Read Eastern Krahn :Jororn' 3 Bible Online

:Jororn' 3 - Eastern Krahn bible

:Jororn' 3

¹:Yee' eh :korn nyor-kpalu :due' :or no-a :Falasi'i-yu, an 'da-dih-a 'Nekodi'ma, 'de :or no-a nyor :klaba' 'do :Jueh'-nyor⧾ bo :ke,

²or-: yi 'de :Yusu' bo, 'gwie-we-eh :due'. :Yeh or yi-a 'de, :yee' or :wlu-' 'de or bo, or 'dae:, Nyor⧾ deh :torne-nyor:, :a yubo-eh' :mor nyor⧾ deh :torne-nyor: :or 'wluh-a 'de Nyorsoa bo :oo'. Deh no-eh, nyor se 'beh-dih: or 'ye nyor⧾ 'di dih 'ma-dih-deh:⧾ :an no-a no, :mor eh 'dhu Nyorsoa :ne 'o or bo :gbor, 'de or 'ye-ih' no.

³:Yee' :Yusu' :wlu-' 'de or bo, or 'dae:, Dhih 'jeh, 'an zela :on :gwluhuh', nyor se 'beh-dih: or 'ye Nyorsoa-a' nyor⧾ wlu 'ken :korn-eh 'ye, :mor eh 'dhu or se 'wluh :dele' ka.

⁴:Yee' 'Nekodi'ma dhele-or-: dih, or 'da, :Kaa nyor :or ne-a, or mu 'wluh-a' :no :neheh' :dele' ka :eh? Or 'beh-dih: or 'ye 'de or 'de 'di pa, 'de or 'ye 'wluh 'do kpor⧾-a' 'sororn' neh 'di :e?

⁵'De :Yusu' 'da, Dhih 'jeh, 'an zela :on :gwluhuh', :mor eh 'dhu nyor se 'de 'ni-: 'dekorn: Nyorsoa-a' :Zulu-' :yi-dih:, 'de or 'ye 'wluh, :yee' or se 'beh-dih: or 'ye Nyorsoa-a' nyor⧾ wlu 'ken :korn-eh 'zorn pa.

⁶:Gwlor-nyor: or-: 'wluh :gwlor-nyor. Jorwor: Nyorsoa-a' :Zulu :due', mo-: :an no-eh, 'de :an no Nyorsoa-a' 'yu.

⁷:Yee' eh-a' 'ma-dih:-' :an-a' :porluh, deh 'on no-a, A :korn a 'ye 'wluh :dele' ka.

⁸:Dha :pobor'-a 'bhorn-a mu-a', 'do :wor or mu. :An 'worn or-a' wlu 'weh, jorwor: :on se :dha or 'wluh-a yubo:, 'de mor :on se :dha or mu-a yubo:. 'Ka-: nyor :yor Nyorsoa-a' :Zulu no-eh, 'de :or 'dhu-a Nyorsoa-a' 'yu-', or-a' dhih :ne :ke.

⁹:Yee' 'Nekodi'ma 'da, :Kaa deh :daa, eh 'beh-dih: eh 'ye :ao' no-a' no :eh?

¹⁰'De :Yusu' 'dae: 'de or bo, :Mor :or 'dhu-a 'Ezlea-nyor⧾-a' nyor⧾ deh :torne-nyor: :klaba'-', :mor 'o :or se deh⧾ :daa yubo: :e?

¹¹Dhih 'jeh, 'an zela :on :gwluhuh', deh⧾ :a yubo:-a, me-: :korn dhih :a za-a-'. 'De deh⧾ :a 'ye-a, me-: :korn kuna'⧾ :a po. Jorwor: a :se-' deh⧾-a' klehkpeh :daa :a :za-a-', dhih 'jeh-' po.

¹²:Mor eh 'dhu, 'on zela: a 'noror yao 'zorn-a' dhih :gwluhuh', :mor a se-eh dhih 'jeh-' po, :yee' :mor eh 'dhu, 'on zela: 'de Nyorsoa 'bli yai'-a' dhih a :gwluhuh', :yee' :kaa a mu eh-a' dhih 'jeh-' :po-eh :no :eh?

¹³Nyor-beh-nyor-beh 'see 'de Nyorsoa 'bli yai' mu, 'yu an 'da-dih-a Nyor-kpalu-a' 'yu :or 'wluh-a 'de or 'bli yai', or :due' 'klein'.

¹⁴:Yee' :ka :Mose' no-a dhiehn-sehn-a' yai' :to-eh 'do tu 'i, 'de :bhehneh'-bluhba ken, :yee' 'ka-: 'yu an 'da-dih-a Nyor-kpalu-a' 'yu :korn or 'ye yai' :to-eh no :ke,

¹⁵'de nyor⧾-a' klehkpeh :an mu-a or-a' dhih dhih 'jeh-' :po, on 'ye 'kmo :sie: :febeh' 'ble.

¹⁶Nyorsoa :kma dha yao 'zorn-a' dhih 'weh 'gabaa. Eh-: :korn dhih, or dbo or-a' 'Yu :due' gbai dha mor. :Yee' nyor :or mu-a or-a' dhih dhih 'jeh-' :po, or :se-' gbe :zie: i, jorwor: or mu 'kmo :sie: :febeh' 'ble-:.

¹⁷Deh no-eh, Nyorsoa :se-' or-a' 'Yu dbo or 'ye nyor⧾ :on :ne-a dha yao 'zorn-a' zabe :kpon-dih:. Jorwor: or dbo-or', or 'ye :gwlor-nyor⧾-a' klehkpeh-a' 'puh-dih-nyor no.

¹⁸:Yee' nyor :or po-a Nyorsoa-a' 'Yu-a' dhih dhih 'jeh-', :yee' Nyorsoa-a' zabe :se-or' kpon. Jorwor: nyor :or se-a or-a' dhih dhih 'jeh-' po, :yee' Nyorsoa-a' zabe kpon-or' see, deh no-eh, or :se-' Nyorsoa-a' 'Yu :due' gbai :daa, or-a' dhih dhih 'jeh-' po.

¹⁹Deh :eh :kpon-dih:-a nyor⧾ zabe, eh-: :dhe dih. Zorn-pli yi dha yao 'zorn 'weh. Jorwor: :gwlor-nyor⧾ :ybeh-' :kule:, :eh :zi 'o zorn-pli-', deh no-eh, an no deh⧾-zon:⧾.

²⁰Nyor⧾-a' klehkpeh :an no-a deh⧾-zon⧾, on 'nyeh zorn-pli-' 'weh, 'de an-a' yi 'noror zorn-pli-', deh no-eh, on :se-' 'bhorn deh⧾ an no-a, en 'ye ken :nyeh.

²¹Jorwor: nyor :or :ne-dih:-a dhih-a' 'yor-eh 'kmo, or-: yi 'noror zorn-pli-', 'de deh⧾ or no-a, en 'ye ken dih :florn, :ka en :yi-dih:-a Nyorsoa-'.

²²:Yee' :ka deh⧾ :daa, en zi-a, :yee' :Yusu'-: 'dekorn: or-a'a: bo :na-nyor⧾-: mo-: mu 'de :Judi'a-bluhba ken. 'Do :wor or :zi-dih: ti-kpor-bei 'de on bo, 'de or po nyor⧾ 'ni 'dlu.

²³:Yee' nyor⧾ 'ni 'dlu :po :Jororn'-a po nyor⧾ 'ni 'dlu :ke, 'de 'Ena :or se-a :gwlor an 'da-dih-a 'Sela bo dih :tehn-dih:. Deh no-eh, 'ni :doru' :ne 'o, 'de :gwlor-nyor:⧾ :dhulu'-a mu 'de or bo, on 'ye 'ni 'dlu :po. (

²⁴Deh :daa, eh :no-eh:-' :weh, 'de :Jororn' mu :kasue 'di :po-eh.)

²⁵Eh :korn 'we-eh :due', :yee' :Jororn'-a'a: bo :na-nyor⧾-a' :noo' 'kpa 'o :Jueh'-yu :due'-a' bo dhobo: 'da 'weh, 'do :Jueh'-nyor⧾-a' :kane' dih :za-eh-a' dhih bo.

²⁶:Yeh eh no :ao', :yee' on mu 'de :Jororn' bo, on zela-or-: :gwluhuh', on 'da, Nyor⧾ deh :torne-nyor:, :on 'beh-dih: :on 'ye 'yu :or :ne-a 'de :on bo 'de 'Jorle-ni-a' 'yluh-a' 'kwla 'wluh-dih: 'da, yubo: :e, :or :korn-a dhih :on :za-a-'? 'Yu-a' 'jeh :dao', or po nyor⧾ 'ni 'dlu :naa, 'de :gwlor-nyor:⧾ :dhulu'-a mu 'de or bo.

²⁷:Yeh on 'da :ao', :yee' :Jororn' zela-uh-: :gwluhuh', or 'dae:, Nyor se 'beh-dih: or 'ye deh no, 'do or-a' 'jeh bo, jorwor: :mor eh 'dhu, Nyorsoa :ne 'o or bo :gbor, 'de or 'ye-eh' no.

²⁸A-a' 'jeh 'yor-eh:, a 'beh-dih: a 'ye-eh' ken dih zela: :ka 'on no-a, 'on :se Nyorsoa-a' 'taan'-yu:. Jorwor: 'mor-: Nyorsoa dbo or ybei'.

²⁹A yubo-eh', 'yu :or :korn-a 'nynor yi-a nyina, or-: 'o 'nynor :korn 'de bo. Jorwor: or 'be :or :nyna-a 'o dih, :mor or 'worn or-a' wlu, :yee' or-a' :porluh 'pehn-: dih. 'De :ka :ne-a :due' 'di, 'ka-: 'o 'mona-a no 'an dih 'yi-dih-eh :ke.

³⁰Or-a' dhih :korn en 'ye 'i 'beh, en 'ye ken dih 'kpuhba:. :Yee' 'an ne :korn en 'ye ya yi.

³¹:Yee' nyor :or 'wluh-a 'de Nyorsoa 'bli yai', or-: no nyor :klaba' 'do nyor⧾-a' klehkpeh ken. Nyor :or 'wluh-a dha 'bluhba ken, or :korn 'de 'bluhba bo. :Yee' deh⧾ :en kor-a dha 'bluhba ken 'i, me-: :korn dhih or za-a-'. Jorwor: nyor :or 'wluh-a 'de Nyorsoa 'bli yai', or-: no nyor :klaba' 'do nyor⧾-a' klehkpeh ken.

³²:Yee' deh or 'ye-a-: 'dekorn: deh or 'worn-a-: me-: :korn dhih or zela ken dih. Jorwor: eh se nyor :korn :or 'ye-a deh⧾ or za-a-', dhih 'jeh-' po.

³³Jorwor: nyor :or po-a deh or zela:-a ken dih dhih 'jeh-', :yee' or po-eh deh-: 'i, :ka Nyorsoa-a za-a dhih-a' 'yor-eh-'.

³⁴:Yee' Nyorsoa-a' 'yu or dbo-a, or-: za Nyorsoa-a' wlu-'. Deh no-eh, Nyorsoa 'nyi or-a' :Zulu or 'weh klehkpeh klehkpeh.

³⁵:A :Baa' Nyorsoa :ybeh or-a' 'Yu-' 'weh. 'De or po 'de deh⧾-a' klehkpeh 'de or 'kwa.

³⁶Nyor :or po-a Nyorsoa-a' 'Yu-a' dhih dhih 'jeh-', :yee' or 'ble 'kmo :sie: :febeh' :naa. Jorwor: nyor :or se-a 'o or-a' 'tele' dih dhe, :yee' or :se-' 'kmo :sie: :febeh' 'ye-: i. Deh no-eh, Nyorsoa-a mu-or 'chehn-' 'kpa-dih:, :ka ti-a mu-a 'dlu-' :tehn.