Read Eastern Krahn :Jororn' 16 Bible Online

:Jororn' 16 - Eastern Krahn bible

:Jororn' 16

¹:Yee' 'on zela: a deh⧾ :daa :gwluhuh' 'weh :naa, 'de a :ne 'o :gwie 'i 'wluh.

²An mu a 'de an-a' 'di :gweh-dih-sla⧾ 'zorn :za. Keen' 'jeh, ti-a mu 'o :nyni, nyor :or mu-a a 'dba-:, :mor or :taa 'ye :dee', :yee' or 'da, or no Nyorsoa-a' :koan:.

³An mu deh⧾ :daa :no, deh no-eh, on se 'On-ba-: 'dekorn: 'mor-: :a-a' nyor yubo: deh 'jeh.

⁴'On zela: a deh⧾ :daa :gwluhuh' 'weh, 'de :mor en-' ti nyni 'o, 'de a 'ye-eh' :gwluhuh' bo :po-dih:, :ka 'on zela: a :gwluhuh' see. 'On :se-' a deh⧾ :daa :gwluhuh' zela: :zai'. Deh no-eh, 'an 'jeh 'yor-eh :ne :daa a bo 'weh.

⁵:Kana :naa nyor :or dbo-a 'on, 'de or bo 'an mu de. Jorwor: a-a' nyor 'see 'on dih dhele :dha 'an mu-a :mu.

⁶Deh 'on zela:-a a deh⧾ :daa :gwluhuh', eh-: no-eh, 'de a-a' :porluh⧾ 'kpa 'zorn.

⁷Jorwor: dhih 'jeh, 'an zela a :gwluhuh', eh mu 'yi dih :nmor 'do a bo, 'on 'ye mu. Deh no-eh, :mor 'on se mu, :yee' nyor⧾-' :za-dih-nyor :se 'noror a bo :yi i. Jorwor: :mor 'on mu, :yee' 'an mu-or 'noror a bo :dbo.

⁸:Mor or 'yle, :yee' or mu deh⧾ 'bluhba-a zi-a 'i, on :gwluhuh' zela:, 'do deh⧾-zon:⧾ on no-a bo. Or mu-uh 'yi 'sleh-deh:⧾ on 'ye-a' no, 'do Nyorsoa ybei' :torne:. :Yee' or mu-uh deh :mor nyor⧾ no-a, 'de Nyorsoa-a' zabe-a kpon-uh-a, or mu-eh 'bluhba :torne:.

⁹:Ka on no-a deh⧾-zon⧾-a' dih 'worn-eh, 'do an-a' 'jeh bo, eh-: no-eh, 'de an zi deh⧾ 'i. Deh no-eh, on :se-' 'on dhih 'jeh-' po.

¹⁰Or mu-uh 'yi 'sleh-deh:⧾ on 'ye-a' no, 'do Nyorsoa ybei' :torne:. Deh no-eh, 'an mu 'de 'On-ba bo de. 'De mor a :se-' 'on 'ye-: i :neheh'.

¹¹Or mu-uh deh, :mor nyor⧾ no-a, 'de Nyorsoa-a' zabe-a kpon-uh-a, or mu-eh 'bluhba :torne:. Deh no-eh, Nyorsoa-a' zabe kpon 'ku :on :korn-a dha yao 'zorn wlu 'ken 'weh see.

¹²'On 'ble deh⧾ :dhulu' 'on 'ye a :gwluhuh' zela:. Jorwor: :mor 'on za-ih', :yee' a-a' :porluh⧾-a mu 'zorn 'kpa-:. Deh no-eh, a se en-' 'yi :nyna-a' 'beh-dih: :naa.

¹³Jorwor: Nyorsoa-a' :Zulu: :an torne-a nyor⧾ dhih-a' 'yor-eh: :en kor-a Nyorsoa 'i, :mor on 'yle, an mu-eh :no, 'de a 'ye dhih-a' 'yor-eh-a' klehkpeh :en kor-a Nyorsoa 'i yubo:. On :se 'de an-a' 'jeh-a' 'kpih 'di :wlu-dih: i. Deh on 'worn-a, eh-: an mu-' :za. :Yee' deh⧾ :en mu-a :no-eh 'de ybei', me-: an mu a :gwluhuh' zela:.

¹⁴An mu 'an 'nyne dhih-a' 'i 'beh-a' 'nyi-:. Deh no-eh, deh⧾ 'on :za-a-', me-: an mu a :gwluhuh' zela:.

¹⁵Deh⧾-a' klehkpeh 'On-ba 'ble-a, 'mor korn-ih. Eh-: :korn dhih, 'on :wlu 'de a bo, 'on 'da, deh⧾ 'on :za-a-', me-: or-a' :Zulu-a mu a :gwluhuh' zela: :ke.

¹⁶:Yee' :Yusu'-a kpa or-a' wlu 'dlu bo, or 'dae:, Eh :se 'o :gwle i, a 'ye 'an 'ye-a' 'bor. 'De :mor ti-bei :zi-dih: 'o ken dih, :yee' a mu 'on 'ye-: :neheh'.

¹⁷:Yeh or 'da :ao', :yee' or-a'a: bo :na-nyor⧾-a' :noo' :wlu-' 'de an-a' 'jeh 'nyne-', on 'dae:, :Mor or 'da, Eh :se 'o :gwle i, a 'ye 'an 'ye-a' 'bor. 'De :mor ti-bei :zi-dih: 'o ken dih, :yee' a mu 'on 'ye-: :neheh', :mor or 'da :ao', :yee' deh eh 'dhu-eh:-' :eh? 'De or :wlu :neheh', or 'da or mu 'de or :Baa' bo, eh-: :korn dhih :a :se-or' 'ye-: i.

¹⁸:Yee' an dhele-eh-: dih :chio'lo:, on 'dae:, :Mor or 'da, 'do ti-bei 'di, :yee' deh eh 'dhu-eh:-' :eh? Deh or :za-a-', :a-a' 'worn-eh-' dih.

¹⁹:Yee' :Yusu' yubo-eh', :ka an 'bhorn-a on 'ye-or' dih dhele: 'do deh or :za-a-' 'de on bo, 'do eh-a' dhih bo. Eh-: no-eh, 'de or :wlu 'de on bo, or 'dae:, A 'chihleh-eh 'i, 'de a-a' 'jeh 'nyne-', :eh :mor deh 'on :za-a-', deh eh 'dhu-eh:-' :e? Deh 'on no-a, Eh :se 'o :gwle i, a 'ye 'an 'ye-a' 'bor. 'De :mor ti-bei :zi-dih: 'o ken dih, :yee' a mu 'on 'ye-: :neheh'.

²⁰Dhih 'jeh, 'an zela a :gwluhuh', a mu 'vin-:, 'de a 'ye 'zlu. Jorwor: 'kmo bo-nyor⧾-a mu 'mona :no. A-a' :porluh⧾-a mu 'zorn 'kpa-:. Jorwor: a-a' :porluh⧾-a' 'zorn 'kpa-eh: :dao', eh mu 'mona-' :za-dih:.

²¹:Mor 'kwli :taa 'nynor no, :yee' or 'ye or-a' 'jeh worn. Deh no-eh, or-a' :gbano: :za-ti nyni 'o 'weh. Jorwor: :mor 'yu 'wluh, :yee' or 'ma-dih: 'kle or 'ye-a, eh-a' dhih-: bo. Deh no-eh, or-a' :porluh 'pehn-: dih, :ka 'yu :dele' 'wluh-a dha yao 'zorn.

²²'Ka-: 'o, eh :ne :ke, 'do a bo. :Yeh :daa :naa, a-a' :porluh⧾ 'kpa-: 'zorn. Jorwor: 'an mu a 'ye-: :neheh'. :Mor 'on 'ye a-uh, :yee' 'mona-a mu a-' dih 'yi-dih:, 'de nyor se 'beh-dih:, or 'ye-a 'mona: :dao', 'kwa :za.

²³:Mor 'we-eh: :dao', eh nyni 'o, :yee' a :se 'on deh dih dhele: i :neheh'. Dhih 'jeh, 'an zela a :gwluhuh', deh-beh-deh-beh: a mu-a 'On-ba 'yba-dih: 'de 'an 'nyne 'di, eh-: or mu a 'nyi-:.

²⁴:Eh 'wluh-a 'o ti :dao' bo, :eh :yeh-dih:-a ti :daa ken, a 'see deh 'yba 'de 'an 'nyne 'di. A 'yba-dih: Nyorsoa deh, 'de 'an 'nyne 'di, :yee' a mu-eh 'ye-:. :Yee' 'mona-a mu a-' dih 'yi-dih:.

²⁵:Mor 'on :taa wlu 'de a bo, :yee' 'an wlu-dih 'de 'dlan⧾ 'di. Jorwor: ti-a mu 'o :nyni, 'on :se 'de 'dlan⧾ 'di :wlu-dih: i :neheh'. Jorwor: 'an mu wlu dih 'si-dih:, :mor 'on :taa 'On-ba-a' dhih-' za.

²⁶'Do 'we-eh: :dao' 'di, a mu-or deh 'yba-dih: 'de 'an 'nyne 'di. 'On se :ao', 'mor-: mu-or deh dih dhele: 'do a-a' 'gor bo.

²⁷Jorwor: 'On-ba-a' 'jeh 'yor-eh :ybeh a-uh' 'weh. Deh no-eh, a :ybeh 'on-' 'weh, 'de a po-eh dhih 'jeh-', :ka 'on 'wluh-a 'de or bo.

²⁸'On 'wluh 'de 'On-ba bo, 'de 'on yi dha yao 'zorn. Jorwor: :yeh :daa :naa, 'an 'wluh dha yao 'zorn 'weh, 'de 'an mu 'de or bo de.

²⁹:Yeh or 'da :ao', :yee' or-a'a: bo :na-nyor⧾ :wlu-' 'de or bo, on 'dae:, Jorwor: :on 'si-dih: wlu dih :naa, 'de :on 'bor 'de 'dlan⧾ 'di :wlu-dih-eh.

³⁰:Kana :naa, :a yubo-eh' deh 'jeh, :ka :on yubo:-a deh⧾-a' klehkpeh. :Yee' eh-a' dhih, nyor se :korn or 'ye :on deh :gwluhuh' zela:. Eh-: no-eh, 'de :a po-eh dhih 'jeh-', :ka :on 'wluh-a 'de Nyorsoa bo 'jeh ka.

³¹'De :Yusu' 'da, Jorwor: a po 'on dhih 'jeh-' :naa :e?

³²Jorwor: ti-a mu 'o :nyni, 'de en nyni 'o 'weh :naa, a 'ye dih :gba, a 'ye a 'bli deh⧾-' dih mu, a 'ye 'o 'on dih sie. Jorwor: 'on se :due' :ne, deh no-eh, 'On-ba :ne 'o 'on bo 'weh.

³³'An zela a deh⧾ :daa :gwluhuh' 'weh, 'de a 'ye :porluh-a' dih 'pehn-eh 'ye, 'an dhih. A mu 'kle 'ye-: dha yao 'zorn. Jorwor: a ku 'di dih. 'On du 'kmo-a' 'kpih 'weh.