Read Eastern Krahn :Jororn' 1 Bible Online

:Jororn' 1 - Eastern Krahn bible

:Jororn' 1

¹:Eh 'wluh-a 'de eh-a' glu 'dhu 'da, 'do :wor Wlu :ne. 'De mor Wlu :dao', or :ne 'o Nyorsoa bo 'weh. 'De or no Nyorsoa.

²:Eh 'wluh-a 'de eh-a' glu 'dhu 'da, or :ne 'o Nyorsoa bo 'weh.

³Or-: deh⧾-a' klehkpeh :yi-dih:-' 'de en :no-eh:. Eh se deh :korn, :eh 'ye :ao', :eh se-or' :yi-dih:, 'de :eh 'ye-a' :no-eh:.

⁴Or-: :ya 'de 'kmo :sie: :febeh', 'de 'kmo :sie: :febeh' :dao', or :ya-a: 'de, eh-: no zorn-pli 'do :gwlor-nyor⧾ bo.

⁵Zorn-pli: :dao', en fan-' 'de :kule-', jorwor: :kule :se-ih' 'mo-dih:.

⁶Nyorsoa dbo nyor-kpalu :due' an 'da-dih-a :Jororn'.

⁷Or-: 'yle, :or 'ye zorn-pli-a' dhih ken dih zela:, 'de :gwlor-nyor⧾-a' klehkpeh 'ye en-' dhih dhih 'jeh-' po.

⁸Or-a' 'jeh 'yor-eh :se zorn-pli: :dao'. Jorwor: or yi-: 'de, or 'ye zorn-pli: :dao' en-' dhih ken dih zela:.

⁹Zorn-pli: 'jeh :en fan-dih-a :gwlor-nyor⧾-a' klehkpeh ken dih, me-: yi 'noror 'bluhba bo.

¹⁰Keen' :mloror', or-: 'bluhba :yi-dih:-', 'de jorwor: Nyorsoa-a mu-or :no, jorwor: ti or :ne-a 'noror 'kmo bo, nyor⧾ :on :ne-a 'noror, on se-or 'i yubo: nyor or 'dhu-eh:-'.

¹¹Or yi 'noror or-a' 'jeh-a'a: 'bluhba ken, jorwor: or-a' 'jeh-a'a: nyor⧾ :se-or' dih kpon.

¹²Jorwor: nyor⧾ :yuh :on :ne-a 'de on 'klu-', :on kpon-or dih, 'de :on po-a or-a' dhih dhih 'jeh-', mo-: or 'nyi 'kpih, on 'ye or-a'a: 'nynuu no.

¹³On :se-' or-a'a: 'nynuu no, 'de yau: ka 'di, :ka nyor-kpalu-a no-a 'yu-a' 'wluh-a'. Jorwor: Nyorsoa-a' 'jeh 'yor-eh: no-eh, 'de or no on :Baa'.

¹⁴:Yee' Wlu :dao', or :yi-dih: 'de :gwlor-nyor-tu 'di, 'de or 'ti 'noror :a 'nyne-'. :A-a' 'jeh 'yor-eh-a' 'yli-eh 'ye or-a' dhih-a' 'i 'beh-a' 'weh, :or no-a Nyorsoa-a' 'Yu :due' gbai-a' dhih-a' 'i 'beh-a'. Or po :a Nyorsoa-a' mla :dhulu' bo, 'de or no-eh, 'de :a yubo: dhih-a' 'yor-eh: :en kor-a Nyorsoa 'i.

¹⁵:Jororn' :za or-a' dhih-' 'weh, or 'wor-', or 'da, Nyor :korn-a dhih 'an za-a-', 'on no-a, :or mu-a 'on ken dih :yi, or-: :dhe dih. Or-a' dhih 'beh-: 'i, or :zi 'o 'on-', deh no-eh, :yeh 'on 'ye-a' 'wluh, :yee' or :ne-'.

¹⁶Or 'ble mla :dhulu'. Eh-: no-eh, 'de :a-a' klehkpeh 'ye :bhorlie' :dhulu' :yee:, 'de or 'kwa.

¹⁷Nyorsoa-a' 'tele' :yi-dih:-' :Mose'. Jorwor: mla-: 'dekorn: dhih-a' 'yor-eh-: me-: :yi-dih: :Yusu' 'Klae-'.

¹⁸Nyor 'see Nyorsoa 'ye :zai'. Jorwor: or-a' 'Yu :due' gbai, :or 'ble-a or-a' :porluh, or-: :to-dih-eh nyor⧾ 'i, nyor or :Baa' 'dhu-eh:-'.

¹⁹:Yee' :Jueh'-nyor⧾-a' nyor⧾ :na-dih-nyor:⧾ :on :ne-a :Julu'slehn, mo-: dbo Nyorsoa-a' 'slaa: :za-nyor⧾-: 'dekorn: 'Livae-nyor:⧾ :noo'-: 'de :Jororn' bo, on 'ye-or' dih dhele: nyor or 'dhu-eh:-'.

²⁰:Yeh on dhele-or dih, :yee' or :se-' 'dlu deh 'i 'neh-dih:, or zela-uh-: :gwluhuh' 'do :gwlor :gwea, :ka or :se-a Nyorsoa-a' 'taan'-yu:.

²¹:Yeh or 'da :ao', :yee' on dhele-or-: dih, on 'da, :Yee' nyor :on 'dhu-eh:-' :eh? :Mor :Ila'yor :e? 'De or 'da, 'On :se :Ila'yor:. 'De on 'da, :Mor Nyorsoa-a' wele-eh: :po-nyor:[1] :or :korn-a :or 'ye-a' 'de yi :oo' :e? 'De or 'da, 'Kei:.

²²:Yee' on 'dae: 'de or bo :neheh', Nyor :on 'dhu-eh:-' :eh? Zela: :a :gwluhuh', 'de :a 'ye nyor⧾ :on dbo-a :a-uh :gwluhuh' zela: :ke. :Kaa :on 'da :an-a' 'jeh-a' dhih :ke :eh?

²³:Yee' :Jororn' :wlu-', 'de or :za deh Nyorsoa-a' wele-eh: :po-nyor: :Azaya' :za-a-', 'de Nyorsoa-a' 'chlee-deh 'di, or 'da, 'Mor :oo' :or 'dhu nyor :or 'wor-a 'de :bhehneh'-bluhba ken, :or no-a, A po :Gwlor :baa'-a' :gwie 'kpa, a 'ye-eh' 'i 'sleh-dih:, or 'ye-eh' bo :na.

²⁴:Yee' :Jueh'-nyor⧾-a' kpor, an 'da-dih-a :Falasi'i, an-a' nyor⧾ :noo' :on :dbo-eh :ke,

²⁵mo-: dhele-or dih, on 'da, :Mor :on :se Nyorsoa-a' 'taan'-yu:, 'de mor :on :se :Ila'yor:, 'de mor :on :se Nyorsoa-a' wele-eh: :po-nyor: :or :korn-a :or 'ye-a' 'de yi, :yee' :eh :korn dhih :an po nyor⧾ 'ni 'dlu 'da :eh?

²⁶:Yee' or :wlu-' 'de on bo, or 'dae:, 'An po nyor⧾ 'ni 'dlu 'weh. Jorwor: 'yu :due' :or :nyna-a dih 'de a 'klu-', or-: a se yubo:.

²⁷Or-: 'dhu nyor :or mu-a 'on ken dih :yi, :or :korn-a :buhbuh⧾-a' dubu'⧾ 'on se-a deh-' 'dhu-eh: 'on 'ye-a' bhehn-dih: :sloror'.

²⁸Deh⧾-a' klehkpeh :daa, en :no-eh:-' 'de :Behtani'i-gwlor-', 'de 'Jorle-ni-a' 'yluh-a' 'kwla 'wluh-dih: 'da, 'de :dha :Jororn'-a po-dih-a nyor⧾ 'ni 'dlu.

²⁹:Yee' :yeh zorn zen-a, :yee' :Jororn' 'ye :Yusu', or na, or yi-or 'i. :Yeh or 'ye-or, :yee' or 'da, A :gbee'e:. Nyorsoa-a' 'Blae'-yu: :or yi-a :a-a' deh⧾-zon⧾-a' dhih :jla 'da, or-: :dhe dih.

³⁰'Yu :or :korn-a dhih 'on :za-a-', or-: :dhe dih, 'on no-a, Nyor-kpalu :due', or-: mu 'on ken dih :yi, or-a' dhih 'beh-: 'i, or :zi 'o 'on-', deh no-eh, :yeh 'on 'ye-a' 'wluh, :yee' or :ne-'.

³¹'An 'jeh 'yor-eh:, 'on se nyor :dao' yubo: :dee'. Jorwor: deh :korn-a dhih 'on yi-a 'de, 'de 'an po-a nyor⧾ 'ni 'dlu, eh-: 'dhu, 'on 'ye-or' 'Ezlea-nyor⧾ 'i :to-dih: nyor or 'dhu-eh:-'.

³²:Yee' :Jororn' zela: :Yusu'-a' dhih ken dih, or 'dae:, 'On 'ye Nyorsoa-a' :Zulu:, :on gweh-a pabu', mo-: 'wluh 'de Nyorsoa 'bli yai', mo-: yi 'o or 'dlu, 'de on :sie: 'o or bo.

³³'An 'jeh 'yor-eh:, 'on se nyor or 'dhu-eh:-' yubo: :zai'. Jorwor: Nyorsoa :or dbo-a 'on, 'on 'ye-a' nyor⧾ 'ni 'dlu :po, or-: zela: 'on :gwluhuh' :zai', or 'da, Nyor :an mu-a 'ye-:, 'an :Zulu-a mu-a 'o 'dlu :yi, 'de on 'ye-a 'o or bo :sie:, or-: 'o, :or mu 'an Gban 'i :ne :Zulu-a' 'jeh :daa nyor⧾ 'dlu :po.

³⁴Deh :dao', 'on 'ye-eh'. 'De 'on no or-a' dhih ken dih zela-nyor, :ka or 'dhu-a Nyorsoa-a' 'Yu-'.

³⁵:Yee' :yeh zorn zen-a, :yee' :Jororn'-a'a: bo :na-nyor⧾-a' nyor⧾ 'sororn', mo-: :ne :Jororn' :nyna 'o :dha 'o dih :neheh'.

³⁶'De :Yusu'-a zi. :Yeh :Jororn' 'ye-or, :yee' or 'da, A :gbee'e:. Nyorsoa-a' 'Blae'-yu :wor :dhe dih.

³⁷:Yeh or-a'a: bo :na-nyor⧾ 'sororn' :dao', on 'worn-ih'-a, :yee' on zi 'o :Yusu' klei' 'weh.

³⁸:Yee' :Yusu' 'bili:-'-: dih, or 'ye-uh, an zi 'o or klei', 'de or dhele-uh dih, or 'da, Deh a 'bhorn :eh? :Yee' on 'dae:, 'Wlabae:, dha :on 'ti :eh? ('Wlabae :bleh-dih: 'i, nyor⧾ deh :torne-nyor:, 'de :Hiblu'-wlu 'di.)

³⁹'De :Yusu' 'da, A 'yle, a 'ye 'o 'ye. :Yee' on :ne or mu-', 'de on 'ye :dha or 'ti-a. Ti an mu-a, :yee' eh no 'gwie-yluh bo. 'De on :ne 'o or bo, 'de glu gor.

⁴⁰Nyor⧾ 'sororn' :dao', :on 'worn-a :Jororn'-a' wlu, 'de :on zi-a 'o :Yusu' klei', an-a' nyor :due'-a' 'nyne :wor 'dhu Andlu' :or 'dhu-a Samor' :Piteh'-a' dei'-'.

⁴¹:Yee' :zai'-deh: Andlu' no-a, or mu or-a' 'de-di' 'kwla⧾-' dih 'bhorn 'da. :Yeh or 'ye-or, :yee' or zela-or-: :gwluhuh', or 'da, :A 'ye Nyorsoa-a' 'taan'-yu 'weh. (Nyorsoa-a' 'taan'-yu :bleh-dih: 'i, 'Klae.)

⁴²:Yeh or 'da :ao', :yee' or kpa-or 'de :Yusu' bo. :Yeh :Yusu' pobo-or ya, :yee' or :wlu-', or 'dae:, :Mor Samor' :oo', :or :korn-a :baa'-a' 'nyne 'dhu-a :Jororn'-'. Jorwor: :eh 'wluh-a dha 'zean' 'bli, :an-a' 'nyne :wor :Sifa'. (:Sifa'-nyne: :daa, me-: 'o 'Glii-nyor⧾-a 'da-dih :Piteh', :en :bleh-dih:-a 'i sobu'.)

⁴³:Yee' :yeh zorn zen-a, :yee' :Yusu' polo-eh' 'do or-a' 'jeh :gwlii', or 'ye :Galali'i-bluhba ken mu. :Yee' or 'ye 'yu :due' an 'da-dih-a Felor'. :Yeh or 'ye-or, :yee' or :wlu-' 'de or bo, or 'da, Zi 'o 'on klei'. (

⁴⁴Felor' 'wluh 'o :gwlor an 'da-dih-a :Behse'la 'di, :gwlor Andlu'-: 'dekorn: :Piteh'-: on 'ti-a 'di :ke.)

⁴⁵:Yee' Felor' 'ye :Natanio' 'weh, or zela-or-: :gwluhuh', or 'da, :A 'ye nyor :or :korn-a dhih :Mose' 'chle-a 'de or-a' 'tele'-chlee-deh 'di 'weh, 'de :or :korn-a dhih Nyorsoa-a' wele-eh: :po-nyor⧾ 'chle-a :ke. Or-a' 'nyne :wor :Yusu', :or 'wluh-a 'Nazla-gwlor 'di. Or :baa' 'nyne :wor 'Joseh:.

⁴⁶:Yeh or 'da :ao', :yee' :Natanio' :wlu-', or 'dae:, Deh 'jeh 'beh-dih: eh 'ye 'Nazla-gwlor 'di 'wluh, eh 'ye nyor⧾-' :za-dih: :e? :Yee' Felor' 'da, 'Nyi :a mu, :on 'ye deh 'ye.

⁴⁷:Yeh an mu-a :Yusu' :gwlii', :yee' :Yusu' 'ye :Natanio' 'weh. :Yeh or 'ye-or, :yee' or :wlu-' 'de or bo, or 'da, :Gbee'e:. 'Ezlea-yu-a' 'kpa :wor :dhe dih, :or no-a 'yi 'sleh-nyor, :or-a' :bo-dih:-a nyor⧾ dih.

⁴⁸:Yeh or 'da :ao', :yee' :Natanio' dhele-or dih, or 'da, :Kaa :on no 'an yubo-eh :eh? :Yee' :Yusu' 'dae:, Ti :on 'ye-a' 'o 'fe-tu 'zorn :ne, 'on 'ye :on 'weh, 'de jorwor: Felor'-a mu :on 'da-:.

⁴⁹:Yee' :Natanio' 'da, Keen' 'jeh, Nyor⧾ deh :torne-nyor:, :mor Nyorsoa-a' 'Yu :oo', :or :dhe dih. :Mor 'Ezlea-nyor⧾-a' 'keen :oo'.

⁵⁰'De :Yusu' 'dae: 'de or bo, Deh 'on no-a, 'on 'ye :on 'weh 'do 'fe-tu 'zorn, eh-: :korn dhih :on po 'an dhih dhih 'jeh-' :e? Jorwor: 'bor, :an mu deh⧾ :klaba'⧾ 'ye-: :en mu-a 'o :yeh :daa :zi.

⁵¹:Yee' :Yusu'-a kpa or-a' wlu 'dlu bo, or 'dae:, Dhih 'jeh, 'an zela a :gwluhuh', a mu 'de Nyorsoa 'bli yai' 'ye-:, 'de-a mu worn kan-dih:, 'de a 'ye Nyorsoa-a' 'enjor-nyor⧾ 'ye, on 'ye 'ya 'dhle no, 'de 'yu an 'da-dih-a Nyor-kpalu-a' 'yu bo.