Read Eastern Krahn Lu 7 Bible Online

Lu 7 - Eastern Krahn bible

Lu 7

¹:Yee' :yeh :Yusu' jla-a 'do deh⧾ :daa or za-a-', 'de nyor⧾ :dao' bo, :yee' or mu 'de :Kapa'nior-gwlor-'.

²:Yee' sorye'-a' nyor :klaba' :due', or-: 'ble 'bhoi-yu, :or puhba-a, 'de :or 'bhorn-a 'meh-a'. 'Yu :daa, or no :dhih :kma-yu: 'do or bo.

³:Yeh sorye'-a' nyor :klaba' :dao', or 'worn-a :Yusu'-a' 'nyne, :yee' or dbo 'de :Jueh'-nyor⧾-a' 'bluhba: :korn-nyor:⧾ :noo', on 'ye-or' 'da, or 'ye 'de yi, or 'ye or-a'a: 'bhoi-yu 'puh-dih:.

⁴:Yeh on nyni-a 'o :Yusu' bo, :yee' on bale-or deh 'jeh, on 'da, Nyor-kpalu: :daa, or :bleh-dih-eh 'i, :on 'ye deh :daa no 'do or bo.

⁵Deh no-eh, or :ybeh :a-a' nyor⧾-' 'weh. 'De or po :a-a' 'di :gweh-dih-sla 'do :a bo.

⁶:Yeh on :za-a deh :dao', :yee' :Yusu' zi 'o on klei' 'weh. :Yee' :yeh an 'koan'-dih-a 'gbu dih, :yee' sorye'-a' nyor :klaba' :dao', or dbo or 'bei' :noo' 'de :Yusu' bo, on 'ye-or :gwluhuh' zela:, on 'ye :ao', :A 'be 'dae:, :Gwlor :baa', 'bor, :an-a' 'beh-dih:-' :an-a' 'jeh 'worn dih. Or 'da, or se-eh 'i :bleh-dih:, :on 'ye 'de or-a'a: 'gbu 'di pa.

⁷Or 'da, eh-: :korn dhih :oo', or :se-' or-a' 'jeh nyor 'da-dih:, or 'ye 'de :on bo yi :sloror'. Jorwor: dbo wlu 'suh, :yee' or-a'a: 'bhoi-yu-a mu 'puh-:.

⁸Or 'da, Or-a' 'jeh :ke, or-: nyor-kpalu: 'o, :or :ne-a 'o 'tele' 'zorn. 'De or 'ble 'kpih 'do sorye' :on :ne-a 'o or 'zorn ken. :Mor :yor or zela: :gwluhuh', Mu, :yee' :mloror' mu-'. :Yee' :mor :yor or 'da, 'Yle, :yee' :mloror' yi-: 'de. :Yee' :mor or 'da 'de or-a'a: 'bhoi-yu bo, No deh :daa, :yee' :mloror' no-eh'.

⁹:Yeh :Yusu' 'worn-a deh :daa, :yee' eh :florn-dih-or-: worn. 'De or 'bili:-' dih 'de nyor⧾ :doru' :an zi-a 'o or klei' bo, or 'dae:, 'An zela a :gwluhuh', 'on 'see eh-a' nyor 'ye, or 'ye dhih 'jeh-' :po-eh 'ble deh :dao', dha 'Ezlea-bluhba-a' 'jeh ken.

¹⁰:Yee' :yeh :yuh :on :dbo-eh, on mu-a 'de sorye'-a' nyor :klaba' 'bli 'gbu de, :yee' on :yeh-dih: 'bhoi-yu: :dao'-: ken, or 'puh-'.

¹¹:Yee' :yeh :Yusu' 'puh-dih:-a sorye'-a' nyor :klaba'-a' 'bhoi-yu, eh :se 'o :gwle, :yee' or mu 'de :gwlor an 'da-dih-a 'Nee 'di. Or-a'a: bo :na-nyor⧾-: 'dekorn: :gwlor-nyor:⧾ :doru'-: mo-: :ne or :mu-dih: :dha :due'.

¹²:Yeh an 'koan'-dih-a 'o :gwlor :dao'-a' gba-dih-gba worn 'i dih, :yee' 'do :dha :due' 'jeh :dao', 'yu :due' :or 'meh-a, or-: nyor⧾-a kpa-dih nma-dih: 'da. 'Yu :dao', or :due', or-: or 'de 'wluh. 'Nynor-a' 'jeh :dao', or-a'a: yibeor 'meh-'. :Yee' nyor⧾ :doru', :on 'wluh-a 'de :gwlor-', mo-: zi 'o or klei'.

¹³:Yeh :Gwlor :baa' 'ye-a 'nynor :dao', :yee' or-a' :wehlih 'kpa 'de or 'di 'weh. 'De or :wlu 'de or bo, or 'dae:, 'Bor 'vin-a'.

¹⁴'De or mu 'de, or 'tuh 'dali: on 'pehn-dih:-a 'ku ken dih, 'de nyor⧾ :an tele-uh-a, on :nyna dih. :Yeh on :nyna-a dih, 'de or :wlu 'de 'meheh'-ku: :dao' bo, or 'dae:, :Goba'-yu:, 'an zela :on :gwluhuh', :sorn-'.

¹⁵:Yeh or 'da :ao', :yee' 'yu :dao', or :dhe dih. 'De or 'kpa 'o :wlu 'da. 'De :Yusu' 'nyi-or or 'de :dele' ka.

¹⁶:Yeh or no :ao', :yee' :fano-a: no an-a' klehkpeh, 'de an 'nyi Nyorsoa-a' 'nyne dhih-a' 'i 'beh-a', on 'da, Nyorsoa-a' wele-eh: :po-nyor: :klaba' :oo', or-: 'wluh-dih: 'de :a 'nyne-'. 'De on :wlu :neheh', on 'dae:, Nyorsoa yi-: 'de, or 'ye or-a'a: nyor⧾-' :za-dih:.

¹⁷:Yee' :Yusu'-a' 'nyne :daa, en gweh :Judi'a-bluhba-a' klehkpeh-: 'dlu 'dekorn: 'bluhba:⧾ :en 'gela-or 'de dih :ke-:.

¹⁸:Yee' nyor⧾ 'ni 'dlu :po :Jororn'-a'a: bo :na-nyor⧾ zela-or deh⧾-a' klehkpeh :Yusu' no-a-: :gwluhuh'. :Yeh or 'worn-ih'-a, :yee' or 'da an-a' nyor⧾ 'sororn' 'do or bo.

¹⁹'De or dbo-uh 'de :Gwlor :baa' bo, on 'ye-or' dih dhele:, :eh beh or :oo' :or 'dhu nyor :or mu-a 'de :yi :eh? :Ae' :a :fuo: nyor :noror' 'ken ke?

²⁰:Yee' :yeh nyor⧾ :dao', on :yeh-dih:-a :Yusu' ken, :yee' on :wlu-' 'de or bo, on 'dae:, Nyor⧾ 'ni 'dlu :po :Jororn' dbo :a-uh 'noror :on bo, or 'dae:, :Mor 'o, :or 'dhu nyor :or mu-a 'de :yi :e? :Ae' :a :fuo: nyor :noror' 'ken ke?

²¹:Yee' 'do ti :dao' 'di, :Yusu' 'puh-dih: nyor⧾ :dhulu' :on 'ble-a puhba-deh⧾-: 'yaa'-deh⧾-: 'dekorn: :yuh 'kwla 'ye-dih-deh⧾ :ne-a 'o 'de-:. 'De nyor⧾ :dhulu' :on 'dor-a, 'de or no-eh, 'de an 'ye dih :ke.

²²Eh-a' dhih, or zela-uh-: :gwluhuh', or 'dae:, A mu deka. :Yee' a zela: :Jororn' :gwluhuh' deh⧾ a 'ye-a-: 'dekorn: deh⧾ a 'worn-a-:. 'Doror'-nyor⧾-a 'ye-: dih. 'De :kloror-nyor⧾-a na. 'De nyor⧾ yau-zon-weh kpon-a, an 'puh, 'de on :gweh :vlehehn'-' :ka :Mose'-a' 'tele' no-a mu-a'. 'De 'suun'-nyor⧾-a 'worn dih. 'De 'meheh'-nyor⧾-a sorn-'. 'De Nyorsoa-a' tubo-wlu:⧾ 'jeh-a po-eh 'de se deh-a' :za-da 'ble-nyor⧾ bo.

²³:Yee' :bhorlie' 'do nyor :or se-a 'an dhih-' dhobo:, 'do or :porluh ken.

²⁴:Yeh :Jororn'-a'a: dboo-nyor⧾ 'wluh-a 'o :Yusu' bo, :yee' :Yusu' 'kpa 'o :Jororn'-a' dhih :za 'da 'weh, 'de nyor⧾ :doru' :dao' bo, or 'dae:, Ti a mu-a 'de :Jororn' bo 'de :bhehneh'-bluhba ken, :yee' deh 'i-deh: a mu 'ye 'da :eh? A mu nyor :or gweh-a :peli'-gan: :pobor'-a bla-a, 'ye 'da :e?

²⁵:Mor eh se :ao' :ne, :yee' deh 'i-deh: a mu 'ye 'da 'de :bhehneh'-bluhba ken :eh? Nyor :or pa-a 'tiei: :nmaa'e-' :e? 'Kei:. Nyor⧾ :on pa-a 'tiei: :nmaa'e, 'de :on 'ble-a deh⧾-a' klehkpeh, :an di-dih-a deh 'worn, mo-: 'ti 'de 'keen-boi' 'bli 'sla⧾ ya.

²⁶:Yee' deh 'i-deh: a mu 'ye 'da, 'de :bhehneh'-bluhba ken :eh? Nyorsoa-a' wele-eh: :po-nyor: :e? Keen' :mloror' :kpeheh:. Jorwor: 'an zela a :gwluhuh', or :se wele-eh: :po-nyor: 'suh. Or :zi 'o wele-eh: :po-nyor-' 'weh.

²⁷Or-: 'o, :or :korn dhih Nyorsoa :za-a-' 'de or-a'a: 'chlee-deh 'di, or 'da, 'An mu 'an-a: tubo-wlu:⧾ :po-nyor :on ybei' :dbo o. Or-: mu :an-a'a: :gwie 'kpa :po 'do :on ybei'.

²⁸:Yee' :Yusu'-a kpa or-a' wlu 'dlu bo, or 'dae:, 'An zela a :gwluhuh', nyor⧾-a' klehkpeh 'nynor⧾-kpao'⧾ 'wluh-a, eh se nyor :korn :or 'ye-a 'i 'beh, :or 'ye-a 'o :Jororn'-' :zi. Jorwor: nyor :or no-a nyor 'zeehn :naa, 'do nyor⧾ :on :ne-a 'de Nyorsoa-a' nyor⧾ wlu 'ken :korn-eh 'zorn, :yee' or-a' 'jeh :dao', or-: 'beh 'i, or-: :zi 'o :Jororn'-'.

²⁹:Yee' nyor⧾-a' klehkpeh-: 'dekorn: 'taa-deh:⧾ :za-nyor⧾-: :yeh on 'worn-a deh :Yusu' :za-a-', :yee' on 'worn-dih-eh 'i, :ka Nyorsoa-a' :gwie 'sleh-a 'i. Deh no-eh, on :po-eh: 'ni 'dlu 'weh :zai', 'de :Jororn' bo.

³⁰Jorwor: :Falasi'i-nyor⧾-: 'dekorn: :Mose'-a' 'tele' yubo-nyor⧾-: deh Nyorsoa 'dhu-a 'do on bo, on :se-eh' dih kpon. Deh no-eh, on :se-' 'worn :Jororn' 'ye-uh' 'ni 'dlu :po.

³¹:Yee' :Yusu'-a kpa or-a' wlu 'dlu bo, or 'dae:, :Yee' deh 'i-deh: 'on 'beh-dih: 'on 'ye :kana-nyor:⧾ :daa 'i :po-dih: :eh? Deh on gweh :eh?

³²On gweh 'nynuu: :nyene' :on :dhe-a dih 'do 'doror', 'de :an wele-a on 'bei', :an no-a, :A bla :tou' 'do a bo. Jorwor: a-a' 'worn, a-a' ye. :A ble nyor-a' 'meheh'-duh:⧾ 'do a bo. Jorwor: a-a' 'worn, a-a' 'vin.

³³:Yee' :Yusu'-a kpa or-a' wlu 'dlu bo, or 'dae:, Ti nyor⧾ 'ni 'dlu :po :Jororn' yi-a 'de, :yee' or pa-' 'suehn:, 'de or :se-' nomor 'na, :yee' a 'da, 'Kwla 'ye-dih-deh: :ne 'o or 'de.

³⁴:Yeh 'yu an 'da-dih-a Nyor-kpalu-a' 'yu yi-a 'de, or di deh 'weh, 'de or 'na, :yee' a 'da, A :gbee'e:. 'Yu :daa, or no deh :di-nyor-: nomor 'na-nyor-:. 'De or no 'taa-deh:⧾ :za-nyor⧾-: 'dekorn: deh⧾-zon:⧾ :no-nyor:⧾ :noo'-: an-a' :ybeh-dih-nyor.

³⁵Jorwor: nyor⧾-a' klehkpeh :on 'worn-dih:-a Nyorsoa-a' :toror' ken dih, an-a' noo-deh⧾-a mu-eh gbor :za, :ka Nyorsoa-a' :toror' 'sleh-a 'i.

³⁶Eh :korn 'we-eh :due', 'de :Falasi'i-nyor⧾-a' nyor :due' :pi-dih: :Yusu' 'de or 'bli 'gbu. 'De :Yusu' mu, or di deh.[1]

³⁷:Yee' 'nynor :due', or-: :ne 'de :gwlor :dao' 'di, or-: nyor⧾-kpalu⧾-a bor-dih bo. :Yeh or 'worn-a :Yusu'-a' 'nyne, :ka or :ne-a 'de :Falasi'i-yu: :dao' 'bli 'gbu 'di, or di-a deh, :yee' or :ya 'de :yabo' :or :no-dih-eh sobu' an 'da-dih-a :alaba'ta. 'Do :wor :pofi'orn :ne.

³⁸:Yeh or yi-a 'de, :yee' or :nyna dih 'de :Yusu' 'kpuh 'i, 'de or buh⧾ bo, 'de or 'vin. 'De or-a' 'mii: :tehehn' :en 'wluh-a 'de or 'yli, me-: zi :Yusu'-a' :buhbuh⧾ dih. 'De or no or-a' 'mii: :en :ne-a 'o or 'dlu, or 'slan :Yusu'-a' :buhbuh⧾ dih. 'De or 'nya or-a' :buhbuh⧾, 'de deh-' 'ye ka 'di, 'de or 'wla-ih :pofi'orn: :dao'-'.

³⁹:Yeh :Falasi'i-yu: :dao', :or :pi-dih:-a :Yusu', or 'ye-eh, :yee' or :wlu-' 'de or-a' 'jeh 'di, or 'da, :Mor 'yu :daa, or 'dhu Nyorsoa-a' wele-eh: :po-nyor-' :dee', :yee' or mu-eh yubo: :dee' 'nynor :daa :or 'tuh-or dih, nyor or 'dhu-eh:-', 'de mor :ka or 'dhu-a deh⧾-zon:⧾ :no-nynor-'.

⁴⁰:Yeh or :za-a deh :daa-', 'do or-a' 'jeh :gwlii', :yee' :Yusu' :wlu-', or 'dae:, Samor', 'on 'ble deh 'on 'ye :on :gwluhuh' zela:. 'De Samor' 'da, :Ao, nyor⧾ deh :torne-nyor:. Zela: 'on :gwluhuh'.

⁴¹'De :Yusu' :wlu, or 'dae:, Nyor⧾-kpalu⧾ 'sororn', mo-: kpon kpa 'de 'yu :due' :or nyor⧾-a kpon-dih-a kpa 'kwa. :Due' kpon 'dhorla-a' :kehehn' :mm' dih, 'de :noror' kpon 'dhorla-a' :kwlaa :mm' dih.

⁴²Mo-: :ne-a 'sororn', on se 'wlii-eh 'ble, on 'ye or-a' kpa⧾ :za. :Yee' or 'tali: kpa⧾ :dao', en-' dhih-: dih. :Yee' nyor :yoror :or mu-or' :ybeh, :eh 'ye 'o :zi :naa :eh?

⁴³'De Samor' 'da, 'On yubo-eh', :yor :or :korn-a kpa :klaba' or 'tali:-a dih, or-: mu 'yu :dao'-' :ybeh, :eh 'ye 'o :zi. :Yeh or 'da :ao', :yee' :Yusu' :wlu-' 'de or bo, or 'dae:, 'Ka-: eh :ne 'jeh ka.

⁴⁴:Yee' :Yusu' 'bili: 'de 'nynor bo 'weh, 'de or :wlu 'de Samor' bo, or 'dae:, :An 'ye 'nynor :daa 'weh :e? :Mor, Samor', :yeh 'on yi-a 'noror :on 'bli 'gbu, :yee' :on :se-' 'on 'ni 'nyi, 'on 'ye :buhbuh⧾ dih :dle. Jorwor: 'nynor :daa, or-a' 'mii: :tehehn', me-: or no, 'de or :dle 'an :buhbuh⧾ dih, 'de or no or-a' 'mii: :ne-a 'o or 'dlu, 'de or 'slan 'an :buhbuh⧾ dih.

⁴⁵:On :se-' 'de 'on :bhluun'⧾-' 'kpa. Jorwor: :eh 'wluh-a 'o ti 'on yi-a 'noror :on 'bli 'gbu, 'nynor :daa, or 'see 'an :buhbuh⧾-a' 'nya-a' 'bor 'de deh-' 'ye ka 'di.

⁴⁶:On :se-' 'on 'chlan 'dlu :po. Jorwor: 'nynor :daa, or-: 'wla 'an :buhbuh⧾ :pofi'orn.

⁴⁷:Yee' eh-a' dhih, 'an zela :on :gwluhuh', 'an :dhih :kma-eh: :klaba' or 'ble-a, eh-: :to-dih: :a 'i, :ka or-a' deh⧾-zon:⧾ :doru' or 'ble-a, 'de en-' dhih 'ma-dih-eh: bo. Jorwor: nyor :or :korn-a deh⧾-zon:⧾ :en se-a 'i :dhie:, 'de en-' dhih 'ma-dih-eh: bo, :yee' or se :ybeh-dih-eh: :klaba' 'ble.

⁴⁸'De :Yusu' :wlu 'de 'nynor :dao' bo, or 'dae:, :An-a' deh⧾-zon⧾-a' dhih 'ma-dih-eh: bo 'weh.

⁴⁹:Yeh :Yusu' 'da :ao', :yee' nyor⧾ :on :ne or di-dih-a deh :dha :due', on 'kpa 'o :wlu 'da 'weh, 'de an-a' 'jeh 'nyne-', an no, Deh 'i-deh-nyor: 'o, :or :dhe dih, :or 'ma-dih nyor⧾-a' deh⧾-zon⧾-a' dhih bo ke :eh?

⁵⁰:Yee' :Yusu' :wlu-' 'de 'nynor :dao' bo, or 'dae:, :An-a' dhih 'jeh-' :po-eh no-eh, 'de :on 'puh. Mu :pehleh'peh:.