Read Eastern Krahn Make 8 Bible Online

Make 8 - Eastern Krahn bible

Make 8

¹Eh :korn 'we-eh :due', :yee' :gwlor-nyor:⧾ :doru' :noo', mo-: :gweh de, mo-: yi 'de :Yusu' bo :neheh'. An-a'a: dii-deh⧾ :gweh-'. Eh-: no-eh, 'de or 'da or-a'a: bo :na-nyor⧾ 'do or bo, or 'da,

²:Gwlor-nyor:⧾ :doru' :daa, an-a' :wehlih-a: no 'on. An-a' 'we taan 'zean' dha 'on bo, 'de an-a'a: dii-deh⧾ :gweh.

³:Mor 'moeh 'si 'de on 'di, 'de 'on 'ye-uh' on 'bli deh⧾-' dih dbo, :yee' an mu :gwluhuh'-' dih 'kpuhba: :gwie⧾ bo dih, deh⧾ :noo' 'wluh-a dih, en :tehn-'.

⁴'De on dhele-or dih, on 'dae:, Dha :a mu 'bhlee :za 'noror :bhehneh'-bluhba: :daa ken, :a 'ye nyor⧾ :daa 'nyi :eh?

⁵'De or dhele-uh dih, or 'da, 'Bhlee: :kpuan'⧾ dhie a 'ble :eh? 'De on 'dae:, En :meheh' 'sorn :oo'.

⁶'De or zela: nyor⧾ :doru' :dao' :gwluhuh', on 'ye dih :dhe 'do 'bluhbor. :Yee' or 'duo: 'bhlee: :kpuan'⧾ :meheh' 'sorn :dao' 'weh, 'de or po Nyorsoa-a' 'zio, 'de or :chehn-dih-ih dih 'de or 'kwa, or 'nyi-ih or-a'a: bo :na-nyor⧾, 'de on 'nyi-ih :gwlor-nyor:⧾ :doru' :dao'.

⁷:Yee' on 'ble zimi: :nyene'-kpor-bei: :ke, 'de or po Nyorsoa-a' 'zio 'do zimi: :dao' bo, 'de or zela: or-a'a: bo :na-nyor⧾ :gwluhuh' on 'ye-ih' nyor⧾ :dao' 'nyi :ke.

⁸'De nyor⧾ :dao' on di deh, on dbo. :Yeh on gweh-a deh :di-eh 'i, :yee' :yih :sie:-a 'o dih, or-a'a: bo :na-nyor⧾ po-a :dha :due', en 'yi :too'⧾ :meheh' 'sorn.

⁹Nyor⧾ :on di-a deh, on 'beh-dih: on 'ye 'wlu :nyieh no. 'De :Yusu' dbo nyor⧾ :doru' :dao' on 'bli deh⧾-' dih.

¹⁰:Yee' 'do :dha :due' :dao', or-: 'dekorn: or-a'a: bo :na-nyor⧾-: on 'kpa 'de 'blagbe 'di, 'de on mu 'de 'bluhba-a' 'for :or 'koan'-dih:-a :Damanu'ta-gwlor dih.

¹¹:Yee' :yeh on 'si-a dih, :yee' :Falasi'i-nyor:⧾, mo-: yi 'de :Yusu' bo, :on yi-or dih 'dhen 'da, 'de on dhele-or dih, or 'ye-uh' 'yi :to-dih-deh 'i :to-dih:, :eh beh or-a' 'kpih 'wluh 'de Nyorsoa bo yai' deh 'jeh :eh?

¹²:Yeh on no :ao', :yee' or-a' 'kpih no gbleh, 'de or 'da, :Eh no :kana-nyor:⧾ :daa, :an 'bhorn-a 'yi :to-dih-deh :eh? Dhih 'jeh, 'an zela a :gwluhuh', Nyorsoa :se-' nyor⧾ :daa 'yi :to-dih-deh 'i :to-dih: i.

¹³:Yeh or 'da :ao', :yee' or 'wluh 'o on bo 'weh, or 'kpa 'de 'blagbe 'di-: de, 'de or 'dhan :Galali'i-yobo'-pehnu, or mu 'de an-a' 'for or 'wluh-a bo de.

¹⁴:Yee' :yeh an mu-a, :yee' :Yusu'-a'a: bo :na-nyor⧾ 'ma-dih: bo on 'ye 'bhlee: :dhulu' kpa. 'Bhlee: :kpuan' :due', or-: on kpa, or-: :ne 'de on bo 'blagbe 'di.

¹⁵:Yee' :Yusu' 'dhu-uh 'slen, or 'dae:, A 'wla :gwluhuh' dih, a 'dhu a-a' 'jeh :dhororn', :Falasi'i-nyor⧾-: 'dekorn: :Hehlo'-: an-a' deh⧾ :en 'vu-dih-a 'bhlee, en :ne-' a 'kor-dih: o.

¹⁶:Yee' an polo dhih 'de an-a' 'jeh 'nyne-', an no, :A se 'bhlee 'ble :dhih 'o, eh-: :korn dhih or 'da :ao'.

¹⁷Jorwor: :ka or yubo-eh 'i, :yee' or dhele-uh-: dih, or 'dae:, :Eh no 'de a polo dhih, :ka a se-a 'bhlee 'ble, eh-a' dhih :eh? A 'see-eh 'ye 'gboror: :e? :Ae' a 'see-eh-' dih 'worn? A-a' :porluh⧾ :kmu-' :e?

¹⁸'Yli a 'ble-a, en-' 'ye dih :e? :Ae' :dou'⧾ a 'ble-a, en-' 'worn dih ke? A 'see-eh :gwluhuh' bo po-dih :e?

¹⁹Ti 'on 'ye-a' 'bhlee: :kpuan'⧾ :mm' dih :chehn-dih: 'do nyor⧾-kpalu⧾-a' 'wlu :mm' bo, :yee' :yih :sie:-a 'o dih, a po-a :dha :due', en-' :too'⧾ dhie :eh? 'De on 'da, En-' :bhue: 'yor 'sororn' :oo'.

²⁰'De :Yusu' dhele-uh dih :neheh', or 'da, :Yee' ti 'on 'ye-a 'bhlee: :kpuan'⧾ :meheh' 'sorn dih :chehn-dih: 'do nyor⧾-a' 'wlu :nyieh bo, dii-deh:⧾ :yih :sie:-a 'o dih, a po-a :dha :due', en-' :too'⧾ dhie :eh? 'De on 'da, En :meheh' 'sorn :oo'.

²¹'De or dhele-uh dih :dele' ka, or 'da, Deh⧾ :daa, a 'see-ih-' dih 'worn 'gboror: :e?

²²:Yee' :yeh :Yusu'-: 'dekorn: or-a'a: bo :na-nyor⧾-: on 'wluh-a 'de 'blagbe 'di, :yee' on mu 'de :gwlor an 'da-dih-a :Behse'la 'di. :Yeh on 'si-a 'o dih, :yee' nyor⧾ :noo' :ya 'de or bo 'doror'-nyor:, 'de on bale-or or 'ye-or' dih 'tuh.

²³:Yee' or kpon 'doror'-nyor: :dao'-a' son-: dih, 'de or za-or 'o :gwlor-'. :Yee' :yeh on 'wluh-a 'o :gwlor-', :yee' :Yusu' po-or :dhehmeh 'yli, 'de or 'tuh or-a' 'yli dih, or dhele-or dih, or 'da, :An 'ye dih 'weh :e?

²⁴'De 'doror'-nyor pobo: dih, 'de or 'da, Keen', 'an 'ye nyor⧾ 'weh, jorwor: on gweh :ka tu⧾-a na-a.

²⁵'De :Yusu' 'tuh or-a' 'yli dih :neheh'. :Yeh or za-or son⧾ 'yli ken, :yee' 'doror'-nyor-a 'ye-: dih, 'de or 'ye deh⧾-a' klehkpeh deh 'jeh neh.

²⁶'De :Yusu' zela-or :gwluhuh', or 'dae:, :Kana :naa mu :on 'bli. :An-a' :mu-' de 'do :gwlor :dao' 'di o.

²⁷:Yee' :yeh :Yusu' 'puh-dih:-a 'doror'-nyor: :dao', :yee' :Yusu'-: 'dekorn: or-a'a: bo :na-nyor⧾-: on zi-', 'de on mu 'de :gwlor⧾ :nyene' 'di, :eh 'koan'-dih:-a 'Sehsali'a: :Fele'pa-gwlor dih. :Yeh an mu-a 'do :gwie 'i, :yee' or dhele-uh-: dih, or 'dae:, :Kaa :gwlor-nyor⧾-a 'da 'on :eh?

²⁸'De on 'da, Nyor⧾ :noo' 'da :mor nyor⧾ 'ni 'dlu :po :Jororn' :oo'. :Noo' 'da, :mor :Ila'yor: 'o. 'De :noo' 'da, :mor Nyorsoa-a' wele-eh: :po-nyor⧾-a' nyor :due' :oo'.

²⁹'De or 'dae:, :A 'worn 'de a bo :ke. :Kaa a 'da 'an dhih :eh? 'De :Piteh' 'da, :Mor Nyorsoa-a' 'taan'-yu: 'o.

³⁰'De :Yusu' 'dhu-uh 'slen, on :ne-' nyor-beh :gwluhuh' zela: or-a' dhih.

³¹:Yee' :Yusu' 'kpa 'o an-a' deh :torne: 'da 'weh :neheh', or 'dae:, 'Yu an 'da-dih-a Nyor-kpalu-a' 'yu :korn or 'ye deh⧾ :doru'-a 'kle 'ye :gbor :gbor. :Yee' 'bluhba: :korn-nyor⧾-: Nyorsoa-a' 'slaa: :za-nyor:⧾ :klaba'⧾-: 'dekorn: nyor⧾ 'tele' :torne-nyor⧾-: on :se-' or-a' dhih 'worn-dih: i. An mu-or 'dba-:, :yee' :mor 'we taan zi, or mu-' :sorn.

³²:Yee' or zela-eh-: ken dih 'de on bo deh 'jeh neh. 'De :Piteh' 'da-or 'do 'for 'i, or 'kpa 'o or-a' 'borboa' 'i :po 'da.

³³Jorwor: :Yusu' 'bili:-'-: dih, or pobo: 'de or-a'a: bo :na-nyor⧾ bo, 'de or po :Piteh' 'borboa' 'i, or 'da, 'Wluh :daa 'on bo, 'ku. Deh no-eh, :on se 'de Nyorsoa-a' 'for bo :ne. Jorwor: :on :ne 'de :gwlor-nyor⧾-a' 'for bo.

³⁴:Yee' or 'da or-a'a: bo :na-nyor⧾-: 'dekorn: nyor⧾ :doru' :noo'-: on 'ye 'de or bo yi. 'De or :wlu 'de on bo, or 'dae:, Nyor :or 'bhorn-a :or 'ye-a' 'o 'on klei' zi, :yee' 'nyi or 'ma-dih: or-a' 'jeh-a' dhih bo. 'Nyi or 'duo: or-a'a: 'kle 'ye-eh-a' 'klorse tu-', or 'ye 'o 'on klei' zi.

³⁵Nyor :or 'bhorn-a :or 'ye-a' or-a' :febeh' dih dhe, :yee' or mu-eh 'ma-dih:. Jorwor: nyor :or 'ma-dih:-a or-a' :febeh' 'do 'an dhih-: 'dekorn: 'do Nyorsoa-a' tubo-wlu:⧾ 'jeh-a' dhih bo-:, :yee' eh-a' dih :dhe-eh: 'o or no.

³⁶:Mor nyor 'ble 'bluhba-a' klehkpeh, 'de or-a' :febeh' 'ye gbe :zie:, :yee' deh 'i-deh: eh mu-or 'o :po :eh?

³⁷:Mor nyor 'ma-dih: or-a' :febeh', deh or 'ye-a' plo 'de or 'ye-eh' deka 'ye, eh se :ne.

³⁸:Mor nyor :taa dhen ple, 'do 'an dhih-: 'dekorn: 'an nyor⧾ deh :torne-eh-: 'noror :kana-nyor:⧾ :daa 'nyne-', :an-a' no-a :dhehehn-deh⧾ 'do Nyorsoa bo, 'de :an no-a deh⧾-zon⧾, :yee' 'yu an 'da-dih-a Nyor-kpalu-a' 'yu-a mu dhen :ple, 'do nyor :dao', or-a' dhih bo :ke, :mor or 'yle 'de or :Baa'-a' dhih-a' 'i 'beh-a' 'di, 'de or :ne 'enjor-nyor:⧾ :on :ne-a gban 'i, on 'ye 'de :yi-dih:.