Read Eastern Krahn Lu 8 Bible Online

Lu 8 - Eastern Krahn bible

Lu 8

¹:Yee' :yeh ti :zi-dih:-a 'o ken dih, :yee' :Yusu'-a na :gwlor⧾ :klaba'⧾-: 'dekorn: :gwlor⧾ :nyene'-: 'di dih. 'De or po tubo-wlu:⧾ 'jeh :en kor-a Nyorsoa-a' nyor⧾ wlu 'ken :korn-eh 'i. :Yeh or mu-a, :yee' or-a'a: bo :na-nyor:⧾ :on :korn-a :bhue: 'yor :ne-a 'sororn', on :ne 'o or bo 'weh :ke,

²'dekorn: 'nynor⧾ or :za-a 'kwla 'ye-dih-deh⧾ 'de, 'de :on :korn-a puhba-deh:⧾ or 'bor-dih:-a, :on 'dhu-a, :Mehle' :or 'wluh-a :gwlor an 'da-dih-a :Magala', :or 'kwla 'ye-dih-deh⧾ :meheh' 'sorn :za-eh: 'o 'de :dee',

³'dekorn: :Joa'na-: :or 'dhu-a 'Chuza-a'a: 'nynor-'. 'Chuza: :dao', or-: 'Keen :Hehlo'-a'a: 'gbu-a' deh⧾-a' klehkpeh :po-eh: 'de 'kwa. 'De :Suza'na-: 'dekorn: 'nynor⧾ :dhulu' :noo' :on 'duo:-a an-a' 'jeh-a'a: 'wlii, 'de on no-a :Yusu'-: 'dekorn: or-a'a: bo :na-nyor⧾-: deh⧾ 'jeh bo dih, mo-: :ne 'o :ke.

⁴Eh :korn 'we-eh :due', :yee' :gwlor-nyor:⧾ :doru', mo-: 'wluh gwlor⧾ 'di dih, on 'kpa :dha :due', 'do :Yusu' bo. :Yee' or po 'dlan, or 'dae:,

⁵:Yee' 'yu :due' :oo', or-: mu deh⧾-yor: :gba 'da. :Yeh or gba-ih-a 'de 'gle, :yee' :nee' 'kpa 'o :gwie 'i, 'de nyor⧾ 'si-dih-ih ken dih. 'De neme: :en zi-dih-a dih 'de yai', en mla-ih.

⁶:Nee' 'kpa 'o 'bluhba ken :or :ne-a 'soba 'zorn. :Yeh en me-a, :yee' en 'klan-'. Deh no-eh, en se 'ni 'ye.

⁷'De :nee' 'kpa 'de 'wu⧾-kwla 'nyne-'. :Yeh en :ne-a 'wu⧾ :me-dih:-a :dha :due', :yee' 'wu⧾ :mla-dih-ih-: worn.

⁸Jorwor: :nee' 'kpa 'o 'bluhba: 'jeh ken, me-: me, 'de :en wa. :Yeh en wa-a, :yee' 'yor-eh :due' po 'yor-a' :kehehn' :due', :neheh' po :kehehn' :due'. :Yeh :Yusu' :za-a deh :daa-', :yee' or po wele-eh:, or 'dae:, Nyor :or 'ble-a :dou'⧾ :or 'ye-a' dhih 'worn, 'nyi or 'worn-ih.

⁹:Yeh :Yusu' po-a 'dlan :daa, :yee' or-a'a: bo :na-nyor⧾ dhele-or-: dih, deh deh⧾-yor-dlan: :dao' or 'dhu-eh:-'.

¹⁰:Yee' or 'dae:, Nyorsoa-a' nyor⧾ wlu 'ken :korn-eh-a' 'slan :za-eh: gbor 'de a :mor :mloror' bo. Jorwor: or :ne 'de 'dlan⧾ 'di, 'do nyor⧾ :noo' bo. Eh-: no-eh, 'de :mor on pobo: dih, 'de an-a' 'ye dih. :Mor on :to :dou'⧾, 'de an-a' 'worn deh-' dih.

¹¹:Yee' deh 'yu :or gba-a deh⧾-yor, or-a' 'dlan 'dhu-eh:-', eh-: :dhe dih. Deh⧾-yor-: 'dhu Nyorsoa-a' wlu-'.

¹²Deh⧾-yor: :or 'kpa-a 'o :gwie 'i, or gweh nyor⧾ :on 'worn-a Nyorsoa-a' wlu. :Yeh on 'worn-ih'-a, :yee' 'ku yi-: 'de, 'de on :za 'o Nyorsoa-a' wlu 'do on :porluh⧾ ken, 'de on :ne-' dhih 'jeh-' po, on :ne-' 'puh.

¹³Deh⧾-yor: :or 'kpa-a 'o 'bluhba: :or :ne-a 'soba 'zorn ken, or gweh nyor⧾ :yuh :mor on 'worn Nyorsoa-a' wlu, :yee' on kpon-uh-: dih 'do :porluh⧾-a' dih 'pehn ka 'di. Jorwor: on se deh-' dih 'worn-eh: 'jeh 'ble. :Yee' on gweh deh⧾-yor: :or :korn-a buh⧾ se-a :dha :dhorno' mu 'de glu. :Yee' on po-eh dhih 'jeh-', 'do ti-kpor-bei 'di. Jorwor: :mor 'ku 'dhen-uh dih, :yee' on ple-', on 'tali: Nyorsoa-deh-: dih.

¹⁴Deh⧾-yor: :or 'kpa-a 'de 'wu⧾-kwla 'nyne-', or gweh nyor⧾ :on 'worn-a Nyorsoa-a' wlu, jorwor: :ka an kpa-a 'kmo :ne-eh 'dlu bo, :yee' 'kmo bo-deh:⧾ :en 'dhu-a, an-a' 'jeh-a' :porluh⧾ 'worn dih 'beh-dih-eh-: bhan-a'-: 'dekorn: an-a' 'jeh-a' :porluh⧾ dih 'pehn-dih-eh-: me-: kpon-uh :bhluun' 'worn dih, 'de an-a' 'yor :se-' wa.

¹⁵Jorwor: deh⧾-yor: :or 'kpa-a 'o 'bluhba: 'jeh ken, or gweh nyor⧾ :on 'worn-a Nyorsoa-a' wlu, 'de :on kpon-uh-a dih 'de :porluh: 'jeh ka 'di-: 'dekorn: 'de 'yi 'sleh ka 'di-:. On po 'de 'kpih, 'de on :se-' sea, 'de on po 'yor.

¹⁶:Yee' :Yusu'-a kpa or-a' wlu 'dlu bo, or 'dae:, Nyor-a' tba 'nape, 'de or-a' 'jli-eh :yabe ken, 'de mor or-a' :dhe-eh dih, 'de ken 'pehn-deh 'zorn. Jorwor: or dhe-eh :dha eh :korn-a dih, 'de nyor⧾ :an pa-a 'de 'gbu, on 'ye zorn-pli-a' 'ye-a' 'beh-dih:.

¹⁷Deh :eh 'zile-eh, eh mu ken :nyeh. 'De deh :eh :kan-eh worn 'i, eh mu yubo-eh:, 'de mor eh mu 'o zorn-pli 'i :yi.

¹⁸'Do eh-a' dha, a 'dhu a-a' 'jeh :dhororn', :ka a no-a deh⧾-a' 'worn-a'. Deh no-eh, nyor :or 'ye-a deh⧾ :dhulu', or-a'a: deh⧾ :dhulu' or 'ye-a, en mu ken 'kpa-:. Jorwor: nyor :or se-a deh 'ye, or-a'a: deh-yu-a' 'jeh or na-dih-a :gwluhuh' dih, 'do or :porluh ken, or 'da, or 'ble-a, eh mu-or 'kwa :za-eh:.

¹⁹:Yee' :Yusu' 'de-: 'dekorn: or-a' dei'-nyor⧾-kpalu⧾-: mo-: yi 'o or bo. Jorwor: on se 'beh-dih: on 'ye-or' dih 'koan'-dih:. Deh no-eh, :gwlor-nyor⧾ :dhie: 'i.

²⁰'De nyor zela-or :gwluhuh', or 'da, :On 'de-: 'dekorn: :an-a' dei'-boi'-: mo-: :nyna dih 'de 'zorn, an 'bhorn :an-a' 'ye-a'.

²¹Jorwor: :Yusu' :wlu-' 'de or bo, or 'dae:, Nyor⧾ :on 'worn-a Nyorsoa-a' wlu, 'de :on dhe-a 'o or-a' 'tele' dih, mo-: 'dhu 'on 'de-: 'dekorn: 'an 'de-di'-boi'-:-'.

²²Eh :korn 'we-eh :due', 'de :Yusu'-: 'dekorn: or-a'a: bo :na-nyor⧾-: on 'kpa 'de 'blagbe 'di. 'De or zela-uh :gwluhuh', or 'dae:, A zi, :a 'dhan, :a 'ye 'de :Galali'i-yobo'-pehnu 'de 'kpa. 'De on 'kpa :gwie 'i.

²³:Yeh an mu-a, :yee' or 'kpa-' 'nyinor:. :Yee' :pobor' :dhulu', or-: :yi-dih-uh 'de 'ni ken. 'De 'ni-a 'yi 'de 'blagbe 'di dih. :Yee' on :ne 'o :gwlebo: :gwie 'i.

²⁴'De on mu, on za-or 'nyinor-', on 'dae:, Nyor⧾ deh :torne-nyor:. Nyor⧾ deh :torne-nyor:. 'Ni-a kpa :a 'weh o. :Yee' or :sorn-' 'weh, 'de or po :pobor'-: 'dekorn: yobo'-pehnu-a' 'duh⧾ :klaba'⧾ :dao' 'borboa' 'i. :Yee' en 'bor-', en no 'dhuan.

²⁵:Yee' or dhele-uh-: dih, or 'dae:, Dha a-a' dhih 'jeh-' :po-eh :ne :eh? :Yeh or 'da :ao', :yee' eh :florn-dih-uh-: worn, 'de :fano-a no-uh. 'De an 'chihleh-eh 'i, an no, Deh 'i-deh-nyor: 'o, :or :dhe dih :eh? :Mor or 'nyi 'ni-: 'dekorn: :pobor' :sloror'-: 'tele', :yee' en dhe 'o or-a' 'tele'-: dih.

²⁶:Yee' :yeh :Yusu'-: 'dekorn: or-a'a: bo :na-nyor⧾-: an mu-a, :yee' on nyni 'o :Galasi'i-nyor⧾-a' 'bluhba ken, :or :ne-a :Galali'i-bluhba :boleh:-a 'i, 'de en po-a 'o yobo'-pehnu 'do gwea.

²⁷:Yeh on 'si-a dih 'do 'kpuhba' 'i, :yee' 'yu :due', :or 'wluh-a 'de :gwlor-', 'de :or 'kwla 'ye-dih-deh⧾ :ne-a 'o 'de, or-: 'ya-dih-uh 'i. 'Yu :daa, or :se-' 'tiei-' pa, 'do ti :dhorno'⧾ 'di. Or se 'gbu 'di 'ti. Jorwor: or 'ti 'de nma-dih-deh⧾ 'klu-'.

²⁸:Yeh or 'ye-a :Yusu', :yee' or 'wor-', or bla 'koor-dlu⧾ 'yi glu 'do or ybei', or po 'geh⧾ 'gabaa, or no, :Yusu', 'yi 'beh-Nyorsoa-a' 'Yu. Deh :an 'bhorn :on 'ye 'on-' :no-dih: :eh? 'An bale :on 'weh, :on :korn 'gen, :an-a' 'ye-dih:-' 'on 'kle o.

²⁹Deh :korn-a dhih or 'da :ao' 'de :Yusu' bo, eh-: 'dhu, :yeh :Yusu' 'ye-or :zai', :yee' or 'nyi 'kwla 'ye-dih-deh 'tele', eh 'ye 'o or 'de 'wluh. :Yee' 'do ti :dhulu' 'di, 'kwla 'ye-dih-deh 'kpa 'yu :dao'-: ken. Keen' :mloror' on 'dhu-or 'yli-eh bo, on po-or 'chen-dubu'⧾ son⧾-', 'de on po-or :gbolo-eh buh⧾-'. Jorwor: or :wa-dih: :gbolo-eh-: 'dekorn: 'chen-: dih. 'Do ti-a' klehkpeh bo, 'kwla 'ye-dih-deh kpa-or 'de :bhehneh'-bluhba ken.

³⁰'De :Yusu' dhele-or dih, or 'da, :An-a' 'nyne :eh? 'De or 'da, 'An 'nyne :wor Sorye' :dhulu'. Deh no-eh, 'de or 'da :ao', 'kwla 'ye-dih-deh:⧾ :dhulu' :ne 'o or 'de.

³¹'De en bale: :Yusu' or :ne-ih' 'tele' 'nyi, en :ne 'de 'bie' :dhorno' :eh se-a :sie: 'da :korn 'di mu.

³²:Yee' 'do dha-a' 'jeh :dao', :yee' :bee'⧾ :dhulu', me-: wa dih 'do tluh :gben-eh 'i. 'De 'kwla 'ye-dih-deh⧾ bale-or, en 'ye 'de :bee'⧾ 'di pa. :Yee' or 'worn-dih-eh ken dih 'weh.

³³'De en 'wluh 'o 'yu :dao' 'de, en mu, en pa 'de :bee'⧾ 'di. :Yee' :bee'⧾ :dao', en jla :jiin'-: glu, 'de en :za 'noror tluh :gben-eh 'i ple-a', en 'kpa 'o yobo'-pehnu worn, 'de en 'meh 'do 'nior.

³⁴:Yee' :yeh nyor⧾ :an 'dhu-a :bee'⧾ :dao' 'yli-eh bo, on 'ye-a deh :eh :no-eh, :yee' on ple-', on mu 'de :gwlor-'-: 'dekorn: 'de :gbalie⧾ bo dih-: 'de an zela nyor⧾ :gwluhuh'.

³⁵'De nyor⧾ yi deh :eh :no-eh 'ye 'da. :Yeh on yi-a 'de :Yusu' bo, :yee' on 'ye 'yu :or 'kwla 'ye-dih-deh⧾ 'wluh-a 'o 'de 'weh, 'de or :dhe 'o :Yusu'-a' buh⧾ bo dih, or pa deh-', 'de or yi or-a' 'jeh bo. :Yee' eh po-uh' :fano:.

³⁶:Yee' nyor⧾ :on 'ye-a deh :eh :no-eh, on zela: nyor⧾ :gwluhuh' :ka 'yu :or 'kwla 'ye-dih-deh⧾ :ne-a 'o 'de, or no-a 'puh-a'.

³⁷:Yee' nyor⧾-a' klehkpeh :on :ne-a 'o :Galasi'i-nyor⧾-a' 'bluhba-a' 'for :dao' ken, on bale: :Yusu' 'weh, or 'ye 'o on 'bli 'wluh. Deh no-eh, :fano-a: no-uh 'gabaa. :Yeh on 'da :ao', :yee' or 'kpa 'de 'blagbe 'di 'weh, 'de or mu de.

³⁸:Yee' 'yu or :za-a 'kwla 'ye-dih-deh⧾ 'de, or bale-or, or 'ye 'o or klei' zi. Jorwor: or dbo-or-: de, or 'dae:,

³⁹Mu 'de :on 'bli :gwlor-'. Zela: nyor⧾-a' klehkpeh :gwluhuh' deh :kolu' Nyorsoa no-a 'do :on bo. 'De 'yu :dao', or mu, or po wele-eh: 'do :gwlor :gwea, 'do deh :kolu' :Yusu' no-a 'do or bo, eh-a' dhih.

⁴⁰:Yee' :yeh :Yusu' 'dhan-a :Galali'i-yobo'-pehnu :neheh', :yee' nyor⧾ :doru', mo-: mu-or 'i 'ya-dih: 'da. Deh no-eh, an-a' klehkpeh :fuo-or-: ken.

⁴¹:Yee' 'yu :due' an 'da-dih-a 'Jalor, :or :korn-a 'de :Jueh'-nyor⧾-a' 'di :gweh-dih-sla 'zorn-a' wlu bo, or-: yi 'de :Yusu' bo. 'De or 'jli dih 'do or 'zorn, or bale-or, or 'ye 'o or klei' zi, or 'ye 'de or 'bli 'gbu mu.

⁴²Deh no-eh, or-a'a: 'nynor-kpao'-yu: :or :ne-a :due' or 'wluh-a, :or :korn-a zon⧾ :ne-a :bhue: 'yor 'sororn', or-: 'bhorn 'meh-a'. :Yeh or bale-or, :yee' :Yusu' zi 'o or klei' 'weh. :Yeh :Yusu'-a mu-a, :yee' nyor⧾-a 'tun-dih-: dih, on 'ye-or' dih 'koan'-dih:.

⁴³:Yeh an mu-a, :yee' 'nynor :due', 'nynor-kpao'-weh-a no-a, nyomor-a 'wluh-a 'de yau-' 'do zon⧾-a' :bhue: 'yor 'sororn' 'di, jorwor: nyor-beh se or-a' 'puh-dih-eh 'beh-dih:,

⁴⁴or-: 'wluh-dih: 'de :Yusu' 'kpuh 'i, or-: 'tuh or-a'a: :gba 'vuu-a' 'mla dih :weheh:. :Yee' 'do :dha :due' :dao', 'do :wor or-a' nyomor 'bor-dih:.

⁴⁵'De :Yusu' 'da, :Or 'tuh 'on dih :eh? :Yeh or dhele-uh-a dih, :yee' an-a' klehkpeh, on dhobo:-'. 'De :Piteh' 'da, Nyor⧾ deh :torne-nyor:, nyor⧾ :daa, on :dhie: :ao', :on :gweh-dih:-a :on 'dlu dih, 'de :an 'tun-dih-a :on dih, :an-a' 'ye-uh' :e?

⁴⁶Jorwor: :Yusu' :wlu-', or 'da, Nyor 'tuh 'on dih. Deh no-eh, 'on yubo-eh' :ka :nyor⧾ 'puh-dih-kpih 'wluh-a 'on.

⁴⁷:Yee' :yeh 'nynor :dao', or 'ye-eh, :ka or se-a 'zile-eh 'beh-dih:, :yee' or-a' 'tiei-a tleh-', 'de or mu 'de :Yusu' bo. 'De or 'jli dih 'do or 'zorn. :Yee' or zela-or-: :gwluhuh', 'do nyor⧾-a' klehkpeh ybei', deh :korn-a dhih or 'tuh-or dih, 'dekorn: :ka or-a' 'weh no-a 'bor-a'-:.

⁴⁸:Yee' :ka 'nynor jla-a, :yee' :Yusu' :wlu-' 'de or bo, or 'dae:, 'An 'yu, :an-a' dhih 'jeh-' :po-eh no-eh, 'de :an-a' 'weh 'bor. Mu :pehleh'peh:.

⁴⁹:Yeh or 'si-a 'o :wlu 'da, :yee' 'yu :due', or-: 'wluh 'de 'Jalor 'bli 'gbu, 'de or :wlu 'de 'Jalor bo, or 'dae:, :An-a'a: 'yu 'meh-' o. :An-a' 'beh-dih:-' :a-a'a: nyor⧾ deh :torne-nyor 'worn dih :neheh' o.

⁵⁰Jorwor: :yeh :Yusu' 'worn-ih'-a, :yee' or :wlu-' 'de 'Jalor bo, or 'dae:, :Fano 'bor :an-a' no-a'. Deh :due' 'suh, po-eh dhih 'jeh-'. :Yee' or mu 'puh-:.

⁵¹:Yee' :yeh on nyni-a 'de 'Jalor 'bli 'gbu, :yee' :Yusu' :se-' 'worn nyor⧾ :dhulu' 'ye 'o or klei' zi, on 'ye :dha 'yu 'meh-a mu. Nyor⧾ or kpa-a, mo-: 'dhu :Piteh'-: :Jororn'-: 'Jeen-: 'yu :baa'-: 'dekorn: 'yu 'de-:.

⁵²:Yee' nyor⧾-a' klehkpeh on :yeh-dih:-a 'o, an po 'viin'-dhlumeh', 'do 'yu-a' dhih bo. 'De :Yusu' 'da, A 'bor 'vin-a'. 'Nynor-kpao'-yu: :daa, or :se-' 'meh, or 'mo-'.

⁵³:Yeh or 'da :ao', :yee' an 'keleh-or'. Deh no-eh, on yubo-eh' :ka or 'meh-a.

⁵⁴Jorwor: :Yusu' kpon or-a' son-: dih, 'de or 'da-or, or 'dae:, 'An 'yu, :sorn-', mu yai'.

⁵⁵:Yeh or 'da :ao', :yee' or-a' :febeh' yi-: de. :Yee' 'do :dha :due' :dao', or :sorn-' 'weh. 'De :Yusu' zela-uh :gwluhuh' on 'ye 'yu :dao' deh-beh 'nyi, or 'ye di.

⁵⁶:Yee' or 'de-: 'dekorn: or :baa'-: eh :florn-dih-uh-: worn. Jorwor: :Yusu' 'dhu-uh 'slen on :ne-' nyor-beh-nyor-beh deh :eh :no-eh :gwluhuh' zela:.