Read Eastern Krahn :Jororn' 12 Bible Online

:Jororn' 12 - Eastern Krahn bible

:Jororn' 12

¹:Yee' eh :sie: 'o 'we :meheh'lo:, eh 'ye 'Meh-a' :bla-dih: 'dlu dih-gor-a' ti no. :Yee' :Yusu' mu 'de :Behtani'i-gwlor 'di, :dha :Lasor' or :za-a: 'de nma-dih-deh 'di, or 'ti-a.

²:Yeh or :ne-a 'de, :yee' on :pi-dih-or 'de mor. 'De :Mata' kpa-uh :bale'-'. :Yee' :Lasor' :ne 'o nyor⧾ :an di-a deh 'do :Yusu' bo 'nyne-' 'weh.

³'De :Mehle' 'duo: 'naa-tu-a' 'bleh 'bleh-a' :pofi'orn:, :or 'yi-a :zolo-eh: :kolu', 'de :or 'kpa-a deh ken-'. Or-: or 'wla :Yusu'-a' :buhbuh⧾-', 'de or no or-a' 'mii: :en :ne-a 'o or 'dlu, or 'slan :Yusu'-a' :buhbuh⧾ dih. :Yeh or no :ao', :yee' :pofi'orn-a' 'no gweh 'de 'gbu 'di-: 'dlu.

⁴:Yeh eh no :ao', :yee' :Juda' :Ehkeh'lior: :or no-a :Yusu'-a'a: bo :na-nyor⧾-a' nyor :due', 'de :or mu-or :plo 'de ybei', or-: :wlu, or 'dae:,

⁵:Eh :korn dhih, :pofi'orn: :daa, or :se-' :plo-eh:, 'de or-a' 'wlii 'ye nyor⧾ :on se-a deh-a' :za-da 'ble 'nyi-eh :eh? :Pofi'orn: :daa, :mor nyor⧾ plo-or, or 'beh-dih: or 'ye 'wlii: nyor :due'-a 'ye-a 'do zon :due' 'di ken :yeh-dih:.

⁶Deh :daa, or :za-a-', eh :se or :kma nyor⧾ :on se-a deh-a' :za-da 'ble, an-a' dhih :deh. Jorwor: or za-eh' 'weh, deh no-eh, or no 'ylii'-nyor:. 'De or no 'wlii dih :dhe-nyor 'do on bo. :Yee' 'wlii: or dhe-a dih, 'do :wor or :za 'wlii, or plo, 'do or-a' 'jeh bo.

⁷:Yeh :Juda' :za-a deh :daa-', :yee' :Yusu' :wlu-' 'de or bo, or 'dae:, 'Wluh 'o or bo. :Pofi'orn: :daa, :mor 'on 'meh-a, or mu-a 'on 'wla-: :dee', or-: 'o, or 'wla 'on :naa.

⁸Nyor⧾ :on se-a deh-a' :za-da 'ble, an mu dha a bo :ne, 'do ti-a' klehkpeh bo. Jorwor: 'on :se-' dha a bo :ne i, 'do ti-a' klehkpeh bo.

⁹:Yee' :Jueh'-nyor:⧾ :doru', mo-: yubo-eh 'i, :ka :Yusu' :ne-a 'o, 'de on yi 'o. Eh :se :Yusu'-a' dhih :due', on :se 'o yi, jorwor: on yi :Lasor' :or :Yusu' :za-a: 'de nma-dih-deh 'di 'ye 'da.

¹⁰:Yee' eh-a' dhih, Nyorsoa-a' 'slaa: :za-nyor:⧾ :klaba'⧾ po wlu :dha :due', on 'ye :Lasor' 'dba :ke.

¹¹Deh no-eh, or-a' dhih :oo', :Jueh'-nyor:⧾ :dhulu' po :Yusu'-a' dhih dhih 'jeh-', 'de on zi 'o or klei'.

¹²:Yeh zorn zen-a, :yee' :Jueh'-nyor⧾-a' nyor⧾ :dhulu', :on yi-a gor :dao', mo-: 'worn-ih' :ka :Yusu'-a yi-a :Julu'slehn.

¹³:Yee' on chehn yuh⧾-wlon:⧾, me-: on 'gba kwa, 'de an mu-or 'i 'ya-dih: 'da, an po 'geh⧾, an no, Dhih-a' 'i 'beh-a' 'do or bo. :Bhorlie' 'do or bo :or yi-a 'de, 'de :Gwlor :baa'-a' 'nyne 'di. :Bhorlie' 'do 'Ezlea-nyor⧾-a' 'keen bo.

¹⁴:Yee' :Yusu' 'ye 'dhornke-yu:, 'de or :dhe 'o eh ken dih, :ka eh no-a 'chle-eh, 'de Nyorsoa-a' 'chlee-deh 'di, eh no-a,

¹⁵A :mor 'Zayorn-nyor:⧾, :fano-a' :no-' a-uh'. A :gbee'e:. A-a'a: 'keen :wor yi 'noror a bo. Or-: :dhe 'o 'dhornke-yu ken dih.

¹⁶:Yee' or-a'a: bo :na-nyor⧾ :se-' deh⧾ :daa dih 'worn 'do ti :dao' 'i. Jorwor: ti Nyorsoa 'nyi-or dhih-a' 'i 'beh-a', 'do :wor on :po-dih-eh :gwluhuh' bo, :ka deh⧾ nyor⧾ no-a 'do or 'bhun, en 'chle-eh:-' see, 'de Nyorsoa-a' 'chlee-deh 'di, 'do or-a' dhih bo.

¹⁷:Yee' nyor⧾ :dhulu' :on 'si-a 'o, 'de :Yusu' 'ye-a 'de :Lasor' 'de nma-dih-deh 'di :za, mo-: :gweh-dih: eh-a' 'nyne deh⧾-' dih 'dlu.

¹⁸Nyor⧾ 'di dih 'ma-dih-deh: :kolu' :dao', or no-a, eh-: :korn dhih, nyor⧾ :dhulu' :dao', on mu-or 'i 'ya-dih: 'da.

¹⁹:Yee' eh-a' dhih, :Falasi'i-nyor⧾-a wlu-' 'de an-a' 'jeh 'nyne-', on 'dae:, A :gbee'e:. Nyor⧾-a' 'worn, an-a' zi 'o :a klei' :neheh' o. 'Bluhba-a' klehkpeh, an zi 'o :Yusu' klei' o.

²⁰:Yee' 'Glii-nyor:⧾ :noo', mo-: :ne 'de nyor⧾ :on yi-a Nyorsoa-a' :weheh' :za 'da 'klu-', 'do gor :dao'.

²¹'De on yi 'o Felor' bo, :or 'wluh-a :gwlor an 'da-dih-a :Behse'la 'di, :or :ne-a :Galali'i-bluhba ken, on 'dae:, Nyor :klaba', :a 'bhorn :a 'ye :Yusu' 'ye.

²²'De Felor' mu, or zela: Andlu' :gwluhuh', 'de Felor'-: 'dekorn: Andlu'-: on mu, on zela: :Yusu' :gwluhuh'.

²³:Yeh :Yusu' 'worn-ih'-a, :yee' or :wlu-' 'de on bo, or 'dae:, Ti nyni 'o 'weh, 'yu an 'da-dih-a Nyor-kpalu-a' 'yu, Nyorsoa 'ye or-a' 'nyne dhih-a' 'i 'beh-a' 'nyi.

²⁴Dhih 'jeh, 'an zela a :gwluhuh', :mor eh 'dhu :koo-yor-eh se 'de 'bluh 'zorn 'kpa, 'de eh 'ye :ao', eh se 'meh, :yee' eh mu :koo-yor-eh :due' :no 'gboror:. Jorwor: :mor eh 'kpa 'de 'bluh 'zorn, 'de eh 'ye 'meh, :yee' eh mu 'yor :dhulu' :po.

²⁵Nyor :or :ybeh-a or-a' :febeh'-', :yee' or mu-eh 'ma-dih:. Jorwor: nyor :or 'nyeh-a or-a' :febeh'-' dha yao 'zorn, :yee' eh-a' dih :dhe-eh: 'o or no, :yee' or mu 'kmo-' :ne, :ka ti-a mu-a 'dlu-' :tehn.

²⁶Nyor :or 'bhorn-a :or 'ye-a 'an-a: 'bhoi-yu no, :yee' 'nyi or zi 'o 'on klei'. :Yee' :dha 'on :ne-a, 'do :wor or mu :ne :ke. :Yee' or-: 'On-ba-a mu deh-' 'ye-eh 'nyi-:.

²⁷:Yee' :Yusu'-a kpa or-a' wlu 'dlu bo, or 'dae:, 'An :porluh-a 'beh-dih 'on 'worn dih :naa. :Kaa 'an mu 'da-: :naa :eh? 'An mu :ao', 'On-ba:, zelie: 'on, 'do 'kle 'ye-eh-a' ti :daa 'kwa :e? 'Kei o. Eh-a' dhih :oo', 'on :yeh-dih: ti :daa ken.

²⁸'De :Yusu' :wlu 'de Nyorsoa bo, or 'dae:, 'On-ba:, deh :eh mu-a :an-a' 'nyne dhih-a' 'i 'beh-a' 'nyi-:, eh-: :on 'ye no. :Yeh or 'da :ao', :yee' wlu 'wluh 'de Nyorsoa 'bli yai', on 'dae:, 'On no-eh' :weh. Jorwor: 'an mu-eh :no :dele' ka.

²⁹:Yeh nyor⧾ :dhulu' :dao' :on :nyna-a 'o dih, on 'worn-ih'-a, :yee' an-a' :noo' 'da, 'ni-a' 'gbu-wlu: 'o, an 'worn. :Yee' :noo' 'da, 'enjor: 'o, or-: :wlu 'de or bo.

³⁰:Yeh eh no :ao', :yee' :Yusu' 'da, Wlu :daa :on :wlu-a, eh :se 'an dhih, jorwor: a-a' dhih :oo', on :wlu.

³¹Ti nyni 'o 'weh, dha yao 'zorn-a' zabe 'ye :zi-eh:. 'De 'ku :on :korn-a dha wlu 'ken, on 'ye 'zorn :po-eh:.

³²'De :mor 'on :to-eh: yai' 'do 'klorse tu 'i, :yee' 'an mu nyor⧾-a' klehkpeh :jli 'do 'on bo.

³³Deh :korn-a dhih or :za-a deh :daa-', 'meh-a' :yor or mu-a 'meh-:, or-: :korn dhih :oo', or za-a-'.

³⁴:Yeh or 'da :ao', :yee' nyor⧾ :dhulu' :dao', on 'dae:, :A 'worn-ih' 'de :Mose'-a' 'tele'-chlee-deh 'di, :ka Nyorsoa-a' 'taan'-yu-a mu-a 'kmo :ne, :ka ti-a mu-a 'dlu-' :tehn. :Yee' :kaa eh no, 'de :on 'da, 'Yu an 'da-dih-a Nyor-kpalu-a' 'yu-a mu yai' :to-eh: 'do 'klorse tu 'i :eh? :Or 'dhu Nyor-kpalu-a' 'yu-a' 'jeh :daa-' :eh?

³⁵'De or 'da, Zorn-pli-a mu 'noror a bo :ne, 'do ti :dhorno'⧾-bei 'di 'gboror:. 'Do eh-a' dha, :ka a 'ble-a zorn-pli :naa, :yee' a :na, 'de glu :ne-' a :gor-dih:. Nyor :or na-a 'de :kule-' dih, 'do :dha or mu-a, or se 'o yubo:.

³⁶:Ka a 'ble-a zorn-pli :naa, :yee' a po zorn-pli: :daa dhih 'jeh-', 'de a 'ye nyor⧾ :on 'ble-a zorn-pli no. :Yeh :Yusu' gweh-a deh :daa, eh-a' :za-a' 'i, :yee' or 'wluh 'o on bo 'weh, 'de or 'zile-uh dih.

³⁷Keen' :mloror' or no nyor⧾ 'yi :to-dih-deh:⧾ :dhulu' :dao' 'weh, 'do nyor⧾ ybei', jorwor: on :se-or' dhih 'jeh-' po 'gboror:.

³⁸Deh :daa, eh :no-eh:-' 'de Nyorsoa-a' wele-eh: :po-nyor: :Azaya'-a' wlu 'ye dhih 'jeh-' 'kpa, :or no-a, :Gwlor :baa', tubo-wlu:⧾ :a po-a, nyor :yoror :or po-ih dhih 'jeh-' :eh? :Or :korn 'de bo, :Gwlor :baa' :to-dih: or-a' 'kpih 'i :eh?

³⁹Deh :korn-a dhih on se-a eh-a' dhih 'jeh-' :po-eh 'beh-dih:, eh-: 'dhu, :Azaya' za-eh' 'weh, 'de or-a'a: 'chlee-deh 'di :ke, or 'da,

⁴⁰Nyorsoa :kpe-dih: 'de on 'yli-' 'weh, 'de or :kmu-dih: an-a' :porluh⧾, 'de on :ne-' dih 'ye, 'de on :ne-' deh-' dih 'worn, 'do an-a' :porluh⧾ ken, 'de on :ne-' dih 'bili:, 'de or :ne-uh' 'puh-dih:.

⁴¹:Azaya' :za deh :daa-' 'weh, deh no-eh, or-a' 'yli-eh 'ye :Yusu'-a' dhih-a' 'i 'beh-a' 'weh, 'de or :za or-a' dhih-'.

⁴²Keen' :mloror', 'ka-: eh :ne 'suh, jorwor: :Jueh'-nyor⧾-a' nyor⧾ :na-dih-nyor:⧾ :dhulu' po :Yusu'-a' dhih dhih 'jeh-', 'de on 'klu-'. Jorwor: an-a' 'worn, an-a' :to-dih-eh nyor⧾ 'i, deh no-eh, an ple :Falasi'i-nyor⧾-a' :fano:, on :ne-uh' 'zorn po, 'de an-a' 'di :gweh-dih-sla 'zorn.

⁴³On :ybeh :gwlor-nyor⧾ 'ye-uh' dhih bo po, :eh :zi 'o Nyorsoa-'.

⁴⁴:Yee' :Yusu' 'wor-', or 'dae:, Nyor :or po-a 'on dhih 'jeh-', :yee' eh :se 'on :due' or :se-' dhih 'jeh-' po. Jorwor: nyor :or dbo-a 'on, or-: 'o, or po dhih 'jeh-' :ke.

⁴⁵:Yee' nyor :or 'ye-a 'on, :yee' or 'ye nyor :or dbo-a 'on 'weh :ke.

⁴⁶'On yi-: 'de, 'on 'ye zorn-pli no dha yao 'zorn, 'de nyor :or po-a 'on dhih 'jeh-', or :ne 'de :kule-' :sie:.

⁴⁷Nyor :or 'worn-a deh 'on :za-a-', 'de :or se-eh :dou'⧾ bo :to, :yee' 'on :se-' or-a' zabe :zi i. Deh no-eh, 'on :se-' 'noror 'bluhba ken yi, 'on 'ye nyor⧾-a' zabe zi. Jorwor: 'on yi-: 'de, 'on 'ye-uh' zelie:.

⁴⁸Nyor :or se-a 'an dhih 'worn-dih:, 'de mor :or se-a 'an wlu dih kpon, :yee' 'an wlu-a' 'jeh :dao', 'an za-a-', mo-: :an mu-or zabe :kpon-dih:, 'do :de 'bor-dih-we-eh 'di.

⁴⁹Deh no-eh, eh :se 'de 'an 'jeh-a' 'kpih 'di, 'on :se-' :wlu-dih:. Jorwor: 'On-ba: :or dbo-a 'on, or-: 'nyi 'on 'tele', deh 'on 'ye-a' :za.

⁵⁰'On yubo-eh', or-a' 'tele' :daa, eh :ya 'de 'kmo :sie: :febeh'. :Yee' 'do eh-a' dha, deh⧾ 'On-ba zela: 'on :gwluhuh', me-: 'an za-'.