Read Eastern Krahn :Jororn' 11 Bible Online

:Jororn' 11 - Eastern Krahn bible

:Jororn' 11

¹:Yee' nyor-kpalu :due' an 'da-dih-a :Lasor', or-: puhba. Or-: 'dekorn: or-a' 'de-di'-nynor⧾-kpao'⧾ :on :ne-a 'sororn', an 'da-dih-a :Mehle'-: 'dekorn: :Mata'-: on 'ti 'de :gwlor an 'da-dih-a :Behtani'i 'di.

²:Mehle' :or 'wla-a :pofi'orn :Gwlor :baa'-a' :buhbuh⧾-', 'de :or no-a or-a' 'mii: :en :ne-a 'o or 'dlu, :or 'slan-a :Yusu'-a' :buhbuh⧾ dih, or-: :korn dei'-nyor-kpalu: :Lasor' :oo', :or puhba.

³:Yeh or puhba-a, :yee' or-a' 'de-di'-nynor⧾-kpao'⧾ dbo :Yusu' wlu bo, on 'dae:, :Gwlor :baa', :on 'be :on :ybeh-a, or-: puhba o.

⁴:Yeh :Yusu' 'worn-a tubo-wlu:⧾ :daa, :yee' or :wlu-', or 'da, 'Weh :daa, eh :se-' :Lasor' 'dba-: i. Jorwor: eh :no-eh:-', 'de Nyorsoa-a' 'nyne 'ye dhih-a' 'i 'beh-a' 'ye. :Yee' eh-a' 'jeh :dao', eh-: mu-eh :no, 'de 'mor :or 'dhu-a Nyorsoa-a' 'Yu-', 'on 'ye dhih-a' 'i 'beh-a' 'ye :ke.

⁵:Yusu' :ybeh :Mata'-: or-a' dei' :Mehle'-: 'dekorn: an-a' dei' :Lasor'-: 'weh.

⁶Jorwor: :yeh or 'worn-ih'-a :ka :Lasor'-a puhba-a, :yee' 'do :dha or :ne-a, or no 'o 'we 'sororn'.

⁷:Yeh 'we 'sororn' :dao', en zi-a, :yee' or zela: or-a'a: bo :na-nyor⧾-: :gwluhuh', or 'da, A zi, :a mu :Judi'a-bluhba ken de.

⁸:Yee' on 'da, Nyor⧾ deh :torne-nyor:, 'do ti-kpor-bei: :en zi-a 'di, :yee' :Jueh'-nyor⧾-a 'bhorn, on 'ye :on sobu'⧾ dih :tba-dih:, on 'ye :on 'dba. :Yee' 'do :wor :an 'bhorn :a 'ye de mu :neheh' :e?

⁹'De or 'da, Eh :se 'yluh-buh⧾-a' :bhue: 'yor 'sororn', :en se 'de zorn-we-eh 'di :ne :e? :Mor eh 'dhu, nyor :na zorn-', :yee' or :se-' dih 'ga-: i, deh no-eh, 'bluhba-a' zorn-pli:, me-: no-eh, 'de or 'ye dih.

¹⁰Jorwor: :mor nyor :na :kule-', :yee' or mu dih 'ga-:, deh no-eh, or se zorn-pli 'ble, :en 'ye-eh' no, 'de or 'ye-a dih 'ye.

¹¹:Yeh :Yusu' gweh-a deh :daa, eh-a' :za-a' 'i, :yee' or :wlu-' 'de on bo :neheh', or 'dae:, :A 'be :Lasor' 'kpa-' 'nyinor:. Jorwor: 'an mu :mu, 'on 'ye-or' 'nyinor-' :za.

¹²'De on 'da, :Gwlor :baa', :mor eh 'dhu, or :taa 'mo, :yee' or mu 'pehli:.

¹³'Mo-a' :yor :Yusu'-a 'da-a, 'meh-a' :oo'. Jorwor: or-a'a: bo :na-nyor:⧾ :mloo', on 'da 'mo-a' 'jeh :nor 'o, or 'da :dee'.

¹⁴:Yee' or zela-eh-: ken dih deh 'jeh, or 'da, :Lasor' 'meh-' o.

¹⁵:Yee' a-a' dhih, 'an :porluh 'pehn-: dih, deh 'on se-a 'o :ne, 'de or 'meh-a, 'de a 'ye 'on dhih 'jeh-' po. A 'nyi, :a mu 'de or bo.

¹⁶:Yee' :Tormor', an 'da-dih-a 'Gba-yu, or :wlu-' 'de or 'bei' bo :na-nyor⧾ bo, or 'dae:, A 'nyi, :a mu, 'de :a :ne :Yusu' 'ye :dha :due' 'meh-dih:.

¹⁷:Yeh :Yusu' 'si-a :gwlor-' dih, :yee' or 'worn-ih' :ka :Lasor' no-a 'we :nyieh 'de nma-dih-deh 'di :weh.

¹⁸'Wluh :Behtani'i, mu :Julu'slehn, eh se :tehn. Eh 'beh-dih: eh 'ye tluh⧾ 'bor⧾ 'sororn' no.

¹⁹Eh-: no-eh, 'de :Jueh'-nyor:⧾ :dhulu' yi :Mata'-: 'dekorn: :Mehle'-: :porluh⧾ 'di dih :dhe 'da, 'do an-a' dei'-a' 'meheh'-dhih bo.

²⁰:Yeh :Mata' 'worn-ih'-a :ka :Yusu'-a yi-a 'de, :yee' or mu-or 'i 'ya-dih: 'da. :Yee' :Mehle' :sie: 'de 'gbu 'weh.

²¹:Yeh :Mata' :yeh-dih:-a :Yusu' ken, :yee' or :wlu-' 'de or bo, or 'dae:, :Gwlor :baa', :mor eh 'dhu, :on :ne :daa :dee', :yee' 'an dei' :se-' 'meh-: i :dee' o.

²²Jorwor: 'on yubo-eh', deh⧾-a' klehkpeh :an mu-a Nyorsoa 'yba-dih: :naa-a' 'jeh, or mu-ih :on 'nyi-:.

²³:Yeh or 'da :ao', :yee' :Yusu' 'dae: 'de or bo, :An-a' dei'-a mu 'kmo :ne :neheh'.

²⁴'De :Mata' 'da, 'On yubo-eh', or mu-' :sorn :neheh' :dele' ka, ti 'meheh'-nyor⧾-a' klehkpeh, an mu-a-' :sorn-dih:, 'do :de 'bor-dih-we-eh 'di.

²⁵'De :Yusu' 'da, 'Mor-: 'o, :or za 'de 'meheh'-nyor⧾ 'de nma-dih-deh 'di, 'de :or 'nyi-uh 'kmo :sie: :febeh'. Nyor :or po-a 'on dhih 'jeh-', or-a' :yeh 'meh, or mu 'kmo :ne :neheh'.

²⁶'De mor nyor-beh-nyor-beh: :or :ne-a 'kmo-', 'de :or po-a 'on dhih 'jeh-', or :se-' 'meh-: i, :ka ti-a mu-a 'dlu-' :tehn. :On po-eh-' dhih 'jeh :e?

²⁷'De :Mata' 'da, Keen', :Gwlor :baa', 'on po-eh-' dhih 'jeh, :mor Nyorsoa-a' 'Yu, or 'tan-a, :or :korn-a, :or 'ye-a dha yao 'zorn yi, :mor 'o.

²⁸:Yeh :Mata' :za-a deh :daa-', :yee' or mu 'de 'gbu-: de, 'de or 'da or-a' dei' :Mehle', 'de 'slan ka 'di, or 'da, :A-a'a: nyor⧾ deh :torne-nyor yi-: 'de, 'de or dhele :an-a' dhih dih.

²⁹:Yeh :Mehle' 'worn-ih'-a, :yee' or 'dhobo:, or :sorn-' 'weh, 'de or mu 'de or bo.

³⁰:Yeh deh⧾ :daa, en mu-a 'dlu bo, :yee' :Yusu' 'see :gwlor-' dih 'si. 'Do :dha :Mata' :yeh-dih-or, 'do :wor or :ne 'gboror:.

³¹:Yee' :Jueh'-nyor:⧾ :on yi-a :Mehle' :porluh 'di dih :dhe 'da, 'de :on :ne-a 'de or bo 'gbu, :yeh on 'ye-a :Mehle', 'de or 'dhobo:-a, or :sorn-a-', or 'si-a 'zorn, :yee' on zi 'o or klei' 'weh. Deh no-eh, :mor on :taa 'ye :dee', :yee' on 'da or mu 'vin 'da, 'do or-a' dei'-a' nma-dih-deh ken.

³²:Yeh :Mehle' nyni-a 'o :dha :Yusu' :ne-a, 'de or 'ye-or, :yee' or du or-a' 'jeh 'weh, 'do or ybei', or 'da, :Gwlor :baa', :mor eh 'dhu, :on :ne :daa :dee', :yee' 'an dei' :se-' 'meh-: i :dee' o.

³³:Yeh :Yusu' 'ye-or, 'de or 'vin-a, 'de :Jueh'-nyor:⧾ :on zi-a 'o or klei', an 'vin-a :ke, :yee' or-a' :porluh 'kpa-: 'zorn 'gabaa.

³⁴'De or 'da, Dha a nma-dih-or dih ka :eh? 'De on 'da, 'Yle, :on 'ye 'o 'ye, :Gwlor :baa'.

³⁵:Yee' :Yusu' 'vin-'.

³⁶'De on 'da, A 'ye :ka or no-a or-a' :ybeh-a' 'weh :e?

³⁷Jorwor: an-a' nyor⧾ :noo' 'da, Nyor :or kan-dih:-a 'doror'-nyor-a' 'yli 'i, or-: :se 'de :Lasor'-a' :gwlebo: :gwie 'i :za-eh 'beh-dih: :e?

³⁸:Yee' :ka :Yusu'-a' :porluh-a 'beh-dih-or 'worn dih :chio'lo:, :yee' or mu 'de :dha on nma-dih:-a :Lasor' dih, :eh no-a wor, on no-a sobu' :kolu', on kan-a 'o or worn 'i.

³⁹:Yeh or nyni-a 'o, :yee' or 'da, A :za 'o sobu' :daa. Jorwor: 'yu :or 'meh-a, or-a' 'de-di'-nynor-kpao' :Mata' 'da, :Gwlor :baa', :mor :a :za 'o sobu', :yee' or mu 'no :po. Deh no-eh, :a nma-dih-or dih :naa, eh-a' 'we :nyieh 'zean'.

⁴⁰'De :Yusu' 'da, 'On :se-' :on :gwluhuh' zela:, 'on :se-' :ao', :an mu Nyorsoa-a' dhih-a' 'i 'beh-a' 'ye-: :mor :on po-eh dhih 'jeh-' :e?

⁴¹:Yeh or 'da :ao', :yee' on :za 'o sobu' 'weh, 'de or pobo: 'de yai', or :wlu, or 'dae:, 'On-ba:, 'on po :on 'zio :ka :an 'worn-a 'an wlu.

⁴²'On yubo-eh', :ka :an 'worn-a 'an wlu 'do ti-a' klehkpeh bo. Jorwor: 'an za-eh' 'weh, 'do nyor⧾ :on :nyna-a dha dih, an-a' dhih bo, 'de on 'ye-eh' dhih 'jeh-' po, :ka eh 'dhu-a :on mor-' :or dbo-a 'on.

⁴³:Yeh or :za-a deh :daa-', :yee' or 'wor-', or 'da, :Lasor', 'si 'zorn.

⁴⁴:Yeh or 'da :ao', :yee' 'yu :or 'meh-a, :yee' or 'si-: 'zorn, 'de :za 'ku 'gbu-yli-eh bhian-dih: or-a' buh⧾-: 'dekorn: or-a' son⧾-: kle-' dih. 'De 'yli-eh: 'sluh :san-dih: 'o or 'yli ken. :Yeh or 'si-a 'zorn, :yee' :Yusu' :wlu-' 'de on bo, or 'dae:, A bhehn-dih-or. A za-or 'ylii kle-' dih, or 'ye mu.

⁴⁵:Yeh or no :ao', :yee' :Jueh'-nyor:⧾ :dhulu' :on yi-a :Mehle' 'ye 'da, :yeh on 'ye-a deh :Yusu' no-a, :yee' on po or-a' dhih-' dhih 'jeh.

⁴⁶Jorwor: an-a' nyor⧾ :noo' mu 'de :Falasi'i-nyor⧾ bo, 'de on zela-uh :gwluhuh' deh or no-a.

⁴⁷:Yeh on 'worn-ih'-a, :yee' Nyorsoa-a' 'slaa: :za-nyor:⧾ :klaba'⧾-: 'dekorn: :Falasi'i-nyor⧾-: on 'da zabe: :zi-nyor⧾-a' klehkpeh :dha :due', on 'da, :Kaa :a mu :no :eh? 'Yu :daa, or no deh⧾ :kolu'⧾ :kolu'⧾ :dhulu' :naa o.

⁴⁸:Mor :a za-or 'yli-eh dih, 'de or 'ye deh⧾ :daa, en-' no-a' 'dlu bo kpa, :yee' :gwlor-nyor⧾-a' klehkpeh, an mu or-a' dhih dhih 'jeh-' :po, on 'ye 'o or klei' zi. :Yee' 'Wloon-nyor⧾-a' nyor⧾ :klaba'⧾-a mu 'de :yi, on 'ye :a-a'a: Nyorsoa-a' 'sla-: 'dekorn: :a-a'a: 'bluhba-dlu-a' klehkpeh-: ya :gba.

⁴⁹:Yee' 'yu :due' an 'da-dih-a :Kai'fa, :or no-a an-a' nyor :due', 'de :or no-a Nyorsoa-a' 'slaa: :za-nyor⧾-a' nyor :klaba' 'do zon :dao' 'di, or-: :wlu 'de on bo, or 'dae:,

⁵⁰A se-eh yubo: :ka eh :nmor-a 'yi dih, nyor :due' 'ye-a 'meh, 'do :a-a'a: nyor⧾-a' dhih bo, :eh :zi 'o :a-a' 'bluhba-dlu-a' klehkpeh, on 'ye gbe :zie:.

⁵¹Deh :daa, or :za-a-', eh :se 'o or-a' 'jeh :gwlii' 'wluh. Jorwor: :ka or no-a Nyorsoa-a' 'slaa: :za-nyor⧾-a' nyor :klaba' 'do zon :dao' 'di, :yee' or po gban-wlu:⧾ :ka :Yusu'-a mu-a 'meh-:, 'do :Jueh'-nyor⧾-a' 'bluhba-dlu-a' dhih bo.

⁵²Eh :se :Jueh'-nyor⧾-a' 'bluhba-dlu-a' dhih :due', jorwor: Nyorsoa-a' 'nynuu: :on gboba:-a dih, 'de or 'ye-uh' :dha :due' po, on 'ye nyor :due' no.

⁵³:Eh 'wluh-a 'o 'we-eh: :dao' 'di, 'do :wor on 'dhu-dih: dhih, on 'ye-or' 'dba.

⁵⁴'Do eh-a' dha, or-a' 'worn, or-a' van-dih: dih 'de :Jueh'-nyor⧾ 'klu-' :dele' ka. Jorwor: or-: 'dekorn: or-a'a: bo :na-nyor⧾-: on mu 'de :gwlor an 'da-dih-a 'Iflan, :or 'koan'-dih:-a :bhehneh'-bluhba dih. 'Do :wor on :ne.

⁵⁵:Yeh :Jueh'-nyor⧾-a' 'Meh-a' :bla-dih: 'dlu dih-gor 'koan'-dih:-a 'o dih, :yee' :gwlor-nyor:⧾ :dhulu' :on 'wluh-a gwlor⧾ 'di dih, mo-: mu :Julu'slehn, on 'ye an-a' 'jeh :kane' dih :za, 'de gor-a' ti 'ye 'o nyni.

⁵⁶:Yee' :yeh on :ne-a 'o Nyorsoa-a' 'sla ybei', :yee' on :nyna dih, 'de an 'bhorn-dih :Yusu' 'yli-eh dih, an dhele on 'bei' dih, on 'dae:, :Kaa eh no 'o a :gwlii'-a' :ne-a' :eh? :Yusu'-a mu gor :daa :yi :e? :Ae' or :se 'de :yi i ke?

⁵⁷Jorwor: Nyorsoa-a' 'slaa: :za-nyor:⧾ :klaba'⧾-: 'dekorn: :Falasi'i-nyor⧾-: on 'nyi nyor⧾ 'tele' 'weh see, on 'da, :mor nyor 'ye :Yusu', :yee' or zela-uh :gwluhuh', on 'ye-or' kpon.