Read Eastern Krahn :Jororn' 10 Bible Online

:Jororn' 10 - Eastern Krahn bible

:Jororn' 10

¹:Yee' :Yusu'-a kpa or-a' wlu 'dlu bo, or 'dae:, Dhih 'jeh, 'an zela a :gwluhuh', nyor :or se-a 'de 'blae'⧾-a' kpo-a' :kpaa' 'worn :yi-dih:, 'de :or 'ya-a kpo ya dih, 'de :or 'si-a 'de or 'di dih, :yee' nyor :dao', or-: 'ylii'-nyor: 'o.

²Jorwor: nyor :or :yi-dih:-a 'do :kpaa' 'worn, 'de :or pa-a, :yee' or-: or-a'a: 'blae'⧾-a' 'yli-eh bo 'dhu-nyor: 'o.

³:Yee' :kpaa'-a' 'yli-eh bo 'dhu-nyor :za 'o :kpaa' 'weh 'do or bo. 'De 'blae'⧾ 'worn en-' 'yli-eh bo 'dhu-nyor-a' wlu 'weh. Or 'da en-' 'nyne, 'de en zi 'o or klei', or 'si-dih-ih 'zorn.

⁴:Mor or 'si-dih: en-' klehkpeh 'zorn, :yee' or 'kpa 'de en ybei', 'de en zi 'o or klei', deh no-eh, en yubo: or-a' wlu 'weh.

⁵En :se 'o nyor 'plo klei' :zi i. Deh no-eh, en se or-a' wlu yubo:. :Yee' en mu :ple, en 'ye 'o or klei' 'wluh.

⁶'Dlan :daa, or-: :Yusu' po 'de, 'de on bo. Jorwor: on :se-or' dih 'worn.

⁷:Yee' :Yusu' :wlu-' :neheh' 'de on bo, or 'dae:, Dhih 'jeh, 'an zela a :gwluhuh', 'mor 'dhu :kpaa' :or :ne-a 'o 'blae'⧾ worn 'i-'.

⁸Nyor⧾-a' klehkpeh, :on yi-a 'on ybei' :zai', on no 'ylii'-nyor:⧾ 'tene' :kpeen:. Jorwor: 'blae'⧾ :se-uh' :dou'⧾ bo :to.

⁹'Mor no :kpaa'. :Mor nyor-beh-nyor-beh :yi-dih: 'on-', 'de or 'ye pa, :yee' or mu 'puh-:. Or mu :pa, 'de or 'ye 'zorn 'si, :yee' or mu dii-deh 'ye-:.

¹⁰'Ylii'-nyor yi-: 'de 'klein', or 'ye 'yli, or 'ye nyor⧾ 'dba, 'de or 'ye deh⧾ 'kor-dih:. Jorwor: 'on yi-: 'de, 'de 'an-a: 'blae'⧾ 'ye 'kmo :ne, 'de 'kmo an mu-a-' :ne, on 'ye 'mona-' dih 'yi-dih:.

¹¹'Mor no 'blae'⧾-a' 'yli-eh bo 'dhu-nyor: 'jeh nor. :Yee' 'blae'⧾-a' 'yli-eh bo 'dhu-nyor: 'jeh nor-a 'worn-dih-eh ken dih 'weh, or 'ye or-a' :febeh' 'kwla :za, or 'ye 'meh, 'do or-a'a: 'blae'⧾-a' dhih bo.

¹²Nyor an za-a geli', :or 'ye-a' 'blae'⧾ 'yli-eh bo 'dhu, or :se 'blae'⧾-a' 'yli-eh bo 'dhu-nyor:, :or :korn-a 'blae'⧾. :Yee' eh-a' dhih, :mor or 'ye ji, eh :taa 'de yi, :yee' or sie 'blae'⧾ 'weh, or ple, or mu-'. :Yee' ji-a 'kpa 'de 'blae'⧾ 'nyne-' 'weh, 'de en gboba-' dih.

¹³'Yu :dao', or ple-', deh no-eh, an za-or geli', or 'ye 'o 'blae'⧾ bo dih pobo:. Eh-: :korn dhih, or se en-' ti :korn.

¹⁴'Mor no 'blae'⧾-a' 'yli-eh bo 'dhu-nyor: 'jeh nor. 'On yubo: 'an-a: 'blae'⧾ 'weh. 'De en yubo: 'on 'weh :ke.

¹⁵'Ka-: 'On-ba no 'an yubo-eh, 'de 'on no or-a' yubo-eh :ke. :Yee' 'on 'worn-dih-eh ken dih 'weh, 'on 'ye 'an :febeh' 'kwla :za, 'on 'ye 'meh, 'do 'an-a: 'blae'⧾-a' dhih bo.

¹⁶'On 'ble 'blae'⧾ :nee', me-: se 'noror 'blae'⧾-a' kpo :daa 'di :ne. 'On :korn 'on 'ye-ih' 'de :ya :gbor :gbor :ke. En mu 'an wlu :dou'⧾ bo :to :ke, 'de en-' klehkpeh 'ye deh :due' no, en 'ye 'yli-eh bo 'dhu-nyor :due' 'ble.

¹⁷Deh :korn-a dhih 'On-ba :ybeh-a 'on, eh-: 'dhu, 'on 'worn-dih-eh ken dih 'weh, 'on 'ye 'an :febeh' 'kwla :za, 'on 'ye 'meh, 'de 'on 'ye-eh' 'ye :dele' ka.

¹⁸Nyor :se-eh' 'on 'kwa :za i. Jorwor: 'an 'jeh 'yor-eh: 'worn-dih-eh ken dih, 'on 'ye-eh' 'kwla :za, 'on 'ye 'meh. 'On 'ble 'kpih, 'on 'ye-eh' 'kwla :za, 'de 'on 'ble 'kpih, 'on 'ye-eh' 'ye :dele' ka. 'Ka :wor 'On-ba no 'an :gwluhuh' zela-eh, 'on 'ye no.

¹⁹:Yeh or :za-a deh :daa-', :yee' :Jueh'-nyor⧾-a' nyor⧾ :na-dih-nyor⧾ :gble-eh:-' 'weh :neheh', 'de on 'nyne-'.

²⁰An-a' :dha :dhulu' 'da, 'Kwla 'ye-dih-deh: :ne 'o or 'de, eh-: no-dih-or sena. :Yee' :eh :korn dhih, a to or-a' wlu :dou'⧾ bo :eh?

²¹Jorwor: :noo' 'da, Nyor 'kwla 'ye-dih-deh⧾ :ne-a 'o 'de, or-a' no :ao' :wlu-a'. 'Kwla 'ye-dih-deh 'beh-dih: eh 'ye nyor-a' 'yli 'i kan-dih: :e?

²²Ti on :za-a Nyorsoa-a' 'sla 'kwla, 'de Nyorsoa bo, 'de :Julu'slehn, me-: :korn gor-a' ti nyni 'o. 'Do ti :dao' 'di, :yee' eh no :chehbe'-a' ti.

²³:Yee' :Yusu'-a na-' 'do Nyorsoa-a' 'sla-a' 'for :noror', :on 'dhu-dih-a :Salomor'-a' 'zorn :forn-dih-da-nyne.

²⁴:Yeh or :ne-a 'de, :yee' :Jueh'-nyor⧾ po-or 'de :kuo 'di, 'de an dhele-or dih, on 'dae:, :Bleheh :eh, :an mu 'de :a 'di dih :florn-dih: :eh? :Mor :on 'dhu Nyorsoa-a' 'taan'-yu-', :yee' zela: :a :gwluhuh' deh 'jeh neh.

²⁵:Yeh on 'da :ao', :yee' or 'da, 'On zela: a :gwluhuh' 'weh. Jorwor: a :se 'on dhih 'jeh-' po. Deh⧾ :kolu'⧾ 'an no-a, 'de 'On-ba-a' 'nyne 'di, me-: zela: 'an dhih ken dih, nyor 'on 'dhu-eh:-'.

²⁶Jorwor: a :se 'on dhih 'jeh-' po. Deh no-eh, a :se 'an-a: 'blae'⧾.

²⁷'An-a: 'blae'⧾ 'worn 'an wlu 'weh. 'De mor :ke, 'on yubo-ih', 'de en zi 'o 'on klei' 'weh.

²⁸'De 'on 'nyi-ih 'kmo :sie: :febeh'. 'Do eh-a' dha, en :se-' gbe :zie: i, :ka ti-a mu-a 'dlu-' :tehn. 'De nyor se 'beh-dih: or 'ye-ih 'de 'on 'kwa :za.

²⁹'On-ba: :or 'nyi-ih-a 'on, or 'beh-: 'i, or :zi 'o nyor⧾-a' klehkpeh-'. Nyor se 'beh-dih: or 'ye-ih 'de 'On-ba 'kwa :za.

³⁰'On-ba-: 'dekorn: 'mor-: :a no deh :due'.

³¹:Yeh :Jueh'-nyor⧾-a' nyor⧾ :na-dih-nyor⧾ 'worn-a deh :daa, :yee' on 'duo: sobu'⧾ 'weh :neheh', on 'ye-or dih :tba-dih:, on 'ye-or' 'dba.

³²:Yeh on no :ao', :yee' :Yusu' :wlu-' 'de on bo, or 'dae:, 'On :to-dih: a deh⧾ :kolu'⧾ :doru', 'On-ba zela:-a 'on :gwluhuh', 'on 'ye-a' no. :Yee' deh⧾ :daa 'on no-a, en-' :yihih :eh, :en :nyni 'yi dih, 'de a 'bhorn a 'ye 'on sobu'⧾ dih :tba-dih:, 'on 'ye 'meh :eh?

³³'De on 'da, Eh :se deh⧾ 'jeh :on no-a en-' dhih, :a :se-' :on sobu'⧾ dih :tba-dih-eh 'bhorn. Jorwor: deh no-eh, :mor :or 'dhu-a :gwlor-nyor-' 'klein', :mor 'o :or 'duo: :an-a' 'jeh-', :or 'ye Nyorsoa no. :Yee' :an 'kor-dih Nyorsoa-a' 'nyne 'weh.

³⁴'De :Yusu' 'da, Eh :se-' 'chle-eh:, 'de :Mose'-a' 'tele'-chlee-deh 'di, :eh :mor Nyorsoa 'da, A :mor nyorsoa⧾ :oo' :e?

³⁵:A yubo-eh', :ka deh Nyorsoa-a' 'chlee-deh :za-a-', eh 'dhu-a dhih-a' 'yor-eh-' :ka ti-a mu-a 'dlu :tehn. :Mor eh 'dhu, Nyorsoa 'da-dih: nyor⧾ or :wlu-a 'de bo, nyorsoa⧾,

³⁶:yee' :eh :korn dhih, :mor 'on 'da, 'Mor Nyorsoa-a' 'Yu :oo', 'de a 'da, 'an 'kor-dih or-a' 'nyne 'weh 'da :eh? 'Mor-: 'o, or tba :jii-eh, 'de or dbo 'on 'noror yao 'zorn.

³⁷:Mor eh 'dhu, 'on se 'On-ba-a' :koan no, :yee' a-a' :po-' 'on dhih 'jeh-'.

³⁸Jorwor: :mor eh 'dhu, 'on no 'On-ba-a' :koan, keen' :mloror' a :se-' 'on dhih 'jeh-' po, jorwor: deh⧾ :kolu'⧾ :dao' 'on no-a, me-: a 'ye dhih 'jeh-' po, 'de a 'ye-eh' yubo: deh 'jeh, :ka 'On-ba :ne-a 'on-', 'de 'on ne-or' :ke.

³⁹:Yeh or 'da :ao', :yee' an vorn-', on 'ye-or' kpon :neheh'. Jorwor: or 'dhan 'de on 'kwa-: dih.

⁴⁰'De or mu 'de 'Jorle-ni-a' 'yluh-a' 'kwla 'wluh-dih: 'da de :neheh', 'do :dha :Jororn' po-dih-a nyor⧾ 'ni 'dlu :dee'. 'Do :wor or :ne,

⁴¹'de nyor⧾ :dhulu' yi 'de or bo, on :wlu 'de an-a' 'jeh 'nyne-', on 'dae:, Keen' :mloror' :Jororn' :se-' nyor⧾ 'yi :to-dih-deh 'i :to-dih:, jorwor: deh⧾-a' klehkpeh or :za-a-' 'do nyor-kpalu: :daa 'bhun, en no dhih-a' 'yor-eh:.

⁴²:Yee' nyor⧾ :dhulu' po :Yusu'-a' dhih dhih 'jeh-' 'do :dha 'o.