Read Eastern Krahn Lu 24 Bible Online

Lu 24 - Eastern Krahn bible

Lu 24

¹:Yee' 'doror'-dlu-a' :zai'-we-eh: an 'da-dih-a 'Sorle, 'do eh-a' zorn bo-mlai'-we-eh 'di, :yee' 'nynor⧾ :dao', deh⧾ :dao' :en po-a 'no 'jeh no, on po-a 'kpa, me-: on kpa, 'de on mu 'de :Yusu'-a' nma-dih-deh bo.

²:Yeh on nyni-a 'o, :yee' on 'ye-eh' :ka sobu' klibo:-a, on 'wluh-a 'o eh worn 'i.

³Jorwor: :yeh on pa-a 'de, :yee' on :se-' :Gwlor :baa' :Yusu'-a' 'ku 'ye 'de mor.

⁴:Ka an 'chihleh-eh 'i, :yee' 'yli :a bla-a 'i, on 'ye nyor⧾-kpalu⧾ 'sororn', mo-: :nyna 'o on 'bhun dih, :on :korn paa-tiei-a chleh 'yli-', :eh gweh-a dhehn 'i.

⁵:Yeh 'nynor⧾ :dao', on 'ye-uh'-a, :yee' :fano-a: no-uh, 'de on 'jli dih 'do 'bluhbor. 'De nyor⧾-kpalu:⧾ :dao', on :wlu 'de on bo, on 'dae:, :Eh :korn dhih, 'de a 'bhorn 'kmo :ne-nyor dih, 'de 'meheh'-nyor⧾ 'klu-' :eh?

⁶Or se :daa :ne. Or :sorn-' 'weh. Ti or :ne-a 'de a bo, 'de :Galali'i-bluhba ken, deh or :za-a-', a :po-dih-eh :gwluhuh' bo,

⁷or no-a, 'Yu an 'da-dih-a Nyor-kpalu-a' 'yu, or :korn or 'ye 'kwla :za-eh: 'de deh⧾-zon:⧾ :no-nyor⧾ bo. 'De mor, or :korn or 'ye 'o tu 'i :kor-dih-eh:. :Yee' 'do 'we-eh-a' taan neh 'di, or mu-' :sorn.

⁸:Yeh on 'da :ao', :yee' 'nynor⧾ :dao', on :po-dih: dhih :Yusu' :za-a-' :gwluhuh' bo 'weh.

⁹:Yeh on 'wluh-a 'o nma-dih-deh worn 'i, 'de on nyni-a :gwlor-', :yee' on zela: :Yusu'-a'a: bo :na-nyor⧾-a' :bhue: 'yor-eh :ne-a :due'-: 'dekorn: nyor⧾-a' klehkpeh-: deh⧾-a' klehkpeh on 'ye-a :gwluhuh',

¹⁰:Mehle' :or 'wluh-a :Magala'-: :Joa'na-: :Mehle' :or no-a 'Jeen 'de-: 'dekorn: 'nynor⧾ :noo' :on :ne-a 'o on bo-: mo-: zela: :Yusu'-a'a: dboo-nyor⧾ deh⧾ :daa :gwluhuh'.

¹¹Jorwor: on :se-uh' dhih 'jeh-' po. On 'da :bobo-dhih: 'o, an za-a-'.

¹²Jorwor: :yeh :Piteh' 'worn-ih'-a, :yee' or :sorn-' 'weh, 'de or kpa ple-a' 'de nma-dih-deh worn 'i. :Yeh or nyni-a 'o eh bo, :yee' or 'jli-: dih, 'de or pobo: 'de eh 'di, or 'ye 'nena-ylii :due' 'klein'. :Yee' or mu-' :gwlor, 'de or 'chihleh-eh 'i, 'do or :porluh ken, 'do deh :eh :no-eh bo.

¹³'Do 'we-eh: :ne-a :due' 'di, :yee' nyor⧾ 'sororn' :an na-a :Yusu' bo, mo-: :an mu :gwlor an 'da-dih-a 'Imeyor 'di, :eh 'beh-dih: :eh 'ye-a' 'wluh :Julu'slehn, 'de mu 'o-a' tluh⧾ 'bor⧾ :meheh' 'sorn no.

¹⁴:Yeh an mu-a, :yee' an bla :manua: 'do deh⧾-a' klehkpeh :en :no-eh, en-' dhih bo.

¹⁵:Yeh an bla-a :manua, :yee' :Yusu'-a' 'jeh 'yor-eh-a yi-: 'de, 'de or 'kpa 'de on 'nyne-', 'de or :ne an na-dih :dha :due', an mu.

¹⁶On 'ye-or', jorwor: on se-or 'i yubo:.

¹⁷:Yeh eh no :ao', :yee' or dhele-uh-: dih, or 'da, :Eh :korn :manua a bla, 'de a na :gwie bo :eh? :Yeh or dhele-uh-a dih, :yee' on :nyna dih 'dhuan, 'de :wehlih: ka 'di.

¹⁸:Yee' an-a' nyor :due', an 'da-dih-a :Kleo'pa, or-: dhele-or dih, or 'da, :On :due' no nyor :or 'ti :daa :Julu'slehn, :or se deh⧾ :en mu-a 'dlu bo, dha 'we 'sororn' :daa 'di yubo: :e?

¹⁹:Yeh or 'da :ao', :yee' :Yusu' dhele-uh-: dih, or 'da, Deh 'i-deh:⧾ 'o :eh? :Yeh or 'da :ao', :yee' on 'dae:, :Yusu' :or 'wluh-a 'Nazla, or-a' dhih :oo'. Or no Nyorsoa-a' wele-eh: :po-nyor: :dee', 'de or-a' wlu-: 'dekorn: :koan-: en :ne 'kpih ken, 'do Nyorsoa-: 'dekorn: :gwlor-nyor⧾-a' klehkpeh-: ybei'.

²⁰Or-: Nyorsoa-a' 'slaa: :za-nyor:⧾ :klaba'⧾-: 'dekorn: :a-a'a: nyor⧾ wlu 'ken :korn-nyor⧾-: on :za 'kwla, 'de 'Wloon-nyor⧾ bo, on 'ye-or' wlu 'ken chehn, or 'ye 'meh. 'De on :kor-dih-or 'o tu 'i.

²¹Jorwor: :a :mor :mloror', :a dhe-eh-: :gwlii' :dee', :ka eh 'dhu-or mor-' :or mu-a 'Ezlea-bluhba zelie. 'De mor, :eh 'wluh-a 'o ti deh⧾ :daa en :no-dih-eh, eh-a' 'we-eh-a' taan neh :wor :dhe dih :naa.

²²'De mor :neheh' :ke, :a-a'a: 'nynor⧾-kpao'⧾ :noo', deh on :za-a-', eh-: 'ma-dih: 'de :a 'di dih. On mu 'de :Yusu'-a' nma-dih-deh bo :glaa'on zorn bo-mlai'.

²³Jorwor: on :se-' or-a' 'ku 'ye. 'De on 'yle, on zela: :a :gwluhuh', on 'da, an-a' 'yli-eh 'kpa deh 'i, 'de on 'ye 'enjor-nyor⧾, mo-: zela-uh :gwluhuh' :ka or :ne-a 'kmo-'.

²⁴:Yee' :a 'bei' :noo', mo-: mu 'de or-a' nma-dih-deh worn 'i :ke, 'de on 'ye-eh :ka :a-a'a: 'nynor⧾-kpao'⧾ no-a eh-a' :za-a' 'tene' :kpeen:. Jorwor: on :se-or' 'ye.

²⁵:Yeh on 'da :ao', :yee' or :wlu-' 'de on bo, or 'dae:, A :mor :daa :or 'ble-a :porluh :due', :or :korn-a :porluh:⧾ :kmu-a, 'do deh⧾-a' klehkpeh Nyorsoa-a' wele-eh: :po-nyor⧾ :za-a-', en-' dhih 'jeh-' :po-eh bo.

²⁶A se-eh yubo:, :ka Nyorsoa-a' 'taan'-yu :korn or 'ye-a deh⧾-a' klehkpeh :daa, en-' 'kle 'ye :gbor :gbor, 'de or 'ye-a dhih-a' 'i 'beh-a' 'ye 'de Nyorsoa 'bli yai' :e?

²⁷:Yeh or 'da :ao', :yee' or zela-eh ken dih 'weh, deh⧾-a' klehkpeh :en :za-eh 'do or 'bhun, :eh tba-a 'de :Mose'-a' 'chlee-deh bo dih, 'de :eh :yeh-dih:-a Nyorsoa-a' wele-eh: :po-nyor⧾-a' klehkpeh an-a' 'chlee-deh⧾ ken.

²⁸:Yeh an 'koan'-dih-a :gwlor an mu-a 'di 'de, :yee' :Yusu'-a mu-', :eh gweh-a :ka nyor :or zi-a :deh.

²⁹Jorwor: on 'neh-or ken 'gabaa, on 'da, :Dhe dih dha :a bo. Deh no-eh, glu-a yi gor 'da. :Yeh on za-or :gwie 'i, :yee' or :pa-dih: 'o on bo 'weh, or 'ye 'o on bo 'pehn.

³⁰:Yeh on pa-a, :yee' or :dhe dih 'do on bo, on 'ye deh di. :Yeh on :dhe-a dih, :yee' or 'duo: 'bhlee: :kpuan'-' 'weh, or po Nyorsoa-a' 'zio, 'de or :chehn-dih-eh dih 'de or 'kwa, or 'nyi-eh on, on 'ye-eh' di.

³¹:Yeh or no :ao', :yee' an-a' 'yli kan-dih: 'i 'weh, 'de on yubo-or 'i. Jorwor: 'do :dha :due' 'jeh :dao', or 'ma-dih: on 'yli 'weh.

³²:Yeh or no :ao', :yee' an 'chihleh-eh 'i, 'de an-a' 'jeh 'nyne-', an no, Ti or wlu-a 'de :a bo, 'de or zela-a :a Nyorsoa-a' 'chlee-deh⧾-a' dhih ken dih 'do :gwie 'i, :yee' 'mona-a :se-' :a dih 'yi-dih: :e?

³³:Yee' 'do :dha :due' 'jeh :dao', on :sorn-' 'weh, 'de on mu :Julu'slehn de. 'Do :wor on :yeh-dih: :Yusu'-a'a: bo :na-nyor⧾-a' :bhue: 'yor-eh :due', :on :sie:-a 'o-: 'dekorn: nyor⧾ :noo'-: ken.

³⁴:Yee' nyor⧾ on :yeh-dih:-a ken, on 'dae:, Keen' 'jeh ka. :Gwlor :baa' :sorn-' 'weh. Or 'wluh-dih: Samor'-: 'i.

³⁵:Yeh nyor⧾ :dao', on 'da :ao', :yee' on 'kpa 'o an-a' ne-a' :za 'da 'weh :ke, deh :eh :no-eh 'do :gwie 'i, 'de eh 'dhu-a ti :Yusu' :chehn-dih:-a 'bhlee dih 'de or 'kwa :weh, 'de an mu-or 'i yubo:.

³⁶:Yeh on 'si-a 'o deh :daa, eh-a' :za 'da, :yee' :Yusu'-a' 'jeh 'yor-eh 'wluh-dih-uh-: 'i, 'de or :nyna 'o on 'nyne-' dih, or 'dae:, :Porluh-a' dih 'pehn-eh: 'do a bo.

³⁷:Yee' on 'gele:-'-: dih, 'de :fano-a no-uh. Deh no-eh, :mor on :taa 'ye, :yee' on 'da 'meheh'-nyor-a' :zulu: 'o :dee', on 'ye.

³⁸'De or 'dae: 'de on bo, :Eh :korn dhih a 'beh-dih a-a' 'jeh 'worn dih :eh? 'De a-a' :porluh⧾-a dhobo :eh?

³⁹A pobo: 'noror 'on 'kwa-: 'dekorn: 'an buh⧾-: ya. 'An 'jeh 'yor-eh: 'o, :or :dhe dih. A 'tuh 'on dih, a 'ye-eh' 'ye. 'Meheh'-nyor-a' :zulu se 'pla⧾-: 'dekorn: 'kpa⧾-: 'ble, :ka a 'ye-a 'on, 'on :ne-a.

⁴⁰:Yeh or 'da :ao', :yee' or :to 'o or-a' :kola⧾-: 'dekorn: or-a' buh⧾-: on 'ye-ih' 'ye.

⁴¹Jorwor: on :se-eh' dhih 'jeh-' po 'gboror:. Deh no-eh, eh :florn-dih-uh-: worn, 'de eh 'yi-dih-uh 'mona dih. Eh-: no-eh, 'de or dhele-uh dih, or 'da, A 'ble deh 'do di-a' bo dha mor :e?

⁴²'De on 'nyi-or zimi-eh: on pi-a, eh-a' 'kplo.

⁴³'De or 'duo-eh', or di-eh 'do on ybei'.

⁴⁴:Yee' or 'da, Ti a-: 'mor-: :a :ne-a :dha :due', deh⧾ 'on zela: a :gwluhuh', me-: :dhe dih :naa, 'on no-a, Deh⧾-a' klehkpeh :en 'chle-eh 'do 'on 'bhun, 'de :Mose'-a' 'tele'-chlee-deh 'di-: 'de Nyorsoa-a' wele-eh: :po-nyor⧾-a' 'chlee-deh⧾ 'di-: 'dekorn: 'de :Saan'-chlee-deh 'di-: en :korn en 'ye dhih 'jeh-' 'kpa :gbor :gbor, :ka en no-a eh-a' :za-a'.

⁴⁵'De or kan-dih: an-a' deh-' dih 'worn-eh 'i, on 'ye Nyorsoa-a' 'chlee-deh dih 'worn deh 'jeh.

⁴⁶'De or 'da, Eh 'chle-eh:-' 'de Nyorsoa-a' 'chlee-deh 'di, eh 'da, Nyorsoa-a' 'taan'-yu-a mu 'kle 'ye-:, 'de or 'ye 'de nma-dih-deh 'di 'wluh, 'do 'we-eh-a' taan neh 'di.

⁴⁷:Yee' nyor⧾-a mu or-a' tubo-wlu⧾ :po, 'de 'dawor'⧾-dlu⧾-a' klehkpeh bo, 'de or-a' 'nyne 'di, :eh tba-a :Julu'slehn dih :chio'lo:, 'de :eh mu-a, 'de on 'ye nyor⧾ :gwluhuh' zela: on 'ye an-a' deh⧾-zon⧾ dih 'tali:, 'de on 'ye 'de Nyorsoa bo 'bili:, 'de or 'ye an-a' deh⧾-zon⧾-a' dhih bo 'ma-dih:.

⁴⁸A :mor mu nyor⧾ :gwluhuh' zela: 'do deh⧾ :daa, en-' dhih bo, deh no-eh, a :mor 'ye en-' dha.

⁴⁹Deh :korn-a wlu 'On-ba po-a :dhama'-', 'an mu-eh a bo :dbo. :Yee' eh-a' dhih, a :dhe :Julu'slehn dih :chio'lo:, 'kpih 'ye 'de Nyorsoa 'bli yai' 'wluh, en 'ye a 'nyi-eh:.

⁵⁰:Yeh :Yusu' gweh-a wlu-a' 'i, :yee' or za-uh 'o :gwlor-' 'weh, 'de on mu, on 'koan'-dih: :Behtani'i-gwlor dih :weh-beh:. :Yeh on nyni-a 'o, :yee' or :to or-a' son⧾ yai', 'de or po-uh :bhorlie' bo.

⁵¹:Yeh or 'si-a 'o an-a' :bhorlie' bo :po 'da, :yee' or 'wluh 'o on bo 'weh, 'de Nyorsoa 'duo-or', or kpa-or 'de or 'bli yai'.

⁵²'De on :za or-a' :weheh', on 'ble 'mona: :no-eh, on mu :Julu'slehn de.

⁵³'De an gweh-dih 'do Nyorsoa-a' 'sla ybei', 'de an po or-a' 'nyne ya 'do ti-a' klehkpeh bo.