Read Eastern Krahn :Jororn' 21 Bible Online

:Jororn' 21 - Eastern Krahn bible

:Jororn' 21

¹:Yeh deh⧾ :daa en zi-a, :yee' :Yusu' 'wluh-dih: or-a'a: bo :na-nyor⧾ 'i, 'do :Tabi'lor-yobo'-pehnu worn 'i. :Ka or no-a an-a' 'yi 'wluh-dih-eh, eh-: :dhe dih.

²Eh :korn 'we-eh :due', :yee' Samor' :Piteh'-: :Tormor' an 'da-dih-a 'Gba-yu-: :Natanio' :or 'wluh-a 'Kena 'de :Galali'i-bluhba ken-: :Zehbehli'-a'a: nyor⧾-kpalu⧾-nynuu-: 'dekorn: :Yusu'-a'a: bo :na-nyor⧾-a' nyor⧾ 'sororn' :noo'-: an-a' klehkpeh :dao', mo-: :ne :dha :due'.

³:Yeh on :ne-a 'o, :yee' Samor' :Piteh' zela-uh-: :gwluhuh', or 'dae:, 'An mu zimi: 'dba 'da o. :Yeh or 'da :ao', :yee' on 'dae:, :A mu 'o :on klei' :zi. 'De on zi 'o or klei', on 'kpa 'de 'blagbe 'di, on 'ye zimi 'dba. Jorwor: 'do glu-we-eh: :dao' 'di, on :se-' deh-beh-deh-beh 'dba.

⁴:Yee' :yeh zorn zen-a, :yee' :Yusu' :nyna dih 'do 'kpuhba' 'i. Jorwor: or-a'a: bo :na-nyor⧾ se-or 'i yubo:, :ka eh 'dhu-a or mor-'.

⁵'De or 'wor 'de on bo, or 'dae:, :A 'bli-nyor⧾-a:, a kpon deh-beh 'weh :e? 'De on 'da, 'Kei o. :A :se-' deh-beh kpon o.

⁶:Yeh on 'da :ao', :yee' or zela-uh-: :gwluhuh', or 'dae:, A po a-a'a: sor 'de 'blagbe-a' :dila-for bo. :Yee' a mu deh :kpon. 'De on no-eh. :Yeh on no-eh, :yee' zimi 'yi 'de an-a'a: sor 'di 'weh kpan kpan. Eh-: no-eh, 'de on se or-a' jli-a' 'beh-dih:, on 'ye-or 'de 'blagbe 'di po.

⁷:Yeh eh no :ao', :yee' bo :na-yu: :dao' :Yusu' :ybeh-a 'gabaa, or :wlu-' 'de :Piteh' bo, or 'dae:, :Gwlor :baa' :oo'. :Yeh :Piteh' 'worn-ih'-a :ka eh 'dhu-a :Gwlor :baa', :yee' or pa or-a'a: 'tiei: or :za-a dih 'weh, 'de or 'kpa 'o 'nior, or :dle, or mu 'de :Yusu' bo.

⁸:Yee' :Yusu'-a'a: bo :na-nyor:⧾ :yuh :sie:-a 'de 'blagbe 'di, an zi 'o :Piteh' klei', an bli 'blagbe, 'de an jli an-a'a: sor :wleh :wleh, :or 'yi-a zimi 'di. Deh no-eh, on se 'kpuhbuh' bo dih :tehn-dih:. Eh 'beh-dih: eh 'ye po son bo-a' :kehehn' :due' no.

⁹:Yeh on 'si-a 'o 'kpuhba' 'i dih, :yee' on 'ye neh, eh-: :dhba-eh:. 'De on 'ye zimi-: 'dekorn: 'bhlee-: en 'pehn 'o :nane' ken dih.

¹⁰:Yee' :Yusu' :wlu-' 'de on bo, or 'dae:, Zimi: a 'dba-a :kana, a :ya 'de en-' :nee'.

¹¹:Yeh or 'da :ao', :yee' Samor' :Piteh' mu 'de 'blagbe 'di-: de, 'de or 'kla sor dih, or ya-or 'o 'kpuhba' 'i. Or 'yi zimi: :klaba'⧾-a' 'bleh 'ble-a' :kehehn' :due' :kwlaa :mm' 'yor taan 'di. Keen' :mloror' or 'yi zimi 'di 'weh, jorwor: or-a' deh :se-' :chlan.

¹²:Yee' :Yusu' 'da-uh', on 'ye deh di. Jorwor: eh se nyor :korn :or 'ye-or dih dhele:, deh 'i-deh-nyor: or 'dhu-eh:-'. Deh no-eh, on yubo-eh', :ka eh 'dhu-a :Gwlor :baa'-'.

¹³:Yee' or 'duo: 'bhlee-: 'dekorn: zimi: :dao'-: 'weh, 'de or 'nyi-ih on, on 'ye-ih' di.

¹⁴:Yeh :daa :naa, eh-: no eh-a' kpor⧾-a' taan neh, :Yusu' :to-dih: or-a' 'jeh or-a'a: bo :na-nyor⧾ 'i, :eh 'wluh-a 'o ti or 'wluh-a 'de nma-dih-deh 'di bo.

¹⁵:Yeh on gweh-a deh :di-eh 'i, :yee' :Yusu' dhele: Samor' :Piteh'-: dih, or 'dae:, :Jororn'-a' 'yu, Samor'. :On :ybeh 'on-' 'weh deh 'jeh, :eh :zi 'o deh⧾ :daa-' :e? 'De :Piteh' 'da, Keen', :Gwlor :baa'. :On yubo-eh', :ka 'on :ybeh-a :on. :Yeh or 'da :ao', :yee' :Yusu' :wlu-' 'de or bo, or 'dae:, 'Nyi 'an-a: 'blae'⧾-nynuu dii-deh.

¹⁶'De :Yusu' dhele-or dih :neheh', or 'dae:, :Jororn'-a' 'yu, Samor'. :On :ybeh 'on-' 'weh deh 'jeh :e? 'De :Piteh' 'da, Keen', :Gwlor :baa'. :On yubo-eh', :ka 'on :ybeh-a :on. :Yeh or 'da :ao', :yee' :Yusu' 'dae:, 'Dhu 'an-a: 'blae'⧾ 'yli-eh bo.

¹⁷:Yee' :Yusu' :wlu-' 'de or bo, 'do kpor⧾-a' taan neh 'di, or 'dae:, :Jororn'-a' 'yu, Samor'. :On :ybeh 'on-' 'weh :e? :Yeh :Yusu' 'da :ao', :yee' eh 'tuh :Piteh'-: dih, deh no-eh, :Yusu' dhele-or-: dih, or no kpor⧾ taan, or 'da, :On :ybeh 'on-' 'weh :e? 'De or :wlu 'de :Yusu' bo, or 'dae:, :Gwlor :baa', :on yubo: deh⧾-a' klehkpeh 'weh. 'De mor :on yubo-eh', :ka 'on :ybeh-a :on. 'De :Yusu' :wlu 'de or bo, or 'dae:, 'Nyi 'an-a: 'blae'⧾ dii-deh.

¹⁸Dhih 'jeh, 'an zela :on :gwluhuh', ti :on no-a :goba'-yu, :yee' :an pa-dih :an-a' 'jeh deh-' 'weh, 'de :dha :korn-a :on 'ton, 'de :an mu 'o. Jorwor: ti :an mu-a :ne, :yee' :an mu son⧾ :slo, 'de nyor :noror' 'ye :on 'behleh bo 'dhu, 'de :dha :on se-a mu-a' 'bhorn, 'do :wor or mu :on :kpa.

¹⁹('Meh-a' :Piteh'-a mu-a 'meh-:, :or 'ye-a' Nyorsoa-a' 'nyne 'i 'beh-dih:, or-a' dhih :oo', :Yusu' :za deh :daa-'.) :Yeh or gweh-a deh :daa, eh-a' :za-a' 'i, :yee' or :wlu-' 'de :Piteh' bo, or 'dae:, Zi 'o 'on klei'.

²⁰:Yeh :Yusu' 'da :ao', :yee' :Piteh' 'bili:-'-: dih, 'de or 'ye bo :na-yu: :dao' :Yusu' :ybeh-a 'gabaa, or zi 'o on klei'. Bo :na-yu: :dao', or-: 'o, :or :ne 'o :Yusu' 'bhun :dee', ti an di-a 'gwie-deh, :or dhele:-a :Yusu' dih, :or no-a, :Gwlor :baa', or-a' 'nyne :eh, :or mu :on :plo :eh?

²¹Or-a' 'jeh :dao', :yeh :Piteh' 'ye-or, 'de or zi-a 'o on klei', :yee' :Piteh' dhele: :Yusu'-: dih, or 'dae:, :Gwlor :baa', :a 'worn 'de :yor :daa bo :ke.

²²:Yeh or dhele-a :Yusu' dih, :yee' :Yusu' :wlu-' 'de or bo, or 'dae:, :Mor eh 'dhu, 'an 'bhorn :yor :daa, or 'ye 'kmo-' :ne :chio'lo:, 'de 'on 'ye deka yi, :yee' deh :on po 'de dih :eh? :On :mor :mloror', zi 'o 'on klei'.

²³Deh :daa :Yusu' :za-a-', eh-: no-eh, 'de or-a' klei' :zi-nyor⧾-a' :dha :dhulu' 'da, or-a'a: bo :na-yu: :daa, or :se-' 'meh-: i :dee'. Jorwor: :Yusu' se :ao', or :se-' 'meh-: i, or 'dae:, :Mor eh 'dhu, 'an 'bhorn or 'ye 'kmo-' :ne :chio'lo:, 'de 'on 'ye deka yi, :yee' deh :on po 'de dih :eh?

²⁴:Yee' :Yusu'-a'a: bo :na-nyor-a' 'jeh :dao', or-: 'o, :or zela: deh⧾-a' klehkpeh :daa ken dih, 'de :or 'chle-ih. 'De :a yubo-eh', :ka or-a' wlu :se-a sih.

²⁵Deh⧾ :dhulu' :nee', me-: :Yusu' no :ke. :Mor eh 'dhu, en-' klehkpeh 'chle-eh: :dee', :yee' 'on yubo-eh', 'bluhba-a' klehkpeh se :dha 'ble, 'chlee-deh:⧾ :en 'chle-eh, en 'ye-a dih :dhe.