Read Eastern Krahn Lu 18 Bible Online

Lu 18 - Eastern Krahn bible

Lu 18

¹:Yee' :Yusu' po 'dlan 'de or-a'a: bo :na-nyor⧾ bo, eh 'ye-uh' :gwluhuh' zela: :ka on :korn on 'ye-a 'de Nyorsoa bo :wlu, 'do ti-a' klehkpeh bo, 'de on :ne-a' sea.

²Or 'dae:, Nyor-kpalu :due' :oo', or-: :ne 'o gwlor :due' 'di, 'de or no zabe: :zi-nyor. Or-a' ple Nyorsoa-a' :fano, 'de mor or-a' 'ye nyor⧾ deh-'.

³:Yee' 'do :gwlor :dao' 'di, 'do :wor :dhoba: 'nynor :due' :ne :ke. Or-: yi 'o or bo, 'do ti-a' klehkpeh bo, or 'dae:, :On :korn 'gen, no-eh, nyor :or pa-a 'o 'on bo 'gen :za.

⁴:Yeh or 'da :ao', :yee' zabe: :zi-yu-a' 'worn, or-a' to-or :dou'⧾ bo. Jorwor: :yeh or 'neh-or ken :neheh:, 'do ti :dhulu' 'di, :yee' zabe: :zi-nyor: :dao', or :wlu-' 'de or-a' 'jeh bo, or 'dae:, Keen' :mloror' 'an-a' 'worn, 'an-a' ple Nyorsoa, 'de 'an-a' 'ye nyor⧾ deh-',

⁵jorwor: :ka 'nynor :daa, or 'beh-dih-a 'on 'worn dih, 'do ti-a' klehkpeh bo, 'de 'on yubo-eh :ka or :korn-a 'gen, :yee' 'an mu or-a'a: 'gen or-uh 'nyi-:. :Mor 'on se-eh no, :yee' 'nynor :daa, or mu 'noror 'on bo :yi, piee piee, or 'ye 'on worn gweh.

⁶:Yee' :Gwlor :baa'-a kpa or-a' wlu 'dlu bo, or 'dae:, A :to zabe: :zi-nyor: :dao', :or se-a 'i 'sleh, or-a' wlu :dou'⧾ bo.

⁷:Yee' Nyorsoa :se-eh' :no i, 'de deh⧾ :en 'sleh-a 'i, en 'ye 'o nyor⧾ or gan-a, 'de :an 'vin-dih-or 'i 'gwie-: :glaa'e-: on bo yi, 'de on 'ye 'gen :korn :e? :Ae' a-a' :porluh⧾ 'da, eh mu ti :dhorno'⧾ :kpa, 'de or 'ye-uh' :za-dih: :e?

⁸Dhih 'jeh, 'an zela a :gwluhuh', or mu 'dhobo:, or 'ye-uh' :za-dih:. Jorwor: 'yu an 'da-dih-a Nyor-kpalu-a' 'yu, :mor or 'yle, or mu nyor⧾ :on po-or dhih 'jeh-', an-a' nyor 'ye-: dha 'bluhba ken :e?

⁹:Yee' :Yusu' po 'dlan :noror' 'de nyor⧾ :an 'da-dih-a an-a' 'jeh 'yi 'sleh-nyor:⧾ 'jeh no, 'de :an vlehn-a on 'bei' bo,

¹⁰or 'dae:, Eh :korn 'we-eh :due', 'de nyor⧾-kpalu⧾ 'sororn' mu 'o Nyorsoa-a' 'sla ybei', on 'ye 'de Nyorsoa bo :wlu. :Due' no :Falasi'i-yu:, 'de :due' no 'taa-deh:⧾ :za-yu.

¹¹:Yeh on :ne-a 'de, :yee' :Falasi'i-yu: :dao', or :nyna dih 'do or 'bli, 'de or wlu 'de Nyorsoa bo, or 'dae:, Nyorsoa, 'on po :an-a' 'zio, :ka nyor⧾ :noo' :ne-a, 'de 'on se :ao' :ne. 'On :se 'ylii'-nyor⧾-: 'nyne :zaan' :no-nyor⧾-: nyor⧾ :an no-a deh⧾-zon:⧾ :nee'-: 'dekorn: :ka 'taa-deh:⧾ :za-yu: :daa, or :ne-a :sloror', 'on se :ao' :ne.

¹²'An pa 'suehn-' 'weh, kpor⧾ 'sororn' 'do 'doror'-dlu :due' 'di. 'De deh⧾-a' klehkpeh 'an 'ye-a, 'an 'nyi en-' :bhue: neh :on 'weh.

¹³:Yeh :Falasi'i-yu-a wlu-a deh :dao', :yee' 'taa-deh:⧾ :za-yu: :dao', or :nyna dih, 'de or :tehn-dih: :Falasi'i-yu bo dih :weh-beh:. Or :se-' 'de yai' pobo: :sloror'. Jorwor: or bla :porluh:, or 'da, Nyorsoa, 'mor deh⧾-zon:⧾ :no-nyor: 'o. Jorwor: :on :korn 'gen, 'ye 'an :wehlih.

¹⁴:Yee' :Yusu'-a kpa or-a' wlu 'dlu bo, or 'dae:, 'An zela a :gwluhuh', 'taa-deh:⧾ :za-yu: :daa, ti or mu-a or 'bli de, :yee' Nyorsoa 'da-dih-or 'yi 'sleh-nyor 'do :yor :dao' ken. Deh no-eh, nyor-beh: :or 'beh-dih:-a or-a' 'jeh 'i, or-: Nyorsoa-a mu ya :ya. :Yee' nyor-beh: :or :ya-a or-a' 'jeh ya, or-: Nyorsoa-a mu ya-' 'duo:.

¹⁵:Yee' nyor⧾ :noo', mo-: :ya 'de :Yusu' bo 'nynuu: :nyene', or 'ye-uh dih 'tuh, on 'ye :bhorlie' 'ye. Jorwor: :yeh or-a'a: bo :na-nyor⧾ 'ye-eh, :yee' on kan-uh-: 'i.

¹⁶:Yeh :Yusu' 'ye-eh, :yee' or 'da or-a'a: bo :na-nyor⧾ 'weh 'do or bo, 'de or 'da, A 'nyi 'nynuu: :nyene' yi 'noror 'on bo. A 'bor an-a' 'yi :kan-eh. Deh no-eh, :ka 'nynuu: :nyene' :ne-a, nyor⧾ :on :ne :ao', mo-: Nyorsoa-a mu wlu 'ken :korn.

¹⁷Dhih 'jeh, 'an zela a :gwluhuh', nyor :or se-eh 'worn-dih: Nyorsoa 'ye-a' wlu 'ken :korn :ka 'yu-yu :ne-a, :yee' or :se-' Nyorsoa-a' nyor⧾ wlu 'ken :korn-eh 'zorn :pa i.

¹⁸Eh :korn 'we-eh :due', :yee' :Jueh'-nyor⧾-a' nyor⧾ :na-dih-nyor :due', or-: dhele: :Yusu' dih, :or 'da, Nyor⧾ deh :torne-nyor: 'jeh :nor, deh 'on 'ye no 'de 'on 'ye 'kmo :sie: :febeh' 'ble :eh?

¹⁹'De :Yusu' dhele-or dih, or 'da, :Eh :korn dhih :an 'da-dih 'on nyor 'jeh :eh? Nyorsoa :due', or-: 'dhu nyor 'jeh-' 'klein'.

²⁰:On yubo: :Mose'-a' 'tele' 'weh, :eh no-a, Nyor-a' :no-' 'nyne :zaan', nyor-a' 'dba-:-' nyor, nyor-a' 'yli-:-', nyor-a' 'dhu-dih:-' nyor⧾ dhih ken dih, :yee' 'ye :on 'de-: 'dekorn: :on :baa'-: deh-'.

²¹:Yeh or 'da :ao', :yee' 'yu :dao', or 'dae:, :Eh 'wluh-a 'de 'an 'yu :gbolo'-bla, 'on dhe 'o 'tele'⧾ :daa, en-' klehkpeh-: dih.

²²:Yeh :Yusu' 'worn-a deh or :za-a-', :yee' or 'da, Deh :due', eh-: :sie: 'o, eh-: :on :korn :on 'ye no. Plo :an-a'a: :kororn-deh⧾-a' klehkpeh. :Yee' 'wlii: :an mu-a 'ye-:, :yee' 'nyi-ih nyor⧾ :on se-a deh-a' :za-da 'ble. :Mor :on no-eh, :yee' :an mu bhaan-deh⧾ 'ble-: 'de Nyorsoa 'bli yai'. :Mor :on no :ao', :yee' 'yle, :on 'ye 'o 'on klei' zi.

²³:Yeh 'yu :dao', or 'worn-a deh :Yusu' :za-a-', :yee' or-a' :porluh 'kpa-: 'zorn 'gabaa. Deh no-eh, or bhan-' 'gabaa.

²⁴:Yee' :Yusu' pobo-or-: ya, 'de or 'da, Eh no 'i :kma-deh: 'do bhaan-nyor bo, 'de or 'ye 'de Nyorsoa-a' nyor⧾ wlu 'ken :korn-eh 'zorn pa.

²⁵Eh :kma 'i 'do bhaan-nyor bo, or 'ye 'de Nyorsoa-a' nyor⧾ wlu 'ken :korn-eh 'zorn pa, :eh :zi 'o :kpuan' ken :soo'o 'ye 'de 'mehno-a' 'bie' 'di :yi-dih:.

²⁶:Yeh or 'da :ao', :yee' nyor⧾ :yuh :on 'worn-a or-a' wlu, :yee' on dhele-or-: dih, on 'da, :Yee' :mor eh :ne :ao', :yee' :or 'beh-dih: :or 'ye 'puh :naa :eh?

²⁷:Yeh on dhele-or dih, :yee' or 'dae: 'de on bo, Deh nyor se-a no-a' 'beh-dih:, Nyorsoa 'beh-dih: eh-a' no-a' 'weh.

²⁸:Yeh :Yusu' 'da :ao', :yee' :Piteh' wlu-', or 'da, :Gbee'e:. :A-a'a: 'gbu⧾ :wor :a 'tali: dih, 'de jorwor: :a zi 'o :on klei'.

²⁹'De :Yusu' 'da, Dhih 'jeh, 'an zela a :gwluhuh', nyor :or 'tali:-a or-a'a: 'gbu-: 'nynor-: 'de-di'-boi'-: 'de-: :baa'-: 'dekorn: or-a'a: 'nynuu-: dih, 'do Nyorsoa-a' nyor⧾ wlu 'ken :korn-eh-a' dhih bo,

³⁰:yee' nyor :dao', or mu en-' :doru' 'ye-: en 'ye 'o ken dih :zi, dha ti :daa bo. :Yee' or mu 'kmo :sie: :febeh' 'ye-: 'do ti :dele' :en mu-a 'de :yi 'di.

³¹:Yee' :Yusu' po or-a'a: bo :na-nyor:⧾ :on :korn-a :bhue: 'yor :ne-a 'sororn' :dha :due', 'de or :wlu 'de on bo, or 'dae:, A :gbee'e:. :A mu :Julu'slehn :naa. 'Do :wor deh⧾-a' klehkpeh Nyorsoa-a' wele-eh: :po-nyor⧾ 'chle-a, 'do 'yu an 'da-dih-a Nyor-kpalu-a' 'yu 'bhun, en mu dhih 'jeh-' 'kpa-dih-eh.

³²:Yee' an mu-or 'kwla :za 'de nyor⧾ :on :se-a :Jueh'-nyor⧾ bo. An mu-or :goba'-dhih ken dih 'wluh-dih:, 'de on 'ye-or :wla-dih:, on 'ye-or' :dhehmeh ya gba,

³³on 'ye-or' bla, 'de on 'ye-or' 'dba. Jorwor: 'do 'we-eh-a' taan neh 'di, or mu-' :sorn.

³⁴Jorwor: :Yusu'-a'a: bo :na-nyor⧾ :se-' deh⧾ :daa or :za-a-' en-' deh-' dih 'worn. Deh no-eh, deh en 'dhu-eh:-', on se-ih yubo:, 'de mor deh or :za-a-', on se-eh yubo: :ke.

³⁵:Yee' :Yusu'-a mu :Jehliko'o. :Yeh or 'koan'-dih-a :Jehliko'o dih, :yee' 'doror'-nyor :due', or-: :dhe dih 'do :gwie: worn 'i, or-: zlor.

³⁶:Yeh or 'worn-a nyor⧾ :doru' :on :ne :Yusu'-a zi-a, an-a' :dhlumeh', :yee' or dhele: nyor⧾-: dih, or 'da, Eh-a' 'nyne :eh?

³⁷:Yeh or dhele-uh-a dih, :yee' on zela-or-: :gwluhuh', on 'dae:, :Yusu' :or 'wluh-a 'Nazla, or-: 'o, :or zi.

³⁸:Yeh on 'da :ao', :yee' or 'wor-', or 'dae:, :Yusu', :Debe'-a' 'yu, 'ye 'an :wehlih.

³⁹:Yeh or 'wor-a, 'de or wele-a :Yusu', :yee' nyor⧾ :on :korn-a 'de nyor⧾ :dao', an-a' ybei', an po-or 'borboa' 'i, an no, No 'dhuan. :Yee' jorwor: or 'kpa 'de de dih, or po 'geh⧾, or no, :Debe'-a' 'yu, 'ye 'an :wehlih.

⁴⁰:Yeh or no :ao', :yee' :Yusu' :nyna dih, or 'da, A 'da 'yu :dao', or 'ye dha 'on bo yi. :Yeh or 'koan'-dih-or dih, :yee' :Yusu' dhele-or-: dih, or 'da,

⁴¹Deh :an 'bhorn 'on 'ye no 'do :on bo :eh? 'De 'doror'-nyor 'da, :Gwlor :baa', 'an 'bhorn 'on 'ye dih 'ye o.

⁴²'De :Yusu' 'da, 'Ye-dih: :naa. :An-a' dhih 'jeh-' :po-eh no-eh', 'de :on 'puh.

⁴³:Yee' 'do :dha :due' :dao', :yee' or 'ye-: dih, 'de or zi 'o :Yusu' klei', or po Nyorsoa-a' 'nyne ya. :Yeh nyor⧾-a' klehkpeh, on 'ye-a deh :daa, :yee' an-a' klehkpeh, an po Nyorsoa-a' 'nyne ya :ke.