Read Eastern Krahn :Jororn' 17 Bible Online

:Jororn' 17 - Eastern Krahn bible

:Jororn' 17

¹:Yeh :Yusu' gweh-a deh⧾ :daa, en-' :za-a' 'i, :yee' or pobo: 'de Nyorsoa 'bli yai', 'de or :wlu, or 'da, 'On-ba:, ti nyni 'o 'weh :naa. 'Nyi 'mor :or 'dhu-a :an-a' 'Yu-', 'an 'nyne dhih-a' 'i 'beh-a', 'de 'on 'ye :an-a' 'nyne dhih-a' 'i 'beh-a' 'nyi :ke.

²Deh no-eh, :on 'nyi 'on 'kpih 'do :gwlor-nyor⧾-a' klehkpeh ken, 'de 'on 'ye nyor⧾-a' klehkpeh :on 'nyi-a 'on, 'kmo :sie: :febeh' 'nyi.

³'Kmo :sie: :febeh' :wor 'dhu, on 'ye :on yubo:, :mor :or 'dhu-a Nyorsoa :due' 'klein' 'jeh ka, 'de on 'ye 'mor :or 'dhu-a :Yusu' 'Klae-', :on dbo-a yubo: :ke.

⁴'On 'nyi :an-a' 'nyne dhih-a' 'i 'beh-a' 'weh, dha yao 'zorn, 'do :koan: :on 'nyi-a 'on, or-a' 'yi :gweh-eh bo.

⁵:Yee' 'On-ba:, 'nyi 'an 'nyne dhih-a' 'i 'beh-a' :naa 'do :on ybei'. 'Nyi 'on dhih-a' 'i 'beh-a' :daa 'on 'ble-a 'de :on bo, 'de jorwor: 'bluhba-a mu-a :no-eh.

⁶Nyor⧾ :on 'nyi-a 'on, :on :za-a: 'de 'kmo 'di, mo-: 'on no-eh, 'de on yubo: :on deh 'jeh. On :korn 'de :on bo, 'de :on 'nyi-uh 'on, 'de on dhe 'o :an-a' wlu dih.

⁷:Yee' on yubo-eh' :naa, :ka deh⧾-a' klehkpeh :on 'nyi-a 'on, en 'wluh-a 'de :on bo.

⁸Deh no-eh, wlu :on 'nyi-a 'on, mo-: 'on 'nyi-uh, 'de on kpon-uh dih. :Yee' on yubo-eh' deh 'jeh neh, :ka 'on 'wluh-a 'de :on bo. 'De on po-eh dhih 'jeh-', :ka eh 'dhu-a :on mor-', :or dbo-a 'on.

⁹'An wlu 'de :on bo, 'do an-a' dhih bo. Eh :se 'kmo-a' dhih, 'on :se 'de :on bo :wlu. Jorwor: :yuh :on 'nyi-a 'on, an-a' dhih, 'an wlu 'de :on bo. Deh no-eh, on :korn 'de :on bo.

¹⁰Nyor⧾-a' klehkpeh 'on 'ble-a, on :korn 'de :on bo. 'De mor nyor⧾-a' klehkpeh :on 'ble-a, on :korn 'de 'on bo :ke. Nyor⧾-a' 'jeh :dao', mo-: :to-dih-eh nyor⧾ 'i, :ka 'an dhih 'beh-a 'i.

¹¹'On :se-' dha yao 'zorn :ne i :neheh'. 'An yi 'de :on bo 'weh :naa. Jorwor: on :mloo', on sie dha yao 'zorn 'weh 'gboror:. 'On-ba: :or :ne-a gban 'i, :an-a' 'worn-:-' deh-a' :no-uh', de :an-a' 'yor-eh-a' 'kpih :on 'nyi-a 'on 'di. 'De :ka :a no-a nyor :due', on 'ye :ao' :ne :ke.

¹²Ti 'on :ne-a 'de on bo, 'on :se-' 'worn deh :se-uh' no, 'de 'kpih :on 'nyi-a 'on 'di. 'On pobo: 'o on bo dih 'weh, 'de an-a' nyor :ne-' 'ma. Jorwor: :yor :or :korn-a :or 'ye-a' gbe :zie:, 'de deh :an-a' 'chlee-deh :za-a-', eh 'ye-a' dhih 'jeh-' 'kpa, or :due' :oo', :or 'ma.

¹³'An yi 'de :on bo 'weh :naa. 'An za deh :daa-' 'weh :naa, :ka 'on :ne-a 'noror yao 'zorn 'gboror:, 'de 'an 'mona 'ye-uh' dih 'yi-dih: 'gabaa.

¹⁴'On po :an-a' tubo-wlu⧾ 'weh, 'noror on bo. Eh-: :korn dhih, 'de 'kmo 'nyeh-uh'. Deh no-eh, on se 'de 'kmo 'di :ne, :ka 'on no-a, 'de 'on se-a 'de 'kmo 'di :ne :ke.

¹⁵'On :se-' :on dih dhele:, :on 'ye-uh 'noror 'kmo bo :za, jorwor: :on 'ye-uh 'ku bo dih :tehn-dih:.

¹⁶On se 'de 'kmo 'di :ne, :ka 'on no-a, 'de 'on se-a 'de 'kmo 'di :ne :ke.

¹⁷:An-a' wlu no dhih-a' 'yor-eh:. :Yee' no :an-a' wlu :daa, 'de nyor⧾ :daa, on 'ye 'for 'i :dhe-dih-eh: 'do :on bo.

¹⁸:Ka :on no-a, 'de :on dbo-a 'on, 'noror 'kmo bo, 'ka-: 'o, 'on no, 'de 'on dbo-uh 'noror 'kmo bo :ke.

¹⁹'On dhe-dih: 'an 'jeh 'for 'i 'do :on bo, 'do an-a' dhih bo, 'de an-a' 'jeh :ke, on 'ye 'for 'i :dhe-dih-eh: 'jeh ka 'do :on bo.

²⁰Eh :se 'an-a: bo :na-nyor:⧾ :daa, an-a' dhih :due', 'on :se 'de :on bo :wlu. 'An wlu 'de :on bo 'weh, 'de :yuh :an mu-a 'on dhih 'jeh-' :po, :mor on 'worn tubo-wlu:⧾ 'an-a: bo :na-nyor⧾-a mu-a :po, 'de on bo.

²¹'Nyi an-a' klehkpeh no nyor :due', 'On-ba:, :ka :on :ne-a 'on-', 'de 'on :ne-a :on-' :ke. :Yee' 'nyi on :ne :a no nyor :due', 'de 'kmo 'ye-eh' dhih 'jeh-' po, :ka eh 'dhu-a :on mor-', :or dbo-a 'on.

²²Dhih-a' 'i 'beh-a' :on 'nyi-a 'on, or-: 'on 'nyi-uh :ke. 'De :ka :a no-a nyor :due', on 'ye :ao' :ne :ke.

²³'On ne-uh' 'weh, 'de :on :ne 'on-'. :Yee' 'nyi on no nyor :due' 'jeh ka, 'de 'kmo 'ye-eh' yubo: :ka eh 'dhu-a :on mor-', :or dbo-a 'on, 'de :on ybeh-uh-a-', :ka :on no-a 'an :ybeh-a' :ke.

²⁴'On-ba:, 'an 'bhorn nyor⧾ :on 'nyi-a 'on, :dha 'on :ne-a, on 'ye 'o :ne :ke, 'de an-a' 'yli 'ye 'an dhih-a' 'i 'beh-a' 'ye. Dhih-a' 'i 'beh-a' :daa, :mor 'o :or 'nyi-eh 'on, deh no-eh, :on :ybeh 'on-' 'weh, 'de jorwor: 'bluhba-a mu :no-eh.

²⁵'On-ba:, :or 'sleh-a 'i, keen' :mloror' 'kmo se :on yubo:, jorwor: 'on yubo: :on 'weh. 'De mor nyor⧾ :on 'nyi-a 'on, on yubo-eh' :ka eh 'dhu-a :on mor-' :or dbo-a 'on.

²⁶'On no-eh', 'de 'kmo yubo: :on, 'de mor 'an mu-eh :no :chio'lo:, on 'ye :on yubo:, 'de jorwor: :ybeh-a' :on 'ble-a 'do 'on bo, eh 'ye-uh' :ne, 'de 'an 'jeh 'yor-eh 'ye-uh' :ne :ke.