Read Eastern Krahn Make 9 Bible Online

Make 9 - Eastern Krahn bible

Make 9

¹'De :Yusu' 'dae: :neheh', Dhih 'jeh, 'an zela a :gwluhuh', nyor⧾ :noo', mo-: :nyna dih dha :a 'nyne-', mo-: :se-' 'meh-: i, 'de on 'ye Nyorsoa-a' nyor⧾ wlu 'ken :korn-eh 'ye, eh 'ye 'de yi, 'de 'kpih 'di.

²:Yee' :yeh 'we :meheh'lo zi-a, :yee' :Yusu' 'duo: :Piteh'-: 'Jeen-: 'dekorn: :Jororn'-: 'weh, 'de or kpa-uh 'de tluh :dhorno' ken, on 'ye kpor chehn. :Yeh an pobo-a 'o, :yee' or-a' yau :za-dih:-',

³'de 'tiei: or pa-a-', en :za-dih: :ke, 'de en fan, en :ne :bhoror:. Eh se nyor :korn dha yao 'zorn :or 'ye-eh' no, 'de paa-tiei 'ye :ao' :bhoror: :ne-eh no.

⁴:Yee' on 'ye :Ila'yor-: 'dekorn: :Mose'-: mo-: :an wlu 'de or bo.

⁵'De :Piteh' :wlu 'de or bo, or 'dae:, Nyor⧾ deh :torne-nyor:, eh :nmor-: 'yi, 'de :a :ne :daa. A 'nyi, :a po gbe :dhe dih :gbalie⧾ taan, :due' 'do :on bo, :due' 'do :Mose' bo, :due' 'do :Ila'yor bo.

⁶:Fano-a: no :Piteh'-: 'dekorn: or 'bei'-: 'gabaa. Eh-: no-eh 'de deh or 'ye-a' :za, 'de or se-eh yubo:.

⁷:Yeh on :ne-a 'o, :yee' yao-pli:, me-: 'jli-uh 'dlu. 'De wlu 'wluh 'de yao-pli: :dao' 'di, on 'da, 'An-a: :dhih :kma-yu: 'o, or-: :dhe dih. A :to or-a' wlu :dou'⧾ bo.

⁸:Yee' 'yli :a bla-a 'i, :yeh on 'ye-a' dih pobo:, :yee' on :se-' nyor :noror' 'ye 'do on bo :neheh'. Jorwor: :Yusu' :due', or-: :ne 'o.

⁹:Yeh an 'dhle-a tluh, :yee' or dhe-uh 'tele' 'i deh on 'ye-a, on :ne-eh' nyor-beh :gwluhuh' zela: kele'a:. :Mor 'yu an 'da-dih-a Nyor-kpalu-a' 'yu 'meh, 'de or 'ye 'de nma-dih-deh 'di 'wluh, 'de on 'ye-eh' nyor⧾ :gwluhuh' zela:.

¹⁰:Yee' on 'ye :Yusu'-a' wlu-' deh, on :se-' nyor⧾ :gwluhuh' zela:, :yee' an bla or-a' 'meh :sorn-' deh-a' :manua:. An dhele an-a' 'jeh dih, an no, Deh 'meh :sorn-' deh 'dhu-eh:-' :eh?

¹¹'De on dhele-or dih, on 'da, :Eh :korn dhih 'de nyor⧾ 'tele' :torne-nyor⧾ 'da :Ila'yor:, or-: :korn :or 'ye 'de yi :zai' :eh?

¹²'De or zela-uh :gwluhuh', or 'da, :Ila'yor :korn or 'ye 'de yi :zai', 'de or 'ye deh⧾-a' klehkpeh 'kpa po. :Yee' eh :se-' 'chle-eh: 'de Nyorsoa-a' 'chlee-deh 'di ke :e, :ka 'yu an 'da-dih-a Nyor-kpalu-a' 'yu :korn or 'ye-a' deh⧾ :dhulu'-a' 'kle 'ye, 'de on :se-a' or-a' dhih 'worn-dih: i :e?

¹³Jorwor: 'nyi 'on zela: a :gwluhuh', :Ila'yor 'yle :weh, 'de deh an 'bhorn-a on 'ye-or' :no-dih:, 'de on :no-dih-eh or, :ka eh no-a 'chle-eh 'do or 'bhun.

¹⁴:Yee' :Yusu'-: 'dekorn: or-a'a: bo :na-nyor⧾-a' nyor⧾ taan :dao'-: on :yeh-dih: on 'bei' :dao' ken. 'De on 'ye nyor⧾ :doru', mo-: 'gbo-dih-uh 'dlu dih. 'De nyor⧾ 'tele' :torne-nyor:⧾ :noo'-: 'dekorn: or-a'a: bo :na-nyor:⧾ :noo'-: mo-: :an 'yea wlu⧾ ken dih.

¹⁵:Yeh nyor⧾ :dhulu' :dao', on 'ye-a :Yusu', :yee' eh 'ma-dih: 'de on 'di-: dih 'gabaa, 'de 'do :dha :due' :dao', an ple, an 'ya-dih-or 'i, an gble-dih-or.

¹⁶'De or dhele-uh dih, or 'da, :Eh :korn dhih, on :ne a 'yea wlu⧾ ken dih :eh?

¹⁷:Yee' 'yu :due', or-: :ne 'de on 'klu-', or-: :wlu 'de or bo, or 'dae:, Nyor⧾ deh :torne-nyor:, 'noror :on bo, 'noror 'on :ya 'an-a: nyor-kpalu-yu, or-: 'kwla 'ye-dih-deh :ne 'o 'de, 'de eh no-eh, or-a' :wlu.

¹⁸:Mor eh 'kpa-or ken, :yee' eh du-or' 'do 'bluhbor, 'de :feon-a bor 'o or worn 'i, or di-dih 'nyne 'i, 'de or 'sleh-dih-'. 'On dhele: :an-a'a: bo :na-nyor⧾ dih 'weh, on 'ye-eh' 'o or 'de :za. Jorwor: on se eh-a' no-a' 'beh-dih:.

¹⁹'De :Yusu' :wlu 'de on bo, or 'dae:, A :mor :kana-nyor:⧾ :daa :or se-a dhih 'jeh-' :po-eh 'ble, ti dhie 'on 'ye dha a bo no :eh? :Kaa 'on 'ye :porluh-a' 'yi 'dba-eh no 'do a bo :eh? A :ya 'de 'yu :daa 'noror 'on bo.

²⁰'De on kpa-or 'de or bo. :Yeh 'kwla 'ye-dih-deh 'ye-a :Yusu', :yee' 'yli :a bla-a 'i, eh no-eh', 'de or vorn. 'De eh 'ga-or dih, or klibo 'do 'bluhbor, 'de :feon-a 'wluh 'de or 'worn.

²¹'De :Yusu' dhele: 'yu :baa' dih, or 'da, Deh :daa eh 'kpa-a 'o or 'bhun, eh-a' ti dhie :eh? 'De or :baa' 'da, Or za-eh 'yu-yu-bla:.

²²:Yee' 'do ti :dhulu' 'di, eh po-or 'de 'yli-: 'dekorn: 'nior-: eh 'ye-or' 'dba. Jorwor: :mor :on 'beh-dih: :on 'ye deh no, 'do deh :daa eh-a' dha, :yee' 'ye :a-a' :wehlih, :za-dih: :a-uh'.

²³'De :Yusu' 'da, :On 'da :mor 'on 'beh-dih-eh :e? Nyor :or 'ble-a dhih 'jeh-' :po-eh, :yee' deh⧾-a' klehkpeh 'beh-dih: en 'ye :no-eh: 'do or bo.

²⁴:Yeh or 'da :ao', :yee' 'yu :baa' 'dhobo:, or 'wor-', or 'dae:, 'On 'ble dhih 'jeh-' :po-eh 'weh, jorwor: eh se 'i :dhie:. :On :korn 'gen, po-eh ken.

²⁵:Yeh :Yusu' 'ye-a nyor⧾ :dhulu' an ya-a 'de ple-a' 'de or bo, 'de or 'nyi 'kwla 'ye-dih-deh 'tele', or :wlu 'de eh bo, or 'dae:, :Mor 'kwla 'ye-dih-deh: :daa, :or 'sun-dih-a nyor⧾, 'de :or no-eh 'de nyor⧾-a' :wlu-a', 'an kpa-dih :on 'kpih, 'wluh 'o 'yu :daa 'de, :an-a' :zi 'o or 'de :neheh' o.

²⁶:Yeh or :wlu-a 'de 'kwla 'ye-dih-deh: :dao' bo, :yee' eh :po-dih: 'yu :dao' 'geh, eh no-eh 'de or vorn 'gabaa, 'de eh mu 'o or 'de 'wluh-:. :Yeh eh no :ao', :yee' 'yu gweh :ka nyor 'meh-a. :Yee' nyor⧾ :ne-a 'o, an-a' :dha :dhulu' 'da, Or 'meh-'.

²⁷Jorwor: :Yusu' kpon or-a' son-: dih, 'de or 'duo-or ya-', 'de or :sorn-', or :nyna dih.

²⁸'De :Yusu' pa 'de 'gbu. 'Do :wor or-a'a: bo :na-nyor⧾ dhele-or dih, 'de 'slan :pa ka 'di, on 'dae:, :Eh :korn dhih 'de :a se 'kpih 'ble 'do 'yu :dao' or-a' 'kwla 'ye-dih-deh 'de :za-eh bo :eh?

²⁹'De or zela-uh :gwluhuh', or 'dae:, Nyorsoa bo :wlu-eh-: ['dekorn: 'suehn-' :pa-eh-:] en :due', me-: 'beh-dih: :en 'ye nyor⧾ 'kwla 'ye-dih-deh⧾-a' :yih :dao' nyor⧾ 'de :za.

³⁰:Yee' :Yusu'-: 'dekorn: or-a'a: bo :na-nyor⧾-: on 'wluh 'o :dha on :ne-a 'weh, 'de on mu, on chehn 'o :Galali'i-bluhba ken :dhie'. Or :se-' 'bhorn :dha on :ne-a, nyor⧾ 'ye 'o yubo:,

³¹deh no-eh, or torne or-a'a: bo :na-nyor⧾ deh, or 'da, An mu 'yu an 'da-dih-a Nyor-kpalu-a' 'yu :plo 'de :gwlor-nyor⧾ bo. An mu-or 'dba-:. :Yee' :mor 'we taan zi, :yee' or mu-' :sorn.

³²Jorwor: deh :daa or :za-a-', on :se-eh' dih 'worn. 'De mor :fano-a: no-uh, on 'ye-or' dih dhele:.

³³:Yee' :yeh on 'wluh-a 'o :dha 'o, :yee' on mu 'de :gwlor an 'da-dih-a :Kapa'nior 'di. :Yeh on pa-a 'de 'gbu :Yusu' :ko-dih:-a 'di, :yee' or dhele: or-a'a: bo :na-nyor⧾-: dih, or 'dae:, Deh 'i-deh: :dhih 'o, a dhobo-' 'do :gwie 'i 'tior' :eh?

³⁴Jorwor: on :se-' deh-' :za, deh no-eh, ti an yi-a 'de 'do :gwie 'i, :yee' nyor :or 'dhu-a nyor :klaba'-' 'do an-a' klehkpeh 'dlu, eh-: :korn dhih an dhobo-'.

³⁵'De or :dhe dih, or 'da or-a'a: bo :na-nyor⧾-a' :bhue: 'yor 'sororn' :dao', 'do or bo, 'de or :wlu 'de on bo, or 'dae:, Nyor :or 'bhorn-a :or 'ye-a' nyor :klaba' no, :yee' 'nyi or :ya or-a' 'jeh ya, or 'ye 'bhoi-yu no 'do a-a' klehkpeh bo.

³⁶:Yee' or 'duo: 'yu-yu-beh :due'-' 'weh. 'De or dhe-or dih 'do an-a' gwea. 'De or 'duo-or ya-', or 'dhu-or :gwlii'. :Yeh or no :ao', :yee' or :wlu-' 'de on bo, or 'da,

³⁷Nyor :or kpon-a 'yu-yu dih, 'de 'an 'nyne 'di, :ka :yor :daa or :ne-a, :yee' nyor :dao', 'mor-: 'o or kpon dih. :Yee' nyor :or kpon-a 'on dih, :yee' eh :se 'on :due' or :se-' dih kpon. Jorwor: nyor :or dbo-a 'on, or-: 'o or kpon dih :ke.

³⁸:Yee' :Jororn' :wlu-' 'de :Yusu' bo, or 'dae:, Nyor⧾ deh :torne-nyor:, :a 'ye 'yu :due', or-: za nyor⧾ 'kwla 'ye-dih-deh⧾ 'de, 'de :an-a' 'nyne 'di. 'De :a zela-or :gwluhuh' or 'ye 'bor, deh no-eh, or :se 'noror :a 'nyne-' 'wluh.

³⁹'De :Yusu' 'dae: 'de or bo, A 'bor or-a' 'borboa' 'i :po-eh. Deh no-eh, nyor :or no-a deh :kolu' 'de 'an 'nyne 'di, or se 'beh-dih: or 'ye 'on deh⧾-zon⧾ 'bhun dih-' :za-dih: 'de ybei'.

⁴⁰Deh no-eh, nyor :or se-a :a bo vorn, :yee' or :ne 'noror :a-a' 'for bo.

⁴¹Dhih 'jeh, 'an zela a :gwluhuh', nyor-beh: :or 'nyi-a a 'ni-korbuh a 'ye-a' 'na, 'de 'an 'nyne 'di, :ka a na-a 'on 'de, eh-a' dhih, :yee' nyor :dao', or mu eh-a' geli' :za-dih-deh 'ye-: :gbor :gbor.

⁴²:Yee' nyor-beh-nyor-beh: :or mu-eh :no, 'de 'nynuu: :nyene' :daa :on po-a 'an dhih dhih 'jeh-', on 'ye-a' 'o :gwie: 'jeh 'i 'wluh, 'de on 'ye-a' :gwie-zon kpa, :yee' eh mu 'yi dih :nmor 'do nyor :dao' bo, sobu' :klaba' 'ye 'o or :gwlii' :san-dih-eh:, 'de or 'ye 'o yobo' worn :po-eh:.

⁴³:Yee' :mor eh 'dhu, :an-a' son no-eh, 'de :on 'ye deh-zon no, :yee' chehn-uh 'o. Eh :nmor-: 'yi :on 'ye :nea:, 'de :on 'ye 'de Nyorsoa 'bli yai' mu, :eh :zi 'o 'ble son⧾ 'sororn', 'de mu 'de 'ku 'bli, 'do :dha neh :eh se-a 'mo-a' :korn, eh :ne-a, [

⁴⁴:dha :samu'⧾ :en di-a nyor⧾-a' yau, :en-' 'meh-a, en :ne-a, 'de neh :eh :ne-a 'de, eh-a' 'mo-a.]

⁴⁵:Mor :an-a' buh no-eh 'de :on 'ye deh-zon no, :yee' chehn-uh 'o. Eh :nmor-: 'yi :on 'ye :nea:, 'de :on 'ye 'de Nyorsoa 'bli yai' mu, :eh :zi 'o 'ble buh⧾ 'sororn', 'de :on 'ye 'de 'ku 'bli :po-eh:, [

⁴⁶:dha :samu'⧾ :en di-a nyor⧾-a' yau, :en-' 'meh-a, en :ne-a, 'de neh :eh :ne-a 'de, eh-a' 'mo-a.]

⁴⁷'De :mor :an-a' 'yli-eh no-eh 'de :on 'ye deh-zon no, :yee' za-eh 'de. Eh :nmor-: 'yi :on 'ye 'yli-eh :due' 'ble, 'de :on 'ye 'de Nyorsoa-a' nyor⧾ wlu 'ken :korn-eh 'zorn pa, :eh :zi 'o :on 'ye 'yli 'sororn' 'ble, 'de :on 'ye 'de 'ku 'bli :po-eh:,

⁴⁸:dha :samu'⧾ :en di-a nyor⧾-a' yau, :en-' 'meh-a, en :ne-a, 'de neh :eh :ne-a 'de, eh-a' 'mo-a.

⁴⁹Nyor⧾-a' klehkpeh, neh-a mu-uh 'dlu 'wla-: :ka 'torn-a 'wla-a 'de 'soma' bo.

⁵⁰'Torn :nmor-: 'yi. Jorwor: :mor or :gweh worn, :yee' :eh mu-or 'torn-' :no :neheh' :eh? A :ne 'torn-worn 'do a-a' 'jeh bo, a-a' :gweh-' worn, 'de a 'ye ken dih kpon-dih: 'de a 'nyne-'.