Read Eastern Krahn Lu 22 Bible Online

Lu 22 - Eastern Krahn bible

Lu 22

¹:Yee' Se 'vu-bhlee-a' gor an 'da-dih-a 'Meh-a' :bla-dih: 'dlu dih-gor, or-a' ti-a 'koan'-dih 'o-: dih.

²:Yee' Nyorsoa-a' 'slaa: :za-nyor:⧾ :klaba'⧾-: 'dekorn: nyor⧾ 'tele' :torne-nyor⧾-: an 'bhorn :ka on 'ye-a' no, 'de on 'ye-a :Yusu' 'dba. Jorwor: an ple nyor⧾ :on :ne-a 'o, an-a' 'yli.

³:Yeh eh no :ao', :yee' 'ku 'kpa 'o :Juda' an 'da-dih-a :Ehkeh'lior :porluh ken 'weh. :Juda' no :Yusu'-a'a: bo :na-nyor:⧾ :on :korn-a :bhue: 'yor :ne-a 'sororn', an-a' nyor :due'.

⁴'De or mu 'de Nyorsoa-a' 'slaa: :za-nyor:⧾ :klaba'⧾-: 'dekorn: Nyorsoa-a' 'sla-a' :poli'si-a' nyor⧾ :klaba'⧾-: bo, 'de on :ne or polo: dhih, :ka or mu-a :Yusu'-a' plo-a' :no, 'de on bo, on 'ye-eh' yubo:.

⁵:Yee' an-a' :porluh⧾ 'pehn-: dih, 'de on 'worn-dih-eh ken dih, on 'ye-or' 'wlii 'nyi, 'do eh-a' no-a' bo.

⁶:Juda' 'worn-dih-eh', or 'ye-eh' no. :Yee' or 'bhorn :ka or 'ye-a' no, 'de or 'ye-a :Yusu' 'kwla :za 'de on bo, :mor :gwlor-nyor:⧾ :dhulu' se 'o :ne.

⁷:Yee' Se 'vu-bhlee-a' gor-a' 'we-eh nyni 'o 'weh, :eh :korn-a ken 'Meh-a' :bla-dih: 'dlu dih-gor-a' 'blae'-yu :korn eh 'ye-a' 'meh-dih:.

⁸'Do 'we-eh: :dao' 'di, :yee' :Yusu' dbo :Piteh'-: 'dekorn: :Jororn'-: or 'dhu-uh wlu 'worn, or 'dae:, A mu, a 'ye 'Meh-a' :bla-dih: 'dlu dih-gor-a' dii-deh⧾ 'kpa po, 'do :a bo.

⁹:Yeh or 'da :ao', :yee' on dhele-or-: dih, on 'da, Dha :an 'bhorn, :a 'ye dii-deh⧾ 'kpa :po-dih: 'da mu :eh?

¹⁰:Yeh on dhele-or dih, :yee' or 'da, A :gbee'e:. :Mor a 'si 'o :gwlor-' dih, :yee' 'yu :due' :or kpa-a :yabe :eh :ne-a 'ni 'di, or :ne a mu 'gbon-dih:. :Yee' a zi 'o or klei'. 'Gbu or mu-a 'di :pa, 'do :wor a 'ye pa.

¹¹:Yee' :mor a :yeh-dih: 'yu :or :korn-a 'gbu ken, :yee' a zela-or :gwluhuh', a 'dae:, :A-a'a: nyor⧾ deh :torne-nyor 'dae:, Dha :chuu: or :ne or-a'a: bo :na-nyor⧾ 'ye-a' 'Meh-a' :bla-dih: 'dlu dih-gor-a' deh 'di :di-dih:, on :ne :eh?

¹²:Mor a dhele-or dih, :yee' or mu a :chuu: :klaba' :on :ne-a 'de 'gbu :dao', an-a' yai' a-uh :torne:. :Dhe-da :po-eh: 'kpa 'weh 'de mor. 'Do :wor a 'ye :a-a'a: dii-deh⧾ 'kpa :po-dih:.

¹³:Yeh or 'da :ao', :yee' on mu-', 'de on 'ye deh⧾-a' klehkpeh :ka or no-a eh-a' :za-a', 'de on po 'Meh-a' :bla-dih: 'dlu dih-gor-a' dii-deh⧾ 'kpa.

¹⁴:Yeh ti nyni-a 'o, nyor⧾ 'ye-a 'Meh-a' :bla-dih: 'dlu dih-gor-a' deh di, :yee' :Yusu'-: 'dekorn: or-a'a: dboo-nyor⧾-: mo-: :an di-dih deh :dha :due'.

¹⁵:Yeh an di-a deh, :yee' or :wlu-' 'de on bo, or 'dae:, 'On 'duo: eh-a' :gwluhuh' dih :na-dih-eh 'weh see, :eh :mor a-: 'mor-: :a 'ye 'Meh-a' :bla-dih: 'dlu dih-gor: :daa, or-a' deh :dha :due' :di-dih: :gbor :gbor, 'de jorwor: 'on 'ye 'kle 'ye.

¹⁶'An zela a :gwluhuh', 'on :se-' 'Meh-a' :bla-dih: 'dlu dih-gor-a' deh :di i :neheh', 'de deh eh 'dhu-eh:-', eh 'ye gbor :za-eh: deh 'jeh, 'do :dha Nyorsoa-a mu-a nyor⧾ wlu 'ken :korn-dih:.

¹⁷:Yeh :Yusu' :za-a deh :daa-', :yee' or 'duo: 'korbuh, :on 'yi-a 'glee-nomor 'di 'weh, 'de or po Nyorsoa-a' 'zio, 'do on bo, 'de or :wlu 'de or-a'a: bo :na-nyor⧾ bo, or 'dae:, A 'duo: 'glee-nomor :or :ne-a 'de on 'di, a 'ye-or' 'na, a 'ye ken :tba-dih:.

¹⁸'An zela a :gwluhuh', 'on :se-' 'glee-nomor 'na-: i :neheh', 'de Nyorsoa-a' nyor⧾ wlu 'ken :korn-eh 'ye 'de yi.

¹⁹:Yeh or no :ao', :yee' or 'duo: 'bhlee: :kpuan'-' 'weh, or po Nyorsoa-a' 'zio 'do eh bo, 'de or :chehn-dih-eh dih, 'de or 'kwa, or 'nyi-eh or-a'a: bo :na-nyor⧾, or 'da, 'Bhlee: :daa, 'an yau: [:on :za-dih-eh 'slaa 'do a-a' dhih bo, mo-: 'o. A di-eh, 'do 'an dhih-a' :gwluhuh' bo :po-dih-eh bo.

²⁰'De :ka :ne-a :due' 'di, :yeh on gweh-a 'gwie-deh: :daa, eh-a' di-a' 'i, :yee' or 'duo: 'korbuh :on 'yi-a 'glee-nomor 'di 'weh, or 'da, 'Korbuh :daa, on no kuo :dele' 'do a mor-: 'dekorn: Nyorsoa-: 'nyne bo. :Yee' 'an nyomor-a' dih 'wla-eh 'do a-a' dhih bo, eh-: mu kuo :dao' 'kpih 'ken :po.]

²¹Jorwor: a :gbee'e:. Nyor :or mu-a 'on :plo, a :mor :ne 'an 'gba-a, a-a' nyor :due' :oo'.

²²'Yu an 'da-dih-a Nyor-kpalu-a' 'yu-a mu 'meh-: :mloror' :kpeheh:, :ka Nyorsoa no-a eh-a' 'dhu-a', jorwor: 'chlo 'do nyor :or mu-or :plo bo.

²³:Yeh or 'da :ao', :yee' on 'kpa 'o an-a' 'jeh dih dhele: 'da 'weh, 'de an-a' 'jeh 'nyne-', 'de on 'ye nyor :or mu-eh :no yubo:.

²⁴:Yeh ti :zi-dih:-a 'o ken dih, :yee' :Yusu'-a'a: bo :na-nyor⧾ 'kpa :dha :due', 'de on 'kpa 'o dhobo: 'da, 'de an-a' 'jeh 'nyne-', nyor :or mu-a nyor :klaba'-' 'dhu-eh 'de on 'nyne-'.

²⁵:Yeh an no :ao', :yee' :Yusu' :wlu-' 'de on bo, or 'dae:, Nyor⧾ :on se-a Nyorsoa yubo:, an-a' 'keen-boi'-a kpa-dih-uh 'kpih. :Mor on :taa :ao' an-a' dhih no, :yee' on 'da deh 'jeh :oo' an no, 'do on bo.

²⁶Jorwor: eh se :korn eh 'ye :ao' :ne, 'noror a 'klu-'. A 'nyi nyor :or no-a nyor :klaba' 'noror a 'klu-', or :ya or-a' 'jeh ya, or 'ye 'yu-yu-a' 'yu-yu gweh. :Yee' a 'nyi nyor⧾ wlu 'ken :korn-nyor gweh 'bhoi-yu 'noror a 'klu-'.

²⁷:Yeh or :za-a deh :daa-', :yee' or dhele-uh-: dih, or 'da, :Yoror :or 'dhu nyor :klaba' :eh? :Yor :or di-a deh :e? :Ae' :yor :or kpa-a nyor :or di-a deh :bale'-'? Eh :se nyor :or di-a deh, or-: :se nyor :klaba' :e? Jorwor: 'mor :or :ne-a 'noror a 'klu-', 'on gweh nyor :bale'-' :kpa-nyor:.

²⁸A :mor :mloror', a :se 'o 'on klei' 'wluh :chio'lo:, 'de 'on :yi-dih: 'de 'an 'kle 'ye-eh-a' klehkpeh 'di.

²⁹:Ka 'On-ba no-a, 'de or 'nyi-a 'on 'kpih 'on 'ye-a or-a'a: nyor⧾ wlu 'ken :korn, 'ka-: 'on no a-a' 'kpih 'nyi-eh :ke, a 'ye or-a'a: nyor⧾ wlu 'ken :korn,

³⁰'de :a 'ye son⧾ ybei' kpuhba:, 'do :dha 'an mu-a nyor⧾ wlu 'ken :korn-dih:. 'De mor, a 'ye 'o 'keen :kpala'⧾ ken dih :dhe, a 'ye 'cheh-dlu⧾-a' :bhue: 'yor 'sororn' :on no-a 'Ezlea-nyor⧾ wlu 'ken :korn.

³¹:Yee' :Yusu'-a wlu-' :chio'lo:, or 'dae:, Samor', Samor', :to :dou'⧾, 'ku-a 'bhorn on 'ye a-' vun, :eh gweh-a :ka nyor vun-a deh⧾-yor-' 'de 'daba 'di, 'de Nyorsoa 'worn-dih-eh ken dih.

³²Jorwor: Samor', 'on bale: Nyorsoa 'weh 'do :an-a' dhih bo, 'de :on :ne-' 'an dhih 'jeh-' :po-eh dih 'tali:. :Yee' :mor :on 'bili: 'noror 'on bo :neheh', :yee' 'kpa :an-a' Nyorsoa :de-di'-boi' bo, 'de an-a' dhih 'jeh-' :po-eh 'ye dih ku.

³³'De :Piteh' 'da, :Gwlor :baa', 'on 'worn-dih-eh', mor-: 'mor-: :a 'ye :kasue 'di :dha :due' :mu-dih:, :mor eh 'dhu 'meh-a', :a 'ye :dha :due' 'meh-dih:.

³⁴'De :Yusu' 'da, 'An zela :on :gwluhuh', :Piteh', :mor :soan'-beor 'ye zlo 'zean', :an mu 'an dhih-' dhobo:, :on 'ye kpor⧾ taan no, :an mu :ao', :on se 'on yubo:.

³⁵:Yee' :Yusu' :wlu-' 'de on bo :neheh', or 'dae:, Ti 'on dbo a-uh, a 'ye-a Nyorsoa-a' tubo-wlu⧾ po, 'de 'on no-a, a-a' :kpa-' 'wlii-: 'tiei 'di :po :gleu'-: 'dekorn: :buhbuh⧾-: :yeh 'on 'da :ao', 'de a mu-a 'de, :yee' deh :yeheh :eh :korn 'kle a 'ye 'de mor :eh? :Yeh or dhele-uh-a dih, :yee' on 'dae:, :A :se-' deh-' 'kle 'ye. Deh⧾-a' klehkpeh :a :korn :a 'ye-a 'ble, :a 'ye-ih'.

³⁶:Yeh on 'da :ao', :yee' or :wlu-' 'de on bo, or 'dae:, :Kana :naa, :mor a 'ble 'wlii-: 'dekorn: 'tiei 'di :po :gleu'-: :yee' a kpa-ih. 'De mor, :mor a se :bhla 'jlehn 'ble, :yee' a plo a-a'a: 'korlor⧾, a 'ye :due' dhen.

³⁷:Yee' 'an zela a :gwluhuh', deh :eh 'chle-eh 'de Nyorsoa-a' 'chlee-deh 'di, eh :korn eh 'ye dhih 'jeh-' 'kpa 'do 'on 'bhun :gbor :gbor, :eh no-a, Or :zlo-dih-eh: deh⧾-zon:⧾ :no-nyor:⧾. Keen', deh :eh 'chle-eh 'do 'on 'bhun, eh yi dhih 'jeh-' 'kpa 'da :naa.

³⁸:Yeh or 'da :ao', :yee' or-a'a: bo :na-nyor⧾ 'dae:, :Gbee'e:, :Gwlor :baa'. :Bhla 'jlehn⧾ 'sororn' :wor :dhe dih. 'De or 'da, En :dhie: 'i. 'Ka-: eh 'ye :ne.

³⁹:Yeh eh no :ao', :yee' :Yusu' 'wluh 'o :gwlor-' 'weh, 'de or mu 'de 'Orle-tluh ken, :eh or no-a 'do ti-a' klehkpeh bo. 'De or-a'a: bo :na-nyor⧾ zi 'o or klei'.

⁴⁰:Yeh or 'si-a 'de dih, :yee' or :wlu-' 'de on bo, or 'dae:, A :wlu 'de Nyorsoa bo, 'de dih 'dhen-eh: :ne-' a gla :za.

⁴¹:Yeh or 'da :ao', :yee' or :tehn-dih-uh bo dih :weh-beh:, or chehn kpor, 'do :dha :mor nyor po sobu', or-a' son 'beh-dih:-a on 'ye-a' nyni, 'do :wor or mu, or bla 'koor-dlu⧾ 'yi glu, 'de or :wlu 'de Nyorsoa bo, or 'dae:,

⁴²'On-ba:, :mor eh 'dhu :on 'worn-dih-eh ken dih, :yee' :za 'on 'kle 'ye-eh-a' 'korbuh :daa 'kwa. Eh :se 'an ken dih 'worn-dih-deh:, jorwor: :an-a' ken dih 'worn-dih-deh:, eh-: 'ye 'dlu bo mu. [

⁴³:Yeh or 'da :ao', :yee' 'enjor :due' :or 'wluh-a 'de Nyorsoa 'bli yai', or-: 'nyi-or 'kpih.

⁴⁴:Ka or-a' :porluh-a 'beh-dih-or 'worn dih 'gabaa, eh-: no-eh, 'de or :wlu 'de Nyorsoa bo 'gabaa, eh :zi 'o ken dih. Eh-: no-eh, 'de zuu: :on 'wluh-or, 'de :on 'kpa-a 'o 'bluhbor, on gweh nyomor.]

⁴⁵:Yeh or gweh-a 'de Nyorsoa bo :wlu-eh 'i, 'de or :sorn-a-', :yee' or mu 'de or-a'a: bo :na-nyor⧾ bo-: de, 'de or :yeh-dih-uh 'mo 'da, deh no-eh, an-a' :porluh⧾ 'kpa-: 'zorn. Eh-: no-eh, 'de on sea 'gabaa.

⁴⁶'De or za-uh 'nyinor-', or 'dae:, :Eh :korn dhih, a 'mo :eh? A :sorn-', a 'ye 'de Nyorsoa bo :wlu, 'de dih 'dhen-eh: :ne-' a gla :za.

⁴⁷:Yee' :yeh :Yusu'-a wlu-a :chio'lo:, :yee' :gwlor-nyor:⧾ :doru', mo-: 'si dih, 'de 'yu an 'da-dih-a :Juda', :or no-a or-a'a: bo :na-nyor:⧾ :on :korn-a :bhue: 'yor :ne-a 'sororn', an-a' nyor :due', or-: :korn 'de an-a' ybei'. 'De or 'koan'-dih: :Yusu' dih, or 'ye 'de or :bhluun'⧾-' 'kpa.

⁴⁸:Yeh or 'kpa-a 'de or :bhluun'⧾-', :yee' :Yusu' :wlu-' 'de or bo, or 'dae:, :Juda', :an plo 'yu an 'da-dih-a Nyor-kpalu-a' 'yu 'weh, 'do or-a' :bhluun'⧾-' 'kpa-eh bo :e?

⁴⁹:Yeh :Yusu'-a'a: bo :na-nyor⧾ pobo-eh ya, :yee' on dhele-or-: dih, on 'da, :Gwlor :baa', :a po :a-a'a: :bhla 'jlehn⧾ :e?

⁵⁰:Yeh on 'da :ao', :yee' an-a' nyor :due' po or-a'a: :bhla 'jlehn 'weh, 'de or chehn 'o Nyorsoa-a' 'slaa: :za-nyor⧾-a' nyor :klaba'-a'a: 'bhoi-yu-a' :dila-dou'.

⁵¹Jorwor: :Yusu' :wlu-' 'de or bo, or 'dae:, :An-a' :no-' deh :daa, eh 'be :neheh' o. :Yeh or 'da :ao', :yee' or 'tuh 'yu-a' :dou'-: dih, 'de or 'bor-dih-uh.

⁵²:Yee' or dhele: Nyorsoa-a' 'slaa: :za-nyor:⧾ :klaba'⧾-: Nyorsoa-a' 'sla-a' :poli'si-a' nyor⧾ :klaba'⧾-: 'dekorn: 'bluhba: :korn-nyor⧾-: dih, :on yi-or dih 'bhorn 'da, or 'da, :Bhla 'jlehn⧾-: 'dekorn: tu⧾-: me-: a 'ble, 'de a yi 'on kpon 'da, :eh gweh-a :ka nyor :or yi-a 'ylii'-nyor: :kpon 'da :e?

⁵³Zorn 'o zorn, 'on :ne 'de a bo 'weh, 'do Nyorsoa-a' 'sla ybei', 'de a-a' nyor :se-' 'on son 'bhun po. Jorwor: a-a'a: ti :oo', :en :dhe dih :naa, 'de eh no 'ku :on :korn-a :kule wlu 'ken, an-a' ti.

⁵⁴:Yeh :Yusu' 'da :ao', :yee' on kpon-or', 'de an kpa-or 'de Nyorsoa-a' 'slaa: :za-nyor⧾-a' nyor :klaba' 'bli 'gbu. :Yeh an mu-a, :yee' :Piteh'-a na-uh-: 'de :peh :peh, jorwor: or :se-uh' dih 'koan'-dih:, or :tehn-dih-uh bo dih.

⁵⁵:Yeh on :yeh-dih:-a 'gbu ken, :yee' on dhba neh 'do on ybei', 'de on :dhe dih 'do neh 'i. 'De :Piteh' yi 'o on 'bhun, 'de or :dhe dih :ke.

⁵⁶:Yee' Nyorsoa-a' 'slaa: :za-nyor⧾-a' nyor :klaba'-a'a: 'bhoi-yu :due', :or no-a 'nynor-kpao'-yu, or-: 'ye :Piteh', or :dhe dih 'do neh worn 'i, 'de or pobo-or ya 'dhuan, or 'da, 'Yu :daa, or na :Yusu' bo :dee'.

⁵⁷Jorwor: or dhobo-ih' 'weh, or 'dae:, 'Nynor, 'on se-or yubo:.

⁵⁸:Yeh ti-bei :zi-dih:-a 'o ken dih, :yee' nyor :noror' 'ye-or' :ke, or 'da, :Mor, an-a' nyor :due' :oo' :ke. :Yee' :Piteh' 'da, 'On 'be, 'on :se an-a' nyor.

⁵⁹:Yeh 'yluh-buh :due' zi-a, :yee' nyor :noror' :noror' yi-: 'de :neheh', or 'da, Dhih 'jeh, 'yu :daa, or :ne :Yusu'-a na-dih :dha :due' :dee'. Deh no-eh, or no :Galali'i-yu:.

⁶⁰:Yee' :Piteh' 'dae: :neheh', 'On 'be, deh :an za-a-', 'on se-eh 'i yubo:. :Yee' :yeh or 'si-a 'o :wlu 'da, :yee' 'do :dha :due' :dao', :soan'-beor zlo-'.

⁶¹:Yeh :soan'-beor zlo-a, :yee' :Gwlor :baa' 'bili:-'-: dih, 'de or pobo: :Piteh' ya. :Yee' :Piteh' :po-dih: dhih :Gwlor :baa' :za-a-' :gwluhuh' bo, or no-a, :Mor :soan'-beor 'ye zlo 'zean', :an mu 'an dhih-' dhobo:, 'do kpor⧾ taan 'di.

⁶²:Yee' :Piteh' 'si-: 'zorn, 'de or 'vin 'gabaa.

⁶³:Yee' nyor⧾ :an 'dhu-a :Yusu' 'yli-eh bo, an 'wluh-dih-or :goba'-dhih ken dih, 'de an bla-or.

⁶⁴'De on bla-or deh 'yli ken, on 'da, Po gban-wlu⧾ 'noror :a bo. :Eh zi :eh zi :eh? :Or tba :on deh :eh?

⁶⁵'De on :za deh⧾ :dhulu' worn 'i dih, :en no-a 'jlei.

⁶⁶:Yeh zorn zen-a, :yee' :Jueh'-nyor⧾-a' 'bluhba: :korn-nyor⧾-: Nyorsoa-a' 'slaa: :za-nyor:⧾ :klaba'⧾-: 'dekorn: nyor⧾ 'tele' :torne-nyor⧾-: :yee' on 'kpa :dha :due', 'de on :ya 'de :Yusu' 'do on ybei', on 'dae:,

⁶⁷Zela: :a :gwluhuh', :mor 'o :or 'dhu Nyorsoa-a' 'taan'-yu-' :e? 'De :Yusu' 'da, :Mor 'on zela: a :gwluhuh', a :se-' 'on dhih 'jeh-' :po i.

⁶⁸'De mor, :mor eh 'dhu, 'on dhele: a dih, a :se-' :wlu i.

⁶⁹Jorwor: :eh 'wluh-a dha 'zean'-zorn: :daa 'bli, 'yu an 'da-dih-a Nyor-kpalu-a' 'yu-a mu dih :dhe, 'do 'kpih :korn-Nyorsoa-a' :dila-son bo.

⁷⁰:Yeh or 'da :ao', :yee' an-a' klehkpeh, on dhele-or-: dih, on 'da, :Yee' :mor Nyorsoa-a' 'Yu :oo' 'da :e? 'De or 'da, Eh-: 'o, a-a' 'yor-eh: a za-a-'.

⁷¹'De on 'da, :Eh :korn dhih, 'de :a 'bhorn dhih ken dih zela-nyor:⧾ :noo' :neheh' :eh? :A-a' 'jeh 'yor-eh:, :a 'worn-eh', 'de or-a' 'yor-eh 'worn.