Read Eastern Krahn :Jororn' 15 Bible Online

:Jororn' 15 - Eastern Krahn bible

:Jororn' 15

¹:Yee' :Yusu' :wlu-' :neheh', or 'dae:, 'Mor-: no tu 'jeh :no :an tlo-a 'bi. 'De 'On-ba no tu :dao', an-a' :kororn-nyor.

²'Gabuh⧾-a' klehkpeh :en tba-a 'o 'on 'bhun, 'de :en :se-a' 'bi :tlo i, me-: or mu 'o :chehn. Jorwor: :yih :en tlo-a 'bi, me-: or 'gbabo 'de dih, 'de en 'ye dih van-dih:, en 'ye 'bi :dhulu' :tlo.

³Wlu 'on :za-a-' 'de a bo, eh-: no-eh, 'de a :gweh :vlehehn'-' see.

⁴A :ne 'on-', :yee' 'an mu a-uh :ne :ke. Tu-a' 'gabuh se 'beh-dih: on 'ye 'bi :tlo, 'do an-a' 'jeh bo, :mor on se 'o tu 'bhun tba. 'De :ka :ne-a :due' 'di, a se 'beh-dih: a 'ye 'bi :tlo 'do a-a' 'jeh bo, :mor a se 'on-' :ne.

⁵'Mor-: 'o, :or no tu. :Yee' a :mor 'dhu tu-a' 'gabuh⧾-'. :Mor nyor :ne 'on-', 'de 'on 'ye-or' :ne, :yee' or mu 'bi :dhulu' :tlo. :Mor a se 'on-' :ne, a se 'beh-dih: a 'ye deh no.

⁶:Mor nyor se 'on-' :ne, :yee' or gweh tu-a' 'gabuh: :on :po-eh 'kwla, 'de :on :klor-a. 'Gabuh: :dao' :on :ne :ao', nyor⧾-a mu-uh' 'duo:, on 'ye-uh' 'yli 'dhu, 'de on 'ye sin.

⁷:Mor a :ne 'on-', 'de 'an wlu 'ye a-' :ne, :yee' deh a 'bhorn-a, a 'yba-dih-eh 'on, :yee' a mu-eh 'ye-:.

⁸:Mor a :tlo 'bi :dhulu', :yee' eh mu 'On-ba-a' 'nyne dhih-a' 'i 'beh-a' 'nyi-:, :yee' eh mu-eh nyor⧾ 'i :to-dih:, :ka a 'dhu-a 'an-a: bo :na-nyor⧾-'.

⁹:Ka 'On-ba no-a 'an :ybeh-a', 'ka-: 'on no a-a' :ybeh-a' :ke. :Yee' a no-eh, 'de 'on 'ye a-' :ybeh :chio'lo:.

¹⁰:Mor a dhe 'o 'an 'tele' dih, :yee' 'an mu a-' :ybeh :chio'lo:, :ka 'on no-a 'o 'On-ba-a' 'tele'-a' dih :dhe-eh, 'de or :ybeh-a 'on-' 'gabaa.

¹¹'On :za dhih :daa-' 'weh 'de a bo, 'de 'mona: :or 'yi-dih:-a 'on-' dih, or 'ye a-' dih 'yi-dih: :ke, or 'ye 'zorn 'wla.

¹²'An 'tele' :wor :dhe dih, a :ybeh-dih:, :ka 'on no-a a-a' :ybeh-a' :ke.

¹³:Ybeh-dih-eh-a' klehkpeh-a' 'dlu :wor 'dhu, nyor 'ye or-a' :febeh' 'kwla :za, or 'ye 'meh, 'do or 'bei'-a' dhih bo.

¹⁴:Mor eh 'dhu, a no deh 'an zela a :gwluhuh', :yee' a :mor 'an :ybeh-dih-nyor:⧾ 'o.

¹⁵'On :se-' a 'an-a: 'bhoi-nynuu 'da-dih: i :neheh'. Deh no-eh, 'bhoi-yu se deh or-a'a: nyor :klaba'-a no-a yubo:. Jorwor: 'an 'da-dih a 'an-a: :ybeh-dih-nyor:⧾. Deh no-eh, deh⧾-a' klehkpeh 'on 'chean'-a 'de 'On-ba 'kwa, me-: 'on :torne: a-uh.

¹⁶A :se 'on gan. Jorwor: 'mor gan a-uh, 'de :or tba a-uh :jii-eh, a 'ye mu, a 'ye 'kmo :sie-bi :tlo. :Yee' deh⧾-a' klehkpeh a mu-a 'yba-: 'de 'an 'nyne 'di, me-: 'On-ba-a mu a 'nyi-:.

¹⁷'An 'tele' :wor :dhe dih, a :ybeh-dih:.

¹⁸:Yee' :Yusu'-a kpa or-a' wlu 'dlu bo :chio'lo:, or 'dae:, :Mor 'kmo 'nyeh a-uh', :yee' a yubo-eh' :ka on 'nyeh-a 'on-' :zai'.

¹⁹:Mor a :korn 'de 'kmo bo :dee', :yee' an mu a-' :ybeh :ka on no-a an-a'a: nyor⧾-a' :ybeh-a'. :Ka eh :ne-a :naa, a se 'de 'kmo bo :korn. Jorwor: 'on :za 'de a nyor⧾ :on :korn-a 'de 'kmo bo 'klu-' 'weh. Eh-: :korn dhih, 'de 'kmo bo-nyor⧾ 'nyeh a-uh'.

²⁰A :po-dih: dhih 'on :za-a-' 'de a bo :gwluhuh' bo, 'on no-a, 'Bhoi-yu se 'i 'beh, or se 'o or-a'a: nyor :klaba'-' :zi. :Ka nyor⧾ 'ye-dih:-a 'on 'kle, :yee' an mu a 'kle 'ye-dih: :ke. :Ka nyor⧾ :noo' dhe-a 'o 'an 'tele' dih, :yee' an mu 'o a-a' 'tele' dih :dhe :ke.

²¹'Kle :dao', eh-: an mu a 'ye-dih:, 'do deh a zi-a 'o 'on klei', eh-a' dhih bo. Deh no-eh, on se nyor :or dbo-a 'on yubo:.

²²:Mor 'on se 'de yi :dee', 'de 'on 'ye :ao', 'on se 'de on bo :wlu, :yee' deh⧾-zon⧾-a' zabe :se-uh' :kpon i :dee'. Jorwor: :ka 'on :wlu-a 'de on bo :naa, :yee' on se deh 'ble, on 'ye-a 'o :za-dih:, 'do an-a' deh⧾-zon:⧾ :no-eh bo.

²³Nyor :or 'nyeh-a 'on-', :yee' or 'nyeh 'On-ba-' 'weh :ke.

²⁴'On no deh⧾ :kolu'⧾ nyor 'see-a no :zai', 'de on 'nyne-'. :Mor on se deh⧾ :daa 'ye :dee', :yee' deh⧾-zon⧾-a' zabe :se-uh' :kpon i :dee'. Jorwor: on 'ye 'on 'weh, 'on no-ih', 'de on 'nyeh 'mor-: 'dekorn: 'On-ba-: 'gboror:.

²⁵Deh :daa, eh :no-eh:-', 'de an-a'a: 'tele' 'ye dhih 'jeh-' 'kpa, :ka eh no-a eh-a' :za-a', eh 'da, Dhih on 'nyeh-a 'on-', en se 'nyne :korn.

²⁶:Mor nyor⧾-' :za-dih-nyor: :or :ne-a 'de 'On-ba bo, 'an mu a :dbo, :mor or 'yle, :yee' or mu 'an dhih ken dih zela:. Or-: 'dhu Gban 'i :ne :Zulu-' :an torne-a nyor⧾ dhih-a' 'yor-eh: :en kor-a Nyorsoa 'i.

²⁷A :mor :ke, a mu 'an dhih ken dih zela:. Deh no-eh, a :ne 'o 'on bo 'weh, :eh 'wluh-a 'de 'an-a: :koan-a' glu 'dhu 'da.