Read Eastern Krahn Lu 21 Bible Online

Lu 21 - Eastern Krahn bible

Lu 21

¹:Yeh :Yusu'-a pobo-a 'o, :yee' or 'ye bhaan-nyor:⧾, :an po-a 'de 'wlii 'de Nyorsoa-a' 'sla-a' 'wlii 'di :po :gbloron'-yu 'di.

²'De or 'ye :dhoba: 'nynor :or se-a deh-a' :za-da 'ble, or po 'de 'wlii-yor: :nyene' 'sororn'.

³:Yeh or 'ye-a 'nynor :dao', :yee' or 'dae:, Dhih 'jeh, 'an zela a :gwluhuh', :dhoba: 'nynor :dao', :or se-a deh-a' :za-da 'ble, 'wlii: or po-a 'de, en :zi 'o 'wlii: nyor⧾-a' klehkpeh, on po-a 'de 'weh.

⁴Deh no-eh, eh-: 'dhu, nyor⧾ :on po-a 'de 'wlii: :dhulu', en-' :yih on 'ble-a, :en :sie:-a ken, me-: 'o, on po 'de. Jorwor: 'nynor :dao' :or se-a deh-a' :za-da 'ble, deh-a' klehkpeh or dhe-a :gwlii', eh-: 'o, or po 'de.

⁵:Yee' :Yusu'-a'a: bo :na-nyor⧾-a' :noo', mo-: :an po Nyorsoa-a' 'sla dhih bo, :ka on :po-dih-uh-a sobu'⧾ :nmaa'e-: 'dekorn: 'nyii'-deh:⧾ nyor⧾ 'nyi-a Nyorsoa, :en no-eh, 'de on :nmor-a 'yi dih. :Yeh on 'da :ao', :yee' :Yusu' 'dae:,

⁶Deh⧾ :daa a 'ye-a dha mor, ti-a mu 'o :nyni, eh :se-' sobu' :korn i, :on 'ye-a' 'o on 'be ken :sie:. Sobu'⧾-a' klehkpeh, en mu ken dih zela-eh:, en 'ye 'zorn :po-eh:.

⁷:Yeh :Yusu' 'da :ao', :yee' on dhele-or-: dih, on 'da, Nyor⧾ deh :torne-nyor:, ti :yihih :eh deh⧾ :daa, en mu :no-eh :eh? Deh :eh mu 'yi :to-dih-deh :no, 'de :a 'ye-eh' yubo:, :ka deh⧾ :daa en-' ti nyni-a 'o, en 'ye-a' :no-eh :eh?

⁸'De or :wlu 'de on bo, or 'dae:, A 'dhu a-a' 'jeh :dhororn'. A-a' 'worn-:-', nyor-a' :bo-dih:-' a dih. Deh no-eh, nyor⧾ :dhulu', mo-: :an mu 'de 'an 'nyne ken :yi-dih:. Mo-: :an mu :ao', mo-: Nyorsoa-a' 'taan'-yu: 'o, 'de on 'ye :ao', :De 'bor-dih-ti nyni 'o 'weh. Jorwor: a-a' zi 'o on klei'.

⁹:Mor a 'worn tuh-a' 'nyne, 'de a 'ye-eh' 'worn :ka nyor⧾-a za-a 'o nyor⧾ :na-dih-nyor⧾ kpala'⧾ 'i, :yee' a-a' :ple-' :fano. Deh no-eh, deh⧾ :daa en :korn en 'ye :no-eh: :zai', jorwor: eh 'see ti-a' 'dlu-' :jla-ti no, 'do :dha :due' :dao'.

¹⁰:Yee' or kpa or-a' wlu 'dlu bo, or 'dae:, 'Bluhba⧾-dlu⧾-: 'bluhba⧾-dlu⧾-: en mu :vorn. :Yee' 'keen-boi'-a mu on 'bei' 'keen-boi' bo :vorn.

¹¹'Bluhba-a mu :tleh 'gabaa. 'Moeh: :eh 'kpa-a Ji Kou'-moeh-: 'dekorn: 'weh⧾-: en mu 'de :yi deh⧾-' dih. Nyor⧾ :fano-' :po-deh⧾-: 'dekorn: nyor⧾ 'yi :to-dih-deh:⧾ :klaba'⧾-: me-: mu 'ye-eh 'de yai'.

¹²Jorwor: :mor deh⧾ :daa en-' klehkpeh, en 'ye :no-eh:, :gwlor-nyor⧾-a mu a :kpon, on 'ye a 'kle 'ye-dih:. An mu a 'kwla :za 'de an-a' 'di :gweh-dih-sla⧾ 'zorn dih, 'de on 'ye a :kasue 'di po. :Yee' an mu 'o a 'keen-boi'-: 'dekorn: 'gomla-nyor⧾-a' nyor⧾ :klaba'⧾-: ybei' :kpa, 'do 'an dhih bo.

¹³:Yee' 'do :wor eh no ti, a 'ye Nyorsoa-a' tubo-wlu:⧾ 'jeh-a' dhih bo zela: 'de on bo.

¹⁴A-a' :sie:-' ti de, a-a' :porluh⧾-a' 'beh-dih:-' a 'worn dih, 'do deh a mu-a :za, :mor a :taa a-a' 'jeh dhih ken za.

¹⁵Deh no-eh, 'an mu a wlu a mu-a-' :za-: 'dekorn: :toror'-: 'nyi-:. Eh-: mu-eh :no, 'de nyor⧾-a' klehkpeh :on po-a a dhih 'dlu, an-a' nyor :se-' a 'borboa' 'i :po-eh 'beh-dih: i. 'De mor, on :se-' a-a' bo dhobo-eh 'beh-dih: i :ke.

¹⁶A 'de-: a :baa'-: a-a' 'de-di'-boi'-: a-a' 'wluh-a-nyor⧾-: 'dekorn: a 'bei'-: mo-: :an mu a :plo :sloror' 'de nyor⧾ 'plo⧾ bo, 'de on 'ye a-a' :noo' 'dba.

¹⁷:Gwlor-nyor⧾-a' klehkpeh, an mu a-uh' 'nyeh-: 'an dhih.

¹⁸Jorwor: a-a' 'mii: :en :ne-a 'o a 'dlu, en-' 'yor-eh :due' :sloror', :se-' gbe :zie: i.

¹⁹Jorwor: :mor a se sea, :yee' a mu 'kmo :sie: :febeh' 'ye-:.

²⁰:Yee' :Yusu'-a kpa or-a' wlu 'dlu bo, or 'dae:, :Mor eh 'dhu a 'ye sorye', 'de on 'ye :Julu'slehn bhin, :yee' a mu-eh yubo: :ka or-a' ya :gba-ti 'koan'-a bo.

²¹:Mor eh :ne :ao', :yee' nyor⧾ :on :ne-a 'de :Judi'a-bluhba ken, 'nyi on ple, on mu 'de tluh⧾ ken. :Yee' :yuh :on 'ti-a 'o :Julu'slehn, 'nyi on ple, on 'wluh 'o. :Yee' :yuh :on :ne-a :gbalie⧾ bo dih, an-a' :mu-' :Julu'slehn.

²²Deh no-eh, Nyorsoa-a mu :Jueh'-nyor⧾ 'kle 'ye-eh: 'dlu :po 'do ti :dao' 'di, 'de deh⧾-a' klehkpeh :en 'chle-eh 'de or-a' 'chlee-deh 'di, en 'ye dhih 'jeh-' 'kpa.

²³'Do ti :dao' bo, eh mu 'i :kma 'gabaa, 'do 'nynor⧾ :on :ne-a 'kwli⧾-'-: 'dekorn: :yuh :an 'nya-dih-a 'nynuu-: bo. :Yee' eh mu 'kle 'ye-eh: :klaba' :no, 'do nyor⧾ :on :ne-a dha yao 'zorn bo. Nyorsoa-a' 'chehn-a mu 'dhle-: 'do on ken.

²⁴An mu :noo' :bhla 'jlehn 'i 'dba-dih:. An mu :noo' :kpon, 'de on 'ye-uh kpa, on 'ye-uh' :kasue 'di po, 'de 'bluhba⧾-a' klehkpeh ken dih. 'De nyor⧾ :on :se-a :Jueh'-nyor:⧾, an mu :Julu'slehn wlu 'ken :korn, on 'ye-eh' kpa :kpaa:, 'de an-a' ti 'ye 'o dih :gweh.

²⁵:Yee' :Yusu'-a wlu-' :chio'lo:, or 'da, 'Do ti :dao' 'di, nyor⧾-a mu nyor⧾ 'yi :to-dih-deh⧾ 'ye-: 'de 'yluh-: 'chuh-: 'dekorn: 'chuh :dhlaen-: 'de en bo yai'. Nyor⧾-a' :dha :dhulu' :on :ne-a dha 'bluhba ken, an mu an-a' 'jeh worn 'ye-:, 'de deh on 'ye-a' no, on :se-eh' yubo: i, 'do yobo'-a' nyor-kpalu-duh⧾-: 'dekorn: :dhlumeh' or po-a bo-:.

²⁶:Gwlor-nyor⧾-a' :porluh⧾-a mu 'zorn 'kpa-: on 'ye :gwluhuh' dih 'kpuhba:. Deh no-eh, :fano-a: no-uh 'do deh :eh yi-a dha 'bluhba ken bo. :Yee' deh⧾-a' klehkpeh :en 'ble-a 'kpih 'do yao :gwlii', en-' 'kpih-a mu 'i gbua:.

²⁷:Yee' nyor⧾-a mu 'yu an 'da-dih-a Nyor-kpalu-a' 'yu 'ye-:. Or mu 'de :yi, 'de 'ni-kpan⧾ 'nyne-', 'de 'kpih-: 'dekorn: dhih-a' 'i 'beh-a' :klaba'-: 'di.

²⁸:Mor deh⧾ :daa, en 'dhu-eh: glu, :yee' a :nyna dih, a 'ye 'de yai' pobo:. Deh no-eh, a-a' zelie-ti 'koan'-: bo.

²⁹:Yee' :Yusu' po 'dlan 'de or-a'a: bo :na-nyor⧾ bo, or 'dae:, A pobo: 'fe-tu-: 'dekorn: tu⧾-a' klehkpeh-: ya.

³⁰:Mor a 'ye-ih, en :taa wlon⧾ :dele' 'dhu, :yee' a-a' 'jeh 'yor-eh yubo-eh' :ka 'ni :dba 'i-ti-a nyni-a 'o.

³¹:Yee' 'ka-: 'o, eh :ne :ke, :mor a 'ye deh⧾ :daa en :taa no-eh, :yee' a mu-eh yubo: :ka Nyorsoa-a' nyor⧾ wlu 'ken :korn-eh 'koan'-dih:-a 'o dih.

³²Dhih 'jeh, 'an zela a :gwluhuh', deh⧾-a' klehkpeh :daa en mu :no-eh:, 'de jorwor: nyor⧾-a' klehkpeh :on :ne-a 'kmo-' dha ti :daa 'i, 'de an-a' ti 'ye 'o dih :gweh, on 'ye 'meh.

³³'Bluhba-: 'dekorn: yao-: en mu 'dlu-' :jla, jorwor: 'an wlu :se-' dih :gweh i, :ka ti-a mu-a 'dlu-' :tehn.

³⁴A 'dhu a-a' 'jeh :dhororn'. A-a' :za-' a-a' 'jeh 'kwla, 'de deh⧾ :en mu-a a nyor⧾-gba-' :po bo-: nomor 'na-eh-: 'dekorn: :ka a 'ye-a 'kmo :ne-eh no-:. :Mor a no-eh, :yee' 'we-eh: :dao', eh mu a ken :ge-dih:,

³⁵:eh gweh-a :ka pluh kpon-a deh, :vai:. :Gwlor-nyor⧾-a' klehkpeh :on :ne-a dha yao 'zorn, an mu 'we-eh: :dao' 'ye-:.

³⁶:Yee' eh-a' dhih, a 'dhu-eh 'yli-eh bo, 'do ti-a' klehkpeh bo. :Yee' a bale: Nyorsoa, or 'ye-eh' no, 'de a 'ye 'kpih 'ye, a 'ye 'de deh⧾ :daa :en mu-a 'de :yi, 'de en 'di :dhie' chehn :pehleh'peh:, 'de a 'ye 'kpih 'ye, a 'ye 'o 'yu an 'da-dih-a Nyor-kpalu-a' 'yu ybei' dih :nyna.

³⁷:Yee' 'do 'we-a' klehkpeh bo, :Yusu'-a torne nyor⧾ deh 'do Nyorsoa-a' 'sla ybei'. :Yee' 'do ti-a' klehkpeh bo, :mor glu :taa gor, :yee' or mu 'de 'Orle-tluh ken, or 'ye 'de 'pehn.

³⁸:Yee' zorn bo-mlai', :gwlor-nyor⧾-a' klehkpeh yi 'o Nyorsoa-a' 'sla ybei', on 'ye-or' :dou'⧾ bo :to.