Read Eastern Krahn :Jororn' 5 Bible Online

:Jororn' 5 - Eastern Krahn bible

:Jororn' 5

¹:Yeh ti :zi-dih:-a 'o ken dih, :yee' :Yusu' mu-' :Jueh'-nyor⧾-a' gor[2] :due' 'de :Julu'slehn.

²:Yee' 'de :Julu'slehn: 'do :dha :or 'koan'-dih:-a gba-dih-gba-a' :kpaa' 'worn dih, an 'da-dih-a 'Blae'⧾-a' :kpaa', 'do :wor pehnu :ne, an 'da-dih-a :Behteh'sla, 'de :Hiblu'-wlu 'di. Pehnu: :daa, 'zorn :forn-dih-deh⧾ :mm', me-: 'dleh-uh.

³:Yee' 'do en 'zorn :dao', 'do :wor :nea-nyor⧾-a 'pehn dih, :on 'dhu-a, 'doror'-nyor⧾-: :kloror-nyor⧾-: 'dekorn: 'tiei-a' 'meheh'-nyor⧾-:. [Nyor⧾ :dao', an fuo 'ni 'ken, eh 'ye dih dhile:.

⁴Deh no-eh, 'do kpor :due' :due' 'di, :Gwlor :baa'-a' 'enjor :due', or-: 'yle, :or 'kpa 'o pehnu: :dao' worn, 'de or dhile-uh dih. :Mor or dhile-uh dih, :yee' :zai'-nyor: :or mu-a 'o 'nior 'kpa-:, :yee' or-: mu 'puh-:, puhba-deh⧾-a' :yih or 'ble.]

⁵:Yee' nyor-kpalu :due', :or puhba:-a 'do zon⧾-a' :kwlaa taan 'yor :meheh' na 'di, or-: :ne 'o.

⁶:Yee' :Yusu' 'ye 'yu :dao' 'weh, or 'pehn dih 'do mor. :Yeh or yubo-eh 'i :ka or 'pehn-a dih 'do :dha 'o, 'do ti :dhorno'⧾ 'di, :yee' or dhele-or-: dih, or 'da, :An 'bhorn :on 'ye 'puh :e?

⁷:Yeh or dhele-or dih, :yee' 'yu :dao', or :wlu-', or 'da, Nyor :klaba', ti 'ni dhile-a dih, 'on se nyor 'ble :or 'ye-a' 'on bo 'kpa, 'de 'on 'ye-a' 'o pehnu: :daa worn 'kpa. :Mor 'on :taa vorn, 'on 'ye 'o 'kpa, :yee' nyor :noror' :chehn-dih: 'on nya.

⁸'De :Yusu' 'da, :Sorn-', mu yai'. 'Duo: :an-a'a: ken 'pehn-deh-', :na, :on 'ye mu.

⁹:Yee' 'do :dha :due' :dao', 'yu 'puh-'. 'De or 'duo: or-a'a: ken 'pehn-deh-', or :na, or mu. 'We-eh: deh :daa, eh :no-eh, eh no Nyorsoa-a' :gwlee-we-eh:.

¹⁰Eh-: :korn dhih, 'de :Jueh'-nyor⧾-a' nyor⧾ :na-dih-nyor⧾ :wlu 'de 'yu :or 'puh-a, on 'dae:, 'Zean' no Nyorsoa-a' :gwlee-we-eh:. :Yee' eh se 'o :a-a'a: 'tele'-a' :gwie 'i :ne, :on 'ye :an-a'a: ken 'pehn-deh kwa 'gba, :on 'ye-eh' kpa.

¹¹:Yeh on 'da :ao', :yee' or :wlu-' 'de on bo, or 'dae:, Nyor :or 'puh-dih:-a 'on, or-: zela: 'on :gwluhuh', 'on 'ye 'an-a: ken 'pehn-deh-' 'duo:, 'on 'ye :na, 'on 'ye mu.

¹²'De on dhele-or dih, on 'da, 'Yu :or zela:-a :on :gwluhuh', :or no-a, 'Duo: :an-a'a: ken 'pehn-deh-', :na, :on 'ye mu, or-a' 'nyne :eh?

¹³Jorwor: or se nyor :or 'puh-dih-or yubo:. Deh no-eh, :Yusu' 'kpa 'de :gwlor-nyor:⧾ :dhulu' :ne-a 'o 'nyne-' 'weh.

¹⁴:Yeh ti-kpor-bei :zi-dih:-a 'o ken dih, :yee' :Yusu' 'ye-or' 'do Nyorsoa-a' 'sla ybei'. 'De or :wlu 'de or bo, or 'dae:, :Gbee'e:. :Ka :on 'puh-a :naa, :yee' 'bor deh⧾-zon⧾-a' no-a', 'de deh-zon: :klaba' :neheh', :eh :zi-a 'o :zai' neh-', eh :ne 'o :on bo yi o.

¹⁵:Yeh or 'da :ao', :yee' 'yu :dao', or mu-', 'de or zela: :Jueh'-nyor⧾-a' nyor⧾ :na-dih-nyor⧾ :gwluhuh', :ka eh 'dhu-a :Yusu'-' :or 'puh-dih-or.

¹⁶:Yee' deh :Yusu'-a no-a deh⧾ :daa 'do Nyorsoa-a' :gwlee-we-eh 'di, eh-: :korn dhih an 'ye-dih-or 'kle.

¹⁷Jorwor: :Yusu' zela-uh-: :gwluhuh', or 'dae:, 'On-ba :ne 'o :koan 'i 'weh, 'de eh yeh-dih 'we-eh: :daa ken. 'De 'an 'jeh :ke, 'on :korn 'on 'ye :koan no :ke.

¹⁸:Yeh :Yusu' :za-a deh :daa-', :yee' eh-: no-eh, 'de an vorn 'gabaa, :eh :zi 'o :zai' neh-', on 'ye-or' 'dba. Eh :se deh or wa-a Nyorsoa-a' :gwlee-we-eh-a' 'tele'-a' dhih :due', jorwor: or 'da-dih Nyorsoa or :Baa' :ke. :Mor or :taa :ao' no, :yee' on 'da or po-dih or-a' 'jeh Nyorsoa 'i.

¹⁹:Yee' :Yusu' :wlu-' 'de on bo, or 'da, Dhih 'jeh, 'an zela a :gwluhuh', 'mor :or 'dhu-a Nyorsoa-a' 'Yu-', 'on se 'beh-dih: 'on 'ye deh no, 'de 'an 'jeh-a' 'kpih 'di. Deh 'on 'ye-a 'On-ba-a no-a, eh-: 'o, 'an no. Deh no-eh, deh 'On-ba-a no-a, eh-: 'an no :ke.

²⁰'On-ba :ybeh 'on-' 'weh, 'de or torne 'on deh⧾-a' klehkpeh or-a' 'jeh 'yor-eh no-a. Keen', or mu 'on deh⧾ :klaba'⧾ :nee' :torne:, en 'ye 'o :yih :daa :zi, 'de a-a' :porluh⧾ 'ye 'ma.

²¹:Yee' :ka 'On-ba-a no-a, 'de or 'duo:-a 'meheh'-nyor⧾ ya-', 'de or 'nyi-uh-a :febeh', 'ka-: 'an no :ke. Nyor 'an 'bhorn-a 'on 'ye-a :febeh' 'nyi, or-: 'an 'nyi :febeh'.

²²Eh :se eh :due', jorwor: 'On-ba-a' 'worn, or-a' zi nyor-a' zabe. Jorwor: zabe: :zi-eh-a' klehkpeh, or po-eh' 'de 'on 'kwa,

²³'de nyor⧾-a' klehkpeh 'ye 'o 'on 'dhu, :ka an no-a 'o or-a' 'dhu-a' :ke. Nyor :or se-a 'o 'on 'dhu, :yee' nyor :dao', or :se 'o 'On-ba: :or no-a Nyorsoa :or dbo-a 'on, 'dhu :ke.

²⁴Dhih 'jeh, 'an zela a :gwluhuh', nyor :or 'worn-a 'an wlu, 'de :or po-a Nyorsoa :or dbo-a 'on, or-a' dhih dhih 'jeh-', :yee' nyor :dao', or 'ble 'kmo :sie: :febeh'. Nyorsoa-a' zabe :se-or' :kpon i. Deh no-eh, or 'wluh 'de 'meh-a' 'kpih 'zorn, 'de or 'dhu 'kmo :ne-eh glu :naa.

²⁵Dhih 'jeh, 'an zela a :gwluhuh', ti-a mu 'o :nyni, 'de en nyni 'o 'weh :naa, nyor⧾ :on deh⧾-zon⧾ 'yi-dih-a-' dih, :eh gweh-a :ka nyor⧾ 'meh-a, mo-: :an mu 'mor :or 'dhu-a Nyorsoa-a' 'Yu-', 'an wlu 'worn-:. :Yee' :yuh :on 'worn-a deh 'on :za-a-' dih deh 'jeh, mo-: :an mu 'kmo :sie: :febeh' 'ble-:.

²⁶:Ka 'kmo :sie: :febeh' 'wluh-a 'de 'On-ba bo, 'ka-: 'On-ba no, or 'nyi-eh 'on, 'de 'kmo :sie: :febeh' 'wluh 'de 'on bo :ke.

²⁷Or 'nyi 'on 'kpih 'weh :ke, 'on 'ye nyor⧾-a' zabe zi. Deh no-eh, 'on no 'yu an 'da-dih-a Nyor-kpalu-a' 'yu.

²⁸Eh-a' 'ma-dih:-' a-a' :porluh⧾. Deh no-eh, ti-a mu 'o :nyni, :en nyor⧾-a' klehkpeh :on :ne-a 'de nma-dih-deh⧾ 'di, an mu-a 'an wlu 'worn-:,

²⁹'de on 'ye 'de nma-dih-deh⧾ 'di 'wluh. Nyor⧾ :yuh :on no-a deh⧾ 'jeh ne, an mu-' :sorn, on 'ye 'kmo :ne, :ka ti-a mu-a 'dlu-' :tehn. :Yee' nyor⧾ :yuh :on no-a deh⧾-zon⧾, an mu-' :sorn :ke, 'de Nyorsoa-a' zabe 'ye-uh' kpon, 'de on 'ye gbe :zie:.

³⁰Jorwor: 'on se 'beh-dih: 'on 'ye deh no, 'de 'an 'jeh-a' 'kpih 'di. :Mor 'On-ba zela: 'on :gwluhuh', 'on 'ye zabe zi, 'de 'an zi-ih. 'Do eh-a' dha, 'an zabe: :zi-eh 'sleh-: 'i. Deh no-eh, 'an-a' 'worn, 'an-a' 'pehn-dih: 'an 'jeh-a' :porluh dih. Jorwor: nyor :or dbo-a 'on, or-: :korn :porluh: 'an 'pehn-dih dih.

³¹:Yee' :Yusu'-a kpa or-a' wlu 'dlu bo, or 'dae:, :Mor eh 'dhu, 'on zela: 'an 'jeh-a' dhih ken dih, :yee' dhih 'an zela-a ken dih, en se deh-' 'dhu-eh:.

³²Jorwor: Nyorsoa, or-: zela 'an dhih ken dih. :Yee' 'on yubo-eh', 'an dhih or zela-a ken dih, en no dhih-a' 'yor-eh:.

³³A :mor :Jueh'-nyor:⧾, a dbo nyor⧾ 'de :Jororn' bo, 'de or zela: 'an dhih ken dih 'de on bo, 'de deh or zela:-a ken dih, en no dhih-a' 'yor-eh:.

³⁴Eh :se :gwlor-nyor:, or-: :korn or 'ye 'an dhih ken dih zela: :deh. Jorwor: 'on :ya-dih-eh 'o 'weh 'suh, a 'ye 'puh :dhih 'o.

³⁵:Jororn', or-: no 'nape :eh wan-a, 'de :eh 'nyi-a nyor⧾ zorn-pli. 'De a 'worn-dih-eh ken dih, a 'ye 'mona no, 'de or-a' zorn-pli-' 'do ti-kpor-bei 'di.

³⁶Jorwor: 'on 'ble dhih ken dih zela-deh: :klaba' :eh :zi-a 'o :Jororn' neh-'. Deh no-eh, :koan-a' 'jeh 'On-ba 'nyi-a 'on, 'on 'ye-a 'i gweh, 'de 'an no-a :naa, or-: zela: 'an dhih ken dih, :ka 'On-ba dbo-a 'on.

³⁷'De 'On-ba: :or dbo-a 'on, or-a' 'jeh 'yor-eh zela: 'an dhih ken dih 'weh. A 'see or-a' wlu 'worn, 'de mor a 'see or-a' 'yuba 'ye,

³⁸'de mor or-a' tubo-wlu⧾ se :dhe-da :korn 'de a 'di. Deh no-eh, a :se-' 'mor or dbo-a, 'an dhih dhih 'jeh-' po.

³⁹A 'chean' Nyorsoa-a' 'chlee-deh 'weh, 'de a yubo-eh 'gabaa. Deh no-eh, :mor a :taa 'ye, :yee' a 'da, eh-: mu a 'kmo :sie: :febeh' 'nyi-:. Nyorsoa-a' 'chlee-deh: :daa, eh-: zela 'an dhih ken dih.

⁴⁰Jorwor: a :se-' 'worn, a 'ye 'noror 'on bo yi, 'de a 'ye 'kmo :sie: :febeh' 'ble.

⁴¹Eh :se :gwlor-nyor⧾-a' nyor⧾ dhih bo :po-eh:, 'on :se-' 'bhorn.

⁴²'De mor 'on yubo: a 'weh, a se Nyorsoa-a' :ybeh-eh 'ble 'de a-a' :porluh⧾ ken.

⁴³'On yi-: 'de, 'de 'On-ba-a' 'kpih 'di, 'de a :se 'on dih kpon. Jorwor: :mor nyor :noror' 'yle, 'de or-a' 'jeh 'yor-eh-a' 'kpih 'di, :yee' or-: a kpon dih.

⁴⁴Po :on 'be dhih bo, 'de :on 'be 'ye :on dhih bo po, eh-: :korn a 'ton 'de a 'nyne-'. Jorwor: a-a' 'worn, a-a' po 'de 'kpih, 'de a 'ye-eh' no, 'de Nyorsoa :or :ne-a :due' 'klein', or 'ye a dhih bo po. :Yee' :kaa a 'beh-dih: a 'ye 'an dhih 'jeh-' :po-eh no :eh?

⁴⁵Jorwor: a-a' :na-dih-eh' :gwluhuh' dih, :eh :mor 'an mu a-a' kuna' :kpa 'de 'On-ba bo :deh. Jorwor: :Mose', a dhe-a :gwlii', or-: mu a-a' kuna' :kpa.

⁴⁶:Mor a po dhih :Mose' :za-a-' dhih 'jeh-' :dee', :yee' a mu 'on dhih 'jeh-' :po :ke. Deh no-eh, 'an dhih :oo', or 'chle.

⁴⁷Jorwor: :ka a se-a deh⧾ or 'chle-a dhih 'jeh-' po, :yee' :kaa a mu deh⧾ 'an za-a-', en-' dhih 'jeh-' :po-eh no :eh?