Read Eastern Krahn Lu 3 Bible Online

Lu 3 - Eastern Krahn bible

Lu 3

¹:Yee' ti :Tabi'lor no-a 'keen 'do 'Wloon-nyor⧾-a' 'bluhba-a' klehkpeh ken, :yee' 'do or-a' zon⧾-a' :bhue: 'yor :mm' no 'di, 'do :wor 'Pantior: Pale' :no-dih: 'gomla-nyor⧾-a' nyor :klaba' 'de :Judi'a-bluhba ken, 'de :Hehlo' :korn :Galali'i-nyor⧾ wlu 'ken, 'de :Hehlo'-a' dei' Felor' :korn :Ituli'a-nyor⧾-: 'dekorn: :Tlakoni'ta-nyor⧾-: wlu 'ken, 'de :Lesa'lior :korn :Abili'i-nyor⧾ wlu 'ken. An-a' klehkpeh :daa, on :ne 'o :Tabi'lor 'zorn.

²:Yee' 'Aneh-: 'dekorn: :Kai'fa-: mo-: no Nyorsoa-a' 'slaa: :za-nyor:⧾ :klaba'⧾, 'do ti-a' 'jeh :dao' 'di. 'Do :wor Nyorsoa :wlu-dih: 'de :Jororn' :or no-a 'Zehkorwlaya'-a'a: 'yu bo, 'de :bhehneh'-bluhba ken.

³:Yeh Nyorsoa :wlu-a 'de or bo, :yee' or na 'bluhba⧾-a' klehkpeh ken dih, :en :ne-a 'Jorle-ni worn dih, or po Nyorsoa-a' tubo-wlu:⧾, or 'da, A 'tali: a-a' deh⧾-zon⧾ dih, a 'ye 'de Nyorsoa bo 'bili:, 'de a 'ye 'ni 'dlu :po, :yee' Nyorsoa-a mu a-a' deh⧾-zon⧾-a' dhih bo 'ma-dih:.

⁴:Ka Nyorsoa-a' wele-eh: :po-nyor: :Azaya' no-a eh-a' 'chle-a', 'de or-a'a: 'chlee-deh 'di, or 'da, Nyor :daa, or 'wor-' 'de :bhehneh'-bluhba ken, or 'dae:, A po :Gwlor :baa'-a' :gwie 'kpa 'do or bo o. A po or-a' :gwie 'kpa, a 'ye-eh' 'i 'sleh-dih:, or 'ye-eh' bo :na.

⁵'Jun⧾-a' klehkpeh, en mu 'yi-:, tluh⧾ :klaba'⧾-: 'dekorn: tluh⧾ :nyene'-: en-' klehkpeh, en mu dih :wa-dih-eh:, 'de en 'ye :gwluhuh' :tehn-dih:. :Gwie:⧾ :en 'kili-a-' dih, en mu 'yi 'sleh-dih-eh:, 'de :gwie:⧾ :en :nyni-a 'yi dih, en mu :noa' :noa' :ne.

⁶:Yee' :gwlor-nyor⧾-a' klehkpeh-a mu nyor⧾ 'puh-dih-nyor: Nyorsoa-a mu-a :dbo, 'ye-:.

⁷:Yee' nyor⧾ :doru', mo-: yi 'de :Jororn' bo, 'de :bhehneh'-bluhba ken, on 'ye 'ni 'dlu :po, 'de or :wlu 'de on bo, or 'dae:, A :mor sane-zon⧾-nynuu: :daa, :or 'dhu a 'slen, a 'ye ple, a 'ye Nyorsoa-a' 'chehn-yuba: :or yi-a 'de, 'zorn 'wluh-dih: :eh?

⁸A no deh⧾, nyor⧾ 'ye a 'ye, :ka a 'tali:-a a-a' deh⧾-zon⧾ dih, 'de a 'bili:-a-' dih 'de Nyorsoa bo. :Yee' a-a' :wlu-' 'de a-a' 'jeh 'nyne-', :eh :mor a :mor 'Eble'hehn 'di-a' 'nynuu: 'o, :dhih 'o, eh-: :korn dhih a mu 'puh-:. A 'nyi 'on zela: a :gwluhuh', Nyorsoa 'beh-dih: sobu'⧾ :kpuan'⧾ :daa en-' no-a' 'weh, en 'ye 'Eble'hehn 'di-a' 'nynuu-' 'dhu-eh:.

⁹:Dhoeh' :dhe-eh: yai' :naa, eh 'ye tu⧾ :en :se-a' 'bi 'jeh :tlo i, en-' glubuh⧾ chehn. Tu⧾-a' klehkpeh :en :se-a' 'bi 'jeh :tlo i, en mu :dba-eh:, 'de en 'ye 'de neh-' :po-eh:.

¹⁰:Yeh or 'da :ao', :yee' nyor⧾ :doru' :dao', on dhele-or-: dih, on 'da, :Yee' :kaa :a 'ye no :naa :eh?

¹¹'De or 'dae:, Nyor-beh: :or 'ble-a 'wla⧾ 'sororn', or :korn or 'ye nyor :or se-a 'wla 'ble, :due' 'nyi. 'De nyor-beh: :or 'ble-a dii-deh, or :korn or 'ye deh :ne-a :due' no :ke.

¹²:Yee' 'taa-deh:⧾ :za-nyor:⧾, mo-: yi 'o :Jororn' bo :ke, on 'ye 'ni 'dlu :po. Mo-: dhele-or dih, on 'da, Nyor⧾ deh :torne-nyor:, :kaa :a 'ye no :eh?

¹³'De or 'dae:, :Mor a :taa 'taa-deh⧾ za, :yee' a-a' :za-' 'wlii: :yih, on se-a a :gwluhuh' zela:, a 'ye-a :za.

¹⁴'De sorye' dhele-or dih :ke, on 'da, :Yee' :a :mor :mloror', :kaa :a 'ye no :ke :eh? :Yee' :Jororn' zela-uh-: :gwluhuh', or 'da, A-a' :kpa-dih:-' nyor⧾ 'kpih, 'de a-a' :za-uh' 'wlii 'kwa dih, 'de mor a-a' :po-uh' dhih 'dlu. 'Nyi a-a' :porluh⧾ 'pehn dih 'do 'wlii: an za-dih-a a geli'-' bo.

¹⁵:Yee' nyor⧾ :dhulu' :dao', on dhe-eh :gwlii', :ka :Jororn'-a mu-a deh :kolu' :no. 'De an-a' klehkpeh, an 'chihleh-eh 'i 'do on :porluh⧾ ken, :eh beh or-: Nyorsoa-a' 'taan'-yu: 'o :eh?

¹⁶'De :Jororn' :wlu 'de an-a' klehkpeh bo, or 'dae:, 'An po a 'ni 'dlu 'weh. Jorwor: nyor :or :korn-a dhih 'beh-a 'i, :or :zi-a 'o 'on-', or-: mu 'de :yi. 'On se deh-' 'dhu-eh:, 'on 'ye or-a'a: :buhbuh⧾-a' dubu'⧾ :sloror' bhehn-dih:. Gban 'i :ne :Zulu-: 'dekorn: neh-: me-: or mu 'o a 'dlu :po.

¹⁷Or 'ble or-a'a: 'daba: 'de or 'kwa, or 'ye deh⧾-yor: or sonor:-a, or-a' klehkpeh-' vun. :Yee' :yor or vun-a-', or mu-or :dha :due' :po, 'de or 'bli 'gbu-a' yai'. Jorwor: or-a' fluh⧾, me-: or mu 'yli :po, 'de neh-a' :yeh se-a 'mo-a' :korn.

¹⁸:Yee' :Jororn' po Nyorsoa-a' tubo-wlu:⧾ 'jeh, 'de :ka :dhulu' 'di. 'De or 'dhu-uh 'slen on 'ye an-a' deh⧾-zon⧾ dih 'tali:.

¹⁹:Yee' :yeh or zela:-a 'Keen :Hehlo' :gwluhuh', 'do deh or no-a, or :za-a or-a' dei' Felor'-a'a: 'nynor :Hehlo'dia or 'kwa, 'dekorn: deh⧾-zon⧾-a' klehkpeh :nee', or no-a-:

²⁰:yee' :Hehlo'-a' deh⧾-zon⧾ 'kpa 'de de dih, 'do :Jororn'-a' :kasue 'di :po-eh bo.

²¹:Yee' ti :Jororn' po-a nyor⧾-a' klehkpeh :dao' 'ni 'dlu, 'do :wor or :po-dih: :Yusu' 'ni 'dlu :ke. :Yeh :Yusu'-a wlu-a 'de Nyorsoa bo, :yee' yao kan-dih: worn.

²²:Yee' Gban 'i :ne :Zulu: :on gweh-a pabu', mo-: :dhe 'o or 'dlu dih. 'De wlu 'wluh 'de Nyorsoa 'bli yai', on 'dae:, :Mor no 'an-a: :dhih :kma-yu. 'An :porluh 'pehn-: dih 'do :on bo.

²³:Yee' ti :Yusu' 'dhu-a or-a'a: :koan glu, :yee' or 'beh-dih: or 'ye zon⧾-a' :kwlaa taan no. :Mor nyor⧾ :taa 'ye :dee', :yee' on 'da, 'Joseh: :or :Hehli'-a 'wluh-a, or-a'a: 'yu :oo'.

²⁴:Hehli' no 'Mata-a' 'yu. 'De 'Mata no 'Livae-a' 'yu. 'Livae no 'Mehki-a' 'yu. 'De 'Mehki-a' no 'Janai-a' 'yu. 'Janai no 'Joseh-a' 'yu.

²⁵'De 'Joseh no :Matati'a-a' 'yu. :Matati'a no 'Emor-a' 'yu. 'De 'Emor no 'Nea-a' 'yu. 'Nea no 'Ehsli-a' 'yu. 'De 'Ehsli no 'Naga-a' 'yu.

²⁶'Naga no 'Mea-a' 'yu. 'De 'Mea no :Matati'a-a' 'yu. :Matati'a no 'Sehme-a' 'yu. 'De 'Sehme no 'Josehn-a' 'yu. 'Josehn no 'Joda-a' 'yu.

²⁷'De 'Joda no :Joana'-a' 'yu. :Joana' no 'Wlisa-a' 'yu. 'De 'Wlisa no :Zowla'baba-a' 'yu. :Zowla'baba no :Sia'ti-a' 'yu. 'De :Sia'ti no 'Nili-a' 'yu.

²⁸'Nili no 'Mehki-a' 'yu. 'De 'Mehki no 'Adi-a' 'yu. 'Adi no 'Kosan-a' 'yu. 'De 'Kosan no :Ehma'na-a' 'yu. :Ehma'na no 'Eheh-a' 'yu.

²⁹'De 'Eheh no :Jasua'-a' 'yu. :Jasua' no 'Ehlie'za-a' 'yu. 'De 'Ehlie'za no 'Jowlan-a' 'yu. 'Jowlan no 'Mata-a' 'yu. 'De 'Mata no 'Livae-a' 'yu.

³⁰'Livae no 'Simior-a' 'yu. 'De 'Simior no 'Juda-a' 'yu. 'Juda no 'Joseh-a' 'yu. 'De 'Joseh no :Jona'ma-a' 'yu. :Jona'ma no :Ila'yaka-a' 'yu.

³¹'De :Ila'yaka no :Mehli'ya-a' 'yu. :Mehli'ya no 'Mena-a' 'yu. 'Mena no :Mata'ta-a' 'yu. 'De :Mata'ta no 'Netorn-a' 'yu. 'Netorn no :Debe'-a' 'yu.

³²'De :Debe' no 'Jehsi-a' 'yu. 'Jehsi no 'Obeh-a' 'yu. 'De 'Obeh no 'Bhoa-a' 'yu. 'Bhoa no 'Sala-a' 'yu. 'De 'Sala no 'Nasorn-a' 'yu.

³³'Nasorn no :Ami'nada-a' 'yu. 'De :Ami'nada no 'Ami-a' 'yu. 'Ami no 'Ani-a' 'yu. De 'Ani no 'Ehzola-a' 'yu. 'Ehzola no 'Pehleh-a' 'yu. 'De 'Pehleh no 'Juda-a' 'yu.

³⁴'Juda no 'Jekor-a' 'yu. 'De 'Jekor no Ase'-a' 'yu. Ase' no 'Eble'hehn-a' 'yu. 'De 'Eble'hehn no 'Tila-a' 'yu. 'Tila no 'Neor-a' 'yu.

³⁵'De 'Neor no 'Sehlu-a' 'yu. 'Sehlu no 'Wliu-a' 'yu. 'De 'Wliu no 'Pehli-a' 'yu. 'Pehli no 'Ibeh-a' 'yu. 'De 'Ibeh no 'Sila-a' 'yu.

³⁶'Sila no 'Kenor-a' 'yu. 'De 'Kenor no :Afa'sa-a' 'yu. :Afa'sa no 'Siehn-a' 'yu. 'De 'Siehn no :Noa'-a' 'yu. :Noa' no 'Lama-a' 'yu.

³⁷'De 'Lama no :Mehtu'sela-a' 'yu. :Mehtu'sela no 'Inor-a' 'yu. 'De 'Inor no 'Jehla-a' 'yu. 'Jehla no :Maha'lali-a' 'yu. 'De :Maha'lali no 'Kineh-a' 'yu.

³⁸'Kineh no 'Ehnor-a' 'yu. 'De 'Ehnor no 'Seheh-a' 'yu. 'Seheh no 'Adan-a' 'yu. 'De Nyorsoa no 'Adan.