Read Eastern Krahn Lu 11 Bible Online

Lu 11 - Eastern Krahn bible

Lu 11

¹Eh :korn 'we-eh :due', 'de :Yusu' :ne :dha-beh, 'de or :wlu 'de Nyorsoa bo. :Yeh or :gweh-a 'i, :yee' or-a'a: bo :na-nyor⧾-a' nyor :due', or-: :wlu 'de or bo, or 'dae:, :Gwlor :baa', :torne: :a 'de Nyorsoa bo :wlu-eh, :ka :Jororn' no-a or-a'a: bo :na-nyor⧾-a' deh :torne-eh, on 'ye-a' 'de Nyorsoa bo :wlu-eh no.

²'De :Yusu' :wlu 'de on bo, or 'dae:, :Mor a :taa 'de Nyorsoa bo wlu, :yee' a 'da, :A :Baa', deh-' 'ye-eh: 'do :an-a' gban 'i :ne-nyne bo. 'Nyi :an-a' nyor⧾ wlu 'ken :korn-eh 'yle.

³'Nyi :a-a' 'we-a' klehkpeh dii-deh.

⁴'Ma-dih: :a-a' deh⧾-zon⧾-a' dhih bo. Deh no-eh, :a 'ma-dih: :a 'bei'-a' klehkpeh :on no-a deh⧾-zon⧾ 'do :a 'bhun, an-a' deh⧾-zon⧾-a' dhih bo 'weh :ke. :An-a' :kpa-dih:-' 'de :a dih 'dhen-eh bo.

⁵:Yee' :Yusu' :wlu-' 'de on bo, or 'dae:, :Mor eh 'dhu deh-', 'de a-a' nyor 'ye 'be 'ble, 'de or 'ye 'de or bo mu dholo-' zuee, 'de or 'ye-or' :gwluhuh' zela:, or 'ye :ao', 'On 'be, :on :korn 'gen, 'nyi 'on 'bhlee: :kpuan'⧾ taan. 'An mu-ih de :ya.

⁶Deh no-eh, 'on 'be :due', :or :na-a :gwie: :dhorno', or-: yi 'o 'on bo. 'De 'on se dii-deh 'ble 'on 'ye-or' 'nyi.

⁷:Mor eh 'dhu, :on 'be :dao', or :wlu 'de 'gbu 'di, or 'da, 'Bor, :an-a' 'beh-dih:-' 'on 'worn dih. :Kpaa' :po-eh: 'o :weh. 'De 'mor-: 'dekorn: 'an-a: 'nynuu-: :a 'pehn dih :weh. Eh-a' dhih, 'on se 'beh-dih: 'on 'ye-' :sorn, 'de 'on 'ye :on deh 'nyi.

⁸'An zela a :gwluhuh', :mor or :se-' :sorn, or se-or 'bhlee 'nyi, 'do 'be deh-a' :taa' 'bla, jorwor: or mu-' :sorn, or 'ye-or' deh-beh-deh-beh: or se-a 'ble 'nyi, deh no-eh, or 'neh-or ken :chio'lo:.

⁹Eh-a' dhih, 'an zela a :gwluhuh', a 'yba-dih: Nyorsoa deh, :yee' a mu-eh 'ye-:. A 'bhorn-eh dih, :yee' a mu-eh 'ye-:. :Mor a bla :kpaa', :yee' or mu 'o 'wluh-: 'do a bo.

¹⁰Deh no-eh, nyor⧾-a' klehkpeh :an 'yba-dih-a Nyorsoa deh, an 'ye-eh'. :Yee' nyor :or 'bhorn-a deh dih, or 'ye-eh'. 'De mor nyor :or bla-a :kpaa', or mu 'o 'wluh-: 'do or bo.

¹¹'De a 'nyne-', :baa' :yoror :or :korn 'yu-a mu-or zimi-eh 'yba-dih:, 'de :or 'ye-or' sehn 'nyi 'do eh bo :eh?

¹²'De mor, :mor or-a'a: 'yu 'yba-dih-or :soan'-gehn, 'de :or 'ye-or' 'jaan' 'nyi :eh?

¹³'De mor :ka a-a' kplen-a' :yeh :nyni 'yi dih, a yubo: 'nyii'-deh:⧾ 'jeh, a 'ye-a' a-a'a: 'nynuu 'nyi 'weh, :yee' a :Baa' :yor :or :ne-a 'de yai', dha or mu :na-dih: 'do nyor⧾ :an 'yba-dih-or Gban 'i :ne :Zulu, an-a' dhih bo :eh?

¹⁴Eh :korn 'we-eh :due', 'de :Yusu' :za 'o 'kwla 'ye-dih-deh: :eh-a' :wlu-a', 'do 'yu :due' 'de. :Yee' :yeh 'kwla 'ye-dih-deh 'wluh-a 'o 'bobo' :dao' 'de, :yee' or :wlu-'. :Yee' eh :florn-dih: nyor⧾ :on :ne-a 'o-: worn.

¹⁵Jorwor: an-a' nyor⧾ :noo' :wlu-', on 'da, :Behzeh'bu: 'o, :on no-a 'ku, 'de :on no-a 'kwla 'ye-dih-deh: :klaba', mo-: 'nyi-or 'kpih, 'de or za nyor⧾ 'kwla 'ye-dih-deh⧾ 'de.

¹⁶:Yee' nyor⧾ :noo'-a 'bhorn on 'ye-or' dih 'dhen. Eh-: :korn dhih, 'de on dhele-or dih, or 'ye-uh' 'yi :to-dih-deh 'i :to-dih: :eh beh or-a' 'kpih 'wluh 'de Nyorsoa bo yai' deh 'jeh :eh?

¹⁷Jorwor: :Yusu' yubo: deh an za-a-' 'do on :gwlii' 'weh, 'de or 'da, :Mor 'bluhba-dlu :za an-a' 'jeh 'sororn', 'de on 'ye an-a' 'jeh bo vorn, :yee' 'bluhba-dlu: :dao', an mu gbe :zie:. :Mor 'cheh-buh :za an-a' 'jeh 'sororn', 'de on 'ye an-a' 'jeh bo vorn, :yee' an mu ya :gba.

¹⁸:Mor 'ku :za an-a' 'jeh 'sororn', 'de on 'ye an-a' 'jeh bo vorn, :yee' :kaa an-a' nyor⧾ wlu 'ken :korn-eh mu dih :nyna-eh :no :eh? Deh no-eh, 'de 'an za-a deh :daa-', eh-: 'dhu, a 'da :Behzeh'bu 'nyi 'on 'kpih, 'on 'ye nyor⧾ 'kwla 'ye-dih-deh⧾ 'de :za.

¹⁹:Yee' :mor eh 'dhu, :Behzeh'bu 'nyi 'on 'kpih, 'on 'ye nyor⧾ 'kwla 'ye-dih-deh⧾ 'de :za, :yee' :or 'nyi a-a'a: nyor⧾ 'kpih, 'de an za nyor⧾ 'kwla 'ye-dih-deh⧾ 'de :ke :eh? :Yee' 'do eh-a' dha, mo-: :an mu a-a' zabe: :zi-nyor⧾ :no.

²⁰Jorwor: :mor eh 'dhu, Nyorsoa-a' 'kpih-', en no-eh, 'de 'on 'ye nyor⧾ 'kwla 'ye-dih-deh⧾ 'de :za, :yee' eh-: :za-eh: gbor :ka Nyorsoa-a' nyor⧾ wlu 'ken :korn-eh :ne-a 'noror a 'klu-' :naa.

²¹:Mor :kmuu-nyor 'ble or-a'a: :vorn-dih-deh⧾-a' klehkpeh, :mor or 'dhu or-a' 'jeh-a'a: 'gbu 'yli-eh bo, :yee' deh :se-' or-a'a: :kororn-deh⧾ 'bhun :bla i.

²²Jorwor: :mor :kmuu-nyor-a' :yor :kmu-a, 'de :or zi-or-', :mor or vorn-or bo, 'de or 'ye-or' du, :yee' or mu or-a'a: :vorn-dih-deh:⧾ or dhe-a :gwlii' :kpa, 'de or 'ye or-a'a: :kororn-deh⧾-' gble.

²³Nyor :or se-a 'noror 'an 'for bo :ne, :yee' or vorn 'on bo. :Yee' nyor :or se-a 'on bo 'kpa 'do deh⧾-a' :dha :due' :po-eh bo, :yee' or gboba deh⧾ dih.

²⁴:Yee' :Yusu'-a kpa or-a' wlu 'dlu bo, or 'dae:, :Mor 'kwla 'ye-dih-deh :za-eh: 'o nyor 'de, :yee' eh zi-dih-'-: dih, eh na 'de 'kwla⧾-' dih. Eh 'bhorn :dha eh 'ye-a' :forn-dih:. Jorwor: :mor eh se dha 'ye, :yee' eh 'da, 'An mu 'de 'an-a: 'gbu soa 'di de :mu, :dha 'on 'wluh-a.

²⁵'Ka-: 'o eh no, 'de eh yi de. :Yeh eh yi-a de, :yee' eh 'ye eh-a'a: 'gbu soa wobo-eh: 'di dih, on :po-eh: 'kpa.

²⁶:Yee' eh mu-', eh :ya 'de 'kwla 'ye-dih-deh:⧾ :nee' :meheh' 'sorn, :en no-a 'kulu-deh⧾, :en :zi-a 'o eh-a' 'jeh-', 'de en pa, en 'ti 'de. :Yee' :mor en gweh 'de or 'di 'dlu, :yee' nyor :dao', or :ne-' 'kmo-zon: :on :zi-a 'o, or-a' :zai' neh-'.

²⁷:Yee' :yeh :Yusu' :za-a deh :daa-', :yee' 'nynor :or :ne-a 'de nyor⧾ :doru' :dao' 'klu-', or-: 'wor, or-: :wlu 'de or bo, or 'dae:, :Bhorlie' 'do 'nynor :or 'wluh-a :on bo, 'de :or 'nya-dih:-a :on.

²⁸Jorwor: :Yusu' :wlu-' 'de or bo, or 'dae:, :Bhorlie' 'do nyor⧾ :on 'worn-a Nyorsoa-a' wlu, 'de :on dhe-uh-a 'o dih bo, :eh :zi 'o, 'on 'de-a' :bhorlie' bo :po-eh-'.

²⁹:Yee' :yeh nyor⧾ :doru'-a 'kpuhba-a ken dih, :yee' :Yusu'-a kpa or-a' wlu 'dlu bo, or 'da, :Kana-nyor:⧾ :daa, on no deh⧾-zon:⧾ :no-nyor:⧾. An 'bhorn 'yi :to-dih-deh:. Jorwor: 'yi :to-dih-deh :due' an mu-a 'ye-: 'klein', eh-: 'dhu, Nyorsoa-a' wele-eh: :po-nyor: :Jona'-a' 'yi :to-dih-deh-'.

³⁰Deh no-eh, :ka :Jona' no-a 'yi :to-dih-deh 'do 'Neneva-nyor⧾ bo, :yee' 'ka-: 'yu an 'da-dih-a Nyor-kpalu-a' 'yu-a mu 'yi :to-dih-deh :no :ke, 'do :kana-nyor:⧾ :daa bo.

³¹'Do Nyorsoa-a' zabe: :zi-we-eh 'di, 'keen-nynor: :or 'wluh-a 'de 'bluhba-dlu: :on :ne-a 'de 'yluh-a' 'kwla 'wluh-dih: 'da-a' kona-for bo, or mu dih :nyna, 'do :kana-nyor:⧾ :daa ybei', 'de or 'ye-uh zabe :kpon-dih:. Deh no-eh, or 'wluh :dha :dhorno' or 'ye 'Keen :Salomor'-a' :toror' :korn-eh :dou'⧾ bo :to. A :gbee'e:. Nyor :noror' :noror' :ne :daa :naa, or-: 'beh 'i, or-: :zi 'o :Salomor'-'.

³²'Do Nyorsoa-a' zabe: :zi-we-eh 'di, 'Neneva-nyor⧾-a mu dih :nyna, 'do :kana-nyor:⧾ :daa ybei', 'de on 'ye-uh zabe :kpon-dih:. Deh no-eh, on 'tali: an-a' deh⧾-zon⧾-: dih, 'de on 'bili: 'de Nyorsoa bo, ti :Jona' po-a Nyorsoa-a' tubo-wlu⧾ 'de on bo. A :gbee'e:. Nyor :noror' :noror' :ne :daa :naa, or-: 'beh 'i, or-: :zi 'o :Jona'-'.

³³:Yee' :Yusu' :wlu-' :neheh', or 'dae:, Nyor-a' tba 'nape, 'de or-a' dhe-eh 'o :dha :or 'zile-eh, 'de mor or-a' dhe-eh dih, 'de :yabe 'zorn. Jorwor: or dhe-eh :dha eh :korn-a dih, 'de nyor⧾ :an pa-a 'de 'gbu, on 'ye zorn-pli-a' 'ye-a' 'beh-dih:.

³⁴:Yee' :an-a' 'yli-eh:, eh-: 'dhu :an-a' yau-a' 'nape-'. :Mor :an-a' 'yli :nmor 'yi dih, :yee' :an-a' yau-a' klehkpeh 'yi-dih: zorn-pli-: dih. Jorwor: :mor eh 'dhu, :an-a' 'yli se 'yi dih :nmor, :yee' :an-a' yau 'yi-dih: :kule-: dih.

³⁵'Do eh-a' dha, 'dhu :an-a' 'jeh 'yli-eh bo, zorn-pli: :ne-a 'de :on 'di, en :ne-' :kule-' :za-dih:.

³⁶:Yee' :mor :an-a' yau-a' klehkpeh, on 'yi-dih: zorn-pli-' dih, :mor :kule-a' deh-beh-deh-beh se 'o on 'bhun :ne, :yee' an mu 'pu-' :ne, :eh gweh-a :ka 'nape-a fan-dih-a :on ken dih, 'do eh-a' zorn-pli-'.

³⁷:Yee' :yeh :Yusu' gweh-a :wlu-a' 'i, :yee' :Falasi'i-yu :due', or-: :pi-dih-or 'de or 'bli 'gbu. 'De or mu, or :dhe dih, or di deh.

³⁸:Yeh :Falasi'i-yu: :dao', or 'ye-a :ka :Yusu' se-a kwa :dle, 'de or di-a deh, :yee' eh :florn-dih-or-: worn.

³⁹'De :Gwlor :baa' :wlu 'de or bo, or 'dae:, A :mor :Falasi'i-nyor:⧾. A worlor 'de a-a'a: 'di 'na-dih-korbuh⧾-: 'dekorn: a-a'a: 'di :di-dih-deh⧾-: ken dih. Jorwor: :vlehehn' 'yi 'de en 'di 'weh, :en 'dhu-a deh⧾-a' klehkpeh-a' 'klan :korn-eh-: 'dekorn: 'kulu-kplen-:.

⁴⁰A :mor :bobo-nyor:⧾ :daa. Eh :se Nyorsoa :or no-a 'de ken, or-: se 'de 'di no :e?

⁴¹Jorwor: deh a 'ble-a, a 'nyi-eh nyor⧾ :on se-a deh-a' :za-da 'ble, :yee' deh⧾-a' klehkpeh, en mu :vlehehn'-' :gweh 'do a bo.

⁴²'Chlo 'do a bo, a :mor :Falasi'i-nyor:⧾. Deh no-eh, a 'nyi Nyorsoa a-a'a: 'dhuu'-deh:⧾ :en :nmor-dih:-a 'soma' worn, en-' :bhue: neh 'weh, 'dekorn: 'dhuu'-deh⧾-a' klehkpeh :bhue: neh-:. Jorwor: a bla-dih 'yi 'sleh-deh⧾-: 'dekorn: Nyorsoa-a' :ybeh-eh-: worn. Deh⧾ :daa, me-: a :korn a 'ye no, 'de mor a se :korn a 'ye :yih a no-a :dee' see, worn :bla-dih: :ke.

⁴³'Chlo 'do a bo, a :mor :Falasi'i-nyor:⧾. Deh no-eh, a :ybeh-' kpala'⧾-a' 'jeh :ne :en :dhe-dih-eh 'for 'i, 'de 'di :gweh-dih-sla⧾ 'zorn dih-a' ken :dhe :deh. 'De a :ybeh nyor⧾ 'ye a wlu bo po, 'do 'doror', 'do deh-' 'ye ka 'di.

⁴⁴'Chlo 'do a bo. Deh no-eh, a gweh nma-dih-deh:⧾ :en nyor⧾ se-a 'ye, 'de nyor⧾-a na-a ken dih, 'de on se-eh 'i yubo:.

⁴⁵:Yeh :Yusu' 'da :ao', :yee' :Mose'-a' 'tele' yubo-yu :due', or-: :wlu 'de or bo, or 'dae:, Nyor⧾ deh :torne-nyor:. :Mor :on 'da :ao', :yee' :on 'jle-dih: :a 'weh :ke.

⁴⁶'De :Yusu' :wlu 'de or bo, or 'dae:, 'Chlo 'do a bo, a :mor :Mose'-a' 'tele' yubo-nyor:⧾ :ke. Deh no-eh, a 'nyi nyor⧾ 'gbeh⧾ :en :korn-a 'ble-a' :kma-a 'i. Jorwor: a-a' 'jeh, a-a' 'worn, a-a' po-uh 'o :jii-eh :due' :sloror', a 'ye-uh' 'dlu dhe.

⁴⁷'Chlo 'do a bo. Deh no-eh, a ma nma-dih-deh:⧾ 'jeh, 'do Nyorsoa-a' wele-eh: :po-nyor:⧾ a :bai'-a' :bai' 'dba-a bo.

⁴⁸'Do eh-a' no-a' bo, a :to-dih: :a 'i, :ka a 'worn-dih a :bai'-a' :bai'-a' noo-deh⧾ ken dih. An-a' 'jeh :dao', on 'dba-uh'. 'De a :mor, ma nma-dih-deh:⧾ 'jeh, 'do on bo.

⁴⁹'Do eh-a' dha, Nyorsoa :or no-a :toror' :korn-nyor, or :wlu-', or 'dae:, 'An mu wele-eh: :po-nyor⧾-: 'dekorn: dboo-nyor⧾-: 'de on bo :dbo. An mu an-a' :noo' 'dba-:, 'de on 'ye :noo' 'kle 'ye-dih:.

⁵⁰'Do eh-a' dha, Nyorsoa-a' wele-eh: :po-nyor⧾-a' klehkpeh, :eh 'wluh-a 'de 'bluhba-a' glu 'dhu 'da, an-a' nyomor, :or 'wla-a 'zorn, or mu 'o :kana-nyor:⧾ :daa 'dlu :po-eh:,

⁵¹:eh 'wluh-a 'de 'Ebo-a' nyomor bo, 'de :eh :yeh-dih:-a 'Zehkorwlaya' :or 'meh-a 'do 'slaa ken :za-dih-deh-: 'dekorn: Nyorsoa-a' 'sla-: 'nyne bo ken. Keen', 'an zela a :gwluhuh', :kana-nyor:⧾ :daa, nyomor-a' klehkpeh :daa, or mu 'o on 'dlu :po-eh:.

⁵²'Chlo 'do a bo, a :mor :Mose'-a' 'tele' yubo-nyor:⧾. Deh no-eh, a kpa :koeh'eh: :eh kan-dih-a 'o deh-' dih 'worn-eh-a' 'gbu worn 'i 'weh. A-a' 'jeh 'yor-eh :se-' 'de on 'di pa. 'De mor a kan-dih :yuh :an 'bhorn-a pa-a' 'zorn.

⁵³:Yee' :Yusu' 'wluh 'o :dha 'o 'weh. :Yee' nyor⧾ 'tele' :torne-nyor⧾-: 'dekorn: :Falasi'i-nyor⧾-: on 'kpa 'o or-a' 'bhun dih :wlu-dih: 'da 'weh 'gabaa. 'De on 'kpa 'o or-a' dih dhele: 'da 'do deh⧾ :dhulu'-a' dhih bo.

⁵⁴Deh :dao' an dhele-or dih, :yee' an 'bhorn :ka on 'ye-a' no, 'de :mor or zi-a deh 'i, 'de on 'ye-or' dhih :kpon-dih:, 'do deh-zon: or mu-a-' :za bo.