Read Eastern Krahn Lu 12 Bible Online

Lu 12 - Eastern Krahn bible

Lu 12

¹:Yee' nyor⧾-a' 'wlu-a' 'wlu, mo-: :gweh-dih: 'o, 'de an 'si-dih on 'bei' ken dih. :Yee' :Yusu'-a'a: bo :na-nyor:⧾, mo-: or :wlu 'de bo :zai', or 'dae:, A 'dhu a-a' 'jeh :dhororn', 'do :Falasi'i-nyor⧾-a' deh⧾ :en 'vu-dih-a 'bhlee, :en 'dhu-a nyor⧾-a' 'yli 'ye-deh⧾-', en :ne-' a 'kor-dih: o.

²Deh-beh: :eh :kan-eh worn 'i, eh mu ken :nyeh. 'De deh-beh: :eh 'zile-eh, eh mu yubo-eh:.

³'Do eh-a' dha, deh a :za-a-' 'de :kule-', eh mu 'worn-eh: 'de zorn-pli-'. 'De deh a :pa-dih:-a 'slan-' 'de :chuu 'di, eh mu :za-eh: 'de 'gbu 'dlu.

⁴:Yee' 'an zela a :gwluhuh', 'an :ybeh-dih-nyor:⧾. A-a' :ple-' nyor⧾ :yuh-a: 'dba-a nyor-a' yau, 'de :on se-a 'beh-dih: :on 'ye-a deh-beh no :neheh'.

⁵Jorwor: 'an mu a 'slen 'dhu-: nyor a :korn a 'ye-a' ple. A ple Nyorsoa, :mor :or 'dba-a nyor, :yee' :or 'ble-a 'kpih :or 'ye-or 'de 'ku 'bli po. Keen', 'an zela a :gwluhuh', or-: a 'ye ple.

⁶Eh :se 'yalih :mm' :en se :plo-eh: 'do 'kaba-yor 'sororn' bo :e? Jorwor: en-' deh :due' 'see bo 'ma-dih-eh 'do Nyorsoa ybei'.

⁷A-a' 'mii: :sloror' :en :ne-a 'o a 'dlu-a' 'jeh, en-' klehkpeh :zlo-eh:-' 'tene' :kpeen:. :Yee' 'do eh-a' dha, :fano-a' :no-' a-uh. A 'kpa deh ken 'gabaa, :eh :zi 'o 'yalih :dhulu'-'.

⁸:Yee' 'an zela a :gwluhuh', nyor-beh: :or 'worn-dih:-a 'an dhih, 'do :gwlor-nyor⧾ ybei', :yee' 'yu an 'da-dih-a Nyor-kpalu-a' 'yu-a mu or-a' dhih 'worn-dih: :ke, 'do Nyorsoa-a' 'enjor-nyor⧾ ybei'.

⁹Jorwor: nyor-beh: :or dhobo:-a 'an dhih-' 'do :gwlor-nyor⧾ ybei', :yee' 'yu an 'da-dih-a Nyor-kpalu-a' 'yu-a mu or-a' dhih-' dhobo: 'do Nyorsoa-a' 'enjor-nyor⧾ ybei' :ke.

¹⁰Nyor⧾-a' klehkpeh :an mu-a 'yu an 'da-dih-a Nyor-kpalu-a' 'yu 'bhun dih :wlu-dih:, an-a' deh⧾-zon⧾-a' dhih-a mu bo 'ma-dih-eh:. Jorwor: nyor :or mu-a Gban 'i :ne :Zulu-a' 'nyne 'kor-dih:, or-a' deh⧾-zon⧾-a' dhih :se-' bo 'ma-dih-eh: i.

¹¹:Yee' :mor on kpa 'de a 'di :gweh-dih-sla⧾ 'zorn, 'do an-a' zabe: :zi-nyor⧾ ybei', 'de on 'ye-a 'de nyor⧾ wlu 'ken :korn-nyor⧾-: 'dekorn: 'kwi⧾ :klaba'⧾-: ybei' kpa, eh-a' 'beh-dih:-' a-a' :porluh⧾ 'worn dih, 'do a-a' 'jeh dhih ken :za-eh bo-: 'dekorn: deh a mu-a :za-:.

¹²Deh no-eh, 'do ti-a' 'jeh :dao' 'di, Gban 'i :ne :Zulu:, mo-: :an mu deh a :korn a 'ye-a'-' :za, a :torne:.

¹³:Yee' 'de nyor⧾ :doru' :dao' 'klu-', :yee' 'yu :due', or-: :wlu 'de :Yusu' bo, or 'dae:, Nyor⧾ deh :torne-nyor:. Zela: 'an 'de-di' :gwluhuh', or-: 'mor-: :a 'ye :kororn-deh:⧾ :a :baa' :sie:-a :a-uh, :a 'ye-ih' gble.

¹⁴Jorwor: :Yusu' :wlu-' 'de or bo, or 'dae:, 'On 'be, :or 'nyi 'on 'tele' 'on 'ye zabe: :zi-nyor no, 'de mor 'on 'ye nyor no :or 'ye a-a'a: :kororn-deh⧾-' gble, 'do a 'nyne bo :eh?

¹⁵'De :Yusu' :wlu 'de nyor⧾-a' klehkpeh :dao' bo, or 'dae:, A 'wla :gwluhuh' dih. A 'dhu a-a' 'jeh :dhororn', 'do deh⧾-a' klehkpeh-a' 'klan :korn-eh bo. Deh no-eh, :gwlor-nyor⧾-a' 'kmo :ne-eh :se 'de or-a'a: bhaan-deh⧾-: 'dekorn: or-a'a: :kororn-deh⧾-: bo 'wluh.

¹⁶:Yee' :Yusu' po 'dlan :due' 'de on bo, or 'dae:, Eh :korn bhaan-nyor :due', or-: :korn gle 'ble dii-deh:⧾ :dhulu'.

¹⁷:Yee' or :wlu-' 'do or-a' 'jeh :gwlii', or 'dae:, :Kaa 'an mu :no :naa :eh? 'On se dha 'ble, 'on 'ye 'an-a: dii-deh:⧾ :doru' :daa dih dhe.

¹⁸:Yee' or 'da, 'On yubo: :ka 'an mu-a :no 'weh. 'An mu 'an-a: dii-deh⧾-a' 'gbu⧾ ya :gba, 'de 'on 'ye :klaba'⧾ ne po, :en :korn-a 'de 'di, 'an mu-a 'an-a: dii-deh⧾-a' klehkpeh-: 'dekorn: 'an-a: :kororn-deh:⧾ 'sluh⧾ dih :dhe.

¹⁹:Yee' 'an mu 'de 'an 'jeh bo :wlu, 'an mu :ao', 'On :korn mla, 'de 'on dhe :kororn-deh:⧾ :dhulu' dih, 'do zon⧾ :dhulu' :en mu-a 'de :yi bo. 'An mu :ao', 'An mu :forn. 'An mu deh 'jeh neh :di, 'de 'on 'ye nomor 'na, 'de 'on 'ye 'an 'jeh-a' :porluh dih 'pehn-dih:.

²⁰Jorwor: Nyorsoa :wlu-' 'de or bo, or 'dae:, :Mor :bobo-nyor: :daa. 'Gwior :daa, :an mu 'meh-:. :Yee' :or mu deh⧾ :on po-a :dha :due', 'do :an-a' 'jeh bo, :or mu-ih :kpa :eh?

²¹:Yee' :Yusu'-a kpa or-a' wlu 'dlu bo, or 'dae:, Nyor :or dhe-a bhaan-deh⧾ dih, 'do or-a' 'jeh bo, 'de :or :se-a bhaan-nyor 'do Nyorsoa bo, 'ka-: eh mu :ne 'do or bo.

²²:Yee' :Yusu' :wlu-' 'de or-a'a: bo :na-nyor⧾ bo, or 'dae:, Eh-a' dhih, 'an zela a :gwluhuh', a-a' :porluh⧾ 'bor a 'worn dih 'beh-dih-eh 'do a-a' 'kmo :ne-eh-a' dhih, 'do deh a 'ye-a' di bo, 'de mor 'do a-a' yau-a' dhih, 'do deh a 'ye-a'-' pa bo.

²³Deh no-eh, :febeh'-a' dhih 'beh-: 'i, eh :zi 'o dii-deh⧾-'. 'De yau-a' dhih 'beh 'i, on :zi 'o paa-deh⧾-'.

²⁴A pobo: 'momaa'⧾ :daa ya, :en-' 'dhu-a deh, 'de mor :en-' chehn-a :koo. En se dii-deh⧾-a' :dhe-da 'ble. Jorwor: Nyorsoa 'nyi-ih dii-deh⧾ 'weh :gbor :gbor. Jorwor: a :mor :mloror', a-a' dhih 'beh-: 'i 'gabaa, en :zi 'o neme-' 'weh.

²⁵A-a' nyor :yoror :or :korn :gwluhuh' dih :na-dih-eh-a' 'bleh 'bleh 'beh-dih: :eh 'ye 'o or-a' :febeh' ybei' kpa 'do 'yluh-buh :due' 'di :eh?

²⁶:Yee' :mor a se deh-yu: :eh :ne :ao', eh-a' no-a' 'beh-dih:, :yee' :eh :korn dhih 'da, 'de a 'beh-dih a-a' 'jeh-a' :porluh⧾ 'worn dih 'do :yih :en :sie:-a 'o, en-' dhih bo :eh?

²⁷A pobo: :peli'-a' 'voma'e: :daa ya, :ka en no-a ku-a', 'de en-' no-a gle, en-' no-a paa-deh⧾. Jorwor: 'an zela a :gwluhuh', 'Keen :Salomor'-a' 'jeh, ti or :ne-a 'de or-a' dhih-a' 'i 'beh-a' klehkpeh 'di, or :se-' paa-deh:⧾ :nmaa'e-' pa, en :se 'o :peli'-a' 'voma'e: :daa, en-' :due'-' :zi.

²⁸:Yee' :mor eh 'dhu, Nyorsoa :taa 'o 'kwla :peli'-a' deh⧾-' :pa-dih-eh no, :en 'dhu-a 'zean'-: :glaa'e-: deh-', :yee' on po-a 'yli, :yee' dha a mu :na-dih: :eh? :Yee' a :mor, or se deh-' :pa-dih-eh 'beh-dih: :e? A :mor :gwlor-nyor:⧾ :on :korn-a dhih 'jeh-' :po-eh se-a 'i 'beh.

²⁹A 'bor :gwluhuh' dih :na-dih-eh 'do deh a mu-a :di-: 'dekorn: deh a mu-a 'na-: eh-a' dhih. 'De a-a' :porluh⧾ 'bor a 'worn dih 'beh-dih-eh.

³⁰Deh no-eh, deh⧾ :daa, me-: se Nyorsoa yubo-nyor⧾-a' klehkpeh-a ple 'de, 'de a :Baa' Nyorsoa yubo-eh' :ka a :korn-a a 'ye-a en-' klehkpeh 'ble.

³¹Jorwor: a 'bhorn deh⧾ :en :korn-a 'de Nyorsoa-a' nyor⧾ wlu 'ken :korn-eh bo 'kwla⧾-' dih, :yee' deh⧾ :yih :sie:-a 'o, or mu-ih a 'nyi-: :ke.

³²:Yee' a :mor nyor⧾-kpor-bei: :daa, a 'bor :fano: :ple-eh. Deh no-eh, a :Baa' Nyorsoa-a' 'ton :korn-deh: 'o, or 'ye a nyor⧾ wlu 'ken :korn-eh 'nyi.

³³A plo a-a' :kororn-deh⧾. :Yee' a 'nyi en-' 'wlii nyor⧾ :on se-a deh-a' :za-da 'ble. A no a-a' 'jeh-a'a: 'wlii 'di :po :gleu', :on :se-a' 'soa'-' 'kpa-: i. :Yee' a 'ye-eh' bo, a 'ye a-a'a: bhaan-deh⧾ dih dhe 'de Nyorsoa 'bli yai', :dha en :se-a' dih :gweh i, 'do :dha 'ylii'-nyor :se-a' dih 'koan'-dih: i, 'de 'gbomor⧾ :se-ih'-a' 'kor-dih: i.

³⁴Deh no-eh, 'do :dha a-a'a: bhaan-deh⧾ :ne-a, 'do :wor a-a' :porluh⧾-a mu :ne :ke.

³⁵:Yee' :Yusu'-a kpa or-a' wlu 'dlu bo, or 'dae:, A :ne buh⧾ ken, a 'ye 'yu an 'da-dih-a Nyor-kpalu-a' 'yu 'ken :fuo:. A po a-a'a: 'tiei 'kpa. 'Nyi a-a'a: 'nape⧾ wan :chio'lo:,

³⁶:eh gweh-a :ka nyor⧾-kpalu:⧾ :an fuo-a an-a'a: nyor :klaba' 'ken, :or 'ye-a 'nynor nyina: :kpa-gor-' 'wluh, 'de :mor or bla :kpaa', on 'ye 'dhobo:, on 'ye-or :kpaa' 'i :za.

³⁷Eh mu 'yi dih :nmor, 'do 'bhoi-nynuu: :dao' bo, :mor an-a'a: nyor :klaba' se-uh 'nyinor-' :yeh-dih:, 'de or 'ye-uh' ken :yeh-dih:, on 'ye-or' 'ken :fuo:. Dhih 'jeh, 'an zela a :gwluhuh', nyor :klaba' :dao', or mu or-a'a: 'korlor dih :za, 'de or 'ye 'bhoi-nynuu-tiei-' pa, 'de or 'ye-uh' :bale'-' kpa, 'de or 'ye-uh' 'de dih :dhe.

³⁸Keen' :mloror' :mor or 'yle dholo-' zuee, :eh beh zorn bo-mlai'-: 'de or 'ye-uh' ken :yeh-dih:, on 'ye-or' 'ken :fuo:, :yee' eh mu 'yi dih :nmor 'do on bo.

³⁹Jorwor: deh a 'ye-a' yubo:, eh-: :dhe dih, :mor 'gbu :korn-nyor yubo-eh :dee', ti 'ylii'-nyor-a mu-a 'de :ya, :yee' or :se-' 'worn-: i, 'ylii'-nyor 'ye or-a'a: 'gbu wa.

⁴⁰A :mor :ke, a :korn a 'ye buh⧾ ken :ne, 'do ti-a' klehkpeh bo. Deh no-eh, 'yu an 'da-dih-a Nyor-kpalu-a' 'yu, ti a :se-or' 'sor-dih:, 'do :wor or mu 'de :yi-dih:.

⁴¹:Yee' :Piteh' dhele: :Yusu'-: dih, or 'da, :Gwlor :baa', 'dlan :daa :on po-a, or :korn 'de :a bo :e? :Ae' or :korn 'de :gwlor-nyor⧾-a' klehkpeh bo?

⁴²:Yeh or 'da :ao', :yee' :Gwlor :baa' :wlu-' 'de or bo, or 'dae:, :Or 'dhu 'bhoi-yu: :or 'dhu-a :dhehehn-nyor-', 'de :or :korn-a :toror' :eh? Or-: 'o, or-a'a: nyor :klaba'-a mu 'de 'bhoi-nynuu: :noo' 'dlu bo :po, :or 'ye-uh' an-a'a: dii-deh⧾ 'nyi, 'do ti on :korn on 'ye-a' deh :di-dih: bo.

⁴³Eh mu 'yi dih :nmor 'do 'bhoi-yu: :dao' bo, :mor or 'si 'o deh :dao', eh-a' no 'da, 'de or-a'a: nyor :klaba' 'ye-or' ken :yeh-dih:.

⁴⁴Dhih 'jeh, 'an zela a :gwluhuh', or-a'a: nyor :klaba'-a mu or-a'a: :kororn-deh⧾-a' klehkpeh 'de or 'kwa :po, or 'ye-ih' 'yli-eh bo 'dhu.

⁴⁵Jorwor: :mor eh 'dhu, 'bhoi-yu: :dao', or :wlu 'do or-a' 'jeh-a' :porluh ken, :mor or 'da, 'An-a: nyor :klaba' :gwle 'de 'weh, 'de or 'see 'de yi. :Yee' :mor or no :ao', :yee' or mu 'o 'bhoi-nyor⧾-kpalu⧾-nynuu-: 'dekorn: 'bhoi-nynor⧾-kpao'⧾-nynuu-: an-a' bla 'da 'kpa-:, 'de or 'ye deh di, or 'ye 'na, 'de nomor 'ye-or' no.

⁴⁶:Yee' eh mu 'we-eh :korn, ti 'bhoi-yu: :dao', or se-a or-a'a: nyor :klaba' 'sor-dih:, 'do :wor or mu 'de :yi-dih:. :Yee' or mu-or 'kle 'ye-eh 'dlu :po 'gabaa, 'de or 'ye-or 'de nyor⧾ :on se-eh dhih 'jeh-' po, 'de on 'nyne-' po.

⁴⁷:Yee' 'bhoi-yu: :dao', :or yubo:-a or-a'a: nyor :klaba'-a' 'ton :korn-deh, jorwor: :or :se-a or-a' 'jeh 'kpa po, 'de :or se-a or-a' 'ton :korn-deh or 'bhorn-a no, :yee' or mu :bla-eh: 'gabaa.

⁴⁸Jorwor: 'bhoi-yu: :yor :or se-eh yubo:, 'de :or no-a blaa-deh⧾, or mu :bla-eh: :weh-beh:. Nyor⧾-a' klehkpeh Nyorsoa 'nyi-a deh⧾ :dhulu', deh⧾ :dhulu', me-: or mu 'sor-: 'de on 'kwa. :Ka en :dhie:-a Nyorsoa po-ih-a 'de :on 'kwa, 'ka-: en mu :dhie:, or 'ye-ih' 'yba 'de :on 'kwa.

⁴⁹:Yee' :Yusu' :wlu-', or 'da, 'On yi-: 'de, 'on 'ye 'bluhba 'yli po. 'An :porluh 'da, 'bluhba 'kpa neh-' :kana :naa.

⁵⁰'Kle 'ye-eh:, eh-: :ne 'o 'on 'de. 'De mor 'an :porluh-a mu 'on 'worn dih 'beh-dih: :beh-dihih:, 'kle 'ye-eh: :daa, eh 'ye 'dlu-' :jla.

⁵¹:Mor a :taa 'ye, :yee' a 'da, 'on yi-: 'de, wlu-' dih 'worn-eh 'ye dha 'bluhba ken :ne :e? 'Kei o. 'An zela a :gwluhuh', 'on :ya 'de deh-' :gble-eh:.

⁵²:Eh 'wluh-a :daa :naa, :mor 'cheh-buh 'ble nyor⧾ :mm' 'de on 'di, :yee' an mu 'sororn' :za-eh:, taan mu 'sororn' 'bhun :ne, 'de 'sororn' 'ye taan 'bhun :ne :ke.

⁵³An mu 'sororn' :za-eh:. :Baa'-a mu 'de or-a'a: nyor-kpalu-yu ya 'bili:. :Yee' nyor-kpalu-yu-a mu 'de or :baa' ya 'bili:. 'De-a mu 'de or-a'a: 'nynor-kpao'-yu ya 'bili:. :Yee' 'nynor-kpao'-yu-a mu 'de or 'de ya 'bili:. 'De-a mu 'de or-a'a: nyor-kpalu-yu-a'a: 'nynor ya 'bili:. :Yee' 'nynor-a mu 'de or-a'a: yibeor 'de ya 'bili:.

⁵⁴:Yee' :Yusu' :wlu-' 'de nyor⧾ :doru' :dao' bo, or 'dae:, :Mor a 'ye 'ni-kpan 'de 'yluh-a' 'nior: 'kpa 'da 'de yai', :yee' 'do :dha :due' :dao', a 'da, 'Ni-a mu :dba o. :Yee' eh :no-eh:-'.

⁵⁵:Yee' :mor :pobor' :taa 'de 'yluh-a' 'kwla 'wluh-dih: 'da-a' kona-for bo 'wluh dih, :yee' a 'da, :Fuun'-a mu 'de :yi. :Yee' eh :no-eh:-'.

⁵⁶A :mor nyor⧾-a' 'yli 'ye-nyor:⧾ :daa. A yubo: 'de yai'-: 'dekorn: 'bluhba-: en-' bo dih zela-eh 'weh. Jorwor: :eh :korn dhih 'de a se ti :daa :a :ne-a ken, en-' bo dih zela-eh 'beh-dih: :eh?

⁵⁷:Yee' :eh :korn dhih, 'de a :se-' zabe zi 'do a-a' 'jeh bo, 'do deh :eh 'sleh-a 'i bo :eh?

⁵⁸:Yee' mor-: 'dekorn: :an-a'a: dhih 'ble-nyor-: a po 'de 'kpih, a 'ye wlu-' dih 'woorn: :dueh'leh: 'do :gwie 'i, :mor or :taa 'de :on 'koti-' kpa, 'de or :ne-' :on dih 'kla 'do zabe: :zi-nyor ybei', 'de zabe: :zi-nyor :ne-' :on :poli'si-yu 'kwla :za-dih:, 'de :poli'si-yu :ne-' :on :kasue 'di po.

⁵⁹'An zela a :gwluhuh', :on 'se 'ba 'de :kasue 'di :dao' 'wluh :chio'lo:, :on 'ye :de 'bor-dih-kaba-yor-eh kpa, 'de :on 'ye 'de eh 'di 'wluh.