Read Eastern Krahn Lu 4 Bible Online

Lu 4 - Eastern Krahn bible

Lu 4

¹:Yee' :yeh :Yusu' 'wluh-a 'o 'Jorle-ni worn, :yee' or 'yi-dih: Gban 'i :ne :Zulu-: dih. 'De :Zulu kpa-or 'de :bhehneh'-bluhba ken.

²'Do :wor 'ku 'dhen-dih-or-' dih, 'do 'we-a' :kwlaa :nyieh 'di, or 'ye deh-zon no. :Yee' 'do 'we :dao' 'di, or :se-' deh-beh worn 'dhen. :Yee' :yeh en :jla-a 'dlu-', :yee' 'moeh: no-or :blaa'a:.

³'De 'ku :wlu 'de or bo, on 'dae:, :Mor :on 'dhu Nyorsoa-a' 'Yu-', :yee' :wlu 'de sobu' :daa bo, on 'ye 'bhlee-' :za-dih:.

⁴'De :Yusu' 'dae:, Eh 'chle-eh:-' 'de Nyorsoa-a' 'chlee-deh 'di, eh 'da, :Gwlor-nyor se dii-deh :due'-a' 'kmo-' :ne-dih-eh 'beh-dih:.

⁵'De 'ku kpa-or 'de :dha :tehn-a ya. 'De 'yli :a bla-a 'i, on :torne-or 'bluhba⧾-dlu⧾-a' klehkpeh :en :ne-a dha yao 'zorn.

⁶'De on 'da, 'Bluhba⧾-dlu⧾-a' klehkpeh :daa-: 'dekorn: en-' 'yi dih :nmor-eh-: me-: 'an mu :on 'nyi-: :on 'ye wlu 'ken :korn. Deh no-eh, en 'nyi-eh: 'on 'weh. Eh-a' dhih, nyor 'an 'bhorn-a 'on 'ye-ih'-a 'nyi, or-: 'an mu-ih 'nyi-:.

⁷:Yee' :mor eh 'dhu, :on :za 'on :weheh', :yee' en-' klehkpeh :daa, en mu 'de :on bo :korn.

⁸'De :Yusu' 'da, Eh 'chle-eh:-' 'de Nyorsoa-a' 'chlee-deh 'di, eh 'da, :An-a' :Gwlor :baa' Nyorsoa, or-: :on 'ye :weheh' :za, :yee' or :due', or-: :korn 'bhoi-yu-deh: :on 'ye no.

⁹'De 'ku kpa-or 'de :Julu'slehn. 'De on :nyna-dih-or dih 'de Nyorsoa-a' 'sla-a' 'kpehehn 'i. 'De on 'da, :Mor :on 'dhu Nyorsoa-a' 'Yu-', :yee' po :an-a' 'jeh 'zorn.

¹⁰Deh no-eh, eh 'chle-eh:-' :neheh', eh 'da, Or mu or-a'a: 'enjor-nyor⧾ 'tele' 'nyi-: 'do :an-a' dhih bo, on 'ye :on 'yli-eh bo 'dhu.

¹¹'De on 'ye :on 'sa 'de on 'kwa, 'de :an-a' buh :ne-' sobu' 'i kor.

¹²'De :Yusu' 'da, Eh 'chle-eh:-', eh 'da, Nyor-a' 'dhen :an-a' :Gwlor :baa' Nyorsoa-' dih.

¹³:Yee' :yeh 'ku gweh-a :Yusu'-a' dih 'dhen-eh 'i, 'do deh⧾-a' klehkpeh :daa bo, :yee' on 'wluh 'o or klei' 'weh, 'do ti-kpor 'di.

¹⁴:Yee' :Yusu' mu 'de :Galali'i-bluhba ken-: de, 'de Nyorsoa-a' :Zulu-a' 'kpih 'di. :Yee' or-a' 'nyne gweh 'o 'do 'bluhba-a' 'for :dao', or-a' klehkpeh ken dih-: 'dlu.

¹⁵'De or torne nyor⧾ deh, 'de an-a' 'di :gweh-dih-sla⧾ 'zorn, 'de nyor⧾-a' klehkpeh, on po-or dhih bo.

¹⁶:Yee' :Yusu' mu 'de 'Nazla de, 'do :dha or :ku-dih:-a, 'de or pa 'de 'di :gweh-dih-sla 'zorn, 'do Nyorsoa-a' :gwlee-we-eh 'di, :ka or no-a 'do ti-a' klehkpeh bo. 'De or :nyna dih, or 'ye Nyorsoa-a' wlu zlo 'de mor.

¹⁷:Yeh or :nyna-a dih, :yee' on 'nyi-or Nyorsoa-a' wele-eh: :po-nyor: :Azaya'-a' 'chlee-deh:. 'De or kan-dih-eh 'i, or 'ye :dha eh-a' wlu 'chle-dih-eh:, :eh no-a,

¹⁸:Gwlor :baa'-a' :Zulu :ne 'o 'on ken 'weh. Deh no-eh, Nyorsoa 'tan 'on 'weh, 'on 'ye tubo-wlu:⧾ 'jeh po, 'de nyor⧾ :on se-a deh-' :za-da 'ble bo. Or dbo 'on 'weh, 'on 'ye wele-eh po, 'de :kasue-nyor⧾ bo, 'on 'ye :ao', A zelie-eh. 'De 'on 'ye wele-eh po, 'de 'doror'-nyor⧾ bo, 'on 'ye :ao', A 'ye dih. Or dbo 'on 'weh, 'on 'ye nyor⧾ an no-a dhih-', zelie:,

¹⁹'de 'on 'ye wele-eh po, :ka zon nyni-a 'o, :Gwlor :baa' 'ye-a or-a'a: nyor⧾ mla bo po.

²⁰:Yeh :Yusu' jla-a, :yee' or kan 'chlee-deh-: 'i, 'de or 'nyi-eh 'yu :or 'dhu-a deh⧾ 'yli-eh bo, 'de 'di :gweh-dih-sla: :dao' 'zorn de, 'de or :dhe dih. :Yee' nyor⧾-a' klehkpeh :on :ne-a 'o, an-a' 'yli-a 'wla 'de or ya.

²¹'De or :wlu 'de on bo, or 'dae:, 'Zean' :daa, Nyorsoa-a' 'chlee-deh-a' wlu :daa, on 'kpa-' dhih 'jeh, :ka a no-a eh-a' 'worn-a'.

²²:Yee' an-a' klehkpeh, an po-or dhih bo, 'de eh :florn-dih-uh worn, 'do wlu⧾ :nmaa'e: :en 'wluh-a 'de or 'worn, en-' dhih bo. 'De on 'da, Eh :se 'Joseh-a' 'yu :e?

²³'De or :wlu 'de on bo, or 'dae:, A mu 'dlan :daa :po, 'de 'on bo 'bla, a mu :ao', Kwein: :di-nyor:, 'puh-dih: :an-a' 'jeh. 'De a mu 'on :gwluhuh' zela:, a 'ye :ao', Deh⧾ :a 'worn-a :on no-a 'de :Kapa'nior, no-ih :ke dha :on 'bli :gwlor-'.

²⁴'De or 'dae: :neheh', Dhih 'jeh, 'an zela a :gwluhuh', eh se Nyorsoa-a' wele-eh: :po-nyor :korn on 'ye-a' dih kpon, 'de or 'bli :gwlor-'.

²⁵Dhih 'jeh, 'an zela a :gwluhuh', :dhoba: 'nynor⧾ :dhulu', mo-: :ne 'de 'Ezlea-bluhba ken, 'do :Ila'yor-a' ti 'i. Ti-a' 'jeh :dao', 'do :wor 'ni :se-' :dba-dih:, 'do zon⧾ taan 'chuh⧾ :meheh'lo 'di, 'de 'moeh: :eh 'kpa-a Ji Kou'-moeh, eh gweh 'o 'bluhba: :dao', or-a' klehkpeh ken 'dlu.

²⁶Jorwor: Nyorsoa :se-' :Ila'yor dbo, 'de 'Ezlea-nyor⧾-a' nyor-beh bo. Jorwor: or dbo-or 'de :dhoba: 'nynor :or :se-a :Jueh'-nynor, 'de :or 'ti-a :Zaleh'fa-gwlor 'di, :or 'koan'-dih:-a 'Saedorn-gwlor dih.

²⁷'De eh :korn nyor⧾ :dhulu', mo-: yau-zon-weh kpon, 'de 'Ezlea-bluhba ken, 'do Nyorsoa-a' wele-eh: :po-nyor: :Ila'seor-a' ti 'i :ke. Jorwor: an-a' nyor-beh se 'o 'puh-dih:, jorwor: 'Neama :due' :or 'wluh-a 'Silia-bluhba ken, or-: 'puh.

²⁸:Yee' :yeh on 'worn-a deh :Yusu' :za-a-', :yee' an-a' klehkpeh :on :ne-a 'de 'sla :dao' 'zorn, 'chehn 'dba-uh'.

²⁹'De on :sorn-', on no-or dih, 'de on za-or 'o gwlor worn 'i, on kpa-or 'o tluh 'dlu, 'do :dha an-a'a: gwlor :po-dih-eh, 'do 'jun 'dlu, 'de on 'ye-or' 'zorn po.

³⁰Jorwor: or :na, or :yi-dih: 'o on 'nyne-', 'de or mu.

³¹:Yee' :Yusu' mu 'de :Kapa'nior-gwlor 'di, 'de :Galali'i-bluhba ken. 'Do Nyorsoa-a' :gwlee-we-eh :due' 'di, :yee' or torne nyor⧾ deh.

³²Or-a' nyor⧾ deh :torne-eh :florn-dih: nyor⧾-a' klehkpeh-: worn, deh no-eh, or wlu-dih 'de 'kpih 'di.

³³:Yeh or torne-a nyor⧾ deh, :yee' 'yu :due', 'kwla 'ye-dih-deh-zon: :ne-a 'o 'de, or-: :ne 'de an-a' 'di :gweh-dih-sla 'zorn, :or 'wor, :or 'da,

³⁴Deh :an 'bhorn :on 'ye :a-uh' :no-dih: :eh? 'Wee'. :Yusu' :mor, :or 'wluh-a 'Nazla-gwlor 'di, :on yi-: 'de, :on 'ye :a-a' dhih dih gweh :e? :Mor :dao', 'on yubo: :on 'weh o. :Mor, Nyorsoa-a' gban 'i :ne-nyor: 'o o.

³⁵:Yeh or 'da :ao', :yee' :Yusu' po 'kwla 'ye-dih-deh: :dao' 'borboa' 'i, or 'da, No 'dhuan. 'Wluh 'o or 'de. :Yeh or 'da :ao', :yee' 'kwla 'ye-dih-deh du 'yu 'weh, 'do on ybei', 'de eh 'wluh 'o or 'de, eh :se-or' deh tba.

³⁶:Yeh eh 'wluh-a 'o or 'de, :yee' nyor⧾-a' klehkpeh :on :ne-a 'o, eh :florn-dih-uh-: worn. 'De an 'chihleh-eh 'i, an no, :Eh no 'de 'yu :daa, or-a' wlu no :ao' 'kpih ken :ne-eh :eh? :Mor or :wlu 'de 'kwla 'ye-dih-deh⧾ bo, :yee' en 'wluh 'o nyor⧾ 'de 'weh.

³⁷:Yeh eh no :ao', :yee' :Yusu'-a' 'nyne gweh 'bluhba: :dao', or-a' 'for-a' klehkpeh-: 'dlu.

³⁸:Yee' :Yusu' 'wluh 'de 'sla :dao' 'zorn 'weh, 'de or pa 'de Samor' 'bli 'gbu 'di. 'Do :wor on :wlu-dih: 'de :Yusu' bo, Samor'-a'a: 'bila-nynor: :chehbe'-a no-a, or-a' dhih.

³⁹:Yeh or 'worn-ih'-a, :yee' or nyna-or-: 'dlu, or po or-a' :chehbe' 'borboa' 'i, 'de eh 'bor. :Yee' 'do :dha :due' :dao', or :sorn-' 'weh, 'de or kpa-uh :bale'-'.

⁴⁰:Yee' :yeh 'yluh-a 'kpa-a 'nior, :yee' nyor⧾-a' klehkpeh :on 'ble-a nyor⧾ :on 'ble-a puhba-deh:⧾ 'doror: 'dor, on ya-uh 'de :Yusu' bo 'weh, 'de or tba an-a' klehkpeh son⧾ ken dih :due' :due', or 'puh-dih-uh.

⁴¹:Yeh or no-a deh :dao', :yee' 'kwla 'ye-dih-deh⧾ 'wluh 'o an-a' nyor⧾ :dhulu' 'de 'weh :ke, 'de en po 'geh⧾, en 'da, :Mor Nyorsoa-a' 'Yu :oo'. Jorwor: or po-ih 'borboa' 'i, or :se-' 'worn en :se-' :wlu. Deh no-eh, en yubo: :ka or 'dhu-a Nyorsoa-a' 'taan'-yu-' 'weh.

⁴²:Yeh zorn zen-a, :yee' :Yusu' mu 'de :dha nyor se-a :ne. :Yee' nyor⧾ :dhulu', mo-: :an 'bhorn-or 'kwla⧾-' dih. :Yeh on 'ye-or, :yee' an po 'de 'kpih, on 'ye-or' :gwie 'i :za.

⁴³Jorwor: or :wlu-' 'de on bo, or 'dae:, 'On :korn 'on 'ye tubo-wlu:⧾ 'jeh po, :en kor-a Nyorsoa-a' nyor⧾ wlu 'ken :korn-eh 'i, 'de :gwlor⧾ :neheh' 'di :ke. Deh no-eh, eh-: :korn dhih :oo', Nyorsoa dbo 'on.

⁴⁴:Yee' or kpa Nyorsoa-a' tubo-wlu:⧾ :po-eh 'dlu bo, 'de :Jueh'-nyor⧾-a' 'di :gweh-dih-sla⧾ 'zorn, 'de :Judi'a-bluhba ken.