Read Eastern Krahn :Jororn' 2 Bible Online

:Jororn' 2 - Eastern Krahn bible

:Jororn' 2

¹:Yee' :yeh 'we 'sororn' zi-a, 'do 'we-eh taan neh 'di, :yee' nyor⧾-a 'dhu 'nynor nyina: :kpa-gor 'de 'Kena-gwlor 'di, 'de :Galali'i-bluhba ken. :Yee' 'do :wor :Yusu' 'de :ne.

²'De on dbo :Yusu'-: 'dekorn: or-a'a: bo :na-nyor⧾-: wlu bo, on 'ye gor :dao' yi :ke.

³:Yeh on :ne-a 'o, :yee' 'glee-nomor: nyor⧾-a' klehkpeh, an 'na-a, or :gweh-'. 'De :Yusu' 'de :wlu 'de or bo, or 'dae:, An-a'a: 'glee-nomor :gweh-' o.

⁴:Yeh or 'da :ao', :yee' :Yusu' :wlu-' 'de or bo, or 'da, 'On-de:, :eh :korn dhih :an zela 'on :gwluhuh' :eh? Eh 'see ti no 'do 'on bo, 'on 'ye deh no kele'a:.

⁵:Yeh or 'da :ao', :yee' or 'de zela: 'bhoi-nynuu: :an no-dih-a 'o :koan :gwluhuh', or 'dae:, Deh⧾-a' klehkpeh or mu a :gwluhuh' zela:, a 'ye-a' no, me-: a 'ye no o.

⁶:Yee' 'nior-yabe⧾ :meheh'lo: :en :no-dih-eh sobu'⧾, :en :ne-a 'o, 'do :Jueh'-nyor⧾-a' :kane' dih :za-eh bo, 'de :en 'beh-dih:-a :en 'ye-a' bi-a' :kwlaa 'sororn'-: :kwlaa taan-: kpa, me-: :dhe 'o dih.

⁷:Yee' :Yusu' :wlu-' 'de 'bhoi-nynuu: :dao' bo, or 'da, A 'yi-dih: 'nior-yabe:⧾ :daa 'ni 'di. :Yeh or 'da :ao', :yee' on 'yi-dih-ih-' :porlu: :porlu:.

⁸:Yee' or 'da, A 'plin-eh, a 'ye 'yu :or :korn-a 'de gor-a' wlu bo kpa. :Yee' on no-eh'.

⁹:Yee' 'ni :dao' on kpa-a, eh :za-dih:-' 'glee-nomor:. 'De 'yu :or :korn-a 'de gor-a' wlu bo, or 'dhen-or worn. :Yee' or se :dha or 'wluh-a, yubo:, jorwor: 'bhoi-nynuu: :dao', on :mloo', on yubo: 'o 'weh. :Yee' :yeh or 'dhen-or worn, :yee' or 'da 'yu :or :korn-a 'nynor yi-a nyina 'weh,

¹⁰'de or zela-or :gwluhuh', or 'dae:, :Mor nyor 'da gor, :yee' an ya 'de 'glee-nomor 'jeh :nor :zai'. :Yee' :mor nyor⧾ 'na, on dbo :weh, 'de jorwor: an ya 'de 'glee-nomor :or se-a worn :nmor. Jorwor: :mor :mloror', :on dhe 'jeh :nor dih :chio'lo:, 'de eh :yeh-dih: ti :daa ken.

¹¹:Yee' nyor⧾ 'yi :to-dih-deh: :kolu' :daa, eh-: no :zai'-deh :Yusu' :to-dih: nyor⧾ 'i. :Yee' 'do 'Kena-gwlor 'di, :or :ne-a 'de :Galali'i-bluhba ken, 'do :wor or :no-dih-eh. 'Do :wor or :to-dih: or-a' dhih-a' 'i 'beh-a' nyor⧾ 'i, 'de or-a'a: bo :na-nyor⧾ po or-a' dhih dhih 'jeh-'.

¹²:Yeh or no :ao', :yee' or 'de-: or-a' dei'-nyor⧾-kpalu⧾-: 'dekorn: or-a'a: bo :na-nyor⧾-: on mu :Kapa'nior-gwlor 'di, 'do :wor on :ne 'do ti-kpor-bei 'di.

¹³:Yee' :yeh :Jueh'-nyor⧾-a' 'Meh-a' :bla-dih: 'dlu dih-gor-a' ti-a 'koan'-dih-a 'o dih, :yee' :Yusu' mu :Julu'slehn:.

¹⁴:Yeh or nyni-a, :yee' or mu 'o Nyorsoa-a' 'sla ybei', 'de or 'ye nyor⧾, mo-: :an plo :blii'⧾-: 'blae'⧾-: 'dekorn: pabu'⧾-: 'de :noo'-a zian-dih 'wlii 'i, 'do an-a'a: 'tebo⧾ ken 'de mor.

¹⁵:Yeh or 'ye-uh'-a, :yee' dubu'⧾, me-: or :no-dih: sene'eh, 'de or no an-a' klehkpeh dih, or za-uh 'de gba-dih-gba 'di, 'dekorn: 'blae'⧾-: :blii'⧾-: :ke. 'De or gboba: nyor⧾ :an zian-dih-a 'wlii 'i, an-a'a: 'wlii dih, 'de or tba an-a'a: 'tebo⧾-a' 'dlu⧾ glu.

¹⁶'De or :wlu 'de pabu'⧾ :plo-nyor⧾ bo, or 'dae:, Deh⧾ :daa, a za-ih dha :dha :daa. A 'bor 'On-ba-a'a: 'gbu 'doror'-gbu-' :no-eh.

¹⁷:Yeh or no :ao', :yee' or-a'a: bo :na-nyor⧾ :po-dih-eh :gwluhuh' bo 'weh, :ka eh 'chle-eh 'de Nyorsoa-a' 'chlee-deh 'di, eh no-a, Nyorsoa, :porluh: 'on 'ble-a 'do :an-a'a: 'gbu-a' :ybeh-eh bo, mo-: 'beh 'i, 'de mor, mo-: :an mu-eh :no, 'de 'on 'ye 'meh.

¹⁸:Yee' :Jueh'-nyor⧾-a' nyor⧾ :na-dih-nyor⧾ :wlu-' 'de or bo, on 'dae:, Nyor⧾ 'yi :to-dih-deh-' :yeheh :eh, :an mu :a 'i :to-dih:, :eh mu-a :a :gwluhuh' zela:, :ka :on 'ble-a 'kpih :on 'ye-a deh⧾ :daa no :eh?

¹⁹:Yeh on 'da :ao', :yee' :Yusu' :wlu-' 'de on bo, or 'da, :Mor a gba Nyorsoa-a' 'sla :daa ya, :yee' 'an mu-or :po :neheh', 'do 'we taan 'di.

²⁰:Yee' on 'dae:, Zon⧾-a' :kwlaa :nyieh 'yor :meheh'lo:, me-: :a :po-dih: 'gbu :daa. Mo-: :an mu :po :neheh' 'do 'we taan 'di :e?

²¹Jorwor: :Yusu'-a' 'jeh-a' yau: 'o or 'da, eh :se Nyorsoa-a' 'sla-a' 'yor-eh:.

²²:Yee' :ka ti nyni-a 'o, 'de :Yusu' 'wluh-a 'de nma-dih-deh 'di, :yee' or-a'a: bo :na-nyor⧾ :po-dih-eh :gwluhuh' bo 'weh, deh or :za-a-' 'de on bo :zai'. :Yee' on po Nyorsoa-a' 'chlee-deh-: 'dekorn: deh :Yusu' :za-a-' 'de on bo-: dhih 'jeh.

²³:Yee' :gwlor-nyor:⧾ :dhulu', mo-: po :Yusu'-a' dhih dhih 'jeh-', ti or :ne-a :Julu'slehn, 'do 'Meh-a' :bla-dih: 'dlu dih-gor-'. Deh no-eh, on 'ye deh⧾ :kolu'⧾ or to-dih-uh-a 'i 'weh.

²⁴Jorwor: or :se-uh' :gwlii' dhe, deh no-eh, or yubo: :gwlor-nyor⧾-a' klehkpeh-a' :porluh⧾ 'weh.

²⁵Nyor⧾ se :korn on 'ye-or' :gwlor-nyor⧾-a' dhih :gwluhuh' zela:, deh no-eh, or yubo: deh :eh :ne-a 'de nyor⧾ 'di 'weh.