Read Eastern Krahn Lu 16 Bible Online

Lu 16 - Eastern Krahn bible

Lu 16

¹:Yee' :Yusu' :wlu-' 'de or-a'a: bo :na-nyor⧾ bo, or 'dae:, Bhaan-nyor :due' :oo', or-: 'ble nyor-kpalu :due', or po-a or-a'a: :kororn-deh⧾-a' klehkpeh 'de 'kwa. 'De on zela-or :gwluhuh', :ka 'yu :dao', or 'kor-dih-a or-a'a: :kororn-deh:⧾ :dao'.

²:Yeh or 'worn-ih'-a, :yee' or 'da-or' 'de or bo, 'de or dhele-or dih, or 'da, Deh 'i-deh: 'o, :eh :dhe dih, 'on 'worn 'do :on 'bhun :eh? Zlo 'an-a: :kororn-deh⧾-a' klehkpeh :en :po-eh 'de :on 'kwa. Deh no-eh, 'on :se 'de 'an-a: :kororn-deh⧾ 'de :on 'kwa :po i :neheh'.

³:Yeh or 'da :ao', :yee' 'yu :dao', or :wlu-' 'de or-a' 'jeh 'di, or 'da, :Kaa 'an mu :no :naa :eh? 'An-a: nyor :klaba'-a za 'an-a: :koan 'on 'kwa 'weh :naa. 'De mor 'on se :kmu, 'on 'ye gle :koan no. 'De mor dhen-a mu 'on :no, 'on 'ye nyor⧾ :zlor.

⁴'On yubo: deh 'an mu-a :no 'weh, 'de :mor 'on 'wluh-a :koan ken, 'de nyor⧾ 'ye-a 'on dih kpon 'de on 'bli 'gbu⧾ 'di dih.

⁵:Yeh or no :ao', :yee' or 'da nyor⧾-a' klehkpeh :on 'ble-a or-a'a: nyor :klaba'-a' kpa⧾ 'weh :due' :due'. 'De or dhele: :zai' nor dih, or 'dae:, Deh dhie :on 'ble 'do 'an-a: nyor :klaba' bo :eh?

⁶'De or 'da, 'On 'ble 'orle-chlan-a' bi-a' :kehehn' :meheh' na. :Yeh or 'da :ao', :yee' 'yu :or :kororn-deh:⧾ :dao', en :po-eh: 'de 'kwa, or zela-or-: :gwluhuh', or 'dae:, 'Duo: :an-a'a: kpa-chlee-deh-'. 'Dhobo:, :on 'ye dih :dhe, :on 'ye :kehehn' :nyieh 'chle 'do mor.

⁷:Yee' or dhele: 'sororn' nor-: dih :ke, or 'dae:, Deh dhie :on 'ble :ke :eh? 'De or 'da, 'On 'ble deh⧾-yor: an 'da-dih-a 'wii, en-' 'gbeh⧾-a' 'wlu :due'. :Yeh or 'da :ao', :yee' 'yu :or :kororn-deh:⧾ :dao', en :po-eh: 'de 'kwa, or zela-or-: :gwluhuh', or 'da, 'Duo: :an-a'a: kpa-chlee-deh-'. 'Chle :kehehn' :meheh' na.

⁸:Yeh 'yu :or :korn-a :kororn-deh:⧾ :dao', or 'worn-a deh 'yu :dao', :or se-a 'i 'sleh, or no-a, :yee' or po-or dhih bo, or 'da or 'yaa:-'. :Yee' :Yusu'-a kpa or-a' wlu 'dlu bo, or 'dae:, Nyor⧾ :on :korn-a 'de 'kmo bo, :mor on :taa on 'bei' 'kmo bo-nyor⧾ deh 'bhun no, :yee' on 'yaa:-', on :zi 'o :yuh :on :ne-a 'noror zorn-pli-' 'weh.

⁹'An zela a :gwluhuh', bhan-a' :or :ne-a 'noror 'kmo bo, or-: a 'ye no, 'de a 'ye 'bei' :dhulu' 'ye 'do a-a' 'jeh bo. 'De :mor 'wlii-a' ti :gweh 'o dih, 'de Nyorsoa 'ye a dih kpon 'de or 'bli yai', :ka ti-a mu-a 'dlu-' :tehn.

¹⁰Nyor :or no-a :dhehehn-nyor 'do deh-yu-a' dih :dhe-eh bo, :yee' or mu :dhehehn-nyor :no, 'do :klaba' neh-a' dih :dhe-eh bo :ke. 'De mor nyor :or se-a 'i 'sleh 'do deh-yu-a' dih :dhe-eh bo, :yee' or :se 'i 'sleh-: i, 'do :klaba' neh-a' dih :dhe-eh bo :ke.

¹¹'Do eh-a' dha, :mor a :se :dhehehn-nyor:⧾ 'do bhan-a' :or :ne-a 'noror 'kmo bo, or-a' dih :dhe-eh bo, :yee' :or mu a :gwlii' :dhe 'do bhan-a' 'jeh :nor :or 'wluh-a 'de Nyorsoa 'bli yai' bo :eh?

¹²'De mor, :mor a :se :dhehehn-nyor:⧾ 'do nyor :noror'-a'a: :kororn-deh:⧾ or po-a 'de a 'kwa bo, :yee' :or mu a :kororn-deh⧾ 'nyi-:, 'do a-a' 'jeh bo, a 'ye :korn :eh?

¹³:Yee' eh se 'bhoi-yu :korn :or 'ye-a nyor⧾ :klaba'⧾ 'sororn'-a' 'bhoi-yu no. :Mor or no-eh, :yee' or mu :due'-' 'nyeh-:, 'de or 'ye 'sororn'-a' nor-' :ybeh. :Yee' or mu :due'-a' wlu deh-' 'ye-:, 'de or 'ye 'sororn'-a' nor-a' dhih-' :vlehn. A se 'wlii-: 'dekorn: Nyorsoa-: an-a' :weheh' :za-eh 'beh-dih: 'do :dha :due'.

¹⁴:Yeh :Yusu' :za-a deh :daa-', :yee' :Falasi'i-nyor:⧾ :on :korn-a klehkpeh :kma-a 'wlii-dhih, :yeh on 'worn-ih'-a, :yee' an wla-dih-or'.

¹⁵:Yeh on no :ao', :yee' :Yusu' :wlu-' 'de on bo, or 'dae:, A :mor nyor⧾-a' :yuh :an po-a an-a' 'jeh 'kpa, 'de nyor⧾ 'yli 'de, 'de nyor⧾-a 'da-dih a 'yi 'sleh-nyor⧾, a :mor 'o. Jorwor: Nyorsoa yubo: deh :eh :ne-a 'o a :porluh⧾ ken 'weh. Deh :gwlor-nyor⧾-a 'da-dih-a deh ken 'kpa-deh, eh-: Nyorsoa 'da-dih se deh ken 'kpa-deh.

¹⁶A 'worn deh :Mose'-a' 'tele'-: 'dekorn: deh⧾ Nyorsoa-a' wele-eh: :po-nyor⧾ :za-a-', 'de :eh :yeh-dih:-a :Jororn'-a' ti ken 'weh. :Eh 'wluh-a 'o :Jororn'-a' ti bo, Nyorsoa-a' nyor⧾ wlu 'ken :korn-eh-a' tubo-wlu⧾ :po-eh:-' 'de a bo, 'de nyor⧾-a' klehkpeh, an vorn on 'ye Nyorsoa-a' nyor⧾ wlu 'ken :korn-eh: :dao' 'zorn pa.

¹⁷:Mose'-a' 'tele'-a' deh-beh-a' 'ma-a'-a mu 'i :kma, eh 'ye 'o 'bluhba-: 'dekorn: yao-: en-' 'dlu-' :jla-eh :zi.

¹⁸:Yee' :Yusu' :wlu-' :neheh', or 'dae:, Nyor-beh-nyor-beh: :or mu-a or-a'a: 'nynor 'kwla :za, 'de :or 'ye-a' 'nynor :noror' :korn, :yee' or no 'nyne :zaan'. 'De mor nyor :or mu-a 'nynor :or :za-eh 'kwla :korn, :yee' or no 'nyne :zaan' :ke.

¹⁹:Yee' :Yusu'-a kpa or-a' wlu 'dlu bo, or 'dae:, Eh :korn bhaan-nyor-kpalu :due', or-: pa 'ylii: :nmaa'e: :en 'kpa-a deh ken-: 'de or 'ble deh⧾-a' klehkpeh, or di-dih deh 'worn 'gwie-: :glaa'e-:.

²⁰:Yee' 'yu :due' an 'da-dih-a :Lasor' :or se-a deh-a' :za-da 'ble, 'de :or 'yi-a 'pa⧾ dih, or-: dhe 'o bhaan-yu: :dao', or-a'a: gba-dih-gba-a' :kpaa' worn 'i dih, 'do ti-a' klehkpeh bo.

²¹Dii-deh:⧾ :en 'kele-a 'o bhaan-yu: :dao', or 'bli 'tebo ken, me-: or 'bhorn or 'ye di. 'De gbe⧾-a 'yle, en beh or-a' 'pa⧾ dih.

²²:Yeh ti :zi-dih:-a 'o ken dih, :yee' se deh-a' :za-da 'ble-yu: :dao', or 'meh-'. :Yeh or 'meh-a, :yee' 'enjor-nyor⧾ kpa-or', or 'ye 'o 'Eble'hehn 'bhun dih :dhe 'de Nyorsoa 'bli yai'. 'De bhaan-nyor-a' 'jeh :dao', or 'meh :ke, 'de on nma-dih-or dih.

²³:Yee' :yeh or 'ye-a or-a' 'jeh 'ye, :yee' or :ne 'de 'ku 'bli, 'de or 'ye or-a' 'jeh worn. 'De or pobo: 'de yai', or 'ye 'Eble'hehn: 'de :dha :dhorno', 'de :Lasor' :dhe 'o 'Eble'hehn 'bhun dih.

²⁴:Yeh or 'ye-uh'-a, :yee' or 'wor-', or wele: 'Eble'hehn, or 'dae:, 'On-ba:, 'Eble'hehn:, 'an 'ye 'an 'jeh worn 'gabaa 'noror 'ku 'bli-neh-'. :On :korn 'gen, 'ye 'an :wehlih. Dbo :Lasor' or 'ye or-a' :jii-eh-a' 'mla 'de 'ni bo tba, 'de or 'ye-eh 'o 'do 'on :meo ken 'te-dih:, 'de yluh :on :ne-a 'o 'on :gwlii', on 'ye ya yi.

²⁵:Yeh or 'da :ao', :yee' 'Eble'hehn :wlu-' 'de or bo, or 'dae:, 'An 'yu. :Po-dih-eh :gwluhuh' bo, ti :on :ne-a 'de 'kmo bo :dee', :yee' :on 'ble deh⧾ 'jeh ne-a' klehkpeh 'weh. :Yee' :Lasor', or-: 'ye zoen'. Jorwor: :kana :naa, or po :tabehyie:, 'de :an 'ye 'kle :naa.

²⁶'De mor 'jun :klaba' :ne 'o mor-: 'dekorn: :a mor-: 'nyne bo. Eh-: no-eh, 'de :mor nyor 'bhorn or 'ye 'noror :a bo 'wluh, or 'ye 'de a bo yi, 'de or se eh-a' no-a' 'beh-dih:. 'De mor :ke, nyor se 'beh-dih:, or 'ye 'de a bo 'wluh, or 'ye 'noror :a bo yi.

²⁷:Yeh 'Eble'hehn 'da :ao', :yee' bhaan-nyor: :dao', or :wlu-', or 'dae:, 'On-ba:, :on :korn 'gen, :mor eh :ne :ao', :yee' dbo :Lasor' 'de 'on-ba 'bli 'gbu 'di.

²⁸Deh no-eh, 'on 'ble dei'-boi' :mm', mo-: :ne 'de, or 'ye-uh :gwluhuh' zela:, on 'ye dih 'bili:, on :ne 'noror 'on bo 'ku 'bli-neh-' 'kle 'ye-eh :ne-a yi.

²⁹:Yeh or 'da :ao', :yee' 'Eble'hehn zela-or-: :gwluhuh', or 'dae:, On 'ble :Mose'-a' 'tele'-chlee-deh-: 'dekorn: Nyorsoa-a' wele-eh: :po-nyor⧾-a' 'chlee-deh⧾-: 'weh. 'Nyi, on to-ih :dou'⧾ bo.

³⁰:Yeh 'Eble'hehn 'da :ao', :yee' or 'dae:, 'Kei:, 'on-ba:, on :se-ih' :dou'⧾ bo :to i. Jorwor: :mor nyor 'wluh 'noror :gwlebo, 'de or 'ye 'de on bo mu, 'de or 'ye-uh :gwluhuh' zela:, :yee' an mu-' dih 'bili:.

³¹:Yeh or :za-a deh :daa-', :yee' 'Eble'hehn zela-or-: :gwluhuh', or 'dae:, :Mor on se :Mose'-: 'dekorn: Nyorsoa-a' wele-eh: :po-nyor⧾-a' wlu :dou'⧾ bo :to, :yee' :mor nyor 'wluh 'noror :gwlebo-a' 'jeh :sloror', :yee' on :se-' or-a' wlu :dou'⧾ bo :to i 'gboror:.