Read Eastern Krahn Lu 17 Bible Online

Lu 17 - Eastern Krahn bible

Lu 17

¹:Yee' :Yusu' :wlu-' 'de or-a'a: bo :na-nyor⧾ bo, or 'dae:, Deh⧾ :en no-eh, 'de nyor⧾-a no-a deh⧾-zon⧾, en mu 'de :yi :gbor :gbor. Jorwor: 'chlo 'do nyor :dao' en mu-a-' :yi-dih: bo.

²Nyor :dao' en mu-a-' :yi-dih:, :mor or no-eh, 'de 'nynuu: :nyene' :on po-a 'an dhih dhih 'jeh-', 'de on 'ye deh-zon no, :yee' eh mu 'yi dih :nmor 'do nyor :dao' bo, sobu' :klaba' 'ye 'o or :gwlii' :san-dih-eh:, 'de or 'ye 'o yobo' worn :po-eh:.

³:Yee' eh-a' dhih, a 'dhu a-a' 'jeh :dhororn'. :Mor eh 'dhu, :an-a' 'de-di' no :on deh-zon 'bhun, :yee' zela-or-: :gwluhuh' :ka deh or no-a, eh :nyni-a 'yi dih. :Yee' :mor eh 'dhu, or 'worn-dih-eh, :yee' 'ma-dih: deh-zon: or no-a, eh-a' dhih bo.

⁴Or-a' :yeh no :on deh⧾-zon⧾ 'bhun 'do kpor⧾ :meheh' 'sorn 'di, 'do 'we-eh :due' 'di, 'de or 'ye 'de :on bo yi, 'do kpor⧾ :meheh' 'sorn 'di, 'de or 'ye :on bale:, :yee' 'ma-dih: deh⧾-zon:⧾ or no-a :on, en-' dhih bo.

⁵:Yee' :Yusu'-a'a: dboo-nyor⧾ :wlu-' 'de or bo, on 'dae:, :Gwlor :baa', po :a-a' dhih 'jeh-' :po-eh ken.

⁶:Yeh on 'da :ao', :yee' :Yusu' :wlu-' 'de on bo, or 'dae:, :Mor a-a' dhih 'jeh-' :po-eh :ne :zlaan'-a' 'yor-eh :sloror' 'beh-dih:, :yee' a 'beh-dih: :wlu 'de tu :daa, an 'da-dih-a 'mormor bo 'weh, :mor a 'da, :Mor tu :daa, 'tlun-eh:, :po-eh: 'de yobo' worn, :yee' an mu 'o a-a' wlu dih :dhe, on 'ye-eh' no.

⁷:Mor eh 'dhu deh-', 'de a-a' nyor :due' 'ye 'bhoi-yu 'ble, 'de or 'ye 'beleh: 'de :on 'bli 'gle, :eh beh or 'ye :an-a'a: 'blae'⧾ 'yli-eh bo 'dhu-: :yee' :mor 'bhoi-yu: :dao', or yi :gwlor-', 'de or 'ye 'de 'gbu 'di pa, :yee' :an mu :ao', :Dhe dih, :on 'ye deh di. 'Ka-: :an mu 'da-: :e? 'Kei:.

⁸:An mu :ao', Po 'an-a: 'gwie-dii-deh 'kpa. :Yee' pa :an-a'a: nyor⧾ :bale'-' :ya-tiei-', :on 'ye 'on :bale'-' :ya, :mor 'on :taa deh di, 'on :taa 'na, :on 'ye 'on 'de dih :dhe. :Mor eh 'dhu 'on :gweh 'i, 'de :on 'ye deh di, :on 'ye 'na.

⁹Deh :on zela: :an-a'a: 'bhoi-yu :gwluhuh', or 'ye-a' no, 'de or no-eh, eh-: :korn dhih :an mu-or 'zio :po :e?

¹⁰:Yee' 'ka-: a :ne :ke. :Mor a no deh⧾-a' klehkpeh Nyorsoa zela: a :gwluhuh', a 'ye-a' no, :yee' 'nyi, a 'da, :A :mor 'bhoi-nynuu: 'o 'suh. :A-a'a: :koan:, :a :korn :a 'ye-a' no, or-: 'o, :a no.

¹¹:Yee' :Yusu'-a mu :Julu'slehn:. :Yeh or mu-a, :yee' or na Sehmeh'la-bluhba-: 'dekorn: :Galali'i-bluhba-: en-' 'dhuna bo.

¹²:Yeh or mu-a, :yee' or :yeh-dih: gwlor :due' ken, 'do :wor nyor⧾-kpalu⧾ :bhue: yau-zon-weh kpon-a, on 'ye-dih-or ybei'. :Yeh on 'ye-or, :yee' 'do :wor on :nyna dih,

¹³'de on wele-or, on 'da, :Yusu', Nyor :Klaba', 'ye :a-a' :wehlih.

¹⁴:Yeh or 'ye-uh'-a, :yee' or :wlu-' 'de on bo, or 'dae:, A mu, a 'ye a-a' 'jeh Nyorsoa-a' 'slaa: :za-nyor⧾ 'i :to-dih:. :Yeh an mu-a, :yee' an-a' yau-zon-weh 'bor-' 'do :gwie 'i.

¹⁵:Yeh an-a' nyor :due' 'ye-eh, :ka or 'puh-a, :yee' or yi-: de, 'de or kpa wlu yai', or po Nyorsoa-a' 'nyne ya.

¹⁶:Yeh or :yeh-dih:-a :Yusu' ken, :yee' or du or-a' 'jeh 'weh 'do or-a' buh⧾ bo, 'de or po-or 'zio. 'Yu :dao', :or po-or 'zio, or no Sehmeh'la-yu:.

¹⁷:Yeh or no-a deh :dao', :yee' :Yusu' dhele-or-: dih, or 'da, Eh :se nyor⧾-kpalu⧾ :bhue: :on se 'puh :e? :Yee' dha nyor⧾ :meheh' :nyieh :on :sie:-a 'o, on :ne :eh?

¹⁸:Yee' :kaa eh no, 'de 'duhba-yu: :daa, or :due', or yi de, or po Nyorsoa-a' 'nyne ya :eh?

¹⁹'De :Yusu' :wlu 'de or bo, or 'dae:, :Sorn-', :on 'ye mu. :An-a' dhih 'jeh-' :po-eh no-eh, 'de :on 'puh.

²⁰Eh :korn 'we-eh :due', 'de :Falasi'i-nyor⧾ dhele: :Yusu' dih, on 'dae:, Ti :yihih :eh, Nyorsoa-a' nyor⧾ wlu 'ken :korn-eh mu 'de :yi :eh? :Yeh on dhele-or dih, :yee' or :wlu-' 'de on bo, or 'dae:, Nyorsoa-a' nyor⧾ wlu 'ken :korn-eh :se deh :oo', a mu 'ye-:, 'de eh 'ye 'de yi :deh.

²¹Nyor :se-eh' a :torne: i, or :se-' :ao', Eh-: :dhe dih, 'de mor, Eh-: :ne 'de 'naa: 'o. Deh no-eh, Nyorsoa-a' nyor⧾ wlu 'ken :korn-eh :ne 'de a 'di.

²²:Yee' or :wlu-' 'de or-a'a: bo :na-nyor⧾ bo, or 'dae:, Ti-a mu 'o :nyni, a 'ye 'yu an 'da-dih-a Nyor-kpalu-a' 'yu-a' dhih-a' 'i 'beh-a' 'we-eh :due' :sloror' 'ye-a' 'bhorn. Jorwor: a :se-eh' 'ye-: i.

²³Nyor⧾-a mu a :gwluhuh' zela:, an mu :ao', Or-: :ne 'de 'naa: 'o, 'de mor, Or-: :dhe dih. :Mor on 'da :ao', :yee' a-a' :zi 'o nyor⧾ :dao' klei'.

²⁴Deh no-eh, :ka dhehn-a no-a 'yli-' :chleh-eh, 'de eh chehn-a yao ken, 'de nyor⧾-a 'ye-a deh⧾-a' klehkpeh-' dih, 'ka-: nyor⧾-a mu 'yu an 'da-dih-a Nyor-kpalu-a' 'yu-a' 'ye-a' :no, 'do 'we-eh: or mu-a 'de :ya 'di.

²⁵Jorwor: or :korn or 'ye deh⧾ :doru'-a 'kle 'ye :zai', 'de mor :kana-nyor:⧾ :daa, on :se-' or-a' dhih 'worn-dih: i :zai' :ke.

²⁶:Yee' :ka eh :ne-a 'do :Noa'-a' ti 'i, 'ka :wor eh mu :ne :ke, 'do ti 'yu an 'da-dih-a Nyor-kpalu-a' 'yu-a mu-a 'de :ya 'di.

²⁷'Do 'we :dao' 'di, :gwlor-nyor⧾-a di deh, an 'na-', an 'ti-dih 'bli, me-: on mane: 'i :chio'lo:, 'de :Noa' pa 'de 'ni ken-meheh 'di. :Yeh or pa-a, :yee' 'ni 'yi-', 'de eh kpa an-a' klehkpeh, :on se-a 'de eh 'di pa.

²⁸'Ka-: eh :ne 'do 'Lorte-a' ti 'i :ke. :Gwlor-nyor⧾-a di deh, 'de an 'na. :Noo'-a dhen deh⧾, 'de :noo'-a plo deh⧾. :Noo'-a 'dhu deh⧾, 'de :noo'-a po 'gbu⧾.

²⁹Jorwor: 'we-eh: 'Lorte 'wluh-a 'Salor-gwlor 'di, 'do :wor neh-: 'dekorn: neh-sobu'⧾-: en 'wluh-dih: 'de yai', 'de en 'kpa 'zorn, :eh gweh-a :ka 'ni-a dba-a, 'de en 'dba nyor⧾-a' klehkpeh.

³⁰'Ka-: 'o eh mu :ne :ke, 'do 'we-eh: 'yu an 'da-dih-a Nyor-kpalu-a' 'yu-a mu-a or-a' 'jeh nyor⧾ 'i :to-dih:.

³¹'Do 'we-eh: :dao' 'di, :mor nyor :ne 'de 'gbu 'dlu,[2] 'de or-a'a: 'tiei 'ye 'de on 'di :ne, :yee' or-a' :pa-' 'de 'gbu, or-a' 'duo:-ih'. 'De :ka :ne-a :due' 'di, :mor nyor :ne 'de 'gle, 'de 'we-eh: :dao', eh 'ye 'o nyni, :yee' or-a' :yi-' :gwlor-'.

³²A :na-dih: deh :eh :no-eh 'do 'Lorte-a'a: 'nynor bo, eh-a' dhih :gwluhuh' dih.

³³Nyor :or 'bhorn-a :or 'ye-a' or-a' :febeh' dih dhe, :yee' or mu-eh 'ma-dih:. Jorwor: nyor :or 'ma-dih:-a or-a' :febeh', :yee' eh-a' dih :dhe-eh: 'o or no.

³⁴'An zela a :gwluhuh', 'do 'gwie-glu: :dao' 'di, :yee' nyor⧾ 'sororn'-a mu 'o ken 'pehn-deh ken :plan-dih:, 'de :due' 'ye 'o :za-eh:, 'de :due' 'ye 'o :sie:.

³⁵:Yee' 'nynor⧾-kpao'⧾ 'sororn'-a mu 'o :dhobo 'zorn :plan-dih:, 'de :due' 'ye 'o :za-eh:, 'de :due' 'ye 'o :sie:. [

³⁶:Yee' nyor⧾-kpalu⧾ 'sororn'-a mu 'de 'gle :plan-dih:, 'de :due' 'ye 'o :za-eh:, 'de :due' 'ye 'o :sie:.]

³⁷:Yeh on 'worn-a deh :daa, :yee' on dhele-or-: dih, on 'da, :Gwlor :baa', dha deh⧾ :daa, en mu :no-dih: :eh? 'De or zela-uh :gwluhuh', or 'dae:, :Dha deh 'meh-dih:-a, 'do :wor 'dhamua'⧾-a gweh-dih.