Read Eastern Krahn :Jororn' 18 Bible Online

:Jororn' 18 - Eastern Krahn bible

:Jororn' 18

¹:Yeh :Yusu' gweh-a 'de Nyorsoa bo :wlu-eh 'i, :yee' or-: or-a'a: bo :na-nyor⧾-: on mu-', 'de on 'dhan 'ni-yu: an 'da-dih-a 'Kedlor, on pa 'de 'dhuu'-deh⧾-a' gba-dih-gba :or :ne-a 'o 'di.

²:Yee' :Juda' :or plo-a :Yusu', or yubo: 'o :dha 'o 'weh, deh no-eh, :Yusu'-: 'dekorn: or-a'a: bo :na-nyor⧾-: an 'gbon-dih 'o 'weh, 'do ti-a' klehkpeh bo.

³:Yee' :Juda' mu 'de 'dhuu'-deh⧾-a' gba-dih-gba :dao' bo 'weh, 'de or kpa 'Wloon-sorye' :noo'-: 'dekorn: Nyorsoa-a' 'sla-a' :poli'si: :noo'-: :yuh Nyorsoa-a' 'slaa: :za-nyor:⧾ :klaba'⧾-: 'dekorn: :Falasi'i-nyor⧾-: on dbo-a. An-a' klehkpeh :dao', on kpa :dhali-pu⧾-: 'nape⧾-: 'dekorn: :vorn-dih-deh⧾-: on 'ye :Yusu' kpon.

⁴:Yeh on 'ye :ao' no, :yee' :Yusu' yubo: deh⧾-a' klehkpeh :en mu-a :no-eh, 'do or 'bhun 'weh see. :Yeh or 'ye-uh'-a, :yee' or 'wluh 'de gba-dih-gba 'di 'weh, 'de or 'ya-dih-uh 'i. :Yee' or dhele-uh-: dih, or 'dae:, Nyor a 'bhorn 'kwla⧾-' dih :eh?

⁵'De on 'da, :Yusu' :or 'wluh-a 'Nazla, or-: 'o :a 'bhorn 'kwla⧾-' dih. 'De :Yusu' 'da, 'Mor-: :dhe dih. :Yeh deh⧾ :daa, en mu-a 'dlu bo, :yee' 'do :wor :Juda' :or plo-a :Yusu', or :ne.

⁶:Yeh :Yusu' no-a, 'Mor-: :dhe dih, :yee' nyor⧾ :dao', on :za-dih: ken, 'de an-a' klehkpeh 'ga dih 'do 'bluhbor.

⁷:Yee' or dhele-uh-: dih :neheh', or 'dae:, Nyor a 'bhorn 'kwla⧾-' dih :eh? 'De on 'da, :Yusu' :or 'wluh-a 'Nazla :oo'.

⁸'De or 'da, 'On zela: a :gwluhuh' 'weh, 'on 'da, 'Mor-: :dhe dih. :Mor eh 'dhu 'mor-', a :taa 'kwla⧾-' dih 'bhorn, :yee' a 'tali: nyor⧾ :yuh :daa dih, on 'ye mu. (

⁹Deh :daa, eh :no-eh:-', 'de or-a' wlu or :za-a-', on 'ye dhih 'jeh-' 'kpa, :eh 'dhu-a, 'On-ba:, nyor⧾ :on 'nyi-a 'on, 'on :se-' an-a' nyor :due' 'ma-dih:.)

¹⁰:Yeh eh no :ao', :yee' Samor' :Piteh' :or 'ble-a :bhla 'jlehn, :yee' or jli-eh 'de kpla-'-: dih, 'de or po-eh, or chehn 'o Nyorsoa-a' 'slaa: :za-nyor⧾-a' nyor :klaba'-a'a: 'bhoi-yu-a' :dila-dou'. 'Bhoi-yu: :dao', or-a' 'nyne :wor :Mala'ka:.

¹¹Jorwor: :Yusu' :wlu-' 'de :Piteh' bo, or 'da, Po 'de :an-a'a: :bhla 'jlehn 'de kpla-' de. 'Kle 'ye-eh-a' 'korbuh 'On-ba: 'nyi-a 'on, 'on 'ye-a' 'di 'na-dih:, 'on :se-uh' 'di 'na-dih: i :e?

¹²:Yee' sorye' :dao'-: an-a'a: :janbe-: 'dekorn: :Jueh'-nyor⧾-a' :poli'si: :dao'-: mo-: kpon :Yusu'. 'De on san-or,

¹³on kpa-or 'de 'yu :due' an 'da-dih-a 'Aneh bo :zai'. 'Aneh no :Kai'fa-a'a: 'nynor :baa'. 'De :Kai'fa no Nyorsoa-a' 'slaa: :za-nyor⧾-a' nyor :klaba' 'do zon :dao' 'di.

¹⁴:Kai'fa-a' 'jeh :dao', or-: 'o, :or :wlu 'de :Jueh'-nyor⧾ bo :dee' see, or 'da, eh :nmor-: 'yi nyor :due' 'ye 'meh 'do :gwlor-nyor⧾-a' klehkpeh-a' dhih bo.

¹⁵:Yee' Samor' :Piteh'-: 'dekorn: :Yusu'-a'a: bo :na-nyor: :noror'-: mo-: zi 'o :Yusu' klei'. Jorwor: :ka Nyorsoa-a' 'slaa: :za-nyor⧾-a' nyor :klaba' yubo:-a bo :na-yu: :dao', :yee' or :due' mu 'o Nyorsoa-a' 'slaa: :za-nyor⧾-a' nyor :klaba'-a'a: 'gbu ybei', or zi 'o :Yusu' klei'.

¹⁶Jorwor: :Piteh' :se 'o mu. Or fuo-uh-: 'ken 'do gba-dih-gba-a' :kpaa' worn 'i, 'noror 'zorn. :Yee' :Yusu'-a'a: bo :na-yu: :dao', Nyorsoa-a' 'slaa: :za-nyor⧾-a' nyor :klaba' yubo:-a, or yi-: de, 'de or :wlu 'de 'nynor-kpao'-yu: :or 'dhu-a :kpaa' 'yli-eh bo, 'de or 'worn or 'ye :Piteh' :pa-dih:.

¹⁷:Yeh :Piteh' pa-a, :yee' 'nynor-kpao'-yu: :dao', or :wlu-' 'de or bo, or 'dae:, :On :se :Yusu'-a'a: bo :na-nyor⧾-a' nyor :due' ke :e? 'De :Piteh' 'da, 'Kei:. Eh :se 'mor-:.

¹⁸'Do ti :dao' 'di, :yee' :chehbe'-a: 'yle. Eh-: no-eh, 'de 'bhoi-nynuu-: 'dekorn: :poli'si: :dao'-: on dhba neh, 'de an 'wona. 'De :Piteh' mu 'o :ke, or 'ye 'wona:.

¹⁹:Yeh deh⧾ :daa, en mu-a 'dlu bo, :yee' Nyorsoa-a' 'slaa: :za-nyor⧾-a' nyor :klaba'-a 'chleh :Yusu', 'do or-a'a: bo :na-nyor⧾-: 'dekorn: or-a' nyor⧾ deh :torne-eh-: en-' dhih bo.

²⁰:Yee' :Yusu' :wlu-' 'de or bo, or 'dae:, :Mor 'on :taa 'de nyor⧾ :on :ne-a dha 'kmo bo wlu, :yee' 'an nyna 'o :gwlor :gwea dih. 'Do ti-a' klehkpeh bo, 'an torne nyor⧾ deh, 'de :a-a'a: 'di :gweh-dih-sla⧾ 'zorn-: 'dekorn: 'do Nyorsoa-a' 'sla ybei'-: :dha :Jueh'-nyor⧾-a' klehkpeh, an 'kpa-dih-a :dha :due'. 'On 'see deh-' za, 'de 'gbu 'de.

²¹:Eh :korn dhih, 'de :an 'chleh 'on :eh? Dhele: nyor⧾ :on 'worn-a 'an wlu dih. On yubo: deh 'on :za-a-' 'weh.

²²:Yeh :Yusu' :za-a deh :daa-', :yee' :poli'si-yu :due', :or :nyna-a 'o or 'bhun dih, or-: po-or 'kpa 'yli, 'de or 'da, 'Ka-: nyor no 'de Nyorsoa-a' 'slaa: :za-nyor⧾-a' nyor :klaba' bo :wlu-eh :e?

²³'De :Yusu' 'da, :Mor 'on :za deh-zon-', :yee' za-eh'. Jorwor: :mor deh⧾ 'on :za-a-', :mor en 'dhu dhih 'jeh-', :yee' :eh :korn dhih, :on po 'on 'kpa 'yli :eh?

²⁴:Yee' :ka on no-a or-a' san-a' :chio'lo:, :yee' 'ka-: or :ne, 'de 'Aneh dbo-or 'de :Kai'fa bo, :or no-a Nyorsoa-a' 'slaa: :za-nyor⧾-a' nyor :klaba'.

²⁵:Yeh deh⧾ :daa, en mu-a 'dlu bo, :yee' 'do :wor Samor' :Piteh' :ne, or 'wona 'gboror:, 'de on dhele-or dih, on 'da, :An-a' 'jeh :daa, :on :se :Yusu'-a'a: bo :na-nyor⧾-a' nyor :due' :ke :e? :Yeh on dhele-or dih, :yee' or dhobo-ih' 'weh, or 'da, Keen'. Eh :se 'mor-:.

²⁶:Yeh :Piteh' 'da :ao', :yee' Nyorsoa-a' 'slaa: :za-nyor⧾-a' nyor :klaba'-a'a: 'bhoi-yu :due', :or :ne 'yu :or :korn-a :dou' :Piteh' chehn-a 'o, on 'wluh-a, or-a' 'jeh :dao', or-: dhele: :Piteh' dih, or 'dae:, Eh :se :mor, 'on 'ye-a 'de 'dhuu'-deh⧾-a' gba-dih-gba 'di, 'do :Yusu' bo :e?

²⁷:Yee' :Piteh' dhobo-ih' :neheh' :dele' ka. :Yee' 'do :dha :due' :dao', :soan'-beor zlo-'.

²⁸:Yee' :Jueh'-nyor⧾-a' nyor⧾ :na-dih-nyor⧾ :za 'de :Yusu' 'de :Kai'fa bo, 'de on kpa-or 'de 'Wloon-gomla-a' nyor :klaba'-a'a: 'sla bo, zorn bo-mlai'. Jorwor: :Jueh'-nyor:⧾ :dao', on :se-' 'bhorn on 'ye :kane' dih :ne. Eh-: no-eh, 'de on :se 'de 'sla :dao' ya 'ya. :Mor on no-eh, :yee' on se 'beh-dih: on 'ye 'Meh-a' :bla-dih: 'dlu dih-gor-a' dii-deh⧾ di.

²⁹Eh-: no-eh, 'de Pale' :or no-a 'gomla-nyor⧾-a' nyor :klaba' :dao', or 'si 'noror on bo 'zorn dih, 'de or dhele-uh dih, or 'dae:, Deh 'i-deh: 'yu :daa, or no, 'de a ya-or 'noror 'on bo :eh?

³⁰'De on 'da, :Mor or se deh-zon no :dee', :yee' :a :se-or' 'noror :on bo :ya i.

³¹:Yee' Pale' 'dae:, A-a' 'jeh 'yor-eh, a 'duo-or', a 'ye-or' zabe zi, :ka a-a'a: 'tele' no-a mu-a'. 'De on 'da, :A se 'kpih 'ble, :a 'ye nyor wlu 'ken chehn, or 'ye 'meh. (

³²Deh :daa, eh :no-eh:-', 'de deh :Yusu' :za-a-', 'de eh 'ye dhih 'jeh-' 'kpa, 'do 'meh-a' or mu-a 'meh-:, :ka or :korn or 'ye-a' :ne.)

³³:Yee' Pale' 'ya 'de or 'bli 'sla ya-: de :neheh', 'de or 'da :Yusu' 'do or bo, or 'dae:, :Mor 'o, :or 'dhu :Jueh'-nyor⧾-a' 'keen-' :e?

³⁴'De :Yusu' 'da, Deh :daa, :an dhele-a 'on dih, eh 'wluh 'o :an-a' 'jeh :gwlii' :e? :Ae' nyor⧾ 'sluh⧾ zela: :on :gwluhuh', 'an dhih?

³⁵'De Pale' 'da, :Mor :on :taa 'ye, :yee' :on 'da, 'mor :Jueh'-yu :oo' :e? :An-a' 'jeh 'yor-eh-a'a: nyor⧾-: 'dekorn: Nyorsoa-a' 'slaa: :za-nyor:⧾ :klaba'⧾-: mo-: :za :on 'kwla 'noror 'on bo. Deh 'i-deh: :on no :eh?

³⁶'De :Yusu' 'da, 'An nyor⧾ wlu 'ken :korn-eh se dha yao 'zorn :korn. :Mor eh 'dhu, eh :korn dha yao 'zorn :dee', :yee' 'an-a: bo :na-nyor⧾-a mu :vorn :dee', on :se-' 'worn-: i, nyor⧾ :se 'de 'on :Jueh'-nyor⧾-a' nyor⧾ :na-dih-nyor⧾ 'kwa :po i. Jorwor: 'an nyor⧾ wlu 'ken :korn-eh se dha yao 'zorn :korn.

³⁷:Yeh or 'da :ao', :yee' Pale' 'da, :Yee' dhih 'jeh, :mor 'keen :oo' :e? 'De :Yusu' 'da, :Mor :on 'da, 'mor 'keen :oo', :yee' :on :se-' 'gbeh. Eh-a' dhih :oo', 'on 'wluh. 'De mor, eh-a' dhih :oo', 'on yi 'noror yao 'zorn :ke, 'on 'ye dhih-a' 'yor-eh ken dih zela:. Nyor⧾-a' klehkpeh :on :ne-a 'noror dhih-a' 'yor-eh-a' 'for bo, mo-: :an 'worn 'an wlu.

³⁸:Yeh or 'da :ao', :yee' Pale' dhele-or-: dih, or 'da, :Eh 'dhu dhih-a' 'yor-eh-' :eh? :Yeh Pale' :za-a deh :daa-', :yee' or 'si-: 'zorn, or mu 'de :Jueh'-nyor⧾ bo de :dele' ka, 'de or :wlu 'de on bo, or 'dae:, 'On :se-or' deh-zon 'bhun 'ye, :eh 'ye-eh' no, 'de zabe 'ye-or' kpon.

³⁹Jorwor: :mor a-a' 'Meh-a' :bla-dih: 'dlu dih-gor-a' ti :taa 'o nyni 'o, zon 'o zon, :yee' 'an za 'de :kasue 'di nyor :due', :yor a 'bhorn-a, :or 'ye-a' 'de 'wluh. A 'bhorn 'on 'ye :Jueh'-nyor⧾-a' 'keen dih 'tali: 'do a bo :e?

⁴⁰:Yeh or dhele-uh-a dih, :yee' on 'wor-', on 'dae:, 'Kei o. :A :se-or' 'bhorn. Jorwor: :Bala'ba:, or-: :a 'bhorn. (:Bala'ba: :dao', an 'bhorn-a, or no 'gomla worn :bla-dih-nyor⧾-a' nyor :due'.)