Read Eastern Krahn :Jororn' 13 Bible Online

:Jororn' 13 - Eastern Krahn bible

:Jororn' 13

¹:Yee' :yeh eh 'ye-a' 'Meh-a' :bla-dih: 'dlu dih-gor-a' ti no, :yee' :Yusu' yubo-eh', :ka or-a' ti-a nyni-a 'o, or 'ye-a 'noror yao 'zorn 'wluh, 'de or 'ye-a 'de or :Baa' bo mu. Or :ybeh or-a'a: nyor⧾ :on :korn-a 'de or bo-' 'weh, dha yao 'zorn. :Ka or no-a an-a' :ybeh-a', 'ka-: or no an-a' :ybeh-a' :chio'lo:, 'de eh nyni 'de eh-a' 'dlu-' :jla 'da.

²:Yeh or-: or-a'a: bo :na-nyor⧾-: on 'ye-a' 'gwie-deh di, :yee' 'ku 'kpa 'o Samor'-a'a: 'yu, an 'da-dih-a :Juda' :Ehkeh'lior :porluh ken 'weh, or 'ye :Yusu' plo.

³:Yee' :Yusu' yubo-eh', :ka or :Baa' Nyorsoa 'nyi-or 'kpih 'do deh⧾-a' klehkpeh ken. Or yubo-eh' :ke, :ka or 'wluh-a 'de or bo, 'de or mu-a 'de or bo de :mu.

⁴:Yee' or :sorn-' 'weh, or :nyna dih, 'do :dha an di-dih-a 'gwie-deh, 'de or :za or-a'a: :gba 'vuu dih, or 'gba 'taba.

⁵:Yeh or no :ao', :yee' or po 'de 'ni, 'de 'pani' 'di, 'de or 'kpa or-a'a: bo :na-nyor⧾-a' buh⧾ dih :dle-eh ken. 'De or no 'taba:, or 'gba-a, or 'slan-uh buh⧾ dih.

⁶:Yeh or :yeh-dih:-a Samor' :Piteh' ken, :yee' :Piteh' dhele-or-: dih, or 'dae:, :Gwlor :baa', :an mu 'on buh⧾ dih :dle :ke :e?

⁷'De :Yusu' 'da, Deh 'an no-a, :on se-eh yubo: :naa. Jorwor: :mor ti :zi-dih: 'o ken dih, :yee' :an mu-eh dih 'worn-:.

⁸'De :Piteh' 'da, 'Kei:. :On :se-' 'an buh⧾ dih :dle i, klehkpeh klehkpeh. 'De :Yusu' 'da, :Mor 'on se :on buh⧾ dih :dle, :yee' :on se 'for 'ble 'noror 'on bo.

⁹'De Samor' :Piteh' 'da, :Gwlor :baa', :yee' :mor eh :ne :ao', :yee' eh :se 'an buh⧾ :due' :deh, jorwor: 'an son⧾-: 'dekorn: 'an 'dlu-: en-' klehkpeh :ke.

¹⁰'De :Yusu' 'da, Nyor :or :dle-a, :yee' or-a' yau-a' klehkpeh :gweh :vlehehn'-' 'weh. :Mor or :na, :yee' deh :due' or :korn or 'ye-a' :dle, eh-: 'dhu or-a' buh⧾-'. A :gweh :vlehehn'-' 'weh. Jorwor: eh :se a-a' klehkpeh.

¹¹Deh :korn-a dhih, or :za-a deh :daa-', eh-: 'dhu, or yubo: nyor :or mu-or :plo 'weh.

¹²:Yeh or gweh-a an-a' buh⧾ dih :dle-eh 'i, :yee' or pa or-a'a: :gba 'vuu 'weh, 'de or mu 'o or 'bli ken :dhe-deh ken de, 'do :dha an di-dih-a deh. 'De or 'da, Deh 'on no-a 'do a bo, a 'worn-eh-: dih :e?

¹³A 'da-dih 'on, Nyor⧾ deh :torne-nyor-: 'dekorn: :Gwlor :baa'-:. Dhih 'jeh :oo', a za-a-'. 'Ka :wor eh :ne 'jeh ka.

¹⁴:Yee' :ka 'mor :or 'dhu-a a-a'a: :Gwlor :baa'-: 'dekorn: a-a'a: Nyor⧾ deh :torne-nyor-: 'de 'on :dle-a a-a' buh⧾ dih, :yee' 'ka-: a 'ye a 'bei'-a' buh⧾ dih :dle-eh no :ke.

¹⁵'On :torne: a deh :daa 'weh, a 'ye-eh' 'ye, 'de a 'ye-eh' no 'do a 'bei' bo :ke.

¹⁶Dhih 'jeh, 'an zela a :gwluhuh', 'bhoi-yu se 'i 'beh, or se 'o or-a'a: nyor :klaba'-' :zi. 'De mor dboo-nyor se 'i 'beh, or se 'o nyor :or dbo-or' :zi.

¹⁷:Yee' :ka a yubo:-a deh⧾ :daa :naa, :mor a no-ih, :yee' a mu :bhorlie' 'ye-: 'do en-' no-a' bo.

¹⁸Eh :se a-a' klehkpeh, 'on :se-' 'da. Nyor⧾ 'on gan-a 'de nyor⧾ 'klu-', 'on yubo-uh'. Jorwor: Nyorsoa-a' 'chlee-deh-a' wlu :korn on 'ye dhih 'jeh-' 'kpa, :on no-a, 'Yu :or :ne 'an kpuhba-a son⧾ ybei', or-a' 'jeh :dao', or-: 'bili: 'de 'on ya.

¹⁹'An sie ti de, 'an zela a deh :daa :gwluhuh' :dueh'leh:, 'de eh 'ye :no-eh:. :Yee' :mor eh :no-eh:, 'de a 'ye-eh' dhih 'jeh-' po nyor 'on no-a, 'on 'dhu-eh:-'.

²⁰Dhih 'jeh, 'an zela a :gwluhuh', nyor :or kpon-a nyor 'on dbo-a dih, :yee' nyor :dao', 'mor-: 'o or kpon dih. 'De nyor :or kpon-a 'on dih, :yee' nyor :or dbo-a 'on, or-: 'o or kpon dih :ke.

²¹:Yeh :Yusu' :za-a deh :daa-', :yee' or-a' :porluh-a 'beh-dih-or 'worn dih, 'de or :na 'bluhbor, or zela-uh :gwluhuh' deh 'jeh, or 'da, Dhih 'jeh, 'an zela a :gwluhuh', a-a' nyor :due', or-: mu 'on :plo.

²²:Yeh or :za-a deh :daa-', :yee' or-a'a: bo :na-nyor⧾-a no pobo: 'de :on 'be ya, 'de :on 'be pobo: 'de :on ya. Deh no-eh, nyor :Yusu'-a 'da-a, 'de on 'nyne-', on se-or yubo:.

²³:Yee' or-a'a: bo :na-yu :due' or :ybeh-a 'gabaa, or-: :ne 'o or 'bhun, 'do deh :di 'da.

²⁴Or-: Samor' :Piteh' no 'yli, or zela: :gwluhuh', or 'ye :Yusu' dih dhele: nyor or 'da-a.

²⁵:Yee' bo :na-yu: :dao', or 'koan'-dih: :Yusu'-: dih, 'de or dhele-or dih, or 'da, :Gwlor :baa', or-a' 'nyne :eh?

²⁶'De :Yusu' 'dae:, :Mor 'on tba 'de 'bhlee-yor-eh 'soma' bo, nyor 'an mu-eh 'nyi-:, :yee' or-: 'o. 'De or tba 'de 'bhlee-yor-eh 'de 'soma' bo, or 'nyi-eh :Juda' :Ehkeh'lior, :or no-a Samor'-a'a: 'yu.

²⁷:Yeh :Juda' 'duo:-a 'bhlee-yor-eh: :dao', :yee' 'do :dha :due' :dao', :yee' 'ku 'kpa 'o or :porluh ken 'weh. 'De :Yusu' :wlu 'de or bo, or 'dae:, Deh :an yi-a no 'da, 'dhobo:, :on 'ye-eh' no.

²⁸Deh or :za-a-', or-a'a: bo :na-nyor⧾-a' klehkpeh :on :ne-a 'o :dha an di-dih-a deh, on :se-eh' dih 'worn, deh :korn-a dhih or :za-a deh :dao', 'de or bo.

²⁹:Yee' :ka :Juda' no-a 'wlii dih :dhe-nyor 'do on bo, :yee' :mor an-a' :noo' :taa 'ye :dee', :yee' on 'da, :Yusu' zela-or :gwluhuh', or 'ye 'Meh-a' :bla-dih: 'dlu dih-gor-a' dii-deh:⧾ :dhen 'da mu. :Mor :noo' :taa 'ye :neheh', :yee' on 'da, :Yusu' zela-or :gwluhuh', or 'ye nyor⧾ :on se-a deh-a' :za-da 'ble, or 'ye-uh 'wlii 'nyi.

³⁰:Yeh :Juda' 'duo:-a 'bhlee-yor-eh-', :yee' 'do :dha :due' 'jeh :dao', :yee' or 'si-: 'zorn, 'de glu gor.

³¹:Yeh :Juda' 'si-a 'zorn, :yee' :Yusu' :wlu-', or 'dae:, Nyorsoa-a yi 'yu an 'da-dih-a Nyor-kpalu-a' 'yu, dhih-a' 'i 'beh-a' 'nyi 'da :naa, 'de nyor⧾ 'ye Nyorsoa-a' dhih-a' 'i 'beh-a' 'ye 'de or ya.

³²:Mor nyor⧾ 'ye Nyorsoa-a' dhih-a' 'i 'beh-a' 'de or ya, :yee' Nyorsoa-a mu :Yusu'-a' 'nyne dhih-a' 'i 'beh-a' 'nyi-: :ke. 'De mor or mu-eh bo 'dhobo:.

³³'An 'nynuu-a:, ti :en :sie:-a 'o, 'de 'on 'ye-a' dha a bo 'wluh, en :se 'i :dhie:. Deh 'on zela:-a :Jueh'-nyor⧾ :gwluhuh', eh-: 'o, 'an zela a :gwluhuh' :ke. A mu 'on 'kwla⧾-' dih 'bhorn-:. 'De mor, :Dha 'an mu-a, a se 'o-a' mu-a' 'beh-dih:.

³⁴'An 'nyi a 'tele' :dele', a :ybeh-dih:. :Ka 'on no-a a-a' :ybeh-a', 'ka-: a 'ye :ybeh-dih-eh no :ke.

³⁵:Mor eh 'dhu a :ybeh-dih:, :yee' :gwlor-nyor⧾-a' klehkpeh, an mu-eh yubo:, :ka a 'dhu-a 'an-a: bo :na-nyor⧾-'.

³⁶:Yeh :Yusu' 'da :ao', :yee' Samor' :Piteh' dhele-or-: dih, or 'da, :Gwlor :baa', dha :an mu :eh? 'De :Yusu' zela-or :gwluhuh', or 'da, :Dha 'an mu-a, :on se 'beh-dih: :on 'ye 'o 'on klei' zi :naa. Jorwor: :an mu 'on ken dih :yi 'de nya.

³⁷'De :Piteh' 'da, :Gwlor :baa', :eh :korn dhih, 'de 'on se 'o :an-a' klei' :zi-eh 'beh-dih: :naa :eh? Eh-a' :yeh 'dhu deh-', 'an mu 'an :febeh' 'kwla :za, 'on 'ye 'meh, 'do :an-a' dhih bo.

³⁸:Yee' :Yusu' 'da, :On 'beh-dih: :on 'ye :an-a' :febeh' 'kwla :za, 'do 'an dhih bo 'jeh ka :e? Dhih 'jeh, 'an zela :on :gwluhuh', :mor :soan'-beor 'ye zlo zorn bo-mlai', :yee' :an mu 'an dhih-' dhobo:, 'do kpor⧾ taan 'di.