhe 'o 'tele'⧾ :dhulu' :nee' dih on :bai'-a' :bai' :torne-uh-a, :eh 'kpa-a :ka on 'ye-a' 'korbuh⧾-: 'plea⧾-: 'dekorn: 'pani'⧾-: en-' worlor-eh no.

⁵Eh-: no-eh, 'de :Falasi'i-nyor⧾-: 'dekorn: nyor⧾ 'tele' :torne-nyor⧾-: on dhele-or dih, on 'da, :Eh :korn dhih 'de :an-a'a: bo :na-nyor⧾-a' dhe 'o 'tele' :a :bai'-a' :bai' :sie-dih:-a :a-uh dih ke :eh, 'de an-a' :dle kwa, eh 'ye-uh' :kane' dih :za, 'de an di deh :eh?

⁶:Yee' or :wlu-' 'de on bo, or 'dae:, :Azaya' :se-eh' 'i zi 'do deh or :za-a-' :dee' see, 'do a :mor nyor⧾-a' 'yli 'ye-nyor:⧾ :daa 'bhun, or po-a Nyorsoa-a' wele-eh, :ka eh no-a 'chle-eh, Nyorsoa 'da-a, Nyor⧾ :daa, an po 'on dhih bo 'do on worn 'i. Jorwor: an-a' :porluh⧾ se 'noror 'on bo :ne.

⁷'An :weheh' an za-a, deh 'plo :oo' an no. An torne nyor⧾ 'tele'⧾ :en 'wluh-a 'de :gwlor-nyor⧾ 'worn, 'de on 'da en 'wluh 'de 'on bo.

⁸'De :Yusu' :wlu 'de on bo :neheh', or 'dae:, A 'tali: Nyorsoa-a' 'tele'-: dih, :yee' :gwlor-nyor⧾-a' :ne, me-: a dhe 'o dih.

⁹'De or 'da, 'On po a-a' 'zio, a 'ye Nyorsoa-a' 'tele' dih 'tali:, 'de jorwor: a 'ye 'o a-a' ne dih dhe.

¹⁰:Mose' :wlu-', or 'dae:, 'Ye :on 'de-: 'dekorn: :on :baa'-: deh-'. 'De or :wlu :neheh', or 'dae:, Nyor :or 'jle-dih:-a or 'de-: 'dekorn: or :baa'-: :yee' or :korn or 'ye 'dba-eh:.

¹¹Jorwor: a :mor :mloror', a 'da :mor nyor zela: or 'de-: 'dekorn: or :baa'-: :gwluhuh', or 'da, Deh a :korn a 'ye-a' 'ye, 'de 'on 'kwa :dee', a :se-eh' 'ye-: i, deh no-eh, eh :dhe-dih-eh: 'for 'i 'do Nyorsoa bo.

¹²:Mor a 'da :ao', :yee' a kan nyor⧾ :dao' 'i on :ne-' deh-beh no 'do on 'de-: on :baa'-: bo.

¹³'Do eh-a' dha, :yee' a no-eh' Nyorsoa-a' wlu no 'plo, 'do a-a' 'tele'⧾ a torne-a nyor⧾, en-' deh-' 'ye-eh-a' dhih bo. A no deh⧾ :dhulu' :nee', me-: :ne :ao' :ke.

¹⁴:Yee' :yeh :Yusu' gweh-a :Falasi'i-nyor⧾-: 'dekorn: nyor⧾ 'tele' :torne-nyor⧾-: an-a' bo :wlu-eh 'i, :yee' or 'da :gwlor-nyor:⧾ :on :ne-a 'o, on 'ye 'de or bo yi :neheh', 'de or :wlu 'de on bo, or 'dae:, A-a' klehkpeh, a :to :dou'⧾, 'de a 'ye 'an wlu-' dih 'worn o.

¹⁵Eh se dii-deh :korn nyor 'ye-a' di, 'de :eh 'ye-or' 'kor-dih: 'do Nyorsoa ybei'. Jorwor: deh⧾ :en 'wluh-a 'o nyor-a' :porluh ken, me-: 'kor-dih-or 'do Nyorsoa ybei'. [

¹⁶Nyor :or 'ble-a :dou'⧾ :or 'ye dhih 'worn, 'nyi or 'worn-ih.]

¹⁷:Yee' :yeh or 'wluh-a 'o nyor⧾ :dao' bo, 'de or pa-a 'de 'gbu, :yee' or-a'a: bo :na-nyor⧾ dhele-or-: dih 'do 'dlan or po-a, or-a' dhih.

¹⁸'De or :wlu 'de on bo, or 'dae:, A se deh-' dih 'worn-eh :korn ke :e? A se-eh yubo: ke :e :ka dii-deh: nyor di-a :eh 'wluh-a 'noror 'zorn ka, eh-a' 'kor-dih-a nyor 'do Nyorsoa ybei' :e?

¹⁹Deh no-eh, eh-: 'dhu, dii-deh: nyor di-a, eh :se 'de or-a' :porluh ken mu, jorwor: eh mu 'de or 'di, 'de eh 'si 'zorn. (:Yee' 'do deh :daa or :za-a-', 'do eh-a' dha, eh-: :korn dhih :oo', or 'da, dii-deh⧾-a' klehkpeh :nmor-: 'yi 'do di 'da.)

²⁰'De or 'da, Deh⧾ :en 'wluh-a 'o nyor-a' :porluh ken, me-: 'kor-dih-or 'do Nyorsoa ybei'.

²¹Deh no-eh, 'do nyor⧾-a' :porluh⧾ ken, 'do :wor deh⧾-zon⧾-a' :gwluhuh' dih :na-dih-eh 'wluh. Eh-: no-eh, 'de an korn 'tmeor⧾, an 'yli, an 'dba nyor⧾, 'de an no 'nyne :zaan',

²²on :korn deh⧾-a' 'klan, on :korn 'galo:, 'de an bo-dih nyor⧾ dih, an 'kpa 'pebe' 'i, 'de on :korn :gwlehehn', an za-dih nyor⧾ deh⧾-zon⧾ 'bhun dih, 'de an 'beh-dih an-a' 'jeh 'i, an no :bobo-deh⧾.

²³Deh⧾-a' klehkpeh :daa, me-: 'o, :en 'dhu deh⧾-zon⧾-', me-: 'wluh 'o :gwlor-nyor⧾ :porluh⧾ ken, me-: 'kor-dih nyor⧾ 'do Nyorsoa ybei'.

²⁴:Yee' :Yusu' :sorn-' 'weh, or 'wluh 'o :dha 'o, or mu 'de 'bluhba-a' 'for 'Taya-gwlor :ne-a ken. :Yee' or :ko-dih: 'de 'gbu :due' 'di, or :se-' 'bhorn nyor⧾ 'ye-eh' yubo: :ka or :ne-a 'o :gwlor :dao' 'di, jorwor: or se 'zile-eh 'beh-dih:.

²⁵:Yee' 'do :dha :due' :dao', 'nynor :due' :or :korn-a 'yu-nynor-kpao'-yu 'ble-a 'kwla 'ye-dih-deh 'do or 'de, or-: 'worn :Yusu'-a' 'nyne, 'de or mu 'de or bo, or 'jli dih 'do or 'zorn.

²⁶'Nynor-a' 'jeh :dao' or no 'Glii-nynor:, :or 'wluh-dih:-a 'Selofeni'sia-bluhba ken. Or bale-or', or 'ye 'kwla 'ye-dih-deh 'do or-a'a: 'yu 'de :za.

²⁷'De :Yusu' :wlu 'de or bo, or 'dae:, 'Nyi 'nynuu: :nyene' dii-deh kele'a:, deh no-eh, eh se 'yi dih :nmor nyor 'ye 'nynuu-a' dii-deh⧾-' 'duo:, 'de or 'ye-ih gbe⧾ 'nyi.

²⁸:Yeh or 'da :ao', :yee' 'nynor 'dae:, Keen' :mloror', :Gwlor :baa', jorwor: gbe⧾-a' 'jeh :en :ne-a 'de 'tebo 'zorn, en di deh⧾-a' :pibi' :en kele-a 'o 'nynuu worn⧾ 'i, :en 'kpa-a 'zorn 'weh.

²⁹'De :Yusu' 'dae:, Deh :on :za-a-', eh-a' dhih, mu. 'Kwla 'ye-dih-deh 'wluh 'o :an-a'a: 'yu 'de 'weh.

³⁰:Yeh 'nynor mu-a or 'bli, :yee' or :yeh-dih: or-a'a: 'yu-: ken, or 'pehn-: dih 'do ken 'pehn-deh ken, :yee' 'kwla 'ye-dih-deh 'wluh 'o or 'de 'weh.

³¹:Yee' :Yusu' 'wluh 'de 'bluhba-a' 'for :or 'koan'-dih:-a 'Taya-gwlor dih bo 'weh, 'de or :yi-dih: 'Saedorn-gwlor-: 'dekorn: 'de 'bluhba-a' 'for :or :ne-a Gwlor⧾ :bhue: an 'da-dih-a :Deka'poli-: ken, or mu 'de :Galali'i-yobo'-pehnu worn 'i.

³²:Yeh or 'si-a 'o dih, :yee' on :ya 'de or bo 'yu :or 'sun-a-: 'de :or :korn :meo: 'meh-a-: 'de on bale-or, or 'ye 'yu son ken dih tba.

³³'De :Yusu' za-or 'de nyor⧾ 'klu-', or kpa-or 'o 'for 'i, 'de or kpa-or :jii :dou'⧾-', or po :dhehmeh, 'de or 'tuh or-a' :meo dih.

³⁴:Yeh or no :ao', :yee' or pobo: 'de yai', 'de or 'wla vlen dih, or :wlu 'de 'yu :dao' bo, or 'da, :Efa'ta:, :eh :bleh-dih:-a 'i, Kan-dih: 'i.

³⁵:Yeh or 'da :ao', :yee' or-a' :dou'⧾ kan-dih: 'i, 'de or-a' :meo 'fele: kwa, or wlu deh 'jeh neh.

³⁶:Yee' :Yusu' dhe nyor⧾ :on 'ye-eh 'tele' 'i, on :ne-' nyor-beh-nyor-beh :gwluhuh' zela:. Jorwor: :yeh or 'da :ao', :yee' or po-uh 'de de dih, 'de an mu, an zela nyor⧾ :gwluhuh' :chio'lo:.

³⁷Nyor⧾-a' klehkpeh :on 'ye-a deh⧾ or no-a, :yee' eh :florn-dih-uh-: worn 'gabaa, 'de on 'da, Or no deh⧾-a' klehkpeh 'weh deh 'jeh neh. Or no-eh' :sloror', 'suun'-nyor⧾-a 'worn-: dih, 'de 'bobo'⧾-a wlu.