Read Eastern Krahn :Jororn' 4 Bible Online

:Jororn' 4 - Eastern Krahn bible

:Jororn' 4

¹:Yee' :Falasi'i-nyor⧾ 'worn-ih', :ka :Yusu' no-eh, 'de bo :na-nyor:⧾ :dhulu'-a zi-a 'o or klei', 'de or po-a nyor⧾ :dao' 'ni 'dlu, :eh :zi-a 'o :Jororn'-'.

²Keen' :mloror' :Yusu'-a' 'jeh 'yor-eh :se-' nyor⧾ 'ni 'dlu :po, jorwor: or-a'a: bo :na-nyor:⧾ 'o, :an no-eh.

³:Yee' :yeh :Gwlor :baa' yubo:-a deh :daa 'i, :yee' or 'wluh :Judi'a-bluhba ken 'weh, 'de or mu :Galali'i-bluhba ken de :dele' ka.

⁴:Yee' :mor or :taa mu, or :korn or 'ye Sehmeh'la-bluhba ken :yi-dih:.

⁵:Yeh or yi-dih-a Sehmeh'la-bluhba ken, :yee' 'do :wor or :yeh-dih: :gwlor an 'da-dih-a 'Saeka ken, :or se-a 'bluhba-a' 'kplo 'Jekor 'nyi-a or-a'a: 'yu 'Joseh, bo dih :tehn-dih:.

⁶'Do :wor 'Jekor-a'a: 'ni-bie :ne :ke. :Yee' :yeh :Yusu' :na-a :naa:, 'de or sea-a, :yee' or :dhe dih, 'do 'ni-bie: :dao' worn 'i, 'yluh-gbao'.

⁷:Yeh or :ne-a 'o, :yee' Sehmeh'la-nynor :due', or-: yi 'nior, 'de :Yusu' :wlu 'de or bo, or 'dae:, 'Nyi 'on 'ni, 'on 'ye 'na. (

⁸:Yeh or-: 'nynor-: an no-a 'ni-deh: :dao', :yee' or-a'a: bo :na-nyor⧾ mu dii-deh:⧾ :dhen 'da 'de :gwlor-'.)

⁹'De 'nynor :dao', or :wlu 'de :Yusu' bo, or 'dae:, :Mor :Jueh'-yu: 'o. 'De 'on 'dhu Sehmeh'la-nynor-'. :Yee' :kaa eh no, 'de :an 'yba-dih 'on 'ni :eh? (Deh :korn-a dhih, 'de 'nynor :dao', or :za-a-' deh :daa, eh-: 'dhu, Sehmeh'la-nyor⧾-: 'dekorn: :Jueh'-nyor⧾-: an-a' nena: 'ni dih.)

¹⁰'De :Yusu' 'da, :Mor eh 'dhu :on yubo: deh Nyorsoa 'nyi-a nyor⧾ :dee', 'de :on 'ye nyor :or 'yba-dih-a :on 'ni yubo: :ke, :yee' :an mu-or 'ni 'yba-dih: :dee', 'de or 'ye :on 'ni :eh 'nyi-a nyor⧾ 'kmo :sie: :febeh' 'nyi.

¹¹'De 'nynor 'da, Nyor :klaba', :on se 'ni 'plin-dih-deh 'ble. 'De mor 'ni-bie: :daa, eh :tehn-' 'di. :Yee' dha :an mu 'ni :dao', :eh 'nyi-a nyor⧾ 'kmo :sie: :febeh' :za, 'de :on 'ye-eh' 'on 'nyi :eh?

¹²:A :bai'-a' :baa' 'Jekor: 'o, or-: 'nyi :a 'ni-bie: :daa. Or-: or-a'a: 'nynuu-: 'dekorn: or-a'a: :nena-deh⧾-: mo-: 'na 'ni :daa :zai'. :An-a' dhih 'beh-: 'i, en :zi 'o :a :bai'-a' :baa' 'Jekor :e?

¹³:Yeh or 'da :ao', :yee' :Yusu' zela-or-: :gwluhuh', or 'dae:, Nyor-beh-nyor-beh: :or mu-a 'ni :daa 'na-:, 'ni 'na-ton-a mu-or :no :dele' ka.

¹⁴Jorwor: nyor :or mu-a 'ni 'an mu-or 'nyi-:, 'na-:, 'ni 'na-ton 'se 'ba-or no, :ka ti-a mu-a 'dlu-' :tehn. Keen' 'jeh, 'ni 'an mu-or 'nyi-:, eh mu 'ni-a' 'dlu⧾-a' glu 'wluh 'da :gweh 'de or 'di, :eh mu-or 'ni :eh 'nyi-a nyor⧾ :febeh' 'nyi-:, 'de or 'ye 'kmo :sie: :febeh' 'ble.

¹⁵:Yee' 'nynor 'dae: 'de or bo, Nyor :klaba', 'nyi 'on 'ni :an 'da-a, 'de 'ni 'na-ton :ne-' 'on no :neheh', 'de 'on 'ye 'nior: :yi-eh 'bor dha mor.

¹⁶'De :Yusu' 'da, Mu, :on 'ye :an-a'a: yibeor 'da, a 'ye 'de yi.

¹⁷'De or 'da, 'On se yibeor 'ble. 'De :Yusu' 'da, Eh-a' 'yor-eh: 'o, :an za-a-', :ka :on no-a, :on se yibeor 'ble.

¹⁸Deh no-eh, :on no nyina: 'ti-eh-a' kpor⧾ :mm' :zai'. 'De :kana :naa, nyor-kpalu: :or :ne :an na-a :naa, or :se :an-a'a: yibeor:. Dhih 'jeh :oo', :on :za-a-'.

¹⁹:Yeh or 'da :ao', :yee' 'nynor 'da, Nyor :klaba', 'on yubo-eh-: 'i :naa, :ka :on 'dhu-a Nyorsoa-a' wele-eh: :po-nyor-'.

²⁰Sehmeh'la-nyor:⧾ :on no-a 'on :bai'-a' :bai', an za Nyorsoa-a' :weheh' dha tluh :daa ken. Jorwor: a :mor :Jueh'-nyor:⧾, a 'da, 'de :Julu'slehn:, 'do :wor :a :korn :a 'ye Nyorsoa-a' :weheh' :za-dih:.

²¹'De :Yusu' 'da, 'Nynor, po 'an wlu dhih 'jeh-'. Ti-a mu 'o :nyni, a :se-' a :Baa' Nyorsoa-a' :weheh' :za i, dha tluh :daa ken-: :eh beh 'de :Julu'slehn-:.

²²A :mor Sehmeh'la-nyor:⧾, nyor a za-a :weheh', a se-or yubo:. Jorwor: :a :mor :or 'dhu-a :Jueh'-nyor⧾-', :a yubo: nyor :a za-a :weheh' 'weh, deh no-eh, 'puh-a' 'wluh 'de :Jueh'-nyor⧾ bo.

²³Jorwor: ti-a mu 'o :nyni, 'de mor en nyni 'o 'weh :naa, :a :Baa' Nyorsoa-a' :weheh' :za-nyor:⧾ 'jeh 'ye or-a' :weheh' :za, 'de or-a' :Zulu-a' 'kpih 'di, :eh kor-a or-a' dhih-a' 'yor-eh 'i. Deh no-eh, :weheh' :za-nyor:⧾ :on :ne :ao', mo-: Nyorsoa 'bhorn.

²⁴Nyorsoa, or-: 'dhu :Zulu-'. :Yee' nyor⧾ :an za-a or-a' :weheh', on :korn on 'ye or-a' :weheh' :za, 'de or-a' :Zulu-a' 'kpih 'di, :eh kor-a or-a' dhih-a' 'yor-eh 'i.

²⁵:Yeh or 'da :ao', :yee' 'nynor 'dae: 'de or bo, 'On yubo-eh' Nyorsoa-a' 'taan'-yu: an 'da-dih-a 'Klae, or mu 'de :yi. :Mor or 'yle, or mu deh⧾-a' klehkpeh ken dih zela: 'noror :a bo.

²⁶'De :Yusu' 'da, 'Mor :or wlu-a 'de :on bo, 'mor-: 'o.

²⁷:Yeh :Yusu' 'si-a 'o deh⧾ :daa, en-' :za 'da, :yee' or-a'a: bo :na-nyor⧾ yi-: 'de. :Yeh on 'ye-or, 'de or wlu-a 'de Sehmeh'la-nynor: :dao' bo, :yee' eh :florn-dih-uh-: worn. Jorwor: an-a' nyor-beh-nyor-beh :se-' :Yusu' dih dhele: deh or 'bhorn-a, 'de mor, deh :korn-a dhih or wlu-a 'de or bo.

²⁸:Yee' 'nynor sie 'o or-a'a: 'nior-yabe 'weh, 'de or mu :gwlor-', or zela: nyor⧾ :gwluhuh', or 'dae:,

²⁹A 'yle, a 'ye nyor-kpalu: :or zela:-a 'on deh⧾-a' klehkpeh 'on no-a :gwluhuh', a 'ye-or' 'ye. Or 'beh-dih: or 'ye Nyorsoa-a' 'taan'-yu-' 'dhu-eh: :e?

³⁰:Yeh or zela-uh-a deh⧾ :daa :gwluhuh', :yee' an-a' klehkpeh, on 'wluh 'o :gwlor-' 'weh, 'de an mu 'de :Yusu' bo.

³¹:Yeh deh⧾ :daa, en mu-a 'dlu bo, :yee' :Yusu'-a'a: bo :na-nyor⧾ 'neh-or-: ken, on 'da, Nyor⧾ deh :torne-nyor:, di deh-beh.

³²'De or 'da, 'On 'ble dii-deh:, 'on 'ye-a' di, eh-: :korn dhih a se yubo:.

³³:Yeh or 'da :ao', :yee' or-a'a: bo :na-nyor⧾-a wlu-' 'de an-a' 'jeh 'nyne-', on 'da, Nyor-beh: ya-or dii-deh ke :e?

³⁴'De or 'da, 'An-a: dii-deh:, eh-: 'dhu, 'on 'ye nyor :or dbo-a 'on, or-a' 'ton :korn-deh no, 'de 'on 'ye :koan: or 'nyi-a 'on, or-a' no-a' 'i gweh.

³⁵A 'ble 'dlan, or-: a po, a 'da, 'Chuh⧾ :nyieh, :yee' :koo-a' chehehn-ti nyni 'o 'weh. Jorwor: 'an zela a :gwluhuh', a kpa 'dlu⧾ yai', 'de a 'ye 'gle⧾ ya pobo:. En-' klehkpeh :ne 'pu-' :naa. Ti nyni 'o 'weh, en 'ye :chehn-eh:.

³⁶Nyor :or chehn-a :koo, or 'ye geli' :za-dih-deh 'weh :naa. 'De or po dii-deh⧾ :dha :due'. Dii-deh:⧾ :dao' or po-a :dha :due', :gwlor-nyor:⧾ 'o, mo-: or po :dha :due', on 'ye 'kmo :sie: :febeh' 'ble. 'De nyor :or tba-ih-a-: 'dekorn: nyor :or chehn-ih-a-: 'de on 'ye 'mona :dha :due' :no-dih:.

³⁷'Dlan :daa, :or no-a, Nyor :due'-: tba-ih, 'de nyor :due'-a chehn-ih, dhih 'jeh :oo'.

³⁸'On dbo a 'weh, a 'ye :koo: :on :korn-a :koan: a se-a no, chehn. Nyor⧾ :noo', mo-: :no-dih: 'de :koan. 'De :koan: on :no-dih:-a 'de, a :mor 'ye 'o deh.

³⁹:Yee' Sehmeh'la-nyor:⧾ :dhulu' :on :ne-a 'o :gwlor :dao' 'di, on po :Yusu'-a' dhih-' dhih 'jeh, deh no-eh, 'nynor zela-uh-: :gwluhuh', or 'da, :Yusu' zela-or-: deh⧾-a' klehkpeh or no-a :gwluhuh'.

⁴⁰'Do eh-a' dha, :yeh Sehmeh'la-nyor⧾ yi-a 'o :Yusu' bo, :yee' on bale-or', or 'ye 'o on bo 'we 'sororn' zi.

⁴¹'De :gwlor-nyor:⧾ :dhulu' :noo' po or-a' dhih dhih 'jeh-' :ke, 'do deh⧾ or za-a-' 'do ti :dao' bo, en-' dhih bo.

⁴²'De on :wlu 'de 'nynor bo, on 'dae:, :A po or-a' dhih-' dhih 'jeh :naa, eh :se deh :on :za-a-' :due', jorwor: deh⧾ :a-a' 'jeh 'yor-eh 'worn-a or :za-a-'. :Yee' :a yubo-eh' 'jeh ka, :ka or 'dhu-a nyor⧾ 'puh-dih-nyor-' 'do 'bluhba bo.

⁴³:Yeh 'we 'sororn' zi-a, :yee' :Yusu' mu :Galali'i-bluhba ken.

⁴⁴Or-a' 'yor-eh zela-eh ken dih 'weh, :ka Nyorsoa-a' wele-eh: :po-nyor se-a deh-' 'ye-eh 'ble, 'do or-a' 'jeh 'bli 'bluhba ken.

⁴⁵:Yeh or 'si-a :Galali'i-bluhba ken dih, :yee' :Galali'i-nyor⧾ kpon-or-: dih. Deh no-eh, an-a' 'jeh 'yor-eh, on :ne 'o 'Meh-a' :bla-dih: 'dlu dih-gor-' 'weh 'de :Julu'slehn, 'de on 'ye deh⧾-a' klehkpeh or no-a 'do gor :dao' 'weh.

⁴⁶:Yeh or :ne-a 'de :Galali'i-bluhba ken, :yee' or mu 'Kena-gwlor-' de :neheh', 'do :dha or :za-dih:-a 'ni 'glee-nomor-'. :Yee' 'kwi :klaba' :due', or-: :korn 'yu-nyor-kpalu-a: puhba, 'de :Kapa'nior-gwlor 'di.

⁴⁷:Yeh 'kwi :klaba' :dao', or 'worn-ih'-a :ka :Yusu' 'wluh-a :Judi'a-bluhba ken, 'de or 'si-a :Galali'i-bluhba ken dih, :yee' or mu 'de or bo, 'de or bale-or, or 'ye 'de or 'bli 'gbu mu, or 'ye or-a'a: 'yu :or 'bhorn-a 'meh-a', 'puh-dih:.

⁴⁸:Yeh or bale-or, :yee' :Yusu' :wlu-' 'de or bo, or 'dae:, A :mor nyor⧾ :daa, :mor eh 'dhu, a se 'yi :to-dih-deh⧾-: 'dekorn: nyor⧾ 'di dih 'ma-dih-deh⧾-: 'ye, :yee' a :se-' 'an dhih dhih 'jeh-' :po i.

⁴⁹:Yee' 'kwi :klaba' 'da, Nyor :klaba', 'yle, :a 'ye mu, 'de 'an-a: 'yu :ne-' 'meh :blaa'a:.

⁵⁰'De :Yusu' 'da, Mu, :an-a'a: 'yu-a mu 'kmo-' :ne. :Yeh :Yusu' 'da :ao', :yee' or po :Yusu'-a' wlu-' dhih 'jeh, 'de or mu.

⁵¹:Yeh or 'si-a 'o :gwie 'i, :yee' or-a'a: 'bhoi-nynuu :ya 'de tubo-wlu⧾ 'weh, :ka or-a'a: 'yu 'puh-a.

⁵²'De or dhele-uh dih, or 'da, Ti :yihih :eh, or yi or-a' 'jeh bo :eh? 'De on 'da, Ti eh no-a 'yluh-gbao' zama, 'do :wor or-a' :chehbe' 'bor-dih:.

⁵³:Yee' 'yu :baa' :po-dih-eh :gwluhuh' bo 'weh, :ka eh 'dhu-a :dha ti :bleh-dih:-a 'i zama, :Yusu' zela-or :gwluhuh', or no-a, :An-a'a: 'yu-a mu 'kmo-' :ne. :Yeh eh no :ao', :yee' or-: or-a'a: 'gbu-a' klehkpeh-: on po :Yusu'-a' dhih-' dhih 'jeh.

⁵⁴:Yee' 'wluh :Judi'a-bluhba ken, mu :Galali'i-bluhba ken, 'de no nyor⧾ 'yi :to-dih-deh:⧾ :kolu'⧾, eh-a' kpor⧾-a' 'sororn' neh :wor :dhe dih :Yusu' no.