Read Eastern Krahn Lu 20 Bible Online

Lu 20 - Eastern Krahn bible

Lu 20

¹Eh :korn 'we-eh :due', 'de :Yusu'-a torne nyor⧾ deh, or po Nyorsoa-a' tubo-wlu:⧾ 'jeh, 'do Nyorsoa-a' 'sla ybei'. :Yeh or no :ao', :yee' Nyorsoa-a' 'slaa: :za-nyor:⧾ :klaba'⧾-: nyor⧾ 'tele' :torne-nyor⧾-: 'dekorn: 'bluhba: :korn-nyor⧾-: mo-: yi 'o or bo,

²'de on dhele-or dih, on 'dae:, Zela: :a :gwluhuh', dha :on :za 'kpih, 'de :an no deh⧾ :daa :eh? :Or 'nyi :on 'kpih :daa :eh?

³:Yeh on dhele-or dih, :yee' or :wlu-' 'de on bo, or 'dae:, 'On 'ble deh :due', 'an mu a dih dhele: :ke. A zela: 'on :gwluhuh',

⁴nyor⧾ 'ni 'dlu :po :Jororn'-a' nyor⧾ 'ni 'dlu :po-deh: :daa, eh 'wluh 'de Nyorsoa bo :e? :Ae' eh 'wluh 'de :gwlor-nyor⧾ bo ke?

⁵:Yeh or dhele-uh-a dih, :yee' an polo-ih' 'de an-a' 'jeh 'nyne-', on 'da, :Mor :a 'da, 'de Nyorsoa bo :oo', :yee' or mu :ao', :Eh :korn dhih, 'de a :se-or' dhih 'jeh-' po 'da :eh?

⁶'De mor, :mor :a 'da, 'de :gwlor-nyor⧾ bo :oo', :yee' nyor⧾-a' klehkpeh, an mu :a sobu'⧾ dih :tba-dih:, :a 'ye 'meh. Deh no-eh, on po-eh-' dhih 'jeh, :ka :Jororn' 'dhu-a Nyorsoa-a' wele-eh: :po-nyor-'.

⁷Eh-a' dhih, on :wlu-' 'de or bo, on 'da, :Dha eh 'wluh-a, :a se 'o yubo:.

⁸:Yeh on 'da :ao', :yee' or 'dae: 'de on bo, :Yee' 'on :se-' a :gwluhuh' zela: i :ke, :dha 'on :za-a 'kpih 'do deh⧾ :daa en-' no-a' bo.

⁹:Yee' :Yusu' 'kpa 'o 'dlan :po 'da 'weh, 'de on bo, or 'dae:, Nyor-kpalu :due' :oo', or-: no gle, 'de :or 'dhu 'de eh 'di 'glee-dubu'⧾. :Yeh or 'dhu-ih-a, :yee' or po-eh 'de nyor⧾ 'kwa, on :ne or 'ye en-' 'bi-' gble. :Yee' :yeh or no :ao', :yee' or mu 'duhba-'.

¹⁰:Yeh eh no-a deh⧾ :dao', en-' 'bi-a' 'kpaan'-ti, :yee' or dbo or-a'a: 'bhoi-yu :due' 'de nyor⧾ or po-a gle 'de 'kwa bo, on 'ye or-a' ne, or bo dbo. :Yee' nyor⧾ :dao', on bla-or', on :se-or' deh 'nyi, 'de on dbo-or de.

¹¹:Yee' 'yu :or :korn-a gle, or dbo 'bhoi-yu: :noror' 'de on bo. :Yeh or mu-a, :yee' on bla-or' :ke, 'de on :no-dih-or dhen. 'De on dbo-or de, on :se-or' deh 'nyi.

¹²:Yee' 'yu :or :korn-a gle, or dbo 'yu-a' taan nor 'weh. :Yeh or mu-a, :yee' on :tba-dih-or deh⧾ dih, 'de on no-or dih, on za-or 'o 'gle.

¹³:Yeh eh no :ao', :yee' 'yu :or :korn-a gle, or 'dae:, :Yee' :kaa 'an mu :no :naa :eh? 'An mu 'an-a: :dhih :kma-yu :dbo. An mu-or deh-' 'ye-: 'bla. 'De or dbo-or.

¹⁴Jorwor: :yeh nyor⧾ :an pobo-a 'o or :baa'-a'a: gle bo dih, on 'ye-or, :yee' an wlu-' 'de an-a' 'jeh 'nyne-', an no, 'Yu :or mu-a or :baa'-a'a: :kororn-deh⧾ :korn, or-: 'o, :or 'yle. A 'nyi, :a 'dba-or, 'de :a 'ye or :baa'-a'a: :kororn-deh⧾ :korn.

¹⁵'De on za-or 'o 'gle, on 'dba-or. :Yeh :Yusu' gweh-a 'dlan :dao', or-a' po-a' 'i, :yee' or dhele-uh-: dih, or 'dae:, :Yee' 'yu :or :korn-a gle, :kaa or mu nyor⧾ :dao' :an pobo-a 'o or-a'a: gle bo dih, an-a' dhih :no :eh?

¹⁶'An zela a :gwluhuh', or mu :mu or 'ye-uh' 'dba, 'de or 'ye 'de nyor⧾ :noo' po. :Yeh nyor⧾ :on :ne-a 'o, on 'worn-a deh :Yusu' :za-a-', :yee' on 'da, :Sago', eh se 'beh-dih: eh 'ye :ao' :ne.

¹⁷:Yeh on 'da :ao', :yee' :Yusu'-a pobo-uh-: ya 'dhuan, 'de or 'da, :Yee' deh :daa :eh 'chle-eh 'de Nyorsoa-a' 'chlee-deh 'di, deh eh 'dhu-eh:-' :eh? :Eh no-a, Tu-a' :yuh 'gbu :po-nyor⧾ po-a dih :dee', tu-a' 'jeh :dao', mo-: no 'gbu-a' :zi-tu :naa.

¹⁸'De nyor-beh: :or mu-a 'o tu :daa ken dih 'ga-:, or mu dih :wa-dih-eh:, 'de nyor-beh: tu :daa, an mu-a 'o ken 'kpa-:, or mu :sun-eh:, or 'ye :bhebe' no.

¹⁹:Yeh :Yusu' :za-a deh :daa-', :yee' nyor⧾ 'tele' :torne-nyor⧾-: 'dekorn: Nyorsoa-a' 'slaa: :za-nyor:⧾ :klaba'⧾-: an 'bhorn on 'ye-or' kpon 'do :dha :due' :dao'. Deh no-eh, on yubo-eh' :ka or :po-dih-uh-a 'dlan dih. Jorwor: an ple nyor⧾-a' 'yli 'weh.

²⁰:Yeh eh no :ao', :yee' an na-dih :Yusu' 'yli-eh:, 'de on dbo nyor⧾ :an 'da-dih-a an-a' 'jeh 'yi 'sleh-nyor⧾, on 'ye-or wlu 'worn dih 'bhorn-dih:, :mor or :za deh-zon-', on 'ye-or' kpon, 'de on 'ye-or 'gomla-nyor⧾-a' nyor :klaba' 'kwla :za-dih:.

²¹:Yee' nyor⧾ :on :dbo-eh, on :wlu-' 'de or bo, on 'dae:, Nyor⧾ deh :torne-nyor:, :a yubo-eh', deh⧾ :an za-a-'-: 'dekorn: deh⧾ :an torne-a nyor⧾-: en 'sleh-: 'i. :A yubo-eh', :ka :an-a' :za-a :gwie-for :due', 'de :an torne-a nyor⧾ Nyorsoa-a' :gwie: 'jeh, 'de 'yi 'sleh ka 'di.

²²Zela: :a :gwluhuh', eh :ne 'o :a-a'a: 'tele'-a' :gwie 'i 'weh :e, nyor 'ye 'taa-deh⧾ :za, 'de 'Wloon-nyor⧾-a' 'keen bo :e? :Ae' :a-a' :no-eh' ke?

²³:Yeh an dhele-or dih, :yee' or yubo-eh' :ka eh 'dhu-a pluh-' on 'gba-a, 'de or :wlu 'de on bo, or 'dae:,

²⁴A :torne: 'on 'sebla-wlii-eh :due', 'on 'ye-eh 'ye. :Yeh or 'ye-eh, :yee' or dhele-uh-: dih, or 'da, :Or :korn 'dlu-: 'dekorn: 'nyne-: :en :ne :daa eh ken :eh? 'De on 'da, 'Wloon-nyor⧾-a' 'keen :oo'.

²⁵'De or 'dae:, 'Do eh-a' dha, a 'nyi 'Wloon-nyor⧾-a' 'keen deh :eh :korn-a 'de or bo, :yee' a 'nyi Nyorsoa deh :eh :korn-a 'de or bo.

²⁶:Yeh or 'da :ao', :yee' 'klii'-deh: on 'ye-a' 'o deh or :za-a-' 'bhun 'ye-dih:, eh se :ne, 'do :gwlor-nyor:⧾ :doru' :dao' ybei'. An-a' :porluh⧾ 'ma-' 'do deh or :za-a-' bo, :yee' deh on 'ye-a' :za :neheh', eh se :ne.

²⁷:Yeh eh no :ao', :yee' :Jueh'-nyor⧾-a' kpor an 'da-dih-a :Sayusi'i-nyor⧾ :on no-a :mor nyor 'meh, :yee' or-a' :sorn-' :neheh', mo-: mu 'de :Yusu' bo, 'de on dhele-or dih, on 'da,

²⁸Nyor⧾ deh :torne-nyor:, :Mose' 'chle-eh' 'do :a bo, or 'da, :Mor nyor 'meh, 'de or 'ye 'nynor sie, :mor or-: 'nynor :dao'-: on se 'yu 'wluh, :yee' or-a' dei'-yu :korn or 'ye or-a'a: 'nynor-' 'duo:, or 'ye-or' :korn, 'de or 'ye 'nynuu 'wluh 'do or-a' 'de-di' :or 'meh-a 'gor bo.

²⁹:Yee' 'de-di'-nyor⧾-kpalu⧾ :meheh' 'sorn :oo', 'de :klaba' nor :korn 'nynor. 'Nynor or :korn-a, or :ne or :se-' 'yu 'wluh, 'de or 'meh.

³⁰:Yeh or 'meh-a, :yee' :yor :or tba-a 'o or 'de, :yee' or 'duo: 'nynor :dao'-' 'weh, 'de or korn-or. :Yeh ti :zi-dih:-a 'o ken dih, :yee' or 'meh-' :ke. Or-: 'nynor-: on :se-' 'yu 'wluh.

³¹'Ka-: taan nor no :ke. 'Ka-: an-a' klehkpeh :on :ne-a :meheh' 'sorn on no, on :tba-dih: ken. An-a' nyor :ne 'nynor :dao' :se-' 'yu 'wluh.

³²:Yeh an-a' klehkpeh, on 'meh-a, 'de on :gweh-a 'o dih, :yee' 'nynor :dao', or 'meh-' :ke.

³³:Yee' :ka or 'ti-a nyor⧾ :meheh' 'sorn :dao' 'bli :dee', :yee' :mor ti nyni 'o, 'de nyor⧾-a' klehkpeh :on 'meh-a, 'de on 'ye-' :sorn, :yee' :or :korn 'nynor or mu-' 'dhu-eh: :naa :eh?

³⁴:Yeh on dhele:-a :Yusu' deh :daa dih, :yee' or :wlu-' 'de on bo, or 'dae:, :Kana-nyor:⧾ :daa, an 'ti-dih 'bli.

³⁵Jorwor: :yuh :on :bleh-dih-eh 'i, :on 'ye-a ti :en mu-a 'de :yi 'ye, 'de :on 'ye-a' 'de nma-dih-deh 'di 'wluh 'do 'we-eh: :dao' 'di, on :se-' 'bli 'ti-dih: i :neheh'.

³⁶'De mor on :se-' 'meh-: i :neheh', :ka ti-a mu-a 'dlu-' :tehn. Deh no-eh, :ka 'enjor-nyor⧾ :ne-a, 'ka-: an mu :ne :ke. :Ka on 'wluh-a 'de nma-dih-deh 'di :naa, :yee' eh-: no-eh, 'de on no Nyorsoa-a' 'nynuu.

³⁷:Yee' :Mose'-a' 'yor-eh :to-dih: :a 'i 'weh, :ka 'meheh'-nyor⧾-a sorn-a-'. Deh no-eh, 'de or-a'a: 'chlee-deh: or 'chle-a 'di, 'do eh-a' :dha or :za-dih:-a 'kwla :yale'-gan: :or sin-a, or-a' dhih-', 'do :wor or 'da-dih: :Gwlor :baa', 'Eble'hehn-a' Nyorsoa, Ase'-a' Nyorsoa, 'dekorn: 'Jekor-a' Nyorsoa.

³⁸Nyorsoa :se 'meheh'-nyor⧾-a' Nyorsoa. Jorwor: or no 'kmo :ne-nyor⧾-a' Nyorsoa. Nyor⧾-a' klehkpeh or 'da-a on 'ye-a' or-a' nyor⧾ no, on no 'kmo :ne-nyor:⧾.

³⁹:Yeh or 'da :ao', :yee' nyor⧾ 'tele' :torne-nyor⧾-a' nyor⧾ :noo' 'dae:, Nyor⧾ deh :torne-nyor:, deh :on :za-a-', eh :florn ken dih.

⁴⁰:Eh 'wluh-a 'o, :yee' eh se nyor :korn :or 'ye-a' :gwluhuh' :ku, :or 'ye-or deh-beh dih dhele: :neheh'.

⁴¹:Yee' :Yusu' :wlu-' 'de on bo, or 'dae:, :Eh :korn dhih, 'de nyor⧾ 'da Nyorsoa-a' 'taan'-yu no :Debe' 'di-a' 'yu :eh?

⁴²:Debe'-a' 'jeh 'yor-eh za-eh' 'weh, 'de 'chlee-deh: an 'da-dih-a :Saan' 'di, or 'da, :Gwlor :baa' :wlu-' 'de 'an :Gwlor :baa' bo, or 'da, :Dhe 'o 'an :dila-son bo dih :chio'lo:,

⁴³'de 'on 'ye nyor⧾ :on 'nyeh-a :on-' ya :ya, 'de :on 'ye-uh' buh⧾ ken dih tba.

⁴⁴:Debe'-a' 'yor-eh 'da-dih 'yu-a' 'jeh :daa, :Gwlor :baa'. :Yee' :kaa or 'ye or-a'a: 'yu-' 'dhu-eh no :eh?

⁴⁵:Yee' ti nyor⧾-a' klehkpeh, an to-a :dou'⧾, :yee' :Yusu' :wlu-' 'de or-a'a: bo :na-nyor⧾ bo, or 'dae:,

⁴⁶A 'dhu a-a' 'jeh :dhororn', 'de nyor⧾ 'tele' :torne-nyor⧾ :ne-' a dih :bo-dih:, 'de an-a' noo-deh⧾ 'di. On :ybeh pa :gba 'vuu:⧾ :nmaa'e-', 'de :na dih :deh. 'De on :ybeh nyor⧾ 'ye-uh' wlu bo po, 'do 'doror', 'de deh-' 'ye ka 'di :deh. On :ybeh-' kpala'⧾ 'jeh :ne :en :dhe-dih-eh 'for 'i, 'de 'di :gweh-dih-sla⧾ 'zorn dih-a' ken :dhe :deh. 'De on :ybeh-' :dha nyor⧾ :klaba'⧾-a dhe-a dih 'do gor-', dih :dhe :deh.

⁴⁷An za :dhoba: 'nynor⧾ 'gbu⧾ 'kwa dih, 'de :mor on 'ye nyor⧾-a' 'yli, :yee' an gwle 'o Nyorsoa bo :wlu 'da. :Mor zabe: :zi-eh-a' ti nyni 'o, nyor⧾ :dao', mo-: Nyorsoa-a mu 'kle 'ye-eh: 'dlu :po 'gabaa, eh 'ye 'o :zi.