Read Eastern Krahn Lu 13 Bible Online

Lu 13 - Eastern Krahn bible

Lu 13

¹:Yee' nyor⧾ :noo', mo-: :ne 'o, :on zela: :Yusu' :gwluhuh' 'do :Galali'i-nyor:⧾ :on :korn-a nyomor Pale' 'wla-a dih, 'de Pale' zian-dih:-a an-a' 'jeh-a'a: 'slaa: :za-dih-deh⧾-a' nyomor.

²:Yeh on :za-a deh⧾ :dao', :yee' :Yusu' dhele-uh-: dih, or 'da, :Mor a :taa 'ye, :yee' a 'da :Galali'i-nyor:⧾ :dao', on no deh⧾-zon:⧾ :no-nyor:⧾, on :zi 'o :Galali'i-nyor⧾-a' klehkpeh-', eh-: :korn dhih, an 'ye an-a' 'jeh worn deh :dao' :e?

³'Kei:. 'An zela a :gwluhuh'. Jorwor: :mor a se a-a' deh⧾-zon⧾ dih 'tali:, 'de a 'ye :ao', a se 'de Nyorsoa bo 'bili:, :yee' a-a' klehkpeh, a mu gbe :zie: :ke.

⁴:Yee' a 'worn-ih' 'de nyor⧾-a' :bhue: 'yor :meheh' na :on 'meh-a, ti 'gbu :dhorno' 'kpa-uh-a ken 'de :Silo'a: :gluun' 'do :Julu'slehn, :mor a :taa 'ye, :yee' a 'da, on no deh⧾-zon:⧾ :no-nyor:⧾, on :zi 'o nyor⧾-a' klehkpeh :on 'ti-a :Julu'slehn :e?

⁵'Kei:. 'An zela a :gwluhuh'. Jorwor: :mor a se a-a' deh⧾-zon⧾ dih 'tali:, 'de a 'ye :ao', a se 'de Nyorsoa bo 'bili:, :yee' a-a' klehkpeh, a mu gbe :zie: :ke.

⁶:Yee' :Yusu' po 'dlan :due' 'de nyor⧾ bo, or 'dae:, 'Yu :due', or-: 'ble 'fe-tu, 'de or-a'a: 'dhuu'-deh⧾ 'klu-'. 'De or mu 'de tu :dao' bo, or 'ye-uh 'ye, :eh beh on 'ble 'bi 'de on ya :eh? Jorwor: :yeh or mu-a 'de, :yee' or :se-' deh-beh-deh-beh 'ye, 'de on ya.

⁷Eh-a' dhih, :yee' or :wlu-' 'de 'yu :or 'dhu-a or-a'a: 'dhuu'-deh:⧾ :dao' 'yli-eh bo, or 'dae:, :Gbee'e:. 'Do zon⧾ taan 'di :naa, 'an pobo 'noror tu :daa ya. 'An 'bhorn 'bi 'de on ya. Jorwor: 'on :se-' deh 'ye. 'An 'bhorn :on 'ye-uh' :dba. :Eh :korn dhih 'de on :nyna dha 'bluhba ken dih 'plo :eh?

⁸:Yeh or 'da :ao', :yee' 'yu :or 'dhu-a 'dhuu'-deh:⧾ :dao' 'yli-eh bo, or :wlu-' 'de or bo, or 'dae:, Nyor :klaba', 'tali-uh dih, 'do zon :due' 'di :neheh'. :Yee' 'an mu-uh gbor dih 'blu-:, 'de 'on 'ye-uh 'kuo-bluh gbor dih po.

⁹:Mor on po 'bi, 'do zon :dele' :an mu-a 'de :yi 'di, :yee' eh :nmor-: 'yi. Jorwor: :mor on se 'buo' po, :yee' dba-uh.

¹⁰:Yee' eh no Nyorsoa-a' :gwlee-we-eh :due', 'de :Yusu'-a torne nyor⧾ deh, 'de an-a' 'di :gweh-dih-sla :due' 'zorn.

¹¹:Yee' 'nynor :due', or-: :ne 'de, or-: 'kwla 'ye-dih-deh :nea-dih:, 'do zon⧾-a' :bhue: 'yor :meheh' na 'di. 'De eh no-eh, or 'kli, or se dih :nyna-eh 'beh-dih:.

¹²:Yeh :Yusu' 'ye-or, :yee' or 'da-or 'do or bo, 'de or :wlu 'de or bo, or 'dae:, 'Nynor, :on 'puh-'.

¹³'De or tba-or son⧾ ken dih. :Yeh or tba-or son⧾ ken dih, :yee' 'do :dha :due' :dao', or :nyna dih, 'de or po Nyorsoa-a' 'nyne ya.

¹⁴:Yeh eh no :ao', :yee' 'yu :or :korn-a 'di :gweh-dih-sla: :dao' wlu 'ken, or 'kpa-' 'chehn. Deh :korn-a dhih, 'de or 'kpa-a 'chehn-', eh-: 'dhu, :Yusu' 'puh-dih: nyor 'do Nyorsoa-a' :gwlee-we-eh 'di. Eh-: :korn dhih, 'de or :wlu 'de nyor⧾ :on :ne-a 'o bo, or 'dae:, :A :korn 'we :meheh'lo:, :a 'ye :koan :no-dih:. :Yee' a 'yle 'do 'we :dao' 'di, a-a' puhba-deh⧾ 'ye 'puh-dih-eh:. Jorwor: eh :se 'de Nyorsoa-a' :gwlee-we-eh 'di, a 'ye 'de yi, a 'ye 'puh-dih-eh:.

¹⁵:Yeh or 'da :ao', :yee' :Gwlor :baa' :wlu-' 'de or bo, or 'dae:, A :mor nyor⧾-a' 'yli 'ye-nyor:⧾ :daa. A-a' nyor 'see or-a'a: :blii'-: 'dekorn: 'dhornke-: bhehn-dih, 'do Nyorsoa-a' :gwlee-we-eh 'di, or 'see-eh 'na 'da kpa, 'de 'ni worn 'i :e? A 'see-eh no :e?

¹⁶:Yee' 'nynor :daa :or no-a 'Eble'hehn 'di-a' 'yu, :or 'ku san-a dih, 'do zon⧾-a' :bhue: 'yor :meheh' na 'di, or se :korn or 'ye bhehn-dih-eh:, 'do Nyorsoa-a' :gwlee-we-eh 'di :e?

¹⁷:Yeh :Yusu' 'da :ao', :yee' dhen-a: no nyor⧾-a' klehkpeh, :on se-a or-a' dhih ken 'worn-dih:. :Yee' nyor⧾-a' klehkpeh :on :sie:-a 'o, an-a' :porluh⧾ 'pehn-: dih, 'do deh⧾ :kolu'⧾ or no-a bo.

¹⁸:Yee' :Yusu' dhele-uh-: dih, or 'dae:, :Kaa Nyorsoa-a' nyor⧾ wlu 'ken :korn-eh :ne :eh? Deh 'an mu-eh 'i :po-dih: :eh?

¹⁹Eh gweh :zlaan'-a' 'yor-eh: :eh 'yu :due' 'duo:-a, 'de or gba-a 'de or-a'a: 'dhuu'-deh⧾ 'nyne-'. 'De eh ku, eh no :zlaan'-gan: :kolu'. :Yee' neme: :en zi-dih-a-' dih 'de yai', me-: po 'dle⧾ 'do eh-a' 'gabuh⧾ 'nyne-'.

²⁰:Yee' :Yusu' :wlu-' :neheh', or 'dae:, Deh 'an mu Nyorsoa-a' nyor⧾ wlu 'ken :korn-eh 'i :po-dih: :eh?

²¹Eh gweh 'bhlee-a' 'vu-dih-deh: :eh 'nynor :due' 'duo:-a, 'de or po-a 'bhlee-a' :bhebe' :doru' bo, 'de or zian-dih-a, 'de :eh gweh-a 'bhlee: :bhebe'-a' klehkpeh 'dlu.

²²:Yee' :Yusu' mu 'de :Julu'slehn:. :Yeh or mu-a, :yee' or :yi-dih: 'de :gwlor⧾ :klaba'⧾-: 'dekorn: :gwlor⧾ :nyene'-: 'di, or torne nyor⧾ deh.

²³'De 'yu :due' dhele-or dih, or 'da, :Gwlor :baa', nyor⧾-kpor-bei: 'o, :an mu 'puh-: :e? :Yeh or dhele:-a :Yusu' dih, :yee' :Yusu' :wlu-' 'de nyor⧾ :on :ne-a 'o bo, or 'dae:,

²⁴A po 'de 'kpih, a 'ye 'de :kpaa' :or se-a 'worn dih 'beh bo ka :yi-dih:. Deh no-eh, 'an zela a :gwluhuh', nyor⧾ :dhulu', mo-: :an mu 'de 'kpih :po, on 'ye 'de :yi-dih:. Jorwor: on :se-eh' no-a' 'beh-dih: i.

²⁵Jorwor: :mor 'gbu :korn-nyor :sorn-', 'de or 'ye 'o :kpaa' po, :yee' a mu dih :nyna 'de 'zorn, 'de a 'ye :kpaa' bla, a 'ye-or' bale:, a 'ye :ao', Nyor :klaba', :za :a :kpaa' 'i. Jorwor: or mu :ao', 'On se a yubo:. 'De mor 'on se :dha a 'wluh-a yubo:.

²⁶:Yee' :mor or 'da :ao', :yee' a mu :ao' 'da-: 'de or bo, Mor-: 'dekorn: :a mor-: :a kpuhba son⧾ ybei'. 'De :on :torne: :a deh, 'do :a 'bli :gwlor-'.

²⁷Jorwor: or mu :ao' 'da-:, 'An zela a :gwluhuh', 'on se a yubo:. 'De mor 'on se :dha a 'wluh-a yubo:. A 'wluh 'o 'on ybei', a :mor deh⧾-zon:⧾ :no-nyor⧾-a' klehkpeh :daa.

²⁸:Yee' a mu 'vin-:, a 'ye 'nyne 'i :di-dih:, :mor a 'ye 'Eble'hehn-: Ase'-: 'Jekor-: 'dekorn: Nyorsoa-a' wele-eh: :po-nyor⧾-a' klehkpeh-: 'do :dha Nyorsoa :korn-dih:-a nyor⧾ wlu 'ken, 'de a :mor :mloror', a 'ye 'zorn :po-eh:.

²⁹Nyor⧾-a mu 'de 'yluh-a' 'kwla 'wluh-dih: 'da 'wluh-:, 'de :noo' 'ye 'noror an-a' 'nior: 'kpa 'da 'wluh. 'De :noo' 'ye 'de an-a' 'kwla 'wluh-dih: 'da-a' :dila-for bo 'wluh-dih:, 'de :noo' 'ye an-a' kona-for bo 'wluh-dih:, 'de on 'ye :dha :due' dih :dhe 'do gor-', 'do :dha Nyorsoa :korn-dih:-a nyor⧾ wlu 'ken.

³⁰A :gbee'e:. Nyor⧾ :yuh :a 'da-dih-a nyor⧾ 'zeehn :naa, mo-: :an mu nyor⧾ :klaba'⧾ :no 'de ybei'. :Yee' :yuh :a 'da-dih-a nyor⧾ :klaba'⧾ :naa, an-a' 'jeh :dao', mo-: :an mu 'zeehn :no 'de ybei'.

³¹:Yee' 'do ti :dao' 'i, :yee' :Falasi'i-nyor:⧾ :noo', mo-: yi 'o :Yusu' bo, on 'dae:, 'Wluh dha :dha :daa :on :ne-a. Mu :dha 'sluh. Deh no-eh, 'Keen :Hehlo'-a 'bhorn or 'ye :on 'dba.

³²:Yeh on 'da :ao', :yee' or :wlu-' 'de on bo, or 'dae:, A mu, a 'ye nyor⧾ dih :bo-dih-nyor: :dao' :gwluhuh' zela:, :ka 'an mu-a nyor⧾ 'kwla 'ye-dih-deh⧾ 'de :za, 'de 'on 'ye puhba-nyor⧾ 'puh-dih: 'zean'-: 'dekorn: :glaa'e-:. :Yee' 'do 'we-eh-a' taan neh 'di, 'an mu 'an-a: :koan 'i :gweh.

³³:Mor eh 'dhu deh-', 'on :korn 'on 'ye :gwie 'i 'kpa, 'zean'-: :glaa'e-: 'dekorn: zorn :ne-a 'o de-:. Deh no-eh, Nyorsoa-a' wele-eh: :po-nyor se :korn or 'ye :dha 'plo 'dba-dih-eh:. Jorwor: 'do :Julu'slehn 'yor-eh:, 'do :wor on :korn on 'ye-or' 'dba-dih:.

³⁴A :mor :Julu'slehn-nyor:⧾ :daa, a :mor 'dba Nyorsoa-a' wele-eh: :po-nyor⧾, 'de :or tba-dih :yuh Nyorsoa dbo-a 'de a bo sobu'⧾ dih, on 'ye 'meh. 'De mor, 'do ti :dhulu' 'di, 'an 'bhorn 'on 'ye a-a' klehkpeh :dha :due' po, 'do 'on bo, :eh gweh-a :ka :gbano: :soon' :vlu-a an-a'a: 'nynuu ken. Jorwor: a-a' 'worn-dih-eh.

³⁵Eh-a' dhih, a :to :dou'⧾, a-a'a: Nyorsoa-a' 'sla-a mu a kwa 'bor-dih-eh:. :Yee' 'an zela a :gwluhuh', a :se-' 'on 'ye-: i :neheh', eh 'ye ti a mu :ao', :Bhorlie' 'do nyor :dao' bo, :or yi-a 'de, 'de :Gwlor :baa'-a' 'nyne 'di, ken :yeh-dih:.