Read Eastern Krahn Lu 15 Bible Online

Lu 15 - Eastern Krahn bible

Lu 15

¹Eh :korn 'we-eh :due', 'de 'taa-deh:⧾ :za-nyor⧾-: 'dekorn: deh⧾-zon:⧾ :no-nyor:⧾ :noo'-: an-a' klehkpeh :dao', mo-: yi 'o :Yusu' bo, on 'ye-or' :dou'⧾ bo :to.

²:Yee' :yeh :Falasi'i-nyor⧾-: 'dekorn: nyor⧾ 'tele' :torne-nyor⧾-: on 'ye-a deh :daa, :yee' an wlu-dih worn dih, 'de an-a' 'jeh 'nyne-', on 'dae:, 'Yu :daa, or kpon deh⧾-zon:⧾ :no-nyor⧾-: dih, 'de or :ne an kpuhba son⧾ ybei'.

³:Yeh on 'da :ao', :yee' :Yusu' po 'dlan 'de on bo, or 'dae:,

⁴:Mor eh 'dhu deh-', 'de a-a' nyor :due' 'ye 'blae'⧾-a' :kehehn' :due' 'ble, 'de :due' 'ye 'ma, :yee' or :se 'o 'blae'⧾ :dao' :en :korn-a :kwlaa :meheh' :nyieh 'yor :ne-a :meheh' :nyieh 'do :dha en di-a dih :sie: i, 'de or 'ye :yeh :eh 'ma-a 'bhorn 'da mu, 'de or 'ye-eh 'ye :e?

⁵:Yee' :mor or 'ye-eh, :yee' 'mona-a mu-or' dih 'yi-dih:, 'de or 'ye-eh :gwle-' :po, or 'ye-eh :gwlor-' kpa.

⁶:Mor or nyni :gwlor-', :yee' or mu or 'bei'-: 'dekorn: nyor⧾ :on :ne or 'ti-a :dha :due' 'da-: 'de or 'ye 'de on bo :wlu, or 'ye :ao', A 'kpa 'on bo, :a 'ye 'mona no. Deh no-eh, 'on 'ye 'an-a: 'blae' :eh 'ma-a 'weh.

⁷:Yee' :Yusu' :wlu-', or 'dae:, 'An zela a :gwluhuh', 'ka-: 'o eh mu :ne :kpeheh:, eh mu 'mona: :dhulu' :no, 'de Nyorsoa 'bli yai', 'do deh-zon: :no-nyor :due' bo, :or 'tali:-a or-a' deh⧾-zon⧾ dih, 'de :or 'bili:-a-' dih 'de Nyorsoa bo, eh 'ye 'o 'yi 'sleh-nyor⧾-a' :kwlaa :meheh' :nyieh 'yor :meheh' :nyieh, :on 'bili:-a-' dih :dee' see-' :zi.

⁸:Yee' :Yusu'-a kpa or-a' wlu 'dlu bo, or 'dae:, 'De mor, :mor eh 'dhu deh-', 'de 'nynor :due' 'ye 'sebla-wlii-a' 'yor :bhue 'ble, 'de or 'ye :due' 'ma-dih:, :yee' or :se-' 'nape :tba i, 'de or 'ye 'de 'gbu 'di dih wobo:, 'de or 'ye-eh' dih 'bhorn, 'de :dhehehn: ka 'di, 'de or 'ye-eh' 'ye :e?

⁹:Yee' :mor or 'ye-eh, :yee' or mu or 'bei'-: 'dekorn: nyor⧾ :on :ne or 'ti-a :dha :due' 'da-:, 'de or 'ye 'de on bo :wlu, or 'ye :ao', A 'kpa 'on bo, :a 'ye 'mona no. Deh no-eh, 'on 'ye 'an-a: 'wlii-eh: 'on 'ma-dih:-a 'weh.

¹⁰:Yee' :Yusu' :wlu-', or 'dae:, 'An zela a :gwluhuh', 'ka-: 'o eh mu :ne :kpeheh:, Nyorsoa-a' 'enjor-nyor⧾-a mu 'mona 'kpa-:, 'do deh-zon: :no-nyor :due' bo, :or 'tali:-a or-a' deh⧾-zon⧾ dih, 'de :or 'bili:-a-' dih 'de Nyorsoa bo.

¹¹:Yee' :Yusu'-a kpa or-a' wlu 'dlu bo, or 'dae:, Eh :korn 'yu :due', or-: 'ble nyor⧾-kpalu⧾-nynuu 'sororn'.

¹²Eh :korn 'we-eh :due', 'de 'zeehn: nor zela: or :baa' :gwluhuh', or 'dae:, 'On-ba:, gble :an-a'a: :kororn-deh⧾-', :on 'ye 'o 'an ne :za :naa. :Yeh or 'da :ao', :yee' or :baa' gble or-a'a: :kororn-deh⧾-' 'weh, 'do or-a'a: 'nynuu: :on :ne-a 'sororn' bo.

¹³:Yeh ti :zi-dih:-a 'o ken dih, :yee' 'zeehn: nor po deh⧾-a' klehkpeh or 'ble-a :dha :due', 'de or mu 'bluhba: 'sluh ken, 'de :dha :dhorno'. 'Do :wor or :no-dih: 'kmo, 'de or plo or-a'a: 'wlii-a' klehkpeh yaa'e.

¹⁴:Yeh or-a'a: 'wlii-a' klehkpeh :gweh-a, :yee' 'moeh: :eh 'kpa-a Ji Kou'-moeh, eh-: 'yle 'do 'bluhba-dlu: :dao', an-a' klehkpeh ken. Ti 'moeh: :dao', eh yi-a 'de, :yee' or-a' son :gweh-', 'de 'moeh no-or 'gabaa.

¹⁵:Yee' eh-a' dhih, or mu 'de 'bluhba-dlu: :dao', an-a' nyor :due' bo, or 'ye-or :koan bo :no-dih:, 'de or 'ye-or' geli' :za. :Yee' 'bluhba: :korn-yu: :dao', or dbo-or 'de or 'bli :gbalie 'i, or 'ye or-a'a: :bee'⧾ dii-deh 'nyi.

¹⁶:Yeh or :ne-a 'de, :yee' or 'bhorn or 'ye dii-deh:⧾ :dao' :bee'⧾-a di-a di :dee'. Jorwor: nyor :se-or' en-' deh-beh 'nyi, or 'ye di.

¹⁷:Yee' eh-: no-eh, 'de or yi or-a' 'jeh bo, or 'da, 'On-ba-a'a: :koan: :no-nyor:⧾ :dhulu' or po-a geli', an-a'a: dii-deh⧾ zi-uh-: worn. :Mor on di-ih, :yee' :nee' :sie: ken. Jorwor: 'mor-: :dhe dih, :or 'moeh-a 'bhorn 'dba :naa.

¹⁸'An mu-' :sorn, 'on 'ye 'de 'On-ba bo de mu. :Yee' 'an mu :aa 'da-: 'de or bo, 'On-ba:, 'on no deh-zon: 'do Nyorsoa-: 'dekorn: mor-: a bo.

¹⁹'On se-eh 'i :bleh-dih:, 'on 'ye :an-a'a: 'yu 'da-dih-eh: :neheh'. :Ka :an no-a :an-a'a: :koan: :no-nyor:⧾ :on po-a geli', an-a' dhih, 'ka :wor :on 'ye 'an dhih no :ke.

²⁰:Yeh or no :ao', :yee' or :sorn-' 'weh, 'de or 'kpa :gwie 'i, or mu 'de or :baa' bo de. Jorwor: :yeh or na-dih-a 'de :gwie 'i, or yi-a :gwlor-' dih 'si 'da, :yee' or :baa' 'ye-or'. :Yeh or :baa' 'ye-or, :yee' or-a' 'yu-a' :wehlih 'kpa 'de or 'di 'weh. 'De or kpa ple-a', or 'ya-dih-or 'i, 'de or 'kpa 'de or :bhluun'⧾-', or :gble-dih-or.

²¹'De or-a'a: 'yu :wlu 'de or bo, or 'dae:, 'On-ba:, 'on no deh-zon: 'do Nyorsoa-: 'dekorn: mor-: a bo. 'On se-eh 'i :bleh-dih:, 'on 'ye :an-a'a: 'yu 'da-dih-eh: :neheh'.

²²Jorwor: or :baa' :wlu-' 'de or-a'a: 'bhoi-nynuu bo, or 'dae:, A 'dhobo:, a :ya 'de :gba 'vuu: :nmaa'e: :on 'kpa-a deh ken, :on :zi-a 'o :gba 'vuu⧾-a' klehkpeh-', a 'ye-or'-' :pa-dih:. :Yee' a po-or 'bor-yor-eh :jii-eh-', 'de a 'ye-or' :buhbuh⧾ buh⧾-' :po.

²³:Yee' a :ya 'de :blii' :gbolo' :eh 'borlor:-a dih, a 'ye-eh 'dba, a 'ye gor 'dhu 'do or bo.

²⁴Deh no-eh, 'an-a: nyor-kpalu-yu: :daa, or 'meh-' :dee', jorwor: or :ne-' 'kmo :naa. Or 'ma-', jorwor: or 'ye-eh:-' :naa. :Yeh or 'da :ao', :yee' on 'kpa gor 'dhu-eh:-'-: ken.

²⁵:Yeh deh⧾ :daa, en mu-a 'dlu bo, :yee' 'yu :klaba' nor :ne 'de 'gle. :Yeh or yi-a :gwlor-', 'de or 'koan'-dih:-a 'gbu dih, :yee' or 'worn blaa-deh⧾-a' wlu-: 'dekorn: ye-a' :dhlumeh'-: 'weh.

²⁶:Yeh or 'worn-ih'-a, :yee' or 'da or :baa'-a'a: 'bhoi-nynuu-a' nyor :due', 'de or dhele-or dih, or 'ye-or' :gwluhuh' zela: deh :eh mu-a 'dlu bo 'noror :gwlor-'.

²⁷:Yeh or dhele-or dih, :yee' 'bhoi-yu: :dao', or 'da, :An-a' dei'-yu:, or-: 'yle, 'de :on :baa' 'dba :blii' :gbolo' :eh 'borlor:-a dih. Deh no-eh, or 'ye or-a'a: 'yu 'weh :dele' ka, 'de deh-beh-deh-beh :se-or' no, or yi-: de :pehleh'peh:.

²⁸:Yeh 'yu :klaba' nor 'worn-a deh :daa, :yee' or 'kpa-' 'chehn, or 'da or :se 'de 'gbu 'di :pa i. Eh-a' dhih, or :baa' mu 'de or bo 'zorn, 'de or bale-or, or 'ye 'de 'gbu 'di pa.

²⁹:Yeh or :baa' bale-or, :yee' or zela: or :baa' :gwluhuh', or 'dae:, :Gbee'e:. Zon⧾-a' klehkpeh :daa, 'on :no-dih:-a :koan 'do :on bo, :eh gweh-a 'ge-yu 'i, 'de 'on 'see-a :on worn bla-dih. Jorwor: :on 'see 'on 'gbalor-yu: :sloror'-a' 'jeh 'dba-dih, 'de 'mor-: 'dekorn: 'on 'bei'-: :a 'ye dele:.

³⁰Jorwor: :yeh :an-a'a: 'yu :daa, :or plo-a :an-a'a: :kororn-deh⧾-a' klehkpeh yaa'e, 'de :bhaa'-nynor⧾ bo, :yeh or yi-a 'de, :yee' :on 'dba :blii' :gbolo' :eh 'borlor:-a dih, 'do or bo.

³¹:Yeh or 'da :ao', :yee' or :baa' :wlu-' 'de or bo, or 'dae:, 'An 'yu, :on :ne :daa 'on bo 'weh, 'do ti-a' klehkpeh bo. 'De 'an-a: :kororn-deh⧾-a' klehkpeh 'on 'ble-a, :an-a'a: :kororn-deh:⧾ 'o.

³²Jorwor: :a :korn :a 'ye gor 'dhu, 'de :a 'ye 'mona no. Deh no-eh, :an-a' dei'-yu: :daa, or 'meh-' :dee'. Jorwor: or :ne-' 'kmo :naa. Or 'ma-' :dee', jorwor: or 'ye-eh:-' :naa.