Read Eastern Krahn Lu 5 Bible Online

Lu 5 - Eastern Krahn bible

Lu 5

¹Eh :korn 'we-eh :due', :yee' :Yusu' :nyna dih 'do :Gehneh'sla-yobo'-pehnu worn 'i, 'de nyor⧾ :dhulu' :gweh-dih-or 'dlu dih, on 'ye Nyorsoa-a' wlu 'worn.

²:Yee' or 'ye 'blagbe⧾ 'sororn' 'do 'kpuhba' 'i, :yih zimi: 'dba-nyor⧾ 'wluh-a 'de 'di, 'de an worlor-a an-a'a: sor⧾.

³'De or 'kpa 'de 'blagbe :due' 'di, :yeh :eh :korn-a 'de Samor' bo. :Yee' or dhele: Samor'-: dih, or 'ye-eh' ken :za-dih: :weh-beh: 'do 'ni ken. 'De :Yusu' :dhe dih 'de eh 'di, or torne nyor⧾ deh.

⁴:Yee' :yeh or gweh-a wlu-a' 'i, :yee' or :wlu-' 'de Samor' bo, or 'dae:, Kpa 'blagbe 'de 'ni-a' :wloo' :or :tehn-a-', mor-: 'dekorn: :on 'bei'-: a 'ye a-a'a: sor⧾ po, 'de a 'ye zimi kpon.

⁵:Yeh or 'da :ao', :yee' Samor' :wlu-' 'de or bo, or 'dae:, Nyor⧾ deh :torne-nyor:, :a no 'yi :kma :koan :no :noo: 'de :wala: :wala: zorn zen. Jorwor: :a :se-' deh-beh kpon. Jorwor: keen' :mloror', :ka :on 'da :ao', :yee' 'an mu sor⧾ :po :neheh'.

⁶:Yeh on po-a an-a'a: sor⧾, :yee' on kpon zimi: :dhulu'. Eh-: no-eh, 'de an-a'a: sor⧾ 'kpa :chlan-a' ken.

⁷:Yee' an po :jii: 'de on 'bei' :on :ne-a 'de 'blagbe: 'sluh 'di bo, on 'ye 'de on bo yi, on 'ye-uh' bo 'kpa. :Yeh on yi-a 'de, :yee' on 'yi-dih: 'blagbe:⧾ :en :ne-a 'sororn' 'weh. 'De en 'bhorn 'ni 'zorn :pa-eh.

⁸:Yeh Samor' :Piteh' 'ye-eh, :yee' or 'jli-: dih 'do :Yusu' 'zorn, or 'da, :Gwlor :baa', :tehn-dih: 'on bo dih. Deh no-eh, 'mor, deh⧾-zon:⧾ :no-nyor: 'o.

⁹Or :za deh :daa 'weh, deh no-eh, or-: 'dekorn: or 'bei'-a' klehkpeh-: an-a' :porluh⧾ 'ma-', 'do zimi: :dhulu' on kpon-a, 'do en-' deh bo.

¹⁰Samor' 'bei' :koan: :no-nyor:⧾ 'Jeen-: 'dekorn: :Jororn'-: :on no-a :Zehbehli'-a'a: 'nynuu, an-a' :porluh⧾ 'ma-' :ke. 'De :Yusu' 'dae: 'de Samor' bo, 'Bor :fano: :ple-eh. :Eh 'wluh-a dha 'zean' 'bli, :an mu nyor⧾ 'de Nyorsoa bo :ya, :ka :an no-a zimi: :kpon-eh :dee'.

¹¹:Yeh or 'da :ao', :yee' on 'ya-dih: an-a'a: 'blagbe⧾ 'kpuhbuh' 'weh. 'De on sie deh⧾-a' klehkpeh, on zi 'o or klei'.

¹²Eh :korn ti :due', :yee' :Yusu' mu 'o gwlor :due' 'di, 'do :dha 'yu :due', yau-zon-weh kpon-a, 'de eh gweh-or 'dlu, or :ne-a. :Yeh or 'ye-a :Yusu', :yee' or 'jli-: dih 'do or 'zorn, or bale-or, or 'da, :Gwlor :baa', :mor eh 'dhu, :on 'worn-dih-eh ken dih, :yee' :on 'beh-dih: 'an 'puh-dih-eh 'weh, 'de 'on :ne-' :kane' dih :ne :neheh'.

¹³:Yeh or no :ao', :yee' :Yusu' tba-or son ken dih, 'de or 'da, 'On 'worn-dih-eh'. 'Wluh :kane' dih. :Yee' 'do :dha :due' :dao', 'do :wor or-a' yau-zon-weh 'bor-dih:.

¹⁴'De :Yusu' 'dhu-or 'slen, or 'da, :An-a' zela:-' deh :daa nyor-beh :gwluhuh' o. Jorwor: mu, :on 'ye :an-a' 'jeh Nyorsoa-a' 'slaa: :za-nyor 'i :to-dih:. :Yee' kpa 'slaa: :za-dih-deh :ka :Mose'-a' 'tele' 'da-a, 'de nyor⧾-a' klehkpeh 'ye-eh' yubo: :ka :on 'puh-a.

¹⁵Jorwor: :Yusu'-a' 'nyne gweh deh⧾-a' klehkpeh-: 'dlu 'gboror:. Eh-: no-eh, 'de nyor⧾ :doru' yi 'de or bo, on 'ye or-a' wlu 'worn, 'de on 'ye 'puh-dih-eh: 'do an-a' puhba-deh⧾ bo.

¹⁶Jorwor: 'do kpor⧾ :dhulu' 'di, :Yusu'-a sie-uh'. 'De or mu 'de :bhehneh'-bluhba ken, or wlu 'de Nyorsoa bo 'de mor.

¹⁷Eh :korn 'we-eh :due', :yeh :Yusu'-a torne-a nyor⧾ deh, :yee' :Falasi'i-nyor⧾-: 'dekorn: nyor⧾ 'tele' :torne-nyor⧾-: :on 'wluh-a :Julu'slehn-: 'dekorn: gwlor⧾-a' klehkpeh :eh :ne-a 'de :Galali'i-bluhba ken dih-: 'dekorn: :Judi'a-bluhba ken dih-: mo-: :dhe dih. :Yee' :Gwlor :baa'-a' 'kpih :ne 'o :Yusu' bo 'weh, or 'ye nyor⧾-a' puhba-deh⧾ 'bor-dih:.

¹⁸:Yee' nyor⧾ :noo', mo-: :ya 'de or bo 'tiei-a' 'meheh'-yu :due', :or 'pehn-a dih 'do or-a'a: ken 'pehn-deh ken. An po 'de 'kpih, on 'ye-or' :pa-dih:, on 'ye-or' dih 'pehn-dih: 'do :Yusu' ybei'.

¹⁹Jorwor: :ka :gwlor-nyor⧾ :dhie:-a 'i, :yee' :ka on 'ye-a' no, 'de on 'ye-a' 'de 'yu :dao' 'de 'gbu :pa-dih:, :yee' ka se :ne. Eh-: no-eh, 'de on 'ya-dih-or 'de 'gbu 'dlu. 'De on chlan 'bie', on 'dhle-dih-or, 'do or-a'a: ken 'pehn-deh ken, 'de nyor⧾-a' gwea, 'do :Yusu' ybei'.

²⁰:Yeh :Yusu' 'ye-a an-a' dhih 'jeh-' :po-eh: :eh :ne-a 'de on 'di, :yee' or :wlu-' 'de or bo, or 'dae:, 'An 'yu, :an-a' deh⧾-zon⧾-a' dhih 'ma-dih-eh: bo.

²¹:Yee' :yeh nyor⧾ 'tele' :torne-nyor⧾-: 'dekorn: :Falasi'i-nyor⧾-: on 'worn-ih'-a, :yee' on 'kpa 'o an-a' 'jeh dih dhele: 'da 'weh, an no, Deh 'i-deh-nyor: 'o, :or :dhe dih, :or no :ao', :or 'kor-dih Nyorsoa-a' 'nyne :eh? Dha nyor 'wluh :or 'beh-dih: :or 'ye deh⧾-zon⧾-a' dhih bo 'ma-dih: :eh? Nyorsoa :due', or-: 'beh-dih-eh.

²²:Yee' :Yusu' yubo: deh an 'chihleh-eh 'i, 'do an-a' :porluh⧾ ken, 'de or :wlu 'de on bo, or 'dae:, :Eh no 'de a na-dih deh⧾ :daa :gwluhuh' dih 'suh :eh?

²³Eh :kma 'i nyor 'ye :ao' 'da, 'de 'tiei-a' 'meheh'-nyor bo, :eh :mor, :Sorn-', mu yai', :na, :on 'ye mu, :eh :zi 'o, :An-a' deh⧾-zon⧾-a' dhih 'ma-dih-eh: bo.

²⁴Jorwor: 'an mu-eh a :torne:, :ka 'yu an 'da-dih-a Nyor-kpalu-a' 'yu, or :korn-a 'kpih dha yao 'zorn, 'do deh⧾-zon⧾-a' dhih-a' bo 'ma-dih-eh bo. Eh-a' dhih, or :wlu-' 'de or bo, or 'dae:, 'An zela :on :gwluhuh', :sorn-', mu yai', 'duo: :an-a'a: ken 'pehn-deh-' :on 'ye 'de :on 'bli 'gbu mu.

²⁵:Yee' 'do :dha :due' :dao', 'yu :dao', or :sorn-' 'weh 'do on ybei'. Or 'duo: or-a'a: ken 'pehn-deh:, or 'pehn-a ken-', 'de or mu or 'bli, or po Nyorsoa-a' 'nyne ya.

²⁶:Yee' eh :florn-dih: an-a' klehkpeh-: worn, 'de an po Nyorsoa-a' 'nyne ya. 'De :fano-a: no-uh, an no, Deh⧾ :a 'see-a 'ye, me-: :a 'ye 'zean'.

²⁷:Yee' :yeh deh⧾ :daa, en zi-a, :yee' :Yusu' 'wluh 'o :gwlor-' 'weh, 'de or 'ye 'taa-deh:⧾ :za-yu :due', an 'da-dih-a 'Livae, or-: :dhe dih 'do :gbalie, :eh :korn-a 'zorn or za-dih-a 'taa-deh⧾. 'De :Yusu' :wlu 'de or bo, or 'dae:, Zi 'o 'on klei'.

²⁸'De 'Livae sie 'o deh⧾-a' klehkpeh, or :sorn-', or zi 'o or klei'.

²⁹Eh :korn 'we-eh :due', :yee' 'Livae 'da :Yusu' 'weh, 'de or 'bli 'gbu, on 'ye son⧾ ybei' kpuhba:. :Yee' 'taa-deh:⧾ :za-nyor:⧾ :dhulu'-: 'dekorn: nyor⧾ :noo'-: mo-: 'kpa :Yusu'-: 'dekorn: or-a'a: bo :na-nyor⧾-: bo, 'de an kpuhba son⧾ ybei'.

³⁰:Yee' :Falasi'i-nyor⧾-: 'dekorn: nyor⧾ 'tele' :torne-nyor:⧾ :on no-a :Falasi'i-nyor⧾ :ke-: mo-: :an jeh :Yusu'-a'a: bo :na-nyor⧾ 'bli, on 'da, :Eh no 'de a :ne, 'taa-deh:⧾ :za-nyor⧾-: deh⧾-zon:⧾ :no-nyor:⧾ :noo'-: a kpuhba son⧾ ybei' :eh?

³¹'De :Yusu' :wlu 'de on bo, or 'dae:, Nyor⧾ :on se-a puhba:, on se :korn on 'ye kwein: :di-nyor 'kwla⧾-' dih 'bhorn. Jorwor: nyor⧾ :an puhba-a, mo-: :korn :on 'ye kwein: :di-nyor 'kwla⧾-' dih 'bhorn.

³²'On :se 'de yi 'do 'yi 'sleh-nyor⧾-a' dhih bo. Jorwor: deh⧾-zon:⧾ :no-nyor:⧾, mo-: 'on yi 'da 'da, on 'ye an-a' deh⧾-zon⧾ dih 'tali:, 'de on 'ye 'de Nyorsoa bo 'bili:.

³³:Yee' nyor⧾ :dao', on :wlu-' 'de :Yusu' bo, on 'dae:, Nyor⧾ 'ni 'dlu :po :Jororn'-a'a: bo :na-nyor⧾-: 'dekorn: :Falasi'i-nyor⧾-a' no-: an pa 'suehn-', 'do kpor⧾ :dhulu' 'di, 'de an wlu 'de Nyorsoa bo. Jorwor: :an-a'a: bo :na-nyor⧾-a 'na-', 'de an di deh 'weh :chio'lo:.

³⁴:Yeh on dhele-or dih, :yee' or 'da, A se 'beh-dih: a 'ye-eh' no, 'de 'duhba:⧾ :on mu-a 'nynor nyina: :kpa-gor-', on 'ye 'suehn-' pa, ti 'nynor-a'a: yibeor :ne-a 'o on bo.

³⁵Jorwor: ti-a mu 'o :nyni yibeor-a mu 'o on ybei' :za-eh:. :Yee' 'do 'we :dao' 'di, an mu 'suehn-' :pa.

³⁶:Yee' :Yusu' po 'dlan 'de on bo, or 'dae:, 'De :ka :ne-a :due' 'di, nyor-a' chehn 'o 'wla :dele'-a' 'for, 'de or-a' 'pa 'wla soa. :Mor or no-eh, :yee' 'wla :dele'-a' 'for :se-' 'wla soa bo :mu-dih: i. :Yee' or 'kor-dih: 'wla :dele' :dao' yaa'e.

³⁷'De nyor-a' po nomor :dele' 'de :zolo-eh: :eh :no-dih-eh deh-ku: soa 'di. :Mor or no-eh, :yee' nomor :dele'-a mu-eh 'i :wa, 'de nomor 'ye dih 'wla, 'de deh-ku: :zolo-eh 'ye 'kor.

³⁸Jorwor: nomor :dele' :korn or 'ye 'de deh-ku-zolo-eh: :dele' 'di :po-eh:.

³⁹'De eh se nyor :korn, :mor or 'na nomor soa, 'de or 'ye nomor :dele' 'bhorn. Deh no-eh, or mu :ao', Nomor soa :nmor worn, or :zi 'o :dele' nor-'.