Read Eastern Krahn :Jororn' 14 Bible Online

:Jororn' 14 - Eastern Krahn bible

:Jororn' 14

¹:Yee' :Yusu' :wlu-' 'de or-a'a: bo :na-nyor⧾ bo, or 'dae:, A-a' :porluh⧾-a' 'beh-dih:-' a 'worn dih. A dhe Nyorsoa :gwlii'. :Yee' a dhe 'on :gwlii' :ke.

²'De 'On-ba 'bli 'gbu, :chuu:⧾ :dhulu' :ne 'de. 'An mu :mu, 'on 'ye dha 'kpa po 'do a bo. :Mor eh se :ao' :ne, :yee' 'on :se-' a :gwluhuh' zela: i :dee'.

³:Yee' :mor 'on mu, :mor 'on gweh dha 'kpa :po-eh 'i, 'do a bo, :yee' 'an mu de :yi :neheh', 'de 'on 'ye 'de a kpa. 'De :dha 'on :ne-a, 'de a 'ye 'o :ne :ke.

⁴A yubo: :gwie: :eh mu-a 'de :dha 'an mu-a 'weh.

⁵:Yeh :Yusu' 'da :ao', :yee' :Tormor' :wlu-' 'de or bo, or 'dae:, :Gwlor :baa', 'do :dha :an mu-a, :a se-a 'o yubo:. :Yee' :kaa :a mu :gwie: :eh mu-a 'de, eh-a' yubo-eh :no :eh?

⁶'De :Yusu' 'dae: 'de or bo, 'Mor 'dhu :gwie: :eh no-eh 'de nyor⧾-a yubo-a dhih-a' 'yor-eh: :en kor-a Nyorsoa 'i, 'de :eh 'nyi-a nyor⧾ :febeh'. Nyor se 'beh-dih: or 'ye 'de 'On-ba bo mu, :mor eh 'dhu, or :yi-dih: 'on-' :gbor, 'de or 'ye 'de mu.

⁷:Mor eh 'dhu, a yubo: 'on 'jeh ka, :yee' a yubo: 'On-ba 'weh :ke. :Eh 'wluh-a dha 'zean' 'bli :naa, a 'ye-or', 'de a yubo-or.

⁸'De Felor' 'da, :Gwlor :baa', :torne: :on :Baa' :a-uh. :Yee' :a-a' :porluh⧾-a mu dih 'pehn-:.

⁹'De :Yusu' 'da, Deh :daa, 'on :ne a dha a bo :ne :nee:, :on se 'on yubo: 'gboror: :e? Nyor :or 'ye-a 'on, :yee' or 'ye 'On-ba 'weh. :Yee' :eh :korn dhih, :an dhele 'on dih, 'on 'ye 'On-ba a-uh :torne: :eh?

¹⁰:On se-eh dhih 'jeh-' po, :ka 'on :ne-a 'On-ba-', 'de 'On-ba :ne-a 'on-' :e? Eh :se 'de 'an 'jeh-a' 'kpih 'di, 'on :se-' deh⧾ :daa-' :za-dih: 'de a bo. Jorwor: 'On-ba: :or :ne-a 'on-', or-: 'o, :or no or-a' :koan.

¹¹A po 'on dhih 'jeh-', :mor 'on 'da, 'on :ne 'On-ba-' 'weh, 'de or :ne 'on-' :ke. :Mor a se deh⧾ 'on :za-a-' dhih 'jeh-' po, :yee' a po 'on dhih 'jeh-', 'do deh⧾ :kolu'⧾ 'on no-a, en-' dhih bo.

¹²Dhih 'jeh, 'an zela a :gwluhuh', nyor :or po-a 'on dhih 'jeh-', :yee' deh⧾ 'an no-a, or mu-ih :no :ke. 'De mor deh⧾-a' 'jeh or mu-a :no, en mu 'i 'beh-:, en 'ye 'o 'an ne-' :zi. Deh no-eh, 'an mu 'de 'On-ba bo de :mu.

¹³'De mor deh-beh-deh-beh: a mu-a 'yba-: 'de 'an 'nyne 'di, 'an mu-eh :no, 'de 'on 'ye 'On-ba-a' 'nyne dhih-a' 'i 'beh-a' 'nyi.

¹⁴:Yee' :mor a 'yba deh, 'de 'an 'nyne 'di, :yee' 'an mu-eh :no, 'do a bo.

¹⁵:Yee' :Yusu'-a kpa or-a' wlu 'dlu bo :chio'lo:, or 'dae:, :Mor a :ybeh 'on-', :yee' a mu 'o 'an 'tele' dih :dhe.

¹⁶:Yee' 'an mu 'On-ba dih dhele:, or 'ye nyor :noror' dbo, or 'ye a-uh' :za-dih:, 'de or 'ye 'o a bo :ne, :ka ti-a mu-a 'dlu-' :tehn.

¹⁷Nyor-a' 'jeh :dao', or-: 'dhu Nyorsoa-a' :Zulu: :an torne-a nyor⧾ dhih-a' 'yor-eh: :en kor-a Nyorsoa 'i. An-a' 'jeh :dao', 'kmo se an-a' dih :kpon-eh 'beh-dih:. Deh no-eh, on :se-uh' 'ye, 'de on se-uh yubo:. Jorwor: a :mor :mloror', a yubo-uh'. Deh no-eh, on :ne a-uh' 'weh, 'de mor an mu 'o a bo :ne.

¹⁸:Mor 'on mu, 'on :se-' a :sie: i, :eh gweh-a :ka 'kwie'-yu :sie:-a dha. 'An mu 'de a bo de :yi.

¹⁹Eh :se 'o :gwle i, :yee' 'kmo :se 'on 'ye-: i :neheh'. Jorwor: a :mor :mloror', a mu 'on 'ye-:. 'De mor :ka 'on :ne-a 'kmo, :yee' a mu 'kmo-' :ne :ke.

²⁰:Mor ti :dao', en nyni 'o, :yee' a mu-eh 'i yubo:, :ka 'on :ne-a 'On-ba-', 'de a :ne-a 'on-', 'de 'on :ne-a a-uh' :ke.

²¹Nyor-beh: :or 'ble-a 'an 'tele', 'de :or dhe-eh 'o dih, :yee' or-: no nyor :or :ybeh-a 'on-'. Nyor :or :ybeh-a 'on-', 'On-ba-a mu-or' :ybeh :ke. :Yee' 'an 'yor-eh mu-or' :ybeh :ke, 'de 'on 'ye 'an 'jeh, or 'i :to-dih:.

²²:Yeh :Yusu' :za-a deh :daa-', :yee' or-a'a: bo :na-nyor⧾-a' nyor :due' an 'da-dih-a :Juda', (Eh :se :Juda' :Ehkeh'lior:.) or-: :wlu, :or 'da, :Gwlor :baa', :eh no 'de :on 'da, :an mu :an-a' 'jeh :a 'i :to-dih:, 'de :on :se-' :an-a' 'jeh 'kmo 'i :to-dih: i :eh?

²³'De :Yusu' 'da, Nyor :or :ybeh-a 'on-', or-: mu 'o 'an 'tele' dih :dhe. 'On-ba-a mu-or' :ybeh :ke. :Yee' :a mu 'de :yi, :a 'ye 'de or 'di 'ti.

²⁴Nyor :or se-a 'on-' :ybeh, :yee' or :se 'o 'an 'tele' dih :dhe i. Nyor⧾ deh :torne-eh: a 'worn-a :naa, eh :se 'de 'on bo 'wluh. Jorwor: 'On-ba: :or dbo-a 'on, 'de or bo :oo', eh 'wluh.

²⁵'An zela deh⧾-a' klehkpeh :daa :gwluhuh' 'weh, :ka 'on :ne-a dha a bo :naa.

²⁶Jorwor: nyor⧾-' :za-dih-nyor: :or 'dhu-a Gban 'i :ne :Zulu-', or-: 'On-ba-a mu :dbo, 'de 'an 'nyne 'di. Or mu a deh⧾-a' klehkpeh :torne:. :Yee' deh⧾-a' klehkpeh 'on :za-a-' 'de a bo, or mu-ih a :gwluhuh' bo :po-dih:.

²⁷:Porluh-a' dih 'pehn-eh:, eh-: 'an sie-dih a-uh. 'An :porluh-a' dih 'pehn-eh: 'o, eh-: 'an 'nyi a-uh. 'On :se-eh' a 'nyi :ka 'kmo-a no-a eh-a' nyor⧾ 'nyi-eh. A-a' :porluh⧾-a' 'beh-dih:-' a 'worn dih. 'De mor a 'bor :fano: :ple-eh :ke.

²⁸A 'worn-eh', 'on zela: a :gwluhuh' 'weh, :ka 'an mu-a dha :mu, 'de 'an mu-a 'noror a bo de :yi. :Mor eh 'dhu, a :ybeh 'on-', :yee' a-a' :porluh⧾-a mu dih 'pehn-: :ka 'an mu-a 'de 'On-ba bo. Deh no-eh, 'On-ba 'beh-: 'i, or :zi 'o 'on-'.

²⁹'An zela a :gwluhuh' 'weh :dueh'leh:, 'de eh 'ye :no-eh:. 'De :mor eh :no-eh:, 'de a 'ye 'on dhih 'jeh-' po.

³⁰Eh :se 'o :gwle i, 'on 'ye wlu-a' 'bor 'de a bo. Deh no-eh, 'ku :on :korn-a dha yao 'zorn wlu 'ken, an yi-: 'de. Jorwor: on se 'kpih 'ble 'do 'on ken.

³¹Deh⧾-a' klehkpeh 'On-ba zela 'on :gwluhuh', me-: 'o, 'an no, 'de nyor⧾ :on :ne-a dha yao 'zorn, 'ye-eh' yubo: :ka 'on :ybeh-a 'On-ba-'. :Yeh :Yusu' gweh-a deh :daa eh-a' :za-a' 'i, :yee' or 'da, A :sorn-', :a 'ye mu.