Read Eastern Krahn Lu 10 Bible Online

Lu 10 - Eastern Krahn bible

Lu 10

¹:Yee' :yeh deh :daa eh zi-a, :yee' :Gwlor :baa' gan nyor⧾-a' :kwlaa :meheh' 'sorn 'yor 'sororn' :noo'. 'De or dbo an-a' 'sororn' 'sororn', on 'ye or ybei' mu, 'de gwlor⧾-a' klehkpeh or yi-a 'di dih :mu 'da-: 'dekorn: deh⧾-a' klehkpeh or yi-a dih :mu 'da-:.

²'De or 'dae: 'de on bo, 'Vluu'-koo :dhubu:-'. Jorwor: :koan: :no-nyor⧾ se 'i :dhie:. Eh-a' dhih, a :wlu 'de :Gwlor :baa' bo, :or no-a 'vluu'-gle-a' :kororn-nyor, or 'ye :koan: :no-nyor⧾ 'de or 'bli 'gle dbo, on 'ye :koo: :dao' chehn.

³A :gbee'e:. A mu. 'An dbo a-uh 'weh, :eh gweh-a :ka 'blae'⧾-nynuu mu-a 'de ji⧾ 'klu-'.

⁴A-a' :kpa-' 'wlii-: 'tiei 'di :po :gleu'-: 'dekorn: :buhbuh:⧾ :nee'-:. 'De a-a' :gble-dih:-' nyor⧾ 'do :gwie 'i, eh :ne-' a-a' ti :zi-dih:.

⁵'Gbu a mu-a 'de 'di :pa, :yee' :zai'-deh: a 'ye-a' no, eh-: 'dhu, a :wlu 'de nyor⧾ :on :ne-a 'de bo, a 'da, :Bhorlie' 'do 'gbu :daa bo.

⁶:Mor nyor :ne 'de 'gbu :dao' 'di, or :taa nyor⧾ dih kpon deh 'jeh, :yee' :bhorlie' :dao', eh mu 'de :sie:. Jorwor: :mor eh se :ao' :ne, :yee' Nyorsoa :se-' 'gbu :dao' :bhorlie' bo :po i.

⁷:Mor a 'si :gwlor-' dih, :yee' 'gbu an mu a 'nyi-:, mo-: a 'ye 'di dih :dhe. :Yee' a di deh an mu-a a 'nyi-:, 'de a 'na deh an mu-a a 'nyi-:. Deh no-eh, nyor :or no-a :koan, or :bleh-dih-eh 'i, or 'ye eh-a' geli' :za-dih-deh 'ye. A-a' 'wluh-:-' 'gbu 'di, a-a' :mu-' 'gbu :noo' 'di.

⁸:Mor a 'si :gwlor-' dih, 'de nyor⧾ 'ye a dih kpon, deh-beh-deh-beh: an mu-a a 'nyi-:, 'de an mu-a 'o a ybei' dih :dhe, a di-eh.

⁹A 'puh-dih: puhba-nyor:⧾ :on :ne-a 'o :gwlor :dao' 'di. :Yee' a zela-uh :gwluhuh', a 'dae:, Nyorsoa-a' nyor⧾ wlu 'ken :korn-eh 'koan'-dih: a dih 'weh.

¹⁰Jorwor: :mor a 'si :gwlor-' dih, 'de nyor 'ye :ao', or se a dih kpon, :yee' a 'si 'de 'kpa ken dih, a 'da,

¹¹:Bhuhbuh' :a 'si-a dha :gwlor-' dih, :on 'ya-a :a buh⧾ dih, an-a' 'jeh :sloror', mo-: :a 'gbabo 'noror :a-a' :buhbuh⧾ 'zorn dih, eh 'ye a 'i :to-dih: :ka Nyorsoa :za-a a-a' deh son 'di. Jorwor: a :korn a 'ye-eh' yubo:, :ka Nyorsoa-a' nyor⧾ wlu 'ken :korn-eh 'koan'-: bo.

¹²'An zela a :gwluhuh', :eh :mor 'do Nyorsoa-a' zabe: :zi-we-eh 'di, Nyorsoa-a mu :wehlih 'ye-: 'do 'Salor-nyor⧾ bo, eh 'ye 'o nyor⧾ :on :ne-a 'o :gwlor :dao' 'di-' :zi.

¹³:Yee' :Yusu'-a 'kpa or-a' wlu 'dlu bo, or 'dae:, 'Chlo 'do a :mor :Kola'zin-nyor⧾ bo. 'Chlo 'do a :mor :Behse'la-nyor⧾ bo. Deh no-eh, deh⧾ :kolu'⧾ 'on no-a 'do a bo, :mor 'on no-ih 'do 'Taya-gwlor-: 'dekorn: 'Saedorn-gwlor-: bo :dee', :yee' an mu an-a' deh⧾-zon⧾ dih 'tali:, 'de on 'ye 'de Nyorsoa bo 'bili: :dee' see, 'de on 'ye 'tiei-zon⧾-' pa, on 'ye 'de :bhuhbuh' 'nyne-' dih :dhe, on 'ye-eh' nyor⧾ 'i :to-dih: :ka on 'bili:-a-' dih.

¹⁴'Do eh-a' dha, :yee' 'do Nyorsoa-a' zabe: :zi-we-eh 'di, Nyorsoa-a mu :wehlih 'ye-: 'do nyor⧾ :dao' bo, eh 'ye a-uh' :zi.

¹⁵:Yee' a :mor :Kapa'nior-nyor:⧾, 'do a bo. A 'bhorn a 'ye a-a' 'jeh 'i 'beh-dih: a 'ye 'de yai' nyni :e? 'Kei:. Nyorsoa-a mu a 'de 'ku 'bli :po.

¹⁶:Yee' :Yusu' :wlu-' :neheh' 'de or-a'a: bo :na-nyor⧾ bo, or 'dae:, Nyor :or to-a a-a' wlu :dou'⧾ bo, 'mor-: 'o or to :dou'⧾ bo. 'De nyor :or se-a a-a' dhih 'worn-dih:, :yee' 'an dhih :oo', or :se-' 'worn-dih:. :Yee' nyor :or se-a 'an dhih 'worn-dih:, :yee' nyor :or dbo-a 'on, or-a' dhih :oo', or :se-' 'worn-dih:.

¹⁷:Yee' nyor⧾-a' :kwlaa :meheh' 'sorn 'yor 'sororn' :Yusu' dbo-a, mo-: yi de, 'de 'mona: ka 'di. 'De on po :Yusu' kuna', on 'da, :Gwlor :baa', :mor :a no :an-a' 'nyne, :yee' 'kwla 'ye-dih-deh:⧾ :sloror', en :ya en-' 'jeh-: ya, 'do :a 'zorn.

¹⁸:Yeh on :za-a deh :daa-' 'de or bo, :yee' or :wlu-', or 'da, 'On 'ye 'ku, on 'wluh 'de Nyorsoa 'bli yai', on 'kpa 'zorn, eh gweh :ka dhehn 'kpa-a.

¹⁹A :gbee'e:. 'On 'nyi a 'kpih 'weh, a 'ye sehn-: 'dekorn: 'jaan'-: ken 'si. 'De 'on 'nyi a 'kpih 'weh, 'do 'ku :on 'nyeh-a a-uh', an-a' 'kpih-a' klehkpeh 'dlu bo, 'de deh :se-' a :no i.

²⁰Jorwor: a-a' 'kpa-:-' 'mona-', :ka 'kwla 'ye-dih-deh⧾-a ya-a en-' 'jeh ya 'do a 'zorn. Jorwor: a 'kpa 'mona-', :ka a-a' 'nyne 'chle-eh 'de Nyorsoa 'bli yai'.

²¹:Yee' 'do ti :dao' 'di, Gban 'i :ne :Zulu: mo-: no-eh 'de 'mona 'yi-dih: :Yusu' dih. 'De or :wlu, or 'dae:, 'On-ba:, :mor :or 'dhu-a :Gwlor :baa' 'de yai'-: 'dekorn: 'noror 'zorn-: 'on po :on 'zio. Deh no-eh, :on 'zile: deh⧾ :daa, :toror' :korn-nyor⧾-: 'dekorn: 'chlee-deh: yubo-nyor⧾-: dih, 'de :on :to-dih-ih 'nynuu: :nyene' 'i. Keen', 'On-ba:, eh 'pehn-dih: :an-a' :porluh-: dih, :on 'ye-eh' no.

²²:Yee' or :wlu-' 'de nyor⧾ bo, or 'dae:, 'On-ba 'nyi 'on 'kpih 'weh, 'do deh⧾-a' klehkpeh bo. Eh se nyor :korn, :or 'ye-a Nyorsoa-a' 'Yu yubo:. Jorwor: or :Baa' :due' gbai, or-: yubo-or. 'De eh se nyor :korn, :or 'ye-a nyor or :Baa' 'dhu-eh:-' yubo:. Jorwor: or-a'a: 'Yu :due' gbai, or-: yubo: nyor or 'dhu-eh:-' 'dekorn: :yuh or-a'a: 'Yu-a 'bhorn-a, or 'ye-a or :Baa' 'i :to-dih:.

²³:Yeh :Yusu' :za-a deh :daa-', :yee' or 'bili:-'-: dih, 'de or-a'a: bo :na-nyor⧾ bo. 'De or :wlu 'de on bo, 'de 'slan :pa ka 'di, or 'dae:, :Bhorlie' 'do 'yli :dao' bo, :en 'ye-a deh a 'ye-a.

²⁴'An zela a :gwluhuh', Nyorsoa-a' wele-eh: :po-nyor:⧾ :dhulu'-: 'dekorn: 'keen-boi' :dhulu'-: an 'bhorn deh⧾ a 'ye-a, on 'ye-ih' 'ye :dee', jorwor: on :se-ih' 'ye. 'De an 'bhorn deh⧾ a 'worn-a, on 'ye-ih' 'worn :dee', jorwor: on :se-ih' 'worn.

²⁵Eh :korn 'we-eh :due', 'de :Mose'-a' 'tele' yubo-yu :due', :nyna dih 'de :gwlor-nyor⧾ 'klu-'. 'De or dhele: :Yusu' dih, deh no-eh, or 'bhorn-dih: :Yusu' wlu 'worn dih, or 'da, Nyor⧾ deh :torne-nyor:, deh 'on 'ye no 'de 'on 'ye 'kmo :sie: :febeh' 'ble :eh?

²⁶'De :Yusu' 'da, Deh 'i-deh: :eh 'chle-eh 'de :Mose'-a' 'tele'-chlee-deh 'di :eh? :Kaa :an no eh-a' zlo-a' :eh?

²⁷:Yeh or 'da :ao', :yee' 'yu :dao', or 'dae:, :Ybeh :an-a' :Gwlor :baa' Nyorsoa-', 'do :an-a' :porluh⧾-a' klehkpeh-: :an-a' :febeh'-a' klehkpeho-: 'dekorn: :an-a' 'kpih-a' klehkpeh-: bo. :Yee' :ybeh nyor⧾ :on :ne 'ti-a :dha :due'-', :ka :on no-a :an-a' 'jeh-a' :ybeh-a'.

²⁸'De :Yusu' 'dae:, 'Ka-: eh :ne 'jeh ka. Dhih 'jeh :oo', :an za-a-'. :Mor :on no-eh, :yee' :an mu 'kmo :sie: :febeh' 'ble-:.

²⁹Jorwor: 'yu :dao', or 'bhorn or 'ye or-a' 'jeh deh yubo-nyor 'da-dih: :gbor. Eh-: :korn dhih, 'de or 'dae: 'de :Yusu' bo, :Or 'dhu nyor :ne 'on 'ti-a :dha :due' :eh?

³⁰'De :Yusu' 'dae:, Eh :korn ti :due', :yee' :Jueh'-yu :due', or-: 'wluh :Julu'slehn, or-: mu :Jehliko'o. :Ka or mu-a, :yee' 'ylii'-nyor⧾ kpon-or'. 'De on chehn-or wluh⧾ dih. 'De on bla-or :blaa:, on :sie-or 'o, :yee' or 'bhorn 'meh-a'. 'De on mu.

³¹:Yeh ti :zi-dih:-a 'o ken dih, :yee' Nyorsoa-a' 'slaa: :za-nyor :due', or-: 'kpa :gwie-' 'jeh :dao' 'i. :Yee' :yeh or 'ye-a 'yu :dao', :yee' or zi-or-: dih, or :yi-dih: 'de :gwie-' 'for 'i.

³²'De deh :ne-a :due' 'di, :yee' 'Livae-yu :due' or-: yi 'o. :Yee' :yeh or 'ye-a 'yu :dao', :yee' or :yi-dih: 'de :gwie-' 'for 'i :ke.

³³Jorwor: ti Sehmeh'la-yu-a na-a :gwie: :dao' bo, 'de or :yeh-dih:-a 'yu :dao' ken, :yee' or-a' :wehlih 'kpa 'de or 'di 'weh.

³⁴'De or mu 'o or bo, or po 'o 'chlan-: 'dekorn: nomor-: 'do or 'pa 'i, 'de or san 'o. :Yeh or :gweh-a 'i, :yee' or dhe-or 'o 'do or-a' 'jeh-a'a: 'dhornke ken dih. Or kpa-or 'de 'gbu 'duhba⧾-a ko-dih-a 'di. 'De or 'dhu-or 'yli-eh bo.

³⁵:Yeh zorn zen-a, :yee' or :za 'o 'sebla-wlii 'sororn', or 'nyi-ih 'yu :or :korn-a 'gbu :dao', or 'dae:, 'Dhu-or 'yli-eh bo o. :Yee' :mor 'on yi de, 'wlii-eh: :an mu-a :plo, :eh mu-a 'o ken 'kpa-:, 'an mu-eh :on de 'nyi-:.

³⁶:Yeh :Yusu' gweh-a 'dlan :dao' or-a' po-a' 'i, :yee' or dhele: 'tele' :zi-yu: :dao'-: dih, or 'dae:, 'Noror nyor⧾ taan :daa 'klu-', nyor :yoror :an-a' :porluh kpon :or no :dha :due' 'ti-kplen 'do 'yu :or 'ylii'-nyor⧾ bla-a bo :eh?

³⁷:Yee' 'tele' yubo-yu: :dao', or 'dae:, 'Yu :or 'ye-a or-a' :wehlih, or-: 'o. :Yeh or 'da :ao', :yee' :Yusu' 'da, Mu, :on 'ye deh :ne-a :due' no.

³⁸:Yee' :Yusu'-: 'dekorn: or-a'a: bo :na-nyor⧾-: an mu-'. :Yeh an mu-a, :yee' on 'si 'o :gwlor-yu :due' 'di-: dih, 'do :wor 'nynor :due' an 'da-dih-a :Mata' or :ne. Or-: za-or :gwie 'i.

³⁹:Mata' 'ble dei'-nynor-kpao' an 'da-dih-a :Mehle', or-: :dhe dih 'do :Yusu' ybei', 'de or to :Yusu'-a' nyor⧾ deh :torne-eh :dou'⧾ bo.

⁴⁰:Yee' :koan: :Mata'-a no-a 'de 'gbu 'de, or :dhie: 'i, eh-: 'beh-dih-or 'worn dih. Eh-: :korn dhih :oo', or yi 'o :Yusu' bo, or 'da, :Gwlor :baa', eh :se deh 'do :on bo :e? Eh :nmor-: 'yi :naa :e? Deh 'an dei'-yu sie-a 'on :koan kwa dih. Zela-or :gwluhuh', or 'ye 'on-' :za-dih: 'da yi.

⁴¹Jorwor: :Gwlor :baa' :wlu-' 'de or bo, or 'dae:, :Mata', :Mata'. Deh⧾ :dhulu', me-: 'beh-dih :an-a' :porluh 'worn dih, 'de :an-a' :porluh-a 'neneh 'de dih.

⁴²Jorwor: deh :due', eh-: :on :korn :on 'ye 'ble. Deh-a' 'jeh :dao', :eh :nmor-a 'yi dih, eh-: :Mehle' gan. :Yee' eh :se 'de or 'kwa :za-eh: i.