Read Eastern Krahn Lu 14 Bible Online

Lu 14 - Eastern Krahn bible

Lu 14

¹Eh :korn-Nyorsoa-a' :gwlee-we-eh :due', 'de :Falasi'i-nyor⧾-a' nyor :klaba' :due' :pi-dih: :Yusu' 'de or 'bli 'gbu. :Yeh or :ne-a 'de, :yee' nyor⧾-a na-dih-or 'yli-eh:.

²:Yee' 'yu :due' :or 'ble-a 'bhun-weh, or-: :ne 'o or ybei'.

³'De :Yusu' :wlu 'de :Mose'-a' 'tele' yubo-nyor⧾-: 'dekorn: :Falasi'i-nyor⧾-: bo, or 'dae:, Eh :ne 'o :a-a'a: 'tele'-a' :gwie 'i 'weh, nyor 'ye puhba-nyor⧾ 'puh-dih:, 'do Nyorsoa-a' :gwlee-we-eh 'di :e? :Ae' eh se 'yi dih :nmor?

⁴:Yeh or dhele-uh-a dih, :yee' an-a' nyor :se-' :wlu. An-a' klehkpeh, on no 'dhuan. :Yee' :Yusu' 'duo: 'yu :dao' 'weh, or 'puh-dih-or, 'de or dbo-or or 'bli.

⁵:Yee' :Yusu' :wlu-' 'de on bo, or 'dae:, :Mor a-a' nyor :due' 'ble nyor-kpalu-yu-: :eh beh :blii'-: 'de on 'ye 'de 'ni-bie: :dhorno' 'di 'kpa, 'do Nyorsoa-a' :gwlee-we-eh 'di, :yee' nyor :dao' or :se 'de 'yu-: 'dekorn: :blii'-: :za i, 'do :dha :due' :dao' :e?

⁶:Yeh :Yusu' 'da :ao', :yee' on se deh or dhele:-a dih, eh-a' gbor :za-da 'ble.

⁷:Yee' :yeh :Yusu'-a di-a deh, 'de :Falasi'i-yu: 'bli 'gbu, :yee' or 'ye nyor⧾ :noo' :on 'da-eh, mo-: :an gan ken :dhe-deh:⧾ 'jeh ne. :Yeh or 'ye-eh, :yee' or po 'dlan 'de on bo, or 'dae:,

⁸:Mor nyor 'da :on 'do 'nynor nyina: :kpa-gor-', :an-a' :dhe-' dih 'do ken :dhe-deh: 'jeh ken. Nyor se yubo: nyor :klaba', :or :zi-a :on-', or-: 'da-eh: 'de gor :dao' :ke.

⁹:Mor nyor :klaba' :dao', or 'yle, :yee' 'yu :or 'da-a a-uh, or mu 'de :yi, 'de or 'ye :wlu 'de :on bo, or 'ye :ao', 'Nyi :an-a'a: ken :dhe-deh 'yu :daa. :Yee' dhen-a mu :on :no. :Yee' :an mu 'o ken :dhe-deh: 'zeehn ken 'bor-dih:.

¹⁰Jorwor: :mor nyor 'da :on gor-', :yee' :dhe dih 'do ken :dhe-deh: 'zeehn ken dih, 'yu :or 'da-a :on gor-', :mor or 'yle, or mu :wlu 'de :on bo 'bla, or mu :ao', 'On 'be, 'yle, yi 'noror ken :dhe-deh: 'jeh ken. :Mor or no :ao', :yee' eh mu :on deh-' 'ye-eh 'nyi-:, 'do gor-a' :yi-nyor⧾ ybei'.

¹¹Deh no-eh, nyor-beh: :or 'beh-dih:-a or-a' 'jeh 'i, or-: Nyorsoa-a mu ya :ya. :Yee' nyor-beh: :or :ya-a or-a' 'jeh ya, or-: Nyorsoa-a mu ya-' 'duo:.

¹²:Yee' :Yusu' :wlu-' 'de 'yu :or :pi-dih-or bo, or 'dae:, :Mor :on :taa nyor⧾ pi-dih, :yee' :an-a' :pi-dih:-' :on 'bei'-: :eh beh :an-a' 'de-di'-boi'-: :eh beh :an-a' 'wluh-a-nyor⧾-: :eh beh bhaan-nyor:⧾ :on :ne :on 'ti-a :dha :due'-: 'suh. :Mor :on no :ao', :yee' an mu :on :pi-dih: 'bla :ke, on 'ye :an-a' son-a' kpa :za.

¹³Jorwor: :mor :on :taa nyor⧾ pi-dih, :yee' :pi-dih: nyor⧾ :on se-a deh-a' :za-da 'ble-: :nea-nyor⧾-: :kloror-nyor⧾-: 'dekorn: 'doror'-nyor⧾-:.

¹⁴:Yee' :an mu :bhorlie' 'ye-:, deh no-eh, on se :an-a' son-a' kpa :za-eh 'beh-dih:. Nyorsoa-a mu :on geli' :za, 'do ti 'yi 'sleh-nyor⧾-a mu-a 'de nma-dih-deh⧾ 'di 'wluh-:.

¹⁵:Yee' :yeh 'yu :due' :or :ne :Yusu' 'i-a kpuhba-a son⧾ ybei', or 'worn-a deh :daa, :yee' or :wlu-' 'de :Yusu' bo, or 'dae:, :Bhorlie' 'do nyor :dao' bo, :or mu-a deh :di 'da :mu 'do gor-', 'do :dha Nyorsoa-a mu-a nyor⧾ wlu 'ken :korn-dih:.

¹⁶Jorwor: :Yusu' :wlu-' 'de or bo, or 'dae:, Eh :korn ti :due', 'de 'yu :due' 'da gor :klaba', 'de or 'da nyor⧾ :dhulu'.

¹⁷:Yee' :yeh dii-deh⧾ :gweh-a 'i, :yee' or dbo or-a'a: 'bhoi-yu: or 'ye nyor⧾ :on 'da-eh :gwluhuh' zela:, on 'ye 'de yi, :ka deh⧾-a' klehkpeh :po-eh 'kpa.

¹⁸Jorwor: an-a' klehkpeh-a za-' dhih 'sluh⧾ :due' :due'. :Zai' nor zela-or-: :gwluhuh', or 'dae:, 'On dhen gle :kana, 'de 'on :korn 'on 'ye-eh 'ye 'da mu. :On :korn 'gen, :za 'o 'on ken. 'An bale :on 'weh.

¹⁹:Yee' 'sororn' nor 'dae:, 'On dhen :blii'⧾ :bhue: :kana. 'An mu-or 'ye 'da :naa. :On :korn 'gen, :za 'o 'on ken. 'An bale :on 'weh.

²⁰:Yee' taan nor 'dae:, 'An-a: 'nynor yi nyina: :kana :naa. :Yee' eh-a' dhih, 'on se 'de yi-a' 'beh-dih:.

²¹:Yee' 'bhoi-yu: :dao', or yi-: de, 'de or po deh⧾ :daa en-' kuna' 'de or-a'a: nyor :klaba' bo. :Yeh or 'worn-ih'-a, :yee' or 'kpa-' 'chehn, 'de or dbo-or, or 'da, 'Dhobo: :on 'ye 'kpa :gwie:⧾ :klaba'⧾-: 'dekorn: 'kpa :gwie:⧾ :nyene'-: :en :ne-a 'de :gwlor-' ken mu. :Yee' :ya 'de nyor⧾ :on se-a deh-a' :za-da 'ble-: :nea-nyor⧾-: 'doror'-nyor⧾-: 'dekorn: :kloror-nyor⧾-:.

²²:Yeh 'bhoi-yu yi-a de, :yee' or :wlu-', or 'dae:, Nyor :klaba', 'on no deh :on zela:-a 'on :gwluhuh' 'weh. Jorwor: 'gbu 'see 'yi 'gboror:.

²³'De or-a'a: nyor :klaba' zela-or :gwluhuh' :neheh', or 'da, Mu, :on 'ye 'kpa :gwie⧾-: 'dekorn: 'kwla 'di :gwie⧾-: bo :na. :Yee' no-eh, nyor⧾ 'ye 'de yi, 'de 'an-a: 'gbu 'ye 'yi.

²⁴'An zela a :gwluhuh', nyor⧾ 'on 'da-a :zai', an-a' nyor-beh :se-' 'an-a: gor-a' dii-deh⧾ worn 'dhen-: i.

²⁵Eh :korn ti :due', :yee' nyor⧾ :doru', mo-: :ne :Yusu'-a nena bo, 'de or 'bili:-' dih 'de on bo, or 'dae:,

²⁶Nyor :or 'bhorn-a :or 'ye-a 'o 'on klei' zi, :mor or se or :baa'-: or 'de-: or-a'a: 'nynor-: or-a'a: 'nynuu-: or-a' 'de-di'-: 'dekorn: or-a' :febeh'-a' :sloror'-: 'nyeh, :yee' or se 'beh-dih: or 'ye 'an-a: bo :na-nyor no.

²⁷:Yee' nyor :or se-a or-a'a: 'kle 'ye-eh-a' 'klorse tu-' 'duo:, :or 'ye-a' 'o 'on klei' zi, :yee' or se 'beh-dih: or 'ye 'an-a: bo :na-nyor no.

²⁸:Yee' :mor eh 'dhu deh-', 'de a-a' nyor :due' 'ye 'gbu :dhorno'-a' po-a' 'bhorn, :yee', or :se-' dih :dhe i :zai' :e, or 'ye-eh' 'ye, :eh beh 'wlii: or 'ble-a, en 'beh-dih: en 'ye 'gbu :dao' 'i gweh 'weh-:?

²⁹:Mor or se-eh no, 'de or 'ye 'gbu :dao' glu 'dhu, 'de or 'ye :ao', or se an-a' 'yi :gweh-eh 'beh-dih:, :yee' nyor⧾-a' klehkpeh :an mu-uh-a 'ye-:, an mu-or :wla-dih:,

³⁰an mu :ao', 'Yu :daa, or 'dhu 'gbu :daa glu, jorwor: or se an-a' 'yi :gweh-eh 'beh-dih:.

³¹'De mor, :mor eh 'dhu deh-', 'de 'keen :due' 'ye tuh :vorn 'da yi, 'do or 'be 'keen :noror' bo, or :se-' dih :dhe i :zai' or 'ye-eh' 'dlu 'di dih :na-dih: :eh beh sorye'-' 'wlu :bhue: or 'ble-a, on 'ble 'kpih on 'ye sorye'-' 'wlu-a' :kwlaa 'sororn' or 'be 'ble-a, bo vorn 'weh-:.

³²:Mor or se-eh 'beh-dih:, :yee' or mu dboo-nyor⧾ :dbo 'de 'keen :dao' bo, :ka or :tehn-a bo 'gboror:, 'de or 'ye :dhoeh' dih po.

³³:Yee' 'do deh :ne-a :due' 'di, a-a' nyor :se-' 'an-a: bo :na-nyor :no i, :mor or se deh⧾-a' klehkpeh or 'ble-a dih 'tali:.

³⁴'Torn :nmor-: 'yi. Jorwor: :mor or :gweh worn, :yee' :eh mu-or 'torn-' :no-dih: :neheh' :eh?

³⁵Or se 'yi dih :nmor 'do 'bluhbor-: 'dekorn: 'kuo: :sloror'-: bo. :Yee' or :po-eh:-' 'kwla. Nyor :or 'ble-a :dou'⧾ :or 'ye-a' dhih 'worn, 'nyi or 'worn-ih.